សមាគមសម្ព័ន្ធអ្នកសារព័ត៌មានកម្ពុជា

សមត្ថកិច្ចបង្ក្រាបបទល្មើសនេសាទខុសច្បាប់ក្នុងស្រុក៤ ជាប់បឹងទន្លេសាបបានចំនួន ១៩លើក

លោក ប៊ុន ឡេង នាយរងការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការនគរបាលខេត្តបាត់ដំបង ក្នុងកម្មវិធីសន្ទនាមតិ នៃវិទ្យុជាតិចំការចេក។ រូបថត៖ រី មុនីបញ្ញា
លោក ប៊ុន ឡេង នាយរងការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការនគរបាលខេត្តបាត់ដំបង ក្នុងកម្មវិធីសន្ទនាមតិ នៃវិទ្យុជាតិចំការចេក។ រូបថត៖ រី មុនីបញ្ញា

សមត្ថកិច្ចបង្ក្រាបបទល្មើសនេសាទខុសច្បាប់ក្នុងភូមិសាស្រ្ត ស្រុកទាំង៤ នៃខេត្តបាត់ដំបង ដែលជាប់បឹងទន្លេសាប បានចំនួន ១៩លើក និងដកហូតឧបករណ៍នេសាទខុសច្បាប់ជាច្រើន។

លោក ប៊ុន ឡេង នាយរងការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការនគរបាល​ខេត្តបាត់ដំបង បានឱ្យដឹងតាមការលើកឡើង ក្នុងកម្មវិធីសន្ទនាមតិ នៃវិទ្យុជាតិចំការចេក ខេត្តបាត់​ដំបង ថា សមត្ថកិច្ចបង្ក្រាបបទល្មើសនេសាទខុសច្បាប់ក្នុង ស្រុកសង្កែ ស្រុកឯកភ្នំ ស្រុកមោងឬស្សី និងស្រុកថ្មគោល។ លោកថា ការបង្រ្កាបបទលើ្មស​នេសាទ​នេះមានផលលំបាកជាច្រើន ដោយពេលខ្លះជួនព្យុះភ្លៀង កណ្តាលទន្លេ ហើយមាន​ការលាក់​ទុកនូវ​ឧបករណ៍​ខុសពីច្បាប់កំណត់ក្នុងព្រៃ ហើយពិបាកចាប់។

 លោកបានថ្លែង​ឲ្យ​ដឹង​បន្ត​ទៀត​ថា៖ «ខ្លះណា ដោយសារការធ្វើដំណើរផ្លូវទឹកមានរយៈចម្ងាយឆ្ងាយ ទម្រាំកម្លាំងសមត្ថកិច្ចចុះទៅដល់ ពួកគាត់ដឹងមុន រើឧបករណ៍ខុសច្បាប់ចេញ។ ទោះយ៉ាងណាក្តី ក្រុមកម្លាំងសមត្ថកិច្ចតែងចុះពិនិត្យ គ្រប់ពេលវេលា តាមបទបញ្ជារបស់ប្រមុខថ្នាក់ដឹកនាំ ចុះអនុវត្ត បង្ការបង្រ្កាប ដកហូត មានការណែនាំអប់រំ ជាដើម»។

លោកបន្តថា បច្ចុប្បន្ននេះមានការចាត់កម្លាំងជំនាញពីស្នងការនគរបាលខេត្ត ទៅប្រចាំការនៅ ភូមិ​សាស្រ្តមូលដ្ឋាន ដែលប្រព្រឹត្តបទល្មើសនេះ ដោយសហការជាមួយសហគមន៍នេសាទ ដើម្បី​ចុះ​សកម្មភាពជាប្រចាំ ។ លោកបន្ថែមទៀតថា ៖ «ខ្ញុំ​សំណូមពរ​ទៅកាន់បងប្អូនប្រជាពលរដ្ឋ​ដែល​មាន​លាក់ទុកនូវឧបករណ៍នេសាទខុសច្បាប់ សុំមេត្តាប្រគល់ជូនសមត្ថកិច្ចនិងបញ្ឈប់រាល់ សកម្មភាព​នេសាទ ឬប្រើប្រាស់ឧបករណ៍ ខុសពីការកំណត់របស់ច្បាប់ជលផល ដោយគិតពីប្រយោជន៍រួម ជាជាងផលចំណេញប្រយោជន៍ខ្លួនឯង»។

គួរបញ្ជាក់ថា ត្រឹមខែសីហានេះ សមត្ថកិច្ច បង្រ្កាបបទល្មើសនេសាទបានសរុប ១៩លើក សាច់ម៉ង​៣០​៦​៦០ម៉ែត្រ ឡុកចំនួន១១៥ក្បាល លូ៣១មាត់ បង្គោល១៥៧៣០ដើម អួន៨២០០ម៉ែត្រ អ៊ុយ១៨មាត់ និងលែងត្រីចម្រុះចូលបឹងធម្មជាតិវិញ ៥១២គីឡូក្រាម ព្រមទាំងប្រមូលឧបករណ៍នេសាទខុសច្បាប់​ពី​ប្រជាពលរដ្ឋយកមកប្រគល់ជូនមានដូចជា សាច់ម៉ង ១៧៧១០ ម៉ែត្រ ប ៦ក្បាល អាំងវ៊ិចទ័រ ៤៣​១​គ្រឿង ដងឆក់ ១៣គូ ឆក់កណ្តុរ ០១គ្រឿង ស្បៃអ៊ុយ៨វង់ និងតាលូទូ០៥វង់ ដែលប្រជាពលរដ្ឋ​មានមកពីស្រុកឯកភ្នំ ស្រុកមោងឬស្សី និង ស្រុកសង្កែ ។

ដោយ​ពលរដ្ឋសារព័ត៌មាន រី មុនីបញ្ញា

191 views

ព័ត៌មានទាក់ទង