តំណាងកម្មករនិយោជិតដែលបម្រើការងារនៅរោងចក្រ សិន តៃ ហ្គាមេន (ខេមបូឌា) បានដាក់ពាក្យបណ្តឹងទៅកាន់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បន្ទាប់ពីនាយកដ្ឋានវិវាទការងារបានច្រានចោលសំណើសុំដោះស្រាយបញ្ហារបស់ពួកគេនៅក្នុងរោងចក្រ។ ក្រសួងបានអះអាងថា ពួកគេនឹងរកដំណោះស្រាយជូនកម្មការនិយោជិតទាំងនោះ។
កាលពីដើមខែសីហា នាយកដ្ឋានវិវាទការងារបានច្រានចោលសំណើទាំង ១៣ ដែលកម្មករនយោជិតបានអះអាងថា អយុត្តិធម៌សម្រាប់ពួកគេ។ ពួកគេបានស្នើឱ្យភាគីពាក់ព័ន្ធចេញមករកដំណោះស្រាយលម្អិតចំពោះបញ្ហាដែលបានកើតឡើងរបស់ពួកគេ។
ខេមបូចា បានទទួលលិខិតមួយចុះថ្ងៃទី១៤ ខែសីហា ឆ្នាំ២០២៤ ដែលបញ្ជាក់ថា តំណាងរបស់កម្មករនិយោជិត បានដាក់ពាក្យបណ្តឹងទៅក្រសួង ដោយជំរុញឱ្យរដ្ឋមន្ត្រី លោក ហេង សួរ ជួយអន្តរាគមដើម្បីពិនិត្យមើលភាពមិនប្រក្រតីនៅក្នុងក្រុមហ៊ុន។
ពួកគេក៏បានជំរុញឱ្យមានដំណោះស្រាយឆាប់រហ័សទាក់ទងនឹងការបង់ភាគទានតិចតួចដោយ រោងចក្រ សិន តៃ ដល់បេឡាជាតិរបបសន្តិសុខសង្គម (ប.ស.ស) ពីឆ្នាំ ២០២១ ដល់ខែ វិច្ឆិកា ឆ្នាំ ២០២៣។ ពួកគេបានស្នើសុំនីតិវិធីដើម្បីដោះស្រាយវិវាទការងាររបស់ពួកគេជាសមូហភាព។
លើសពីនេះ កម្មករនយោជិតបានជំរុញឱ្យក្រុមហ៊ុនបញ្ឈប់ការរើសអើងលើមេដឹកនាំសហជីព សកម្មជន និងសមាជិកនៃសហព័ន្ធសហជីពស្មារតីកម្មករខ្មែរ និងធ្វើឱ្យក្រុមហ៊ុនក្លាយជាសហគ្រាសមួយ ដែលមានសហគមន៍ប្រកបដោយសុខសាន្តពេញលេញ។
អ្នកស្រី សេង សុភាព អាយុ ៤១ឆ្នាំ ដែលបានបម្រើការងារនៅរោងចក្រ សិន តៃ អស់រយៈពេល ១១ឆ្នាំមកហើយនោះ បានប្រាប់ ខេមបូចា ថា ពួកគេបានចេញមុខ ដាក់ពាក្យបណ្ដឹងទៅក្រសួង ដោយសារពួកគេចង់ឱ្យមានការអន្តរាគមន៍ដោះស្រាយសំណើទាំង ១៣ ចំណុចនេះឱ្យបានលឿន ជាពិសេសសំណើលើការទូទាត់ពេញលេញ នៃការរួមចំណែកបង់ភាគទានដល់បេឡាជាតិរបបសន្តិសុខសង្គម។
អ្នកស្រីនិយាយថា៖ «វាជារឿងអយុត្តិធម៌សម្រាប់ខ្ញុំក្នុងនាមជាតំណាងកម្មករ ហើយយើងត្រូវបានគេរើសអើង។ ខ្ញុំចង់ឲ្យរដ្ឋមន្ត្រី ហេង សួរ ជួយពិចារណាថាតើនេះ [ស្ថានភាពក្នុងរោងចក្រ] មានអ្វីខុសប្រក្រតីឬអត់ ហើយមើលថា តើវាអយុត្តិធម៌ណាស់សម្រាប់យើងឬអត់»។
លោក កឹម សុផេន ប្រធានសហព័ន្ធសហជីពស្មារតីកម្មករខ្មែរប្រចាំរោងចក្រ បានប្រាប់ ខេមបូចា ថា រហូតមកដល់ពេលនេះ មិនទាន់មានដំណោះស្រាយណាមួយសម្រាប់កម្មករនិយោជិតនោះទេ ជាពិសេសទាក់ទងនឹងអត្ថប្រយោជន៍នៃរបបសន្តិសុខសង្គម។
លោកអះអាងថា ប្រសិនបើពាក្យស្នើសុំដាក់ទៅក្រសួងតាមនីតិវិធីច្បាប់មិនមានដំណោះស្រាយសមស្របទេ តំណាងកម្មករនិយោជិត គ្រោងនឹងលើកយកបញ្ហានេះទៅកាន់ភាគីអ្នកបញ្ជាទិញរបស់រោងចក្រវិញ។ ការបង្វែរបញ្ហានេះទៅកាន់អ្នកបញ្ជាទិញទំនិញពីរោងចក្រ គឺជាជម្រើសចុងក្រោយមួយដើម្បីឱ្យអ្នកបញ្ជាទិញជួយជំរុញ ក្នុងការរកដំណោះស្រាយលើបញ្ហាដែលកើតឡើងជាមួយនឹងភាគីរោងចក្រ។
លោកសុផេនបន្តថា៖ «ខ្ញុំជឿថា ថ្នាក់ដឹកនាំក្រសួងនឹងមានដំណោះស្រាយសម្រាប់កម្មករ និងសហជីព ព្រោះនេះមិនមែនជាបញ្ហាធំទេ។ វាជាបញ្ហានិយាយអំពីអត្ថប្រយោជន៍របស់កម្មករ និងសិទ្ធិរបស់ពួកគេនៅកន្លែងធ្វើការ»។
ទន្ទឹមនេះ ប្រធានរដ្ឋបាលក្រុមហ៊ុន សិន តៃ លោក បូរ ប៊ុនលី បានប្រាប់ ខេមបូចា ថា លោកមិនទាន់បានទទួលដំណឹងថា កម្មករនិយោជិតបានដាក់ពាក្យប្តឹងទៅក្រសួងការងារនៅឡើយទេ។ លោកបន្តទៀតថា ទោះយ៉ាងណា រោងចក្របានព្យាយាមដោះស្រាយរាល់សំណើដែលកម្មករនិយោជិតបានដាក់មក។
លោកនិយាយថា៖ «យើងក៏បានពិភាក្សារកដំណោះស្រាយជាមួយក្រសួងផងដែរ។ ថាតើការស៊ើបអង្កេតបន្តឬអត់ […] ព្រោះយើងជំទាស់នឹងសំណើរបស់កម្មករ ដោយសារមានការសង្ស័យ ដូច្នេះយើងទុកវាទៅលើក្រសួងដើម្បីសម្រេច និងដោះស្រាយតាមនីតិវិធីរបស់ពួកគេ»។
អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក កត្តា អ៊ន បានប្រាប់ ខេមបូចា ថា ករណីក្រុមហ៊ុន សិន តៃ គឺមិនមែនជាបញ្ហារបស់កម្មករនិយោជិតទេ ប៉ុន្តែបញ្ហាគឺថា «សហជីពមិនអាចទទួលបានប្រាក់ខែរបស់ពួកគេ» ដូច្នេះពួកគេដាក់ «ពាក្យបណ្តឹង» ជាបន្តបន្ទាប់។
លោកបានអះអាងថា ផ្អែកលើការត្រួតពិនិត្យដោយអធិការកិច្ចការងារលើរោងចក្រ គឺក្រុមហ៊ុន «មិនបានបំពានលក្ខខណ្ឌការងារណាមួយឡើយ»។
លោកអ៊ន មិនបានឆ្លើយតបនឹងសំណួរថាតើក្រសួងនឹងដោះស្រាយដោយរបៀបណាចំពោះការរួមចំណែកបង់ភាគទានតិចតួចដល់បេឡាជាតិរបបសន្តិសុខសង្គមដោយក្រុមហ៊ុន សិន តៃ នោះទេ ប៉ុន្តែលោកបានឆ្លើយថា មានឧបទ្ទវហេតុស្រដៀងគ្នានៃការកាត់បន្ថយវិភាគទានសន្តិសុខសង្គមដោយក្រុមហ៊ុននាពេលកន្លងមក។
ក្រុមហ៊ុនត្រូវបានផាកពិន័យតាមច្បាប់ ហើយពួកគេក៏បាន និងកំពុងរួមចំណែកជាមួយ «ចំនួនត្រឹមត្រូវ» សម្រាប់កម្មករនិយោជិតចាប់តាំងពីខែមិថុនា ឆ្នាំ ២០២៤ មក។
លោកលើកឡើងថា៖ «ក្រសួងតែងតែរង់ចាំសម្របសម្រួល ដោះស្រាយជូនរាល់បញ្ហា ឬសំណូមពររបស់កម្មករជានិច្ចឲ្យតែចេញពីឆន្ទៈពិតប្រាកដ»។
លោកក៏បានរំឮកដល់សហជីពទាំងអស់ ត្រូវបំពេញតួនាទីរបស់ខ្លួនឱ្យបានខ្ជាប់ខ្ជួនប្រកបដោយវិជ្ជាជីវៈ ដែលស្របតាមច្បាប់ការងារបានចែង៕
ប្រែសម្រួលពីអត្ថបទភាសាអង់គ្លេស៖ Zhen Tai Workers’ Representatives File Complaint With Labor Minister After All Requests Were Rejected
