ធនាគារពិភពលោក (World Bank) បានអនុម័តថវិកាបន្ថែមចំនួន ៧៩,៥ លានដុល្លារ ដើម្បីបង្កើនគុណភាព និងលទ្ធភាពទទួលបានការអប់រំនៅកម្ពុជា។ មូលនិធិនេះនឹងពង្រីកសកម្មភាពគម្រោងទៅកាន់សាលារៀនជាង ១៥០០ នៅទូទាំងប្រទេស ដោយផ្តោតលើការផ្តល់លទ្ធភាពទទួលបានការអប់រំដល់កុមារដែលជួបការលំបាក គ្រួសារក្រីក្រ និងជនមានពិការភាព។
យោងតាមធនាគារពិភពលោកកាលពីថ្ងៃសុក្របានឲ្យដឹងថា ហិរញ្ញប្បទាននេះនឹងគ្របដណ្តប់លើសកម្មភាពនៅក្នុងកម្រិតសាលាមធ្យមសិក្សាចំនួន ៥០០ សាលាបឋមសិក្សាចំនួន ១០០០ និងសាលាមត្តេយ្យចំនួន ៩០ ។ សកម្មភាពទាំងនេះរួមមានការបណ្ដុះបណ្ដាល និងឱកាសអភិវឌ្ឍន៍វិជ្ជាជីវៈសម្រាប់គ្រូបង្រៀន បច្ចេកវិទ្យាអប់រំសាកល្បង ការធ្វើទំនើបកម្មសៀវភៅសិក្សា រួមទាំងការសាងសង់ និងជួសជុលថ្នាក់រៀនបន្ថែមទៀត។
លោក ប៊ូ សារឿន មន្ត្រីទំនាក់ទំនងព័ត៌មានរបស់ធនាគារពិភពលោកប្រចាំកម្ពុជា បានមានប្រសាសន៍ថា មូលនិធិនេះរួមមានឥណទានចំនួន ៦០ លានដុល្លារបានពីសមាគមអភិវឌ្ឍន៍អន្តរជាតិ និងថវិកាចំនួន ១៩,៥ លានដុល្លារផ្សេងទៀត ទទួលបានពីភាពជាដៃគូសកលសម្រាប់ការអប់រំ។
កាលពីខែមករា ឆ្នាំ ២០២២ ធនាគារពិភពលោកបានផ្តល់ថវិកាចំនួន ៦៩,៣ លានដុល្លារ សម្រាប់គម្រោងកែលម្អការអប់រំទូទៅនៅកម្ពុជា។ ខណៈមូលនិធិបន្ថែមនឹងពង្រីកគម្រោងនេះឱ្យដំណើរការទៅមុខកាន់តែល្អប្រសើរ។
លោក សារឿន បានមានប្រសាសន៍ថា ដោយសារតម្រូវការខ្ពស់ក្នុងវិស័យអប់រំ ធនាគារពិភពលោក «បានបន្ថែមថវិកា […] ដើម្បីឲ្យរដ្ឋាភិបាលអាចពង្រីក [សកម្មភាព] ដល់សាលារៀនបានច្រើនជាងមុន»។
នាយកប្រចាំប្រទេសរបស់ធនាគារពិភពលោក ប្រចាំប្រទេសកម្ពុជា លោកស្រី ម៉ារីយ៉ាម សាលីម (Maryam Salim) មានប្រសាសន៍ថា កិច្ចខិតខំប្រឹងប្រែងត្រូវបានធ្វើឡើងដោយរដ្ឋាភិបាលក្នុងរយៈពេលពីរទសវត្សរ៍ចុងក្រោយនេះ ដើម្បីពង្រីកលទ្ធភាពទទួលបានការអប់រំ ប៉ុន្តែលទ្ធផលទទួលបាននៅមានកម្រិតទាប និងលទ្ធភាពទទួលបានការអប់រំប្រកបដោយគុណភាព នៅតែជាបញ្ហាប្រឈមដ៏សំខាន់។
លោកស្រីនិយាយបន្ថែមទៀតថា៖ «ការផ្តល់ហិរញ្ញប្បទានបន្ថែមនេះគឺដើម្បីពង្រឹងថែមទៀតនូវកិច្ចខិតខំប្រឹងប្រែងដើម្បីដោះស្រាយភាពក្រីក្រក្នុងការសិក្សា និងកសាងមូលធនមនុស្សដែលចាំបាច់សម្រាប់ការលូតលាស់នៃសេដ្ឋកិច្ច និងការអភិវឌ្ឍរបស់ប្រទេសកម្ពុជា»។
លោក ប៉ា ចាន់រឿន ប្រធានវិទ្យាស្ថានកម្ពុជាដើម្បីប្រជាធិបតេយ្យ បានលើកឡើងថា វិស័យអប់រំនៅកម្ពុជាត្រូវការការអភិវឌ្ឍបន្ថែមទៀតដោយលើកឡើងពីរបាយការណ៍វាយតម្លៃលើលទ្ធផលនៃកំណែទម្រង់វិស័យអប់រំរបស់ធនាគារពិភពលោកនៅដើមឆ្នាំនេះ។
លោក ចាន់រឿន បានប្រាប់ខេមបូចាថា៖«ដូច្នេះ កម្ចីនេះនឹងអាចចូលរួមចំណែកនៅក្នុងការពង្រឹងក៏ដូចជាអភិវឌ្ឍវិស័យអប់រំនៅក្នុងប្រទេសកម្ពុជាយើងបានមួយកម្រិត ។ ប៉ុន្តែទោះជាយ៉ាងណា បើយោងតាមរបាយការណ៍របស់ធនាគារពិភពលោកហ្នឹងបញ្ជាក់ថា កម្ពុជាកន្លងមកចាយលើវិស័យអប់រំច្រើន ប៉ុន្តែទទួលបានលទ្ធផលតិច» ដោយលោកបានបន្ថែមថា រដ្ឋាភិបាលគួរតែយកចិត្តទុកដាក់ចំណាយប្រាក់កម្ចីនេះឱ្យបានត្រឹមត្រូវ។
ប្រធានសមាគមគ្រូបង្រៀនឯករាជ្យកម្ពុជា លោកស្រី អ៊ុក ឆាយាវី មានប្រសាសន៍ថា ប្រាក់កម្ចីរបស់ធនាគារពិភពលោក «មិនមានប្រសិទ្ធភាពខ្លាំងទេ» ព្រោះវា «មិនត្រូវបានប្រើប្រាស់សម្រាប់គោលបំណងជាក់ស្តែងនោះទេ ប៉ុន្តែលើអ្វីដែលមិនសូវសំខាន់»។
លោកស្រីបានបន្ថែមថា៖ «ចង់ឱ្យអាលុយកម្ចីប្រព័ន្ធអប់រំហ្នឹងធ្វើម៉េចឱ្យអ្នកដែលទទួល [ផលប្រយោជន៍] គឺសិក្សានុសិស្សពិតប្រាកដ»។
លោក ស្មាន សំកុ នាយកសាលាបឋមសិក្សាគោកធ្លក ក្នុងខេត្តបន្ទាយមានជ័យ បានប្រាប់ខេមបូចាថា ប្រាក់កម្ចីរបស់ធនាគារពិភពលោកគឺល្អ ដោយសារសាលារបស់លោកទទួលបានសម្ភារៈសិក្សា ដូចជាសៀវភៅ និងប៊ិចជាដើម។ ទន្ទឹមនឹងនោះ ក៏មានការលំបាកខ្លះៗផងដែរ ដោយសារថ្នាក់នីមួយៗមានសិស្សច្រើន ដែលធ្វើឲ្យការយកចិត្តទុកដាក់របស់គ្រូបង្រៀនលើពួកគេមានកម្រិត។
លោក សំកុ ដែលបង្រៀនថ្នាក់ទី៣ និងទី៤ បាននិយាយថា៖ «បាទព្រោះនែសិស្សច្រើនទៅ គ្រូមិនអាចផ្តល់ការយកចិត្តទុកដាក់ពេញលេញនោះទេ […] យកចិត្តទុកដាក់ដែរតែវាច្រើន បើយើងបង្រៀន [យឺតៗម្តងម្នាក់] មិនអាចចប់កម្មវិធីសិក្សា»។
លោកស្រី ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា មិនអាចទាក់ទងសុំការអត្ថាធិប្បាយបានទេ ៕
ប្រែសម្រួលពីអត្ថបទភាសាអង់គ្លេស៖ World Bank Extends $79.5M to Improve Education Quality And Access in Cambodia
