ភ្នាក់ងារដឹកជញ្ជូនម្ហូបអាហារ និងទំនិញផ្សេងៗនៃក្រុមហ៊ុន WOW NOW ប្រមាណជាង ១០០នាក់ បាននាំគ្នាតវ៉ានៅខាងមុខអគារក្រុមហ៊ុនដ៏ស្កឹមស្កៃ នាវិថី ៣១០ ស្ថិតក្នុងខណ្ឌបឹងកេងកង រាជធានីភ្នំពេញ នៅថ្ងៃទី២៩ ខែធ្នូ ឆ្នាំ២០២៣ ។
ក្រុមអ្នកតវ៉ាបានឱ្យដឹងថា នេះជាលើកទី២ហើយ ដែលពួកគាត់នាំគ្នាមកទាមទារឱ្យក្រុមហ៊ុនផ្ដល់ដល់ពួកគាត់វិញ នូវអត្ថប្រយោជន៍ទាំងអស់ ដែលក្រុមហ៊ុនធ្លាប់បានផ្ដល់សម្រាប់ពួកគាត់ ដូចជា ប្រាក់ខែ ប្រាក់រង្វាន់លើកទឹកចិត្ត និងប្រាក់កម្រៃថ្លៃឈ្នួលដឹកជញ្ជូនជាដើម ។
តំណាងក្រុមអ្នកតវ៉ាជាង ១០នាក់បានចូលចរចាជាមួយភាគីក្រុមហ៊ុន ។ ជាលទ្ធផល ភាគីទាំងពីរបានព្រមព្រៀងគ្នាជាលាយលក្ខណ៍អក្សរ លើចំណុចចំនួនបីទាក់ទិននឹងអត្ថប្រយោជន៍និងលក្ខខណ្ឌការងារ ។
ទោះបីយ៉ាងណា មេដឹកនាំសហជីពដែលកំពុងតាមឃ្លាំមើលការរំលោភសិទ្ធិកម្មករទាំងក្នុងនិងក្រៅប្រព័ន្ធ បានហៅករណីនេះថា ជាចរិតក៏ដូចជាទម្លាប់របស់វិនិយោគិនមួយចំនួន ដែលព្យាយាមធ្វើល្អតែពីខាងដើម ។
ខេមបូចា បានទូរស័ព្ទជួបតំណាងក្រុមហ៊ុន ដើម្បីការបំភ្លឺអំពីករណីនេះ នៅល្ងាចថ្ងៃសុក្រ ប៉ុន្តែតំណាងក្រុមហ៊ុនបានប្រាប់ថា កំពុងជាប់រវល់ចរចាជាមួយក្រុមអ្នកតវ៉ា ។
សូមទស្សនាវីដេអូរបស់ ខេមបូចា អំពីការទាមទារចង់បានរបស់ក្រុមអ្នកតវ៉ា !
