ការប្រណាំងរទេះសាឡី គោលឿន ប្រចាំឆ្នាំ២០២៥ ត្រូវបានប្រារព្ធនៅព្រឹកថ្ងៃចន្ទ ទី៧ ខែមេសា នាក្រុងច្បារមន ខេត្តកំពង់ស្ពឺ ។
ពិធីនេះត្រូវបានរៀបចំឡើងដោយមន្ទីរវប្បធម៌និងវិចិត្រសិល្បៈខេត្តកំពង់ស្ពឺ ក្រោមកិច្ចសហការជាមួយសហភាពសហព័ន្ធយុវជនកម្ពុជាខេត្តកំពង់ស្ពឺ រដ្ឋបាលក្រុងច្បារមន ព្រមទាំងសមាគមរទេះសាឡី គោលឿន ខេត្តកំពង់ស្ពឺ ។
មន្ទីរវប្បធម៌និងវិចិត្រសិល្បៈខេត្តកំពង់ស្ពឺ បានឱ្យដឹងថា គោលបំណងនៃការប្រារព្ធពិធីនេះ គឺដើម្បីចូលរួមអភិរក្ស លើកស្ទួយ អភិវឌ្ឍ និងផ្សព្វផ្សាយឱ្យកាន់តែទូលំទូលាយនូវប្រពៃណី ប្រណាំងរទេះសាឡី គោលឿន នៅក្នុងខេត្ត កំពង់ស្ពឺ ដែលបុព្វបុរសខ្មែរបានបន្សល់ទុកជា យូរយារណាស់មកហើយ ហើយក៏ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិ ដែលនឹងចូលមកដល់នៅម៉ោង ៤ និង ៤៨នាទីព្រឹកថ្ងៃចន្ទ ២រោច ខែចេត្រ ឆ្នាំម្សាញ់ សប្ដស័ក ពុទ្ធសករាជ ២៥៦៨ ត្រូវនឹងថ្ងៃទី១៤ ខែមេសា ឆ្នាំ២០២៥ ។
មន្ទីរវប្បធម៌ និងវិចិត្រសិល្បៈខេត្តកំពង់ស្ពឺបញ្ជាក់ថា បើតាមការសិក្សាអំពីប្រវត្តិនៃពិធីនេះ គឺកាលពីដើមឡើយគេប្រើប្រាស់រទេះសាឡីគោ សម្រាប់តែការដឹកជញ្ជូនភ័ស្តុភារបណ្ណាការ និងចាស់ទុំចូលរួមក្នុងពិធីអាអាពាហ៍ពិពាហ៍ ពិធីបុណ្យប្រពៃណី និងពិធីបុណ្យផ្សេងៗទៀតប៉ុណ្ណោះ លុះចំណេរក្រោយមក អ្នកស្រុកអ្នកភូមិក៏បានផ្តួចផ្តើមគំនិត បង្កើតពិធីប្រណាំងរទេះសាឡីគោនេះនៅតាមភូមិ នៅតាមសហគមន៍ និងនៅតាមទីប្រជុំជន ដើម្បីអបអរក្នុងឱកាសត្រៀមរៀបចំពិធីបុណ្យចូលឆ្នាំថ្មីប្រពៃណីជាតិទៀតផង ។
ក្នុងពិធីប្រកាសលទ្ធផលផ្ដាច់ព្រ័ត្រនៃការប្រណាំងរទេះសាឡី គោលឿន ឆ្នាំ២០២៥ ពានរង្វាន់ត្រូវបានប្រគល់ជូនបេក្ខជនជ័យលាភីចំណាត់ថ្នាក់ពីលេខ ១ ដល់លេខ ៥ តាមផ្នែកនីមួយៗ គឺផ្នែកគោខ្នាតធំ និងគោខ្នាតតូច ៕
