ប្រជាពលរដ្ឋរស់នៅសង្កាត់សាលាកំរើក ក្រុងសៀមរាប ខេត្តសៀមរាប ប្តេជ្ញារួមគ្នាទប់ស្កាត់ និងលុបបំបាត់គ្រឿងញៀន ពីព្រោះវាបានបំផ្លាញការសិក្សា និងភាពស្រស់ថ្លារបស់យុវវ័យ ព្រមទាំងបង្កឲ្យមានអំពើហិង្សា និងឧក្រិដ្ឋកម្ម ដែលធ្វើឲ្យប៉ះពាល់ដល់សង្គមជាតិធ្ងន់ធ្ងរ។
យុវជនឈ្មោះ រ៉ូហ្សីង ជាប្រជាពលរដ្ឋរស់នៅសង្កាត់សាលាកំរើក ក្រុងសៀមរាបបានឲ្យដឹងថា ស្ទើរតែរៀងរាល់ថ្ងៃ គេតែងឃើញនៅតាមសារព័ត៌មានក្នុងស្រុករាយការណ៍ពីការប្រើហិង្សា និងការសម្លាប់មនុស្សក្រោមឥទ្ធិពលគ្រឿងញៀនជាញឹកញាប់។
ប្រភពដដែលបានឲ្យដឹងទៀតថា៖ «គ្រឿងញៀនមានផលប៉ះពាល់ភ្លាមៗដល់ផ្លូវកាយ និងផ្លូវចិត្ត ហើយអាចបង្កគ្រោះថ្នាក់យ៉ាងធ្ងន់ធ្ងរដល់ការលូតលាស់ បញ្ញា ស្មារតី និងផ្លូវអារម្មណ៍របស់យុវជន។ បច្ចុប្បន្នបទល្មើសជួញដូរ ចែកចាយ និងប្រើប្រាស់គ្រឿងញៀននៅតែជាបញ្ហាគួរឲ្យព្រួយបារម្ភ និងកំពុងធ្វើឲ្យប៉ះពាល់ដល់សង្គម»។
មិនខុសពីការលើកឡើងខាងលើយុវតី គឹមធា រស់នៅក្នុងក្រុងសៀមរាបដូចគ្នាដែលនោះបានរៀបរាប់ថា ការប្រើប្រាស់គ្រឿងញៀនវាអាចធ្វើឲ្យប៉ះពាល់សុខភាព ធ្វើឲ្យការសិក្សាធ្លាក់ចុះ និងសង្គមជាតិ។
ប្រភពដដែលបន្តថា៖ «សម្រាប់យុវវ័យរបស់យើងនាពេលបច្ចុប្បន្ន ពួកគាត់មានការយល់ដឹងច្រើនពីផលប៉ះពាល់នៃការប្រើប្រាស់គ្រឿនញៀន ហើយកន្លងមកអាជ្ញាធរពាក់ព័ន្ធ និងលោកគ្រូអ្នកគ្រូក៏តែងតែធ្វើការផ្សព្វផ្សាយ និងបញ្ចៀបការយល់ដឹងនៅតាមបណ្ដាលសាលា និងនៅតាមមូលដ្ឋាន ធ្វើយ៉ាងឲ្យពួកគាត់មានការយល់បន្ថែមពីផលប៉ះពាលនៃការប្រើប្រាស់គ្រឿញៀន និងចូលរួមទប់ស្កាត់ឲ្យបានគ្រប់ៗគ្នា»។
នាយករងមជ្ឈមណ្ឌលជាតិយុវជនកម្ពុជា លោក មៅ ប៊ុណ្ណះ បានមានប្រសាសន៍ថា ចំពោះយុវវ័យនៅពេលប្រើប្រាស់គ្រឿងញៀនច្រើនហួសកម្រិត វាអាចធ្វើប៉ះពាល់យ៉ាងធ្ងន់ធ្ងរ ចំពោះខ្លួនឯង ក្រុមគ្រួសារ និងសង្គមជាតិទាំងមូល។
លោកបន្តថា៖ «សម្រាប់យុវវ័យនាពេលបច្ចុប្បន្ន គឺពួកគាត់មានការចូលរួមច្រើនក្នុងការទប់ស្កាត់ ការប្រើប្រាស់គ្រឿងញៀន»។
នាយរងការិយាល័យប្រឆាំងគ្រឿងញៀនខេត្តសៀមរាប លោកវរសេនីយ៍ទោ ណាម ណម មានប្រសាសន៏ថា ការប្រើប្រាស់ និងជួញដូរគ្រឿងញៀន បាននិងកំពុងរីករាលដាលទៅតាមជនបទ និងតំបន់ដាច់ស្រយាល។ ដើម្បីឱ្យការទប់ស្កាត់ និងបង្ក្រាបគ្រឿងញៀនឲ្យមានប្រសិទ្ធភាព លុះត្រាតែមន្រ្តីនិងអាជ្ញាធរទាំងអស់ត្រូវនៅឱ្យឆ្ងាយពីគ្រឿងញៀន លុបបំបាត់អំពើពុករលួយពាក់ព័ន្ធនឹងគ្រឿងញៀន ត្រូវមានឆន្ទៈខ្ពស់ក្នុងការអនុវត្តច្បាប់ដោយមិនមានការយោគយល់។
លោកបានឲ្យដឹងបន្ថែមទៀតថា៖ «ខ្ញុំលើកទឹកចិត្តទៅកាន់បងប្អូនប្រជាពលរដ្ឋត្រូវរាយការណ៏ជាបន្ទាន់រាល់ឃើញមានសកម្មភាពគ្រឿងញឿនកើតមានឡើងដើម្បីឲ្យអាជ្ញាធរចុះបង្ក្រាប់ភ្លាមៗទាន់ពេលវេលា។ អជ្ងាធរមានការលាក់ការជាសម្ងាត់ដើម្បីធានាសុខសុវត្ថិភាពជូនបងប្អូនប្រជាពលរដ្ឋ»។
ប្រធាននាយកដ្ឋានផ្សព្វផ្សាយ អប់រំ និងទំនាក់ទំនងសាធារណ:នៃអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន ឧត្តមសេនីយ៍ឯក លឹម តុងហួត បានមានប្រសាសន៏ថា ឆ្នាំ២០២៣ ខេត្តសៀមរាប បង្រ្កាបបទល្មើសគ្រឿងញៀនបាន២៨៨លើកថយចុះ១០លើក ហើយសមត្ថកិច្ចបានកំណត់មុខសញ្ញាទប់ស្កាត់ និងបង្ក្រាបយ៉ាងសកម្មស្ទើរតែទាំងស្រុង។
ការគ្រប់គ្រងការបន្សាបអ្នកញៀនគ្រឿងញៀន និងមានយន្តការតាមដានមុខសញ្ញាប្រើប្រាស់ និងអ្នកដែលបានបន្សាបចេញពីមណ្ឌលស្តារនីតិសម្បទាអ្នកញៀនគ្រឿងញៀន។ បានផ្សព្វផ្សាយគោលនយោបាយទាំង៧ចំណុច នៃគោលនយោបាយ ភូមិ ឃុំ សង្កាត់ មានសុវត្ថិភាពចំនួន ៤ ៥៥៦លើក ប្រជាពលរដ្ឋចូលរួមប្រមាណ ៣៦៨ ៦៥៧នាក់ ស្រី ២២៦ ៩២២នាក់៕
រាយការណ៍ព័ត៌មានដោយ៖ ភី ភារ៉ា
