សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋរស់នៅសង្កាត់ត្រើយកោះ ស្នើសុំចៅសង្កាត់ឲ្យជួយជួសជុលផ្លូវមួយខ្សែឡើងវិញ

ផ្លូវនៅភូមិត្រើយកោះមានសភាពខូចខាតខ្លាំង ទាំងរដូវវស្សារនិងរដូវប្រាំង។ រូបភាព ឆន រីយ៉ា
ផ្លូវនៅភូមិត្រើយកោះមានសភាពខូចខាតខ្លាំង ទាំងរដូវវស្សារនិងរដូវប្រាំង។ រូបភាព ឆន រីយ៉ា

ប្រជាពលរដ្ឋរស់នៅក្នុង​សង្កាត់ត្រើយកោះ ស្រុក​ទឹក​ឈូ ខេត្ត​កំពត ទទូចសុំដល់ចៅសង្កាត់ឲ្យជួយជួសជុលផ្លូវមួយខ្សែឡើងវិញ ដោយសារ​ផ្លូវមានសភាពទ្រុឌទ្រោម ដែលធ្វើឲ្យពលរដ្ឋពិបាកក្នុងការធ្វើ​ដំណើរទាំងរដូវប្រាំង​និងរដូវវស្សា​​។

ប្រជាពលរដ្ឋដែល​សូម​មិន​បញ្ចេញឈ្មោះ​បានឱ្យដឹងថា ផ្លូវនៅភូមិនេះមានសភាពខូចខាត​ខ្លាំង ទាំងរដូវវស្សានិងរដូវប្រាំង។ នៅក្នុងរដូវប្រាំង​ មានជង្ហុកធំៗរលាក់ ចំណែកខែវស្សាបើធ្វើដំណើរដោយរថយន្តឬម៉ូតូមានការស្អិតជាប់ រឺ​ជាប់ផុង និងមានភក់ជ្រាំ។

ក្រុមពលរដ្ឋបាន​បន្ត​ឲ្យ​ដឹង​ទៀត​ថា ៖«ក្រុម​ពួកយើង​ខ្ញុំ​​ធ្លាប់មានការទទូចសុំដល់ចៅសង្កាត់ជាច្រើនលើកច្រើនសារមកហើយ អំពីការឲ្យជួយជួសជុលផ្លូវឡើងវិញ។ ហើយកន្លងមកមានការ​ជួសជុលជាបន្តបន្ទាប់ដែរប៉ុន្តែមិនមានលក្ខណៈយូរអង្វែងទេ»។

ជាការ​ឆ្លើយតប​ទៅ​នឹង​សំណូមពរ​របស់​ប្រជា​ពលរដ្ឋ​ លោក​ ពៅ សុន ចៅសង្កាត់ត្រើយកោះបានថ្លែងនៅក្នុងកម្មវិធីសន្ទនាមតិរបស់វិទ្យុជាតិ៩មករា ថា កន្លងមកមានការជួសជុលដោយទទួលបានជំនួយពីសប្បុរសជន ប្រជាជនមួយចំនួនហើយត្រូវបានផ្តល់ទៅកាន់ផ្លូវណាដែលមានអទិភាពជាង។ ផ្លូវមិនសូវមានអទិភាពមិនទាន់ជួសជុលនៅឡើយទេ ដោយយោងតាមថវិកាដែលមានស្តួចស្តើងប្រចាំឆ្នាំ។

លោកបានថ្លែង​ឲ្យ​ដឹងទៀតថា ៖«តែទោះជាយ៉ាងណា ខ្ញុំ​សំណូមពរឱ្យមានការចូលរួមសហការយ៉ាងសកម្មពីសំណាក់​​ប្រជាពលរដ្ឋនិងសប្បុរសជនទាំងអស់សម្រាប់អភិវឌ្ឍន៍ហេដ្ឋារចនាសម្ព័ន្ធក្នុងភូមិឡើងវិញផងដែរ»។

លោកចៅសង្កាត់លោក​ ពៅ សុន បានថ្លែងថា លោក​ បានដាក់ចេញផែនការថ្មីក្នុងការកែលម្អផ្លូវ​ ចាក់បេតុង ដោយមិនត្រូវការគ្រោះក្រហម ឬដីសទៀតទេ។  លោកថានៅក្នុងឆ្នាំ២០២០លោកធ្វើ​បាន​ដូចជា សមិទ្ធិផលផ្លូវបេតុងថ្មី១០០០ម៉ែត្រ និងធ្វើបន្ថែមទៀតបាន២៩២ម៉ែត្រ។ សង្កាត់បានកំពុងបន្តធ្វើបន្ថែមនិងសម្រេចបានសមិទ្ធិផលថ្មីទៀត។

133 views

ព័ត៌មានទាក់ទង