សមាគមសម្ព័ន្ធអ្នកសារព័ត៌មានកម្ពុជា

ទឹកជំនន់កម្រិតធ្ងន់បង្ខំឲ្យប្រជាពលរដ្ឋមួយចំនួនក្នុងខណ្ឌដង្កោត្រូវចាកចេញពីផ្ទះ

ប្រជាពលរដ្ឋកំពុងជញ្ជូនអីវ៉ាន់ចេញពីផ្ទះដែលជន់លិចដោយទឹកជំនន់ក្នុងសង្កាត់គង់នយ ខណ្ឌដង្កោ រាជធានីភ្នំពេញ ថ្ងៃទី២៦ ខែតុលា ឆ្នាំ២០២១។ ខេមបូចា/បញ្ញា ឆព័ណ្ណ
ប្រជាពលរដ្ឋកំពុងជញ្ជូនអីវ៉ាន់ចេញពីផ្ទះដែលជន់លិចដោយទឹកជំនន់ក្នុងសង្កាត់គង់នយ ខណ្ឌដង្កោ រាជធានីភ្នំពេញ ថ្ងៃទី២៦ ខែតុលា ឆ្នាំ២០២១។ ខេមបូចា/បញ្ញា ឆព័ណ្ណ

ប្រជាពល​រដ្ឋ​ជា​ច្រើន​គ្រួសារ​រស់​នៅ​ខណ្ឌ​ដង្កោ ត្រូវ​បង្ខំ​ចិត្ត​ចាក​ចេញ​ពី​ផ្ទះ​បន្ទាប់ពី​ទឹក​ស្ទឹង​ព្រែក​ត្នោត​បាន​ហក់ឡើង​ខ្ពស់។ អាជ្ញាធរ​ក៏​បាន​ឲ្យ​ដឹង​ដែរ​ថា​ទំនប់​៧មករា នៅ​ភាគ​ខាង​ត្បូង​រាជធានី​ភ្នំពេញ ក៏​មាន​លេច​ធ្លាយ​បន្ទាប់​​ពីរង​ការ​​​ខូច​ខាត​ដោយសារ​​ភ្លៀង​ធ្លាក់ខ្លាំង​។​​

បើ​តាម​សេចក្ដី​ជូន​​ដំណឹង​ពី​ស្ថាន​ភាព​អាសន្ន​លើ​បញ្ហា​​ទឹក​ជំនន់​របស់​មន្ទីរ​សាធារណការ​ និង​ដឹក​ជញ្ជូន​នៅ​ថ្ងៃទី២៧ ខែ​តុលា បានឲ្យដឹងថាប្រ​ជា​ពល​រដ្ឋ​នៅ​សង្កាត់​គង់នយ ទៀន ស្ពានថ្ម ព្រែក​កំពឹស និង​រលួស ក្នុង​ខណ្ឌ​ដង្កោ ត្រូវ​អាជ្ញាធរ​ស្នើ​ឲ្យ​ជម្លៀស​ចេញ​ពី​លំនៅ​ដ្ឋាន និង​ស្វែង​រក​កន្លែង​សុវត្ថិ​ភាព​បន្ទាន់​។​

លោក វី​ ជីម វ័យ​ ៦៦​ឆ្នាំ រស់​នៅ​ភូមិ​សេរីសម្បត្តិ ក្នុង​សង្កាត់​គង់នយ បាន​ចាក​ចេញពី​ផ្ទះ​បន្ទាប់ពី​​ទឹក​ជំនន់​មក​ដល់​។ លោក ជីម ឲ្យ​ដឹង​ថាទឹក​ចាប់​ផ្ដើម​ឡើង​អំឡុង​ថ្ងៃទី​២០ ខែតុលា បង្ខំ​ឲ្យ​លោក​ត្រូវ​ស្វែង​រក​កន្លែង​ស្នាក់​នៅ​ផ្សេង បន្ទាប់​ពី​ទឹក​បាន​ជន់​លិច​ផ្ទះ​លោក​ជាង​​បួន​ម៉ែត្រ។​

លោក​បន្ថែម​ថា៖ «​ឆ្នាំ​នេះ​ទឹក​ឡើង​លឿន ធ្វើ​ឲ្យ​យើង​ពិបាក​យក​អីវ៉ាន់​ចេញ​បាន​ទាន់​ពេល…​សម្លៀក​បំពាក់ គ្រែ សាឡុង ក៏ដូច​ជា​សត្វ​ចិញ្ចឹម​ត្រូវ​ទុក​ចោល យើង​គ្រាន់​តែអាច​យក​រួច​ខ្លួន​ពេល​ទឹក​កំពុង​ឡើង»។​

វា​ជារឿង​ពិបាក​មួយ​ដែល​លោកត្រូវ​​មក​រស់​នៅ​លើទីតាំង​បណ្ដោះ​អាសន្ន​មួយ គ្មាន​ទាំង​ទឹក​ស្អាត ឬ​បង្គន់​អនាម័យ តែ​លោកថា​គ្មាន​ជម្រើសផ្សេង​ទេ ខណៈ​ទឹក​កំពុង​តែ​បន្ត​ឡើង​។​

អ្នកស្រី គុណ សោភា វ័យ​ ៣០​ឆ្នាំ រស់​នៅ​តាម​បណ្ដោយ​ស្ទឹង​ព្រែក​ជ្រៃ ក្នុង​ខណ្ឌ​ដង្កោ​។ ក្នុង​រយៈ​ពេល​ប៉ុន្មាន​ថ្ងៃ​នេះ អ្នក​ស្រី​ថា ទឹក​បាន​លិចជុំ​វិញ​ផ្ទះ​អស់​ហើយ​។

អ្នកស្រី​លើក​ឡើង​ថា៖ «​វា​ជា​ការ​លំបាក​មួយ​សម្រាប់​យើង​ក្នុង​ការ​រស់​នៅ ខណៈ​ទឹក​នៅ​តែ​បន្ត​ឡើង» ដោយបន្ថែមថា៖ «​ផ្ទះ​របស់​ខ្ញុំ​ឥឡូវនេះទឹកព័ន្ធជុំ​វិញ​អស់​ហើយ។ វាពិបាក គ្មាន​បង្គន់​ប្រើ​ប្រាស់ ព្រោះ​ទឹក​លិច​អស់​ហើយ។ អ្វី​ដែល​សំខាន់ជាង​នេះ ខ្ញុំ​បារម្ភ​សត្វមានពិស និង​សុវត្ថិ​ភាព​កូនៗ​ទាំង​ពីរ​របស់​ខ្ញុំ ពួកគេ​អាយុ​មិន​ទាន់​បាន​ប្រាំ​ឆ្នាំ​ផង»។​

អ្នកស្រី​បន្ត​ថា៖ «ខ្ញុំ​កំពុង​រស់​នៅ​ដោយ​ពិបាក​ចិត្ត ហើយ​ខ្ញុំ​ចង់​ផ្លាស់ទៅរស់​នៅ​កន្លែង​ផ្សេង​មួយរយៈ​ទម្រាំ​​អ្វីៗ​វិល​មក​រក​សភាព​ដើម​វិញ…​ប៉ុន្តែដោយសារតែមិនមាន​ប្រាក់ ខ្ញុំ​មិន​អាច​ទៅ​ណាបាន ខ្ញុំ​ត្រូវ​រស់​នៅ​ទី​នេះ​បន្ត​ទៀត​»។​

ប្រ​ជា​ពល​រដ្ឋកំពុង​ជញ្ជូន​អីវ៉ាន់​ចេញ​ពី​ផ្ទះ​ដែល​ជន់​លិច​ដោយ​ទឹក​ជំនន់​ក្នុងសង្កាត់គង់នយ ​ខណ្ឌ​ដង្កោ រាជធានីភ្នំពេញ ថ្ងៃទី​២៦ ខែ​តុលា ឆ្នាំ២០២១។ ខេមបូចា/បញ្ញា ឆព័ណ្ណ​

អ្នកស្រី​ ភូម អឿន វ័យ​ ៥៩​ឆ្នាំ រស់​នៅ​ជិត​ស្ពាន​ព្រែកជ្រៃ ក្នុង​សង្កាត់​ស្ពាន​ថ្ម ឲ្យ​ដឹង​ដែរ​ថា អ្នក​ស្រី​បារម្ភ​ថា​ផ្ទះ​នឹង​អាច​ដួល​រលំ បើ​សិន​ជា​ទឹក​នៅ​តែ​បន្ត​ឡើង​ថែម​ទៀត​។

អ្នកស្រីបន្ថែម​ថា៖ «​វា​ជា​កង្វល់​ធំ​បំផុតសម្រាប់​ខ្ញុំ​បើ​ទឹក​នៅ​តែ​បន្ត​ឡើង…​ខ្ញុំ​បារម្ភ​ថា​វាអាច​ធ្វើ​ឲ្យ​រលំ​ផ្ទះ​ខ្ញុំ ព្រោះ​វា​នៅ​ជិត​ស្ទឹង​»។​

ចៅ​សង្កាត់​​គង់នយ លោក អ៊ុន សុខរុំ ប្រាប់​ខេមបូចា ថា​ប្រជា​ពល​រដ្ឋ​សរុប​ ៤៧៣​គ្រួសារ ឬ​ស្មើ​នឹង​មនុស្ស​ ២ ១៦២​នាក់ បានរង​ផល​ប៉ះ​ពាល់​ដោយសារ​ទឹក​ជំនន់​ គិត​ត្រឹម​ថ្ងៃទី​២៦ ខែតុលា​។​​

លោក​ឲ្យ​ដឹង​ទៀត​ថា ភូមិធំៗ​ចំនួន​បួន​ក្នុង​សង្កាត់​នេះ​បាន​រងការជន់លិចដោយសារទឹកជំនន់ ក្នុង​នោះ​ប្រជា​ពល​រដ្ឋ​ចំនួន​ ១១​គ្រួសារ​ត្រូវ​ជម្លៀសទៅ​កាន់ទីទួល​សុវត្ថិ​ភាព​។​​

លោក​បន្ថែម​ថា៖ «​ប្រជា​ពល​រដ្ឋ​ទាំងនេះ​តែង​តែ​រងគ្រោះ​ដោយ​សារ​ទឹក​ជំនន់ ព្រោះទីតាំង​នៅ​ជិត​ស្ទឹង​ព្រែកត្នោត…​ក្នុង​ប៉ុន្មាន​ឆ្នាំ​ចុង​ក្រោយ​នេះ យើង​រង​ផល​ប៉ះពាល់​ខ្លាំង ហើយ​ឆ្នាំ​នេះ​ទឹក​ហាក់​ដូច​ជា​ហក់​ឡើង​ខ្លាំង​ជាង​រាល់ដង និង​អាច​បង្ក​ការ​លំបាក​ច្រើន​ដល់​ប្រជាពលរដ្ឋ​រស់​នៅទី​នេះ»។​

លោកសុខរុំ ​ឲ្យ​ដឹង​ទៀត​ថា ក្នុង​ចំណោម​ប្រជា​ពល​រដ្ឋ​ ៤៧៣គ្រួសារដែល​រង​ផល​ប៉ះ​ពាល់ មាន​ប្រហែល​ ២០០គ្រួសារទំនងជា​រងការប៉ះពាល់ខ្លាំង​ជាងគេដោយ​សារទឹក​ជំនន់ និង​មាន​ដីស្រែ​៩៧០​ហិកតា​ត្រូវ​ជន់​លិច។​

អ្នក​នាំពាក្យ​សាលារាជធានី​ភ្នំពេញ លោក ម៉េត មាសភក្ដី ប្រាប់​ខេមបូចា ថា​ដោយសារតែ​មាន​លេច​ធ្លាយ​នៅ​ទំនប់​៧មករា បានធ្វើឲ្យសង្កាត់​ទៀន និង​ស្ពានថ្ម រងផល​ប៉ះពាល់​ធ្ងន់​ធ្ងរ​ដោយ​សារ​ទឹក​ជំនន់​។​

លោក​បន្ថែមថា៖ «ដោយសារតែមានការ​លេច​ធ្លាយ​ទំនប់​៧​មករា កាល​ពី​យប់​មិញ [ថ្ងៃពុធ] ទឹក​បាន​ហូរ​ធ្លាក់​ទៅ​យ៉ាង​ខ្លាំង និង​បាន​ជន់​លិច​ផ្ទះ​ប្រជា​ពល​រដ្ឋ​នៅ​តាម​បណ្តោយ​មាត់​ស្ទឹង ជាពិសេស​នៅ​សង្កាត់​ស្ពានថ្ម និង​សង្កាត់​ទៀន​»។​

ចាប់​ពី​ថ្ងៃទី​​២៥ ខែតុលា មក​ អាជ្ញាធរ​បាន​សម្រេច​ចិត្ត​បិទ​ចរាចរណ៍​រថយន្តធន់​ធំជាបណ្ដោះ​អាសន្ន​លើ​ផ្លូវ​លេខ​២០អា និង​លេខ​១០៤ ពី​រង្វង់​មូលកួរ​ស្រូវ ទៅ​ដល់​ផ្សារ​កន្ទួត ដោយសារតែ​កម្រិត​ទឹក​ឡើង​ខ្ពស់។​

លោក មាស​ភក្ដី ឲ្យ​ដឹង​ទៀត​ថា៖ «វា​ពិតជាគួរ​ឲ្យ​បារម្ភ ពីព្រោះវា​ជា​គ្រោះ​ធម្មជាតិ យើង​មិន​អាច​វាយ​តម្លៃ​ផល​ប៉ះពាល់​បាន​១០០​ភាគ​ទេ…​យើង​បាន​ព្យាយាម​ទប់ស្កាត់ និង​ដោះ​ស្រាយដោយ​បេះដូង​សម្រាប់​ប្រ​ជាពល​រដ្ឋ។ យើង​នៅ​បន្ត​តាម​ដាន ពី​ការ​លេច​ធ្លាយ​ទំបន់​នេះដែរ»។​

ក្រុម​មន្ត្រី​យោធា​កំពុង​ច្រក​ខ្សាច់ និងដី​ដាក់​ក្នុង​បាវ យក​ដាក់​លើ​ផ្លូវ​ដើម្បី​ទប់​ទឹក​ជំនន់​ក្នុង​សង្កាត់​គង់នយ ខណ្ឌ​ដង្កោ រាជធានី​ភ្នំពេញ ថ្ងៃទី​២៦ ខែតុលា ឆ្នាំ២០២១។ ខេមបូចា/ បញ្ញា ឆព័ណ្ណ​

អភិបាល​ខេត្ត​កំពង់​ស្ពឺ លោក វ៉ី សំណាង មាន​ប្រសាសន៍​ថា ដោយសារ​គ្មាន​ភ្លៀង​ធ្លាក់​​ទឹក​ស្ទឹង​ព្រែក​ត្នោត​បាន​ស្រក​ចុះ​២​សង់ទីម៉ែត្រ ​ធៀបទៅ​នឹង​ម្សិល​មិញ​។ បើ​សិនជា​គ្មាន​ព្យុះ​ទៀតទេ លោក​ថា ស្ថាន​ភាព​នឹង​វិល​ទៅ​រក​ភាព​ប្រក្រតី​​ឆាប់ៗ​វិញ​។​

លោកមានប្រសាសន៍​ថា៖ «ទឹក​ជំនន់​បាន​បំផ្លាញ​ស្រូវ​អស់​៤៥​ហិកតា ផ្លូវ​ ១៤​ខ្សែ​រង​កាត​ខូច​ខាត​ដោយ​កន្លែង និងប្រ​ជាពល​រដ្ឋ​រស់​នៅ​តាម​បណ្ដោយ​ដងស្ទឹង ជា​ពិសេស​មនុស្សចាស់ និង​កូន​ក្មេង​[រងផលប៉ះពាល់]»។​

លោក សន ជ័យ ជា​ប្រធាន​​អង្គការ​​សម្ព័ន្ធ​​គណនេយ្យ​​ភាព​​សង្គម​​កម្ពុជា​ បាន​ប្រាប់​ខេមបូ​ចា ថា​ទឹក​ជំនន់​អាច​បង្ក​ការ​ខូច​ខាត​រយៈពេល​វែង និង​ខ្លី​។ លោក​បន្ថែម​ថា បើ​សិនជា​មិន​មាន​ដំណោះ​ស្រាយ​ឲ្យ​មាន​ប្រសិទ្ធភាពលើ​បញ្ហា​ទឹក​ជំនន់​ទេ សុវត្ថិ​ភាព​ប្រ​ជា​ពល​រដ្ឋ និង​ទ្រព្យសម្បត្តិ​នឹង​រងហានិភ័យ​ខ្ពស់។​​

លោក​មានប្រសាសន៍​ថា៖ «តាម​គំនិត​ផ្ទាល់​ខ្លួន​ខ្ញុំ ​ភាគី​ផ្សេងៗ​រួម​ទាំង​រដ្ឋាភិបាល វិស័យ​ឯកជន និង​អង្គការ​សង្គម​ស៊ីវិល គួរ​តែ​រួម​គ្នា​ផ្ដល់​ជំនួយ​បន្ទាន់​សម្រាប់​អ្នក​ដែល​រង​ផល​ប៉ះពាល់​ក្នុង​គ្រោះ​ទឹក​ជំនន់​នេះ»

ប្រែសម្រួលពីអត្ថបទភាសាអង់គ្លេស៖ Worsening floods drive Dangkor residents from their homes

175 views
ព័ត៌មានថ្មីៗ »
អត្ថបទពេញនិយម »