សមាគមក្រុមការងារ១០០រាត្រី បានអំពាវនាវឱ្យអាជ្ញាធរពិនិត្យមើលឡើងវិញនូវសកម្មភាពរបស់ប្រធានគណបក្សកម្លាំងជាតិ(NPP) លោក ជា មុនី និងទីប្រឹក្សាជាន់ខ្ពស់ លោក រ៉ុង ឈុន ដោយចោទពួកគេថាបានប្រព្រឹត្តសកម្មភាពស្ថិតក្រោមអតីតប្រធានគណបក្សប្រឆាំង លោក សម រង្ស៊ី។
ក្រុមយុវជនដែលចូលរួមជីវភាពនយោបាយជាមួយរដ្ឋាភិបាលនេះបានបញ្ចេញវីដេអូឃ្លីបមួយបន្ទាប់ពីតុលាការបានចេញដីការឹបអូសទ្រព្យសម្បត្តិលោក រ៉ុង ឈុន។ លោក ឈុន កំពុងប្រឈមមុខនឹងការចោទប្រកាន់ពីបទញុះញង់ថ្មី ជុំវិញការរិះគន់របស់គាត់ចំពោះការបោះបង្គោលព្រំដែនរបស់រដ្ឋាភិបាលជាមួយ និងវៀតណាម និងឧស្សាហកម្មឆបោកតាមអ៊ីនធឺណិតខុសច្បាប់នៅក្នុងប្រទេស។ តុលាការនឹងប្រកាសសាលក្រមនៅថ្ងៃទី៥ ខែឧសភា ពាក់ព័ន្ធនឹងបទចោទប្រកាន់ថ្មីនេះ។
វីដេអូឃ្លីបរយៈពេលពីរនាទីបានបង្ហាញរូបភាពរបស់លោក ឈុន និងលោក មុនី រួមនិងសកម្មភាពដឹកនាំកាលពីអតីតកាលរបស់ពួកគេជាមួយគ្រូបង្រៀន និងសហជីព ក៏ដូចជាបាតុកម្មរបស់កម្មករកាត់ដេរ ដែលត្រូវបានរៀបចំឡើងដោយគណបក្សប្រឆាំងដែលត្រូវបានរំលាយគឺគណបក្សសង្គ្រោះជាតិ។ អ្នកធ្វើអត្ថាធិប្បាយក្នុងវីដេអូ ដែលជាសមាជិកនៃសមាគមក្រុមការងារ១០០រាត្រី បានចោទប្រកាន់ថា អ្នកទាំងពីរមានគោលបំណងធ្វើឱ្យសង្គមមានអស្ថិរភាព និងញុះញង់ឱ្យមានកំហឹងជាសាធារណៈប្រឆាំងនឹងរដ្ឋាភិបាល។
សមាជិករូបនោះបានបន្តថា៖ «ខ្ញុំសូមអង្វរឱ្យអាជ្ញាធរពាក់ព័ន្ធទាំងអស់ពិនិត្យមើលសកម្មភាពរបស់ថ្នាក់ដឹកនាំគណបក្សកម្លាំងជាតិ និងបក្សពួកដើម្បីដាក់ពួកគាត់ មិនឱ្យធ្វើសកម្មភាពនយោបាយបាន»។
ប្រធានគណបក្សកម្លាំងជាតិ លោក ជា មុនី បានចោទសួរពី «ឯករាជ្យភាព» នៃសមាគមនេះ ដោយបន្ថែមថាវា «មិនសំខាន់» ក្នុងការជឿលើការអះអាងរបស់ពួកគេនោះទេ។ លោក មុនី បញ្ជាក់ថា គណបក្សនយោបាយរបស់លោកកំពុងតែធ្វើសកម្មភាពរបស់ខ្លួនស្របតាមច្បាប់កម្ពុជា។
លោកបានចោទជាសំណួរថា៖ «ខ្ញុំចង់សួរថា តើអ្វីជាគោលជំហរនយោបាយរបស់ក្រុមការងារ១០០រាត្រី?»។
លោកមានប្រសាសន៍ថា៖ «វាមិនសំខាន់ទៅលើអង្គការសង្គមស៊ីវិល១០០រាត្រីហ្នឹងទេ ធ្វើតែកិច្ចការរបស់ខ្លួនទៅខ្ញុំគណបក្សនយោបាយខ្ញុំធ្វើអ្វីដែលជាច្បាប់របស់ប្រទេសកម្ពុជាបានចែង ហើយអ្វីដែលពលរដ្ឋគាំទ្រ»។
លោកបានបន្ថែមថា៖ «រឿងប្រវត្តិអីវាជាយុទ្ធសាស្ត្ររបស់ពួកគេ[ក្រុមការងារ១០០រាត្រី] ឥឡូវខ្ញុំសួរថាហេតុអ្វីបានជាអង្គការសង្គមស៊ីវិល និងសមាគមជាច្រើនមិនមានប្រតិកម្ម? ខ្ញុំក៏ធ្លាប់ធ្វើការក្នុងសហជីពដែរ»។
លោក មុនី បន្តថា៖ «វាមិនចាំបាច់គាត់ប្រតិកម្ម[អំពីយើង] ទេ។ បើខ្ញុំបានប្រព្រឹត្តខុសក្រសួងមហាផ្ទៃនឹងចាត់វិធានការហើយ ព្រោះគេមានការឃ្លាំមើលជិតដិតចំពោះគណបក្សកម្លាំងជាតិដែលមានប្រជាប្រិយភាព»។
លោកបានចែករំលែកថា គណបក្សរបស់លោកកំពុងរៀបចំរចនាសម្ព័ន្ធរបស់ខ្លួន ដើម្បីចូលរួមការបោះឆ្នោតនៅឆ្នាំ២០២៧ និងឆ្នាំ២០២៨ ទោះបីជាមានបញ្ហា និងការធ្វើទុក្ខបុកម្នេញសមាជិក និងសកម្មជនគណបក្សរបស់ខ្លួនជាបន្តបន្ទាប់ក៏ដោយ។
ជាមួយគ្នានេះ លោក មួង សូនី ប្រធានសមាគមក្រុមការងារ១០០រាត្រី បានសង្កត់ធ្ងន់ថា លោក រ៉ុង ឈុន និងលោក ជា មុនី កំពុងត្រាប់តាម «នយោបាយជ្រុលនិយម» របស់អតីតមេដឹកនាំគណបក្សប្រឆាំង លោក សម រង្ស៊ី ក្នុងគោលបំណងបំផ្លាញសន្តិភាព និងស្ថិរភាពនយោបាយ។
លោក សូនី ធ្លាប់ជាសកម្មជនបរិស្ថានម្នាក់ដែលធ្វើការជាមួយអង្គការមាតាធម្មជាតិ ដោយបានចូលរួមជាមួយគណបក្សកាន់អំណាចនៅឆ្នាំ២០២៣។ លោក សូនី ក៏ធ្លាប់ជាប្រធានសមាគមសម្ព័ន្ធនិស្សិតបញ្ញវន្តខ្មែរ។
លោក សូនី បាននិយាយថា៖ «គណបក្សនេះជាកូនជឹងអ្នកដែលធ្វើឱ្យលោក សម រង្ស៉ី នៅក្រៅប្រទេស ចឹងការបន្តសាបព្រោះមនោគមវិទ្យានយោបាយជ្រុលនិយមរបស់លោក សម រង្ស៊ី គឺមានវត្តមាននៅក្នុងគណបក្សកម្លាំងជាតិ»។
លោក សូនី បានបន្តថា៖ «យើងសង្កេតឃើញថា អ្នកនយោបាយទាំងនេះកំពុងធ្វើតាមវិធីសាស្រ្តរបស់លោក សម រង្ស៊ី ពោលគឺប្រមូលផ្តុំបាតុកម្ម និងការចុះមូលដ្ឋានជួបបងប្អូនប្រជាពលរដ្ឋនិយាយបែបឱ្យមានលក្ខណតវ៉ាឬប្រឆាំងស្អប់ទៅលើរាជរដ្ឋាភិបាល»។
លោកបានកត់សម្គាល់ថា អតីតប្រធានសហជីព លោក ជា មុនី បានដឹកនាំកម្មករធ្វើបាតុកម្មយ៉ាង«សកម្ម» និងបានសហការជាមួយលោក សម រង្ស៊ី ក្នុងសកម្មភាពដែលធ្វើឱ្យ«សង្គមមានអស្ថិរភាព និងបង្កការរំខានយ៉ាងខ្លាំង»។
តាមការឱ្យដឹងពីលោក ឈុន បាននិយាយថា លោកមិនបានយកចិត្តទុកដាក់ចំពោះការវាយប្រហារដោយ«ក្រុមមួយចំនួន»នេះទេ ដោយសង្កត់ធ្ងន់ថា គណបក្សកម្លាំងជាតិកំពុងអនុវត្តសកម្មភាពរបស់ខ្លួនស្របតាមច្បាប់។
លោកបានមានប្រសាសន៍ថា៖ «ខ្ញុំមើលឃើញថារាល់បញ្ហាទាំងអស់ដែលលើកឡើងប្រឆាំងនឹងខ្ញុំគឺជាហេតុផលនយោបាយ»។
កាលពីថ្ងៃទី២២ ខែមេសា លោក យ៉ាង សុខឃាង អនុប្រធានគណ:កម្មាធិការប្រតិបត្តិបណ្តោះអាសន្នប្រចាំខេត្តកំពង់ធំត្រូវបានចាប់ខ្លួន ដែលការចាប់ខ្លួននេះត្រូវបានគណបក្សចាត់ទុកថាជាហេតុផលនយោបាយ។ ទោះជាយ៉ាងណា នគរបាលរាជធានីភ្នំពេញ បានបដិសេធចំពោះការចោទប្រកាន់នេះ ដោយបានអះអាងថា លោក សុខឃាង គឺបានញុះញង់ឱ្យមានការរំខានដល់សន្តិសុខសង្គម និងប្រមាថព្រះមហាក្សត្រ ប៉ុន្តែនគរបាលមិនបានបញ្ជាក់លម្អិតពីបទល្មើសដែលត្រូវបានចោទប្រកាន់ឡើយ។
អ្នកនាំពាក្យគណបក្សកាន់អំណាច លោក សុខ ឥសាន បានយល់ស្របចំពោះសេចក្តីថ្លែងការណ៍របស់នគរបាល ដោយលើកឡើងថា ការចាប់ខ្លួនសមាជិក និងសកម្មជននៃគណបក្សកម្លាំងជាតិ មិនពាក់ព័ន្ធនឹងហេតុផលនយោបាយទេ។
លោកបានមានប្រសាសន៍ថា៖ «កុំចេះតែចោទប្រកាន់សមត្ថកិច្ចថាធ្វើខុស។ សូមពិចារណាជាមុនសិនថាតើការបំពានណាមួយត្រូវបានប្រព្រឹត្តពិតប្រាកដ។ ប្រសិនបើអ្នកអនុវត្តបានត្រឹមត្រូវ វាមិនគួរមានបញ្ហាអ្វីនោះទេ»។
លោកបន្តថា គណបក្សនយោបាយជាង៤០ទៀតកំពុងដំណើរការដោយមិនមានបញ្ហាអ្វីឡើយ។ លោកបន្ថែមថា៖ «ខ្ញុំសូមជំរុញឱ្យគាត់មើលទ្បើងវិញ មើលខ្លឹមសារច្បាប់ស្តីពីគណបក្សនយោបាយ ហើយប្រៀបធៀបទៅនឹងសកម្មភាពរបស់គាត់ ខ្លឹមសារថាតើធ្វើស្របតាមច្បាប់ឬអត់។ សូមកុំចោទសមត្ថកិច្ចថាគាបសង្កត់ យារយី សូមមើលខ្លួនគាត់សិន»។
កាលពីចុងសប្តាហ៍កន្លងទៅនេះ សមាជយុវជនគណបក្សប្រជាជនកម្ពុជាដែលកំពុងកាន់អំណាចដឹកនាំដោយលោកនាយករដ្ឋមន្ត្រី ហ៊ុន ម៉ាណែត បានពិនិត្យឡើងវិញនូវសមិទ្ធិផលរបស់គណបក្សក្នុងឆ្នាំ២០២៤ និងបានគូសបញ្ជាក់ពីគោលនយោបាយការពារអធិបតេយ្យភាពទឹកដី រក្សាសន្តិភាព លើកកម្ពស់ការអភិវឌ្ឍសេដ្ឋកិច្ចសង្គម និងលុបបំបាត់ក្រុមនយោបាយជ្រុលនិយម។
លោក ប៉ា ចាន់រឿន ប្រធានវិទ្យាស្ថានកម្ពុជាដើម្បីប្រជាធិបតេយ្យ បានអំពាវនាវឱ្យរដ្ឋាភិបាលបើកលំហនូវសិទ្ធិពលរដ្ឋ និងនយោបាយ ដោយជំរុញឱ្យអាជ្ញាធរគ្រប់លំដាប់ថ្នាក់គោរពសិទ្ធិ និងសេរីភាពរបស់បុគ្គលដែលធ្វើសកម្មភាពសង្គម និងនយោបាយ។
លោកបានមានប្រសាសន៍ថា៖ «ដើម្បីឱ្យលទ្ធិប្រជាធិបតេយ្យដំណើរការដោយរលូន ចាំបាច់ត្រូវមានការចូលរួមពីគណបក្សប្រឆាំងដែលគួរឱ្យទុកចិត្ត ព្រោះវត្តមានរបស់គណបក្សប្រឆាំងរឹងមាំអាចធានាបាននូវតុល្យភាពអំណាច ក៏ដូចជាគណនេយ្យភាព»។
លោក ចាន់រឿន ជឿជាក់ថា ការចាប់ខ្លួនសមាជិក និងសកម្មជននៃគណបក្សកម្លាំងជាតិ គឺពាក់ព័ន្ធទៅនឹងសកម្មភាពនយោបាយពីអតីតកាលរបស់ពួកគេក្នុងនាមជាអ្នកប្រឆាំង ជាពិសេសបទពិសោធន៍របស់ពួកគេជាមួយគណបក្សសង្រ្គោះជាតិ ដែលត្រូវបានរំលាយនៅពេលនោះ។
លោកក៏បានជំរុញឱ្យគណបក្សនយោបាយពិនិត្យឡើងវិញនូវសកម្មភាពនយោបាយរបស់ខ្លួន ហើយត្រូវធ្វើការឆ្ពោះទៅរកការកាត់បន្ថយការប្រឈមមុខដាក់គ្នា និងអំពើហិង្សា៕
ប្រែសម្រួលពីអត្ថបទភាសាអង់គ្លេស៖ Youth Association Calls for the Barring of NPP’s Activities Amid Court Against Senior Party Leaders
