អាជ្ញាធរឃុំស្រែខ្វាវ ស្រុកអង្គរជុំ ខេត្តសៀមរាប បន្តការយកចិត្តទុកដាក់ដោយបង្កើនការផ្សព្វផ្សាយអំពី អំពើហិង្សាក្នុងសហគមន៍ កាន់តែទូលំទូលាយដល់ប្រជាពលរដ្ឋ ដើម្បីលុបបំបាត់អំពើហិង្សាក្នុងគ្រួសារ និងសហគមន៍ និងជួយដល់ជនរងគ្រោះទាន់ពេលវេលា។
កញ្ញា ស៊ុន សាក់ស៊ី ជាពលរដ្ឋរស់នៅក្នុងឃុំស្រែខ្វាវ ស្រុកអង្គរជុំ បានលើកឡើងថា អាជ្ញាធររបស់ខ្លួនតែងតែយកចិត្តទុកដាក់ជានិច្ច ក្នុងការចូលរួមផ្សព្វផ្សាយនិងអន្តរាគមន៍លើករណីអំពើហិង្សាក្នុងសហគមន៍ពេលកើតមានឡើង។ ទោះជាយ៉ាងណា កញ្ញា សាក់ស៊ី ចង់ឲ្យអាជ្ញាធរខិតខំបន្ថែមទៀតក្នុងការទប់ស្កាត់។
កញ្ញាបានថ្លែងថា៖ «ខ្ញុំនៅតែទទូចឱ្យអជ្ញាធរបន្តយកចិត្តទុកដាក់បង្កើនការផ្សព្វផ្សាយឱ្យបានទូលំទូលាយដល់ប្រជាពលរដ្ឋ»។
លោក លី សារៀន មេឃុំស្រែខ្វាវ បានថ្លែងថា ក្នុងឃុំរបស់លោកផ្ទាល់បញ្ហាអំពើហិង្សាក្នុងគ្រួសារមានការកាត់បន្ថយច្រើនគួរឲ្យកត់សម្គាល់។ ហើយអាជ្ញាធរពាក់ព័ន្ធ តែងតែចុះផ្សព្វផ្សាយ និងអន្តរាគមន៍ជាប់ជានិច្ចទាក់ទងនិងករណីអំពើហិង្សាក្នុងគ្រួសារដែលកើតមានឡើងក្នុងនៅមូលដ្ឋាន។
លោកបន្តថា៖ «អាជ្ញាធរនៅតែបន្តមានវិធានការ ផ្សព្វផ្សាយ អប់រំណែនាំ ដើម្បីឱ្យប្រជាពលរដ្ឋកាន់តែយល់ដឹងបានច្រើនជាងនេះទៀត ដើម្បីចូលរួមទប់ស្កាត់អំពើហិង្សាក្នុងគ្រួសារឲ្យមានប្រសិទ្ធិភាព»។
លោកបានថ្លែងឲ្យដឹងបន្តទៀតថា អាជ្ញាធរឃុំមានតួនាទីយ៉ាងសំខាន់ក្នុងការជួយអន្តរាគមន៍ទៅដល់ជនរងគ្រោះដោយ អំពើហិង្សាក្នុងគ្រួសារ និងអប់រំផ្លូវច្បាប់ទៅដល់ពលរដ្ឋនៅក្នុងមូលដ្ឋានរបស់ខ្លួន ដោយសារតែស្រី្តជាជនរងគ្រោះភាគច្រើននៅពុំទាន់យល់ដឹងអំពីផ្លូវច្បាប់បានទូលំទូលាយនៅឡើយ ដែលជាហេតុធ្វើឲ្យជនរងគ្រោះបន្តរួមរស់ជាមួយប្តីក្នុងស្ថានភាពហិង្សាជាបន្តទៀត។
លោកបន្ថែមថា៖ «ដូច្នេះការទប់ស្កាត់អំពើហិង្សាឲ្យមានប្រសិទ្ធិភាពលុះណាតែមានការចូលរួមទាំងអស់គ្នាទាំងពលរដ្ឋនិងអាជ្ញាធរ»៕
