សមាគមសម្ព័ន្ធអ្នកសារព័ត៌មានកម្ពុជា

យុវតីបង្ហាញពីទស្សនៈ និងសមត្ថភាពពាក់ព័ន្ធការរៀនជំនាញបច្ចេកទេស

សិស្សស្រីឈ្មោះ លាន ចាន់ណាវី កំពុងហាត់ការក្នុងរោងជាងអគ្គិសនីនៃវិទ្យាស្ថានជាតិបណ្តុះបណ្តាលវិជ្ជាជីវៈព្រះកុសមៈ។ រូបថតនៅថ្ងៃទី១១ ខែឧសភា ឆ្នាំ២០២៤។ (ខេមបូជា/ គឹម សារុំ)
សិស្សស្រីឈ្មោះ លាន ចាន់ណាវី កំពុងហាត់ការក្នុងរោងជាងអគ្គិសនីនៃវិទ្យាស្ថានជាតិបណ្តុះបណ្តាលវិជ្ជាជីវៈព្រះកុសមៈ។ រូបថតនៅថ្ងៃទី១១ ខែឧសភា ឆ្នាំ២០២៤។ (ខេមបូជា/ គឹម សារុំ)

យុវជនខ្មែរមួយចំនួនកំពុងប្តូរផ្នត់គំនិតរៀនជំនាញអគ្គិសនីគ្រឿងអេឡិកត្រូនិច និងមេកានិក ​ខណៈក្រសួងការងារថា មានយុវជនកំពុងសិក្សាជំនាញបច្ចេកទេសជាង៣ម៉ឺននាក់ក្នុងនោះ​ស្រ្តីមានប្រមាណ៤០ភាគរយ។

របត់នៃការប្តូរផ្នត់គំនិតរបស់ស្រ្តី និងយុវជនជាសិស្សសាលាដែលភាគច្រើនក្រោយបញ្ចប់​ថ្នាក់​ទី​១២[មធ្យមសិក្សាទុតិយភូមិ]បច្ចុប្បន្នកំពុងតម្រង់គោលដៅអាជីពរបស់ខ្លួន​ទៅតាមទីផ្សារ​ការងារ​ដែលផ្តោតលើជំនាញបច្ចេកទេសជាជាងរៀនមុខវិជ្ជាផ្សេង។

ស្ថិតក្នុងបន្ទប់តូចល្មមដែលនៅលើតុមានដាក់បរិក្ខារ និងឧបករណ៍អគ្គិសនី​ និងមានស្រ្តីម្នាក់​ក្នុង​សម្លៀកបំពាក់អាវពណ៌ត្រួយចេកលាយ​ឆ្នូតពណ៌ខ្មៅ និងពាក់មួកឃ្លុប​ពណ៌ស ដៃស្តាំ​កំពុង​កាន់​ប្រដាប់មួលវិសភ្ជាប់ទៅនឹងជញ្ជាំងនិងដៃឆ្វេងកំពុងកាន់ទប់ប្រអប់កុងតាក់ភ្លើង។ នោះ​ជា​ស្រ្តី​ឈ្មោះ លាន ចាន់ណាវី សិក្សាជំនាញបច្ចេកទេសផ្នែកតបណ្តាញអគ្គិសនី​[ក្នុង​អគារ]​​ក្នុង​ចំណោមស្រ្តីមួយចំនួនទៀតកំពុងសិក្សានៅវិទ្យាស្ថានជាតិបណ្តុះបណ្តាលវិជ្ជាជីវៈ​ព្រះកុសមៈនៅក្នុងរាជធានីភ្នំពេញ។                                              

មកពីគ្រួសារដែលមានឪពុកម្តាយជាកសិករផងនោះស្រ្តី លាន ចាន់ណាវី មានបងប្អូន​ស្រី​៣នាក់ ហើយនាងជាកូនច្បងបានប្រឡងជាប់មធ្យមសិក្សាទុតិយភូមិតាំងពីឆ្នាំ២០១៧​មក​ តែនាងមិនមានជំនាញចំណេះអាជីពអ្វីមួយនៅក្នុងខ្លួនឡើយ។ ប៉ុន្តែ ចាន់ណាវី នៅតែស្វែង រក​ឱកាស​ដើម្បីរៀនជំនាញបច្ចេកទេសអគ្គិសនីយកជាអាជីពសម្រាប់ចិញ្ចឹមជីវីត​ទៅ​អនាគត​ ខណៈដែលខ្លួនក៏មានស្វាមីហើយដែរ។

ស្ថិតក្នុងវ័យ២៤ឆ្នាំមកពីភូមិបន្ទាយមាស ឃុំបន្ទាយមាសខាងលិច ស្រុកបន្ទាយមាស ខេត្ត​កំពត ក្នុងទឹកមុខញញឹមស្រស់ស្រាយ ចាន់ណាវី ហាក់បង្ហាញពីចំណូលចិត្តខ្លាំង​ជាមួយ​នឹង​ឧបករណ៍អគ្គិសនីដែលមាននៅក្បែរខ្លួន។ លាន ចាន់ណាវី បានប្រាប់ ខេមបូចា ថា មូល​ហេតុ​​ដែលនាងចាប់យកជំនាញបច្ចេកទេសតបណ្តាញអគ្គិសនីក្នុងអគារ ព្រោះនាង​មើល​ឃើញ​ទី​ផ្សារការងារបច្ចេកទេសមួយចំនួននៅកម្ពុជាមានដំណើរការល្អហើយឱកាសការងារក៏មានច្រើនដែរ។ ម៉្យាងវិញទៀតជំនាញបច្ចេកទេសអគ្គិសនីនេះក៏មិនចាំបាច់តែបុរសទេ​ដែល​មាន​សមត្ថភាពរៀនចេះនោះតែស្រ្តីក៏មានសិទ្ធិ និងមានសមត្ថភាពរៀនអាចធ្វើបានដូចបុរសដែរ។

ចាន់ណាវី ពោលថា៖ «ដំបូងខ្ញុំគិតថា ការងារនេះវាជាការងារបុរសទេ តែដល់ខ្ញុំគិតៗទៅ គឺ​បុរសនិងស្រ្តីមានសិទ្ធិនិងសមត្ថភាពស្មើគ្នាអ៊ីចឹងយើងអាចរៀនបានដូចគ្នា។ មួយវិញទៀត​ ខ្ញុំគិតថាឱកាសទីផ្សារការងារសម្រាប់ស្រ្តីមានច្រើនជាងមុនហើយទីផ្សារការងារបច្ចេកទេស​ទូលំទូលាយនិងឱកាសនៃប្រាក់ចំណូលក៏បានខ្ពស់ជាងមុនដែរ»

ចាន់ណាវី ត្រូវសិក្សាជំនាញតបណ្តាញអគ្គិសនី១០ខែ និងទើបរៀនបាន៥ខែក្តីតែសម្រាប់នាង​ដែលកំពុងសិក្សាលើជំនាញនេះវាមិនពិបាកហើយក៏មិនងាយស្រួលដែរតែនាងអាចសម្រប​ខ្លួន​បាន។ ប៉ុន្តែយ៉ាងណាក្តី ណាវី ត្រូវខិតខំសិក្សាបន្ថែមទៀតដើម្បីវិវឌ្ឍខ្លួនឱ្យកាន់តែ​ប្រសើរ​ជាងនេះព្រោះជំនាញអគ្គិសនីជាបំណងនិងជាចំណូលចិត្តរបស់នាង​ស្រាប់ផង។ ក្រោយពេល​រៀនចប់នាពេលខាងមុខ នាងប្រាថ្នាបើកហាងលក់គ្រឿងបរិក្ខារអគ្គិសនី​និង​ចង់ធ្វើការដូច​ស្វាមី​របស់នាងជាជាងម៉ៅការតបណ្តាញអគ្គិសនីដែរ។

ចាន់ណាវី បន្ថែមថា៖ «រឿងរៀនជំនាញបច្ចេកទេសនេះកុំឱ្យស្រ្តីមួយចំនួនគិតថាខ្លួនឯង​ទន់ខ្សោយ។ ព្រោះពី​មុន​ស្រ្តី​ខ្លួនឯងតែងគិតថាវិលជើងក្រានមិនជុំ។ អ៊ីចឹងកុំឱ្យស្រ្តី​មាន​ទស្សនៈបែបហ្នឹងទៀត ហើយស្រ្តី​និងយុវជនគ្រប់រូបខំរៀនឱ្យមានចំណេះជំនាញផ្ទាល់ខ្លួន ដើម្បីងាយស្រួលរកប្រាក់ចំណូលផ្គត់ផ្គង់គ្រួសារ»។​

បច្ចុប្បន្នការសិក្សាជំនាញវិជ្ជាជីវៈបច្ចេកទេសមួយចំនួនកំពុងត្រូវបានចាប់អារម្មណ៍ពីយុវជនជាសិស្ស ឬស្រ្តីកាន់តែទូលំទូលាយរហូតមានទាំងនិស្សិតទៅសិក្សានៅបរទេសទៀងផង។ ដូច​ជាយុវតី ផុន សុផាត់សា ដែលមានវ័យ២០ឆ្នាំជានិស្សិតអាហារូបករណ៍ម្នាក់​ដែលបាន​ទៅ​សិក្សានៅទីក្រុងហាណូយ ប្រទេសវៀតណាម ចាប់តាំងពីខែកញ្ញា ឆ្នាំ២០២៣ ជំនាញ​[វិស្វកម្ម​អគ្គិសនី]​បានប្រាប់តាមសារអេឡិចត្រូនិកថាកញ្ញាបានប្រឡង​ជាប់មធ្យមសិក្សាទុតិយភូមិ​ក្នុង​ឆ្នាំ​២០២៣។ បន្ទាប់ពីកញ្ញាប្រឡងជាប់ហើយក៏ស្រាវជ្រាវតាមផេកផ្លូវការ​របស់​ក្រសួង​អប់រំ យុវជន និងកីឡា ​ក៏ឃើញព័ត៌មានប្រកាសជ្រើសរើស​និស្សិតអាហារូបករណ៍​ទៅសិក្សា​ជំនាញ​អគ្គិសនី ផ្នែក[វិស្វកម្មអគ្គិសនី]។

កញ្ញាបន្តថា ក្រោយមកកញ្ញាក៏បានធ្វើដំណើរមកពីខេត្តស្វាយរៀង​ដើម្បីមកប្រឡង​នៅ​រាជធានីភ្នំពេញ។ ចំពោះវិញ្ញាសាប្រឡងនៅពេលនោះ គឺគណិតវិទ្យា និងវប្បធម៌ទូទៅ​ហើយ​កញ្ញា​បានប្រឡងជាប់ជាស្ថាពរ។ ពេលនេះនាងកំពុងសិក្សាឆ្នាំទី១នៅសាកលវិទ្យាល័យ [Hanoi University of science and technology]។​បើទោះខ្លួនជាស្រ្តីក្តីក៏ សុផាត់សា មាន​មោទនភាពជាខ្លាំងព្រោះនាងមានសមត្ថភាពរៀន​បានដូចបុរសដែរ។

កញ្ញាលើកឡើងថា ជំនាញបច្ចេកទេស គឺជាមុខជំនាញមួយដែលស្មុគស្មាញហើយមនុស្ស​ភាគ​ច្រើន​តែងគិតថា មានតែបុរសទេ​ទើប​អាចធ្វើបាន។ បច្ចុប្បន្នកញ្ញាដឹងថាទីផ្សារការងារ​ផ្នែកបច្ចេកទេស​និង​បច្ចេកវិទ្យា​នៅកម្ពុជាក៏​មានមនុស្សស្រីដែលកំពុងតែធ្វើការ និងសិក្សា​រៀនសូត្រ​​ពីជំនាញ​បច្ចេកទេសមិនចាញ់​មនុស្ស​ប្រុសឡើយទាំងនៅក្នុងនិងក្រៅប្រទេស។​

កញ្ញាសុផាត់សាពោលថា៖ «ក្នុងនាមខ្ញុំជានិសិ្សតស្រីម្នាក់កំពុងសិក្សាជំនាញ [វិស្វកម្ម​អគ្គីសនី]​​នៅក្រៅប្រទេសមិនថាជំនាញនេះលំបាកមានឧបសគ្គយ៉ាងណាក៏ដោយទេ​ក៏ខ្ញុំមិន​ចុះចាញ់ជាដាច់ខាត។ មនុស្សប្រុសអាចធ្វើបានយើងជាមនុស្សស្រីក៏អាចធ្វើបានដូចគ្នា​គ្មាន​ការងារណាជំនាញណាដែលមនុស្សស្រីធ្វើមិនបាននោះទេ»

សង្គមកម្ពុជាពីមួយជំនាន់ទៅមួយជំនាន់ គឺពុំសូវឱ្យតម្លៃការងារទៅលើមនុស្សស្រីទេដោយ​គិតថាស្ត្រីជាភេទទន់ខ្សោយមិនមានកម្លាំងប្រាជ្ញារឹងមាំដូចមនុស្សប្រុសឡើយ។ ទើបធ្វើឱ្យស្រ្តី​នៅតែ​ក្នុងផ្ទះ មិនបានសិក្សារៀនសូត្រ ពុំសូវមានការយល់ដឹងពីសង្គម​ខាងក្រៅដូចមនុស្ស​ប្រុស រហូតមានសុភាសិតមួយលើកឡើងថា(មនុស្សស្រីបង្វិលជើងក្រានមិនជុំ)។ ដោយសារ​សង្គមពីមុនយល់ឃើញបែបនេះហើយទើបធ្វើឱ្យសង្គមកម្ពុជាមិនសូវរីកចម្រើន។ នេះជាការ​លើក​ឡើងរបស់កញ្ញា ផុន សុផាត់សា។                          

យុវតីដែលមានដើមកំណើតនៅភូមិពពែត ក្រុង-ខេត្តស្វាយរៀង បន្ថែមថា៖ «បើក្រឡេកមើល​សង្គមកម្ពុជាបច្ចុប្បន្នវិញ ខ្ញុំសង្កេតឃើញថា សុភាសិតដែលបានលើកឡើងពីមុន​តែពេល​នេះ វាស្ទើរលែងមានហើយ។ ដោយសារសព្វថ្ងៃប្រជាពលរដ្ឋ​យើងមានការយល់ដឹងច្រើន និង​បញ្ជូន​កូនប្រុសស្រីរបស់ពួកគាត់ទៅសិក្សារៀនសូត្រឱ្យមាន​ចំណេះវិជ្ជា ដើម្បីអភិវឌ្ឍ​គ្រួសារ និងប្រទេសជាតិ»។ កញ្ញាបន្តថា៖ «សង្គមយើងសព្វថ្ងៃបានលើកកម្ពស់​ដល់ស្ត្រីឱ្យ​មានសិទ្ធស្មើនិងបុរសដែរ ដោយអនុញ្ញាតឱ្យស្ត្រីចូលបម្រើការងារគ្រប់វិស័យដូចបុរស​ដែរ»

សកម្មភាពកំពុងអនុវត្តជាក់ស្តែងរបស់និស្សិត១ក្រុមជំនាញអគ្គិសនី​នៅវិទ្យាស្ថាន​ពហុបច្ចេកទេសព្រះកុសុមៈ។រូបថតនេះផុសក្នុងផេករបស់វិទ្យាស្ថានកាលពីថ្ងៃទី១០ ខែមករា ឆ្នាំ២០២៤។

លោកស្រី ឃួន វិច្ឆិកា អ្នកនាំពាក្យក្រសួងអប់រំ មិនបានឆ្លើយនឹងសំណួរថាតើនិស្សិត​អាហារូបករណ៍ រឺនិស្សិតជាស្ត្រីរៀនបង់លុយខាងជំនាញបច្ចេកទេស​ផ្សេងក្នុង​ប្រទេស​កម្ពុជាមានប៉ុន្មាននាក់ រឺប៉ុន្មានភាគរយនៅទូទាំងប្រទេស?។ ប៉ុន្តែលោកស្រី វិច្ឆិកា បានឱ្យដឹងថា សម្រាប់ឆ្នាំ២០២៤នេះក្រសួងអប់រំ យុវជន និងកីឡា បានសហការ​ជាមួយ​បណ្តាប្រទេសផ្តល់អាហារូបករណ៍ ដូចជា រដ្ឋាភិបាលចិន វិស័យឯកជនជប៉ុន(Teacher Training) ប្រទេសហុងគ្រី សាធារណរដ្ឋគុយបា ក្រសួងអប់រំរបស់ប្រទេសជប៉ុន ខេត្តក្វាងស៊ី​ប្រទេសចិន សាធារណរដ្ឋសង្គមនិយមវៀតណាម សាកលវិទ្យាល័យចិន(Dali University) ប្រទេសឡាវ និងប្រទេសថៃ។ សម្រាប់និស្សិតអាហារូបករណ៍ប្រុសស្រីដើម្បីទៅសិក្សា​ជំនាញ​​​ផ្សេងៗ។

លោកស្រីបន្តថា ដោយគិតពីខែមករា ដល់ខែមីនា និងគិតពីខែឧសភាដល់ខែវិច្ឆិកា ឆ្នាំ២០២៤ មានអាហារូបករណ៍ចំនួន៣០២ស្មើ៣០២នាក់។ មុខជំនាញក្នុងការជ្រើសនេះមានចម្រុះរាប់​តាំង​ពីទាក់ទងទៅនឹងមុខវិជ្ជាមនុស្សសាស្រ្ត និងមុខជំនាញផ្សេងៗទៀត។

លោកស្រីថ្លែងថា៖ «នេះគ្រាន់តែជាចំនួនតួលេខដែលក្រសួងអប់រំរៀបចំនីតិវិធីក្នុងការ​ប្រឡង​ទេ។ ដោយឡែកយើងនៅមានអាហារូបករណ៍ជាច្រើនទៀតដែលរដ្ឋាភិបាល​ប្រទេស​​នីមួយៗ​រៀបចំ​ក៏ដូចជាមូលនិធិផ្សេងៗទៀតដែលគាត់ផ្តល់ឱ្យយើង»

អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក កត្តា អ៊ន មានប្រសាសន៍ថា ការបណ្តុះបណ្តាលជំនាញវិជ្ជាជីវៈបច្ចេកទេសដែលរួមមាន៣៨ជំនាញស្ថិតក្រោមការគ្រប់គ្រងរបស់ក្រសួងការងារ និងបណ្តុះបណ្តាលវិជ្ជាជីវៈ​កំពុងតែដំណើរការ​បណ្តុៈបណ្តាល​ចំនួន៣៧​វិទ្យាស្ថាន​នៅទូទាំងប្រទេស។

លោក កត្តា អ៊ន បានបន្តថា ជាគោលដៅរបស់ក្រសួងការងារ គឺចង់ឱ្យយុវជនបានចូលរៀន​ជំនាញ​បណ្តុះបណ្តាលបច្ចេកទេសឱ្យបានកាន់តែច្រើន ខណៈដែលរាជរដ្ឋាភិបាលកម្ពុជា​បាន​កំណត់ឱ្យបាន១លាន៥សែននាក់ត្រូវចេះជំនាញបច្ចេកទេសក្នុងបំណងជួយដល់​ជនក្រីក្រ។ ពីព្រោះថាការរៀនជំនាញបច្ចេកទេស គឺវាឆ្លើយតបទៅនឹងទីផ្សារការងារបច្ចុប្បន្ន​ដែលនៅ​តាម​រោងចក្រ​សហគ្រាសបច្ចុប្បន្ន​​កំពុងត្រូវការអ្នកជំនាញ។ រោងចក្រសហគ្រាសកម្រិតមធ្យម និងកម្រិតខ្ពស់នៅកម្ពុជានឹងត្រូវការកម្លាំងជំនាញអ្នកបច្ចេកទេសរាប់សិបនាក់ទៀត។                                    

បើតាមលោក កត្តា អ៊ន តាមការសង្កេតរបស់លោកឃើញថាសិស្សនារីដែល​កំពុង​សិក្សា​ជំនាញ​បច្ចេកទេសមានគ្រប់ផ្នែកដូចជាផ្នែកមេកានិក ផ្នែកបច្ចេកទេសសំណង់​ក៏មាន​សិស្ស​ស្រ្តី​រៀនដែរ។ ចំពោះការចុះឈ្មោះចូលរៀនជំនាញបច្ចេកទេសបច្ចុប្បន្នសរុបមានជាង ៣ ៧០០០នាក់ដែលរាជរដ្ឋាភិបាលកម្ពុជាប្រកាសបើកវគ្គបណ្តុះបណ្តាលជំនាញវិជ្ជាជីវៈខ្លី និង​មធ្យមឱ្យបាន[១លាន៥សែននាក់ដោយរៀនមិនបង់ថ្លៃ] ហើយក្នុងចំណោមអ្នក​ដែលបាន​ចុះ​ឈ្មោះមានជាង ៣៧ ០០០នាក់​នេះ ក្នុងនោះមានស្រ្តីប្រមាណ៤០ភាគរយ។ ក្នុងនោះដែរ​អ្នក​មកពីគ្រួសារក្រីក្រមានជិត ១៧ ០០០នាក់​ទាំងបុរសទាំងស្រ្តី និងត្រូវសិក្សារយៈពេល៤ខែ​ដែលបច្ចុប្បន្នត្រូវបានប្រឡងបញ្ចប់ហើយដែលមានយុវជនប្រឡងប្រហែល៤ពាន់នាក់ក្នុង​ចំណោម ១៧ ០០០នាក់លើជំនាញបច្ចេកទេស[កម្រិតសញ្ញាប័ត្រc1]។

លោកឱ្យដឹងទៀតថា បើតាមលោកសង្កេតឃើញថាការចូលរៀនជំនាញបច្ចេកទេសខ្លះ​សិស្ស​ប្រុសមានចំនួនច្រើនជាងសិស្សស្រីហើយជំនាញខ្លះសិស្សស្រី និងសិស្សប្រុស​មានចំនួន​ប្រហាក់​ប្រហែលគ្នានឹងសិស្សស្រីដែរ។

លោកបញ្ជាក់ថា ហេតុដូច្នេះហើយការងារដែលបុរសធ្វើបានស្រ្តីក៏អាចធ្វើបានដូចគ្នាដែរ។ រីឯ​នៅ​តាមរោងចក្រ​សហគ្រាសក៏កំពុងត្រូវការអ្នកជំនាញបច្ចេកទេសមិនថាបុរស ឬស្រ្តីទេ គឺ​អាច​ធ្វើការបាន​ដូច​គ្នា។ អ៊ីចឹងហើយលោកមើលឃើញថាយុវជនបច្ចុប្បន្នកំពុងតែ​ចាប់​អារម្មណ៍​លើ​ជំនាញ​បច្ចេកទេសនេះខ្លាំងណាស់ដែលអាចរកចំណូលបាន​ក្នុងរង្វង់​ពី​៣០០​ដល់ប្រហែល៧០០​ដុល្លារឯណោះក្នុង១ខែ។                       

លោកថ្លែងថា៖ «ដូច្នេះការបណ្តុះបណ្តាលជំនាញបច្ចេកទេសដល់យុវជនឱ្យបានចំនួនច្រើន គឺ​ដើម្បីចូលធ្វើការងារនៅតាមបណ្តា​រោងចក្រសហគ្រាស។ រោងចក្រសហគ្រាស​បច្ចុប្បន្ន​កំពុងតែមានចំនួនកើនឡើងហើយត្រូវការអ្នកជំនាញចូលធ្វើការក៏ច្រើនដែរ»

ទាក់ទងបរិបទនៅក្នុងប្រទេសកម្ពុជាឃើញថានាពេលបច្ចុប្បន្ននេះគឺស្រ្តីនិងយុវជនតែងតែ​មានការប្រែប្រួលទៅតាមសម័យកាល។ ក្នុងបរិបទសង្គមថ្មីៗនេះដែលតាមរយៈការសិក្សា​ស្រាវអំពីការផ្លាស់ប្តូរគំនិតរបស់យុវជនក្រោយពីបញ្ចប់ចំណេះដឹងទូទៅថ្នាក់ទី១២ដោយពួកគេមួយចំនួនប្តូរទៅចាប់យកជំនាញបច្ចេកទេសវិញ គឺជារឿងមួយល្អ​ព្រោះវាស្រប​ទៅនឹង​បរិបទ​នៅក្នុងសង្គមកម្ពុជាបច្ចុប្បន្ន។ នេះបើតាមលោក សេក សុជាតិ អ្នកប្រឹក្សាយោបល់​ផ្នែក​អភិវឌ្ឍន៍ផ្នត់គំនិត និងការស្រាវជ្រាវ។

លោកបន្តថា ការងារជាច្រើននៅក្នុងសង្គមកម្ពុជានាពេលបច្ចុប្បន្នគឺត្រូវការឱ្យមានស្រ្តី​ចូលរួម​ ជាពិសេសពាក់ព័ន្ធនឹងផ្នែកបច្ចេកទេសជំនាញមិនថាមេកានិច មិនថាជំនាញបច្ចេកទេស​អគ្គិសនី​ហើយក៏មិនថាគ្រឿងម៉ាស៊ីនឬក៏បច្ចេកវិទ្យាអីទេ។ លោកចង់ឃើញស្រ្តីមានវត្តមាន​នៅ​គ្រប់ទីកន្លែងដើម្បីបង្កឬបង្កើតឱ្យមានសមភាពយានឌ័រនៅតាមកន្លែងធ្វើការគ្រប់ផ្នែកទាំងអស់ដើម្បីធានាឱ្យបាននូវភាពស្មើគ្នារវាងបុរសនិងស្រ្តី។

បើតាមលោក សុជាតិ ស្រ្តីក៏បានដើរតួយ៉ាងសំខាន់ដែរក្នុងការរក្សាឱ្យមានតុល្យភាព និង​សុវត្ថិភាព​ការងារជាចេរភាពបន្តទៅថ្ងៃអនាគត។ គ្រប់គ្នាមើលឃើញហើយថាការរៀនជំនាញ​ខាងបច្ចេកទេសនេះវាបានបង្ហាញតាមរយៈការរីកចម្រើននៃបច្ចេកវិទ្យាធ្វើឱ្យពិភពលោកមានការទទួលស្គាល់នូវភាពចាំបាច់របស់វា ជាពិសេសការងារបច្ចេកទេសបច្ចេកវិទ្យាហ្នឹងតែម្តង។ ស្រ្តីគឺមិនត្រូវបានប្រើប្រាស់កម្លាំងច្រើនទេតែប្រើប្រាស់បញ្ញាច្រើនជាង។                              

លោកថ្លែងថា៖ «ការផ្លាស់ប្តូរផ្នត់គំនិតរបស់ស្រ្តីចាប់យកជំនាញបច្ចេកទេសនេះក៏វាជា​វិជ្ជាជីវៈ​​អាជីព​មួយដែរដែលស្រ្តីមានសក្តានុពលខ្ពស់សម្រាប់កម្ពុជាបច្ចុប្បន្ន និងទៅ​អនាគត​។ ចំពោះ​ការយល់ឃើញរបស់ខ្ញុំគិតថាការលើកកម្ពស់ផ្តល់តម្លៃឱ្យស្រ្តីក្នុងការ​ប្រើ​ប្រាស់​ចំណេះដឹងផ្នែកជំនាញបច្ចេកទេសជាមួយបុរសគឺជារឿងល្អ។ នេះក៏វាបង្ហាញពីការវិវឌ្ឍ​មួយ​ចំនួន​នៅក្នុង​វិស័យ​​អប់រំនៅកម្ពុជាដែរ»

លោក សុជាតិ បន្ថែមថា នៅតាមសាលារៀន ឬនៅតាមមជ្ឈមណ្ឌលបណ្តុះបណ្តាលវិជ្ជាជីវៈ​ផ្សេងៗ​ទៀតក៏អាច​រៀបចំ​ជា​កម្មវិធីដើម្បីបណ្តុះបណ្តាល និងជំរុញលើកកម្ពស់វិជ្ជាជីវៈ​របស់​ស្រ្តីក៏ដូចជាយុវជន​ឱ្យមាន​ប្រសិទ្ធភាពខ្ពស់ និងគុណភាពដែរ។ ដូច្នេះរាល់ការសិក្សា​ដែល​មិន​ត្រឹមត្រូវដែលធ្វើឱ្យស្រ្តីមិនអាចឆ្លងកាត់ការងារធំៗបានផ្នែកបច្ចេកទេសហ្នឹងវាជាឧបសគ្គមួយដែរ។ បើសិនជាស្រ្តីមិនមានចំណេះដឹង និងវិជ្ជាជីវៈច្បាស់លាស់ និងមិនអាចប្រើប្រាស់​សមត្ថភាព​​ខ្លួនឯង​បានពេញលេញទេក៏វាអាចបង្កើតឱ្យមានភាពមិនស្មើគ្នារវាងបុរសនិង​ស្រ្តី​ដែរ​៕

254 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម