សមាគមសម្ព័ន្ធអ្នកសារព័ត៌មានកម្ពុជា

អាជ្ញាធរពង្រាយកម្លាំងពង្រឹងសន្តិសុខ​២៤​ម៉ោង ដើម្បីរក្សាសុត្ថិភាព​ជូន​ពលរដ្ឋ និងភ្ញៀវទេសចរនៅខេត្តសៀមរាប

នគរបាលពង្រាយកំលាំងទៅតាមគោលដៅយាមល្បាត ដើម្បីពង្រឹងសុវត្ថិភាពដល់ពលរដ្ឋ និងភ្ញៀវទេសចរ។ (រូបថត ហាង សុជាតា)
នគរបាលពង្រាយកំលាំងទៅតាមគោលដៅយាមល្បាត ដើម្បីពង្រឹងសុវត្ថិភាពដល់ពលរដ្ឋ និងភ្ញៀវទេសចរ។ (រូបថត ហាង សុជាតា)

អាជ្ញាធរខេត្តសៀមរាប​បានដាក់ពង្រាយនគរបាលយាមល្បាតប្រចាំការនៅតាមគោលដៅ២៤ម៉ោងលើ២៤ម៉ោង ដើម្បី​រក្សានូវសុខសុវត្ថិភាពដល់ប្រជាពលរដ្ឋរស់នៅក្នុងខេត្ត និងភ្ញៀវទេសចរដែលមកទស្សនានៅតំបន់​ទេសចរណ៍​​ប្រវត្តិសាស្រ្ត វប្បធម៌ ធម្មជាតិ។

ស្នងការរងទទួលផែនការងារនគរបាលព្រហ្មទណ្ឌ លោកវរសេនីយ៍ឯក នួន ស័ក្តិចំរើនរិទ្ធ ថ្លែងនៅ​ក្នុង​កម្មវិធី​សន្ទនា​មតិរបស់វិទ្យុជាតិខេត្តសៀមរាបថា ខេត្តសៀមរាប មាន១២ក្រុង ស្រុក  និងប្រជាពលរដ្ឋរស់នៅ​អចិន្ត្រៃយ៍​សរុបចំនួន ១១៥ ៧៧៨២នាក់ ដោយកំលាំងនគរបាលមានជាង២ពាន់នាក់ ដែលកំពុងបំរើភារកិច្ច និងទ្រទ្រង់​សភាពការ​ជារួម ដើម្បីការពារសន្តិសុខ សណ្តាប់ធ្នាប់ ជូនពលរដ្ឋ ភ្ញៀវទេសចរជាតិ និងអន្តរជាតិ។​

លោកថា​៖ «មន្រ្តីសមត្ថកិច្ចបានអនុវត្តនូវតួនាទី ដោយយកចិត្តទុកដាក់ប្រឹងប្រែងមិនក្លាចនឿយហត់ និងបន្តពង្រឹងការការពារសន្តិសុខសណ្តាប់ធ្នាប់ ដើម្បីឲ្យខេត្តយើងមានសន្តិសុខ និងសុវត្ថិភាពល្អ»

ប្រភពដដែលបន្ថែមថា បច្ចុប្បន្ននេះការងារសន្តិសុខ អាជ្ញាធរពាក់ព័ន្ធទាំងអស់​បាននិងកំពុង​ធ្វើការរឹតបន្តឹង​បន្ថែម​ទៀត ដោយធ្វើការ​យាមល្បាតទាំងយប់ទាំងថ្ងៃ គឺ២៤ម៉ោងលើ២៤ម៉ោង ជាពិសេសនៅតំបន់ដែលមានភាព​ស្មុក​ស្មាញ​ក្នុងក្រុង ដើម្បីទប់ស្កាត់ឲ្យបានល្អប្រសើរនូវរាល់បទល្មើសផ្សេងៗ។

ពលរដ្ឋរស់នៅក្នុងក្រុងសៀមរាបលោក សាង បានលើកឡើងថា ចំពោះសន្តិសុខសណ្តាប់ធ្នាប់នៅក្នុងសៀមរាប គឺមានភាពល្អប្រសើរ ដោយសារតែអាជ្ញាធរពាក់ព័ន្ធទាំងអស់តែងតែធ្វើការពង្រឹង​ការយាមល្បាតជា​ប្រចាំមិន​ថា​យប់ឬថ្ងៃឡើយ ក្នុងគោលបំណងរក្សានូវសុខសុវត្ថិភាពដល់បងប្អូនប្រជាពលរដ្ឋ ព្រមទាំងភ្ញៀវទេសចរផងដែរ។

លោក សាង បន្ថែមថា៖ «នៅក្នុងខេត្តមិនសូវមានភាពអសន្តិសុខកើតឡើងនោះទេ ដោយសារសមត្ថកិច្ច​យាម​ល្បាត ជាប្រចាំមិនថាយប់ ឬថ្ងៃ ដើម្បីរក្សានូវសុខសុវត្ថិភាពដល់បងប្អូនប្រជាពលរដ្ឋ និងភ្ញៀវទេសចរ»

មិនខុសពីការលើកឡើងខាងលើ លោក សុភាក់ រស់នៅក្នុងក្រុងសៀមរាបដែរនោះ ថា លោកតែងតែឃើញមាន សមត្ថកិច្ចនៅប្រចាំការ និងយាមល្បាតនៅកន្លែងទីប្រជុំជន និងកន្លែងផ្សេងៗនៅតាមគោលដៅទេសចរណ៍ ដើម្បី​ផ្តល់​នូវសុខសុវត្ថិភាព និងភាពកក់ក្តៅដល់ពលរដ្ឋព្រមទាំងភ្ញៀវទេសចរបានយ៉ាងល្អប្រសើរ។

លោក សុភាក់ បញ្ជាក់ថា​៖ «តែងឃើញមានសមត្ថកិច្ចនៅប្រចាំការ និងយាមល្បាតនៅកន្លែងទីប្រជុំជន និង កន្លែងផ្សេងៗនៅតាមគោលដៅទេសចរណ៍ ដើម្បីផ្តល់នូវសុខសុវត្ថិភាពនិងភាពកក់ក្តៅដល់ពលរដ្ឋ​ព្រម​ទាំង​ភ្ញៀវទេសចរបានយ៉ាងល្អប្រសើរ»។

គួរបញ្ជាក់ផងដែរថា ​នៅក្នុងឱកាសសម្ពោធដាក់ឱ្យប្រើប្រាស់ជាផ្លូវការ អាកាសយា​នដ្ឋានអន្តរជាតិសៀមរាបអង្គរ នាថ្ងៃទី១៦ ខែវិច្ឆិកា ឆ្នាំ២០២៣ នាយករដ្ឋមន្រ្តីនៃកម្ពុជា លោក ហ៊ុន ម៉ាណែត បានណែនាំបន្ថែមដល់អាជ្ញាធរ​ខេត្តសៀមរាប ត្រូវខិតខំក្នុងការការពារសន្តិសុខ សណ្ឋាប់ធ្នាប់ នៅតំបន់ជុំវិញអាកាសយានដ្ឋានអន្តរជាតិ​សៀមរាប​អង្គរ និងក្នុងខេត្តសៀមរាបទាំងមូល ដើម្បី​ធានាសុវត្ថិភាពដល់ភ្ញៀវទេសចរដែលមកកម្សាន្តនៅក្នុងខេត្ត ខណៈបច្ចុប្បន្ននេះ រាជរដ្ឋាភិបាលបាននិងកំពុងខិតខំ​ចរចាជំរុញការតភ្ជាប់ជើងហោះហើរបន្ថែមមកកាន់​អាកាស​យានដ្ឋាន​អន្តរជាតិថ្មី៕

នគរបាលពង្រាយកំលាំងទៅតាមគោលដៅយាមល្បាត ដើម្បីពង្រឹងសុវត្ថិភាពដល់ពលរដ្ឋ និង​ភ្ញៀវទេសចរ។ (រូបថត ហាង សុជាតា)
110 views

ព័ត៌មានទាក់ទង