សេចក្តីសម្រេចរបស់គណៈកម្មការអឺរ៉ុបក្នុងការដកផ្នែកខ្លះនៃប្រព័ន្ធអនុគ្រោះពន្ធ «អ្វីៗគ្រប់យ៉ាងលើកលែងអាវុធ» ហៅកាត់ថា EBA សម្រាប់ទំនិញចូលទៅកាន់ទីផ្សារ សហភាពអឺរ៉ុប (EU) នោះ បានចូលជាធរមាននៅថ្ងៃទី១២ ខែសីហា ដោយនៅពេលនេះ ផលិតផលកាត់ដេរ ផលិតផលស្បែកជើង និងសម្ភារៈសម្រាប់ការធ្វើដំណើរប្រមាណជា ២០ភាគរយនឹងត្រូវជាប់កាតព្វកិច្ចបង់ពន្ធ។
សេចក្តីសម្រេចនេះបានកើតមាន បន្ទាប់ពីសហភាពអឺរ៉ុបបានប្រកាសឲ្យដឹងកាលពីខែកុម្ភៈថា ខ្លួនបានបញ្ចប់ការអង្កេតពេញមួយឆ្នាំរបស់ខ្លួនហើយបានរកឃើញថា ប្រទេសកម្ពុជាមិនទាន់បានធ្វើគ្រប់គ្រាន់ក្នុងការដោះស្រាយ ”កង្វល់ទាក់ទិននឹងបញ្ហារំលោភសិទ្ធិមនុស្សជាប្រព័ន្ធនិងធ្ងន់ធ្ងរ” ក្នុងប្រទេសនេះនៅឡើយទេ។
សេចក្តីថ្លែងការណ៍នេះបានឲ្យដឹងថា៖ «សហភាពអឺរ៉ុបចាប់ផ្តើមអនុវត្តវិធានការណ៍នេះ ស្របពេលនៅរក្សាទំនាក់ទំនងជាមួយកម្ពុជាជុំវិញកំណែទម្រង់ចាំបាច់នានា»។
លោក ហ្វីល ហូហ្គែន (Phil Hogan ) ជាស្នងការសហភាពអឺរ៉ុបទទួលបន្ទុកផ្នែកពាណិជ្ជកម្មបានលើកឡើងនៅក្នុងសេចក្តីថ្លែងការណ៍នេះថា សហភាពអឺរ៉ុបបានជួយប្រទេសកម្ពុជាអភិវឌ្ឍឧស្សាហកម្មកាត់ដេរជាឧស្សាហកម្មនាំចេញនិងបន្តចាំជួយប្រទេសនេះ ខណៈវិស័យកាត់ដេរកំពុងជួបការលំបាកដោយសារការធ្លាក់ចុះសេដ្ឋកិច្ចបណ្តាលមកពីវិបត្តិវីរ៉ុសកូវីដ-១៩។
លោកបានលើកឡើងក្នុងសេចក្តីថ្លែងការណ៍នេះថា៖ «ទោះបីជាយ៉ាងណា ការបន្តគាំទ្ររបស់យើងមិនបន្ធូរបន្ថយតម្រូវការបន្ទាន់ឲ្យប្រទេសកម្ពុជាគោរពសិទ្ធិមនុស្សនិងសិទ្ធិការងារនោះទេ»។
លោក បានបន្ថែមថា៖ «ខ្ញុំត្រៀមខ្លួនរួចជាស្រេច ដើម្បីបន្តទំនាក់ទំនងរបស់យើងនិងផ្តល់សិទ្ធិនាំចូលដោយរួចពន្ធពេញលេញទៅកាន់ទីផ្សារអឺរ៉ុបសម្រាប់ផលិតផលពីប្រទេសកម្ពុជាឡើងវិញ ប្រសិនបើយើងមើលឃើញនូវភាពរីកចម្រើនច្រើនលើបញ្ហានេះ»។
សេចក្តីថ្លែងការណ៍របស់សហភាពអឺរ៉ុបលើកឡើងថា៖ «សហភាពអឺរ៉ុបនឹងបន្តឃ្លាំមើលស្ថានភាពក្នុងប្រទេសនេះ ដោយផ្តោតការយកចិត្តទុកដាក់ជាសំខាន់លើការរឹតត្បិតលើសេរីភាពនៃការបញ្ចេញមតិនិងសិទ្ធិនយោបាយនាពេលបច្ចុប្បន្ន ព្រមទាំងជម្លោះដីធ្លីនិងសិទ្ធិការងារក្នុងបរិបទនៃកំណែទម្រង់ដែលកំពុងបន្តនេះ»។
លោក កុយ គួង អ្នកនាំពាក្យក្រសួងកាបរទេស នៃប្រទេសកម្ពុជា បានលើកឡើងនៅក្នុងសារតាមតេឡេក្រាមថា ជំហររបស់ក្រសួងកាបរទេសមិនផ្លាស់ប្តូរទេ ចាប់តាំងពីសហភាពអឺរ៉ុប ប្រកាសឲ្យដឹងពីសេចក្តីសម្រេចរបស់ខ្លួនកាលពីថ្ងៃទី១២ ខែកុម្ភៈ។
លោក កុយ គួង បានមានប្រសាសន៍ថា៖ «កន្លងមក យើងបានធ្វើការងារដើម្បីកែលម្អនិងលើកស្ទួយសិទ្ធិមនុស្សនិងលទ្ធិប្រជាធិបតេយ្យ ព្រមទាំងសិទ្ធិការងារ ក្នុងឋានៈជារដ្ឋឯករាជ្យនិងមានអធិបតេយ្យភាព»។
លោកបានបន្ថែមថា ការដកផ្នែកខ្លះនៃប្រព័ន្ធអនុគ្រោះពន្ធ EBA នឹងមិនប៉ះពាល់ដល់ទំនាក់ទំនងកម្ពុជានិងសហភាពអឺរ៉ុបទេ ហើយសហប្រតិបត្តិការទ្វេភាគីនឹងបន្តដដែល។
លោក កុយ គួង បានមានប្រសាសន៍ថា៖ «បើទោះបីជាមានការសម្រេចទាក់ទិននឹងប្រព័ន្ធអនុគ្រោះពន្ធ EBA ក៏ដោយ ក៏រាជរដ្ឋាភិបាលកម្ពុជានៅតែប្តេជ្ញាចិត្តខ្ពស់ក្នុងការបន្តលើកស្ទួយនិងកែលម្អស្ថានភាពសិទ្ធិមនុស្ស សិទ្ធិការងារនិងលទ្ធិប្រជាធិបតេយ្យក្នុងក្របខណ្ឌនៃរដ្ឋមានអធិបតេយ្យភាពនិងឯករាជ្យពេញលេញ»។
ចំណុចមួយចំនួនដែលសហភាពអឺរ៉ុបចង់ឃើញការរីកចម្រើនរួមមានការស្តាសេរីភាពនយោបាយ បង្កើតលក្ខខណ្ឌចាំបាច់ឡើងវិញសម្រាប់បក្សនយោបាយប្រឆាំង ដែលអាចជឿទុកចិត្តបាននិងធ្វើវិសោធនកម្មច្បាប់ដ៏ចម្រូងចម្រាស់ដូចជាច្បាប់ស្តីពីអង្គការមិនមែនរដ្ឋាភិបាលជាដើម។
សេចក្តីថ្លែងការណ៍របស់គណៈកម្មការអឺរ៉ុបលើកឡើងថា៖ «ប្រសិនបើរដ្ឋាភិបាលកម្ពុជាបង្ហាញការរីកចម្រើនគួរឲ្យកត់សម្គាល់ ជាពិសេសជុំវិញបញ្ហាសិទ្ធិនយោបាយនិងសិទ្ធិស៊ីវិល គណៈកម្មការអឺរ៉ុបអាចនឹងពិនិត្យមើលសេចក្តីសម្រេចរបស់ខ្លួនឡើងវិញ ហើយនឹងផ្តល់ប្រព័ន្ធអនុគ្រោះពន្ធក្រោមកិច្ចព្រមព្រៀង ‘អ្វីៗគ្រប់យ៉ាងលើកលែងអាវុធ’ ឡើងវិញ»។
លោក ហេង សួរ អ្នកនាំពាក្យក្រសួងការងារបានមានប្រសាសន៍តាមតេឡេក្រាមថា បើទោះបីជាមានការដកហូតផ្នែកខ្លះនៃ EBA ក៏ដោយ ក៏សហភាពអឺរ៉ុបនិងកម្ពុជានៅតែជាមិត្តនិងដៃគូយុទ្ធសាស្ត្រជាមួយគ្នាដដែល។
លោក ហេង សួរ បានមានប្រសាសន៍ថា៖ «ក្នុងឋានៈជាប្រទេសដែលមានអធិបតេយ្យភាពនិងឯករាជ្យពេញលេញ កម្ពុជាបំពេញយ៉ាងត្រឹមត្រូវតាមគោលការណ៍លទ្ធិប្រជាធិបតេយ្យនិងគោរពសិទ្ធិការងារដូចមានចែងក្នុងរដ្ឋធម្មនុញ្ញ ដោយមិនចាំបាច់មានប្រទេសណាមករំឭកកម្ពុជានោះទេ»។
លោកបានបន្ថែមថា បច្ចុប្បន្ន កម្ពុជាបារម្ភអំពីផលប៉ះពាល់ដោយសារបញ្ហាវីរុសកូវីដ១៩ ចំពោះឧស្សាហកម្មកាត់ដេរ។
លោក ហេង សួរ បានមានប្រសាសន៍ថា៖ «ការដកផ្នែកខ្លះនៃប្រព័ន្ធ EBA គឺគ្រាន់តែជាផ្នែកតូចមួយនៃបញ្ហាក្នុងដំណាក់កាលមានវិបត្តិកូវីដ១៩ប៉ុណ្ណោះ។ ប្រទេសកម្ពុជាបារម្ភខ្លាំងអំពីផលប៉ះពាល់ដោយសារវីរុសកូវីដ១៩ ពីព្រោះ…យើងត្រូវប្រឈមនឹងកង្វះវត្ថុធាតុដើមសម្រាប់វិស័យកាត់ដេរ ហើយដោយសារតែជំងឺនេះ យើងបារម្ភថា ចំនួនរោងចក្រដែលត្រូវបិទទ្វារនឹងកើនឡើង ប៉ុន្តែយើងស្ថិតនៅក្នុងតួលេខមួយដែលអាចគ្រប់គ្រងបានខុសពីការវាយតម្លៃពីដំបូង»។
លោកបានបន្ថែមថា ប្រទេសកម្ពុជាអាចរក្សាសកម្មភាពសេដ្ឋកិច្ចធម្មតាបើធៀបនឹងប្រទេសដទៃទៀតចំពេលមានការរីករាលវីរុសកូវីដ១៩នេះ។
លោក ហេង សួរ បានមានប្រសាសន៍ថា៖ «កម្ពុជាត្រូវតែបន្តនៅលើវិថីនៃផែនការសកម្មភាពកំណែទម្រង់របស់ខ្លួន ទាំងគោលនយោបាយសេដ្ឋកិច្ចនិងអភិបាលកិច្ច ដើម្បីរក្សាភាពប្រកួតប្រជែងដោយមិនពឹងផ្អែកខ្លាំងលើប្រព័ន្ធអនុគ្រោះពន្ធដូចមុនទៀត»។
រោងចក្រកាត់ដេរនិងរោងចក្រផលិតស្បែកជើងប្រមាណ២៥៦កន្លែងបានផ្អាកប្របត្តិការដោយសារវិបត្តិកូវីដ១៩ នេះបើយោងតាមលិខិតចេញផ្សាយកាលពីខែមិថុនាដោយសមាគមរោងចក្រកាត់ដេរកម្ពុជា (GMAC) សមាគមរោងចក្រ ផលិតស្បែកជើងនិងសភាពាណិជ្ជកម្មអឺរ៉ុបផ្ញើជូនសហភាពអឺរ៉ុបស្នើឲ្យពន្យារការដកផ្នែកខ្លះនៃប្រព័ន្ធអនុគ្រោះពន្ធ EBA នេះ ។
លិខិតនេះលើកឡើងថា រោងចក្រភាគច្រើននៅកម្ពុជាកំពុងប្រតិបត្តិការដោយកាត់បន្ថយសមត្ថភាពផលិត ហើយកម្មករជាង ១៣០.០០០នាក់បានបាត់បង់ការងាររួចហើយ។
លោក មឿន តុលា ជានាយកប្រតិបត្តិ មជ្ឈមណ្ឌលសម្ព័ន្ធភាពការងារ និងសិទ្ធិមនុស្សហៅកាត់ (Central) ជាអង្គការក្រៅរដ្ឋាភិបាលដែលគាំទ្រដល់ពលករកម្ពុជាបាននិយាយថា លោកសោកស្តាយចំពោះការបាត់បង់ផ្នែកខ្លះនៃប្រព័ន្ធអនុគ្រោះពន្ធ EBA ប៉ុន្តែបានអះអាងថា គោលបំណងរបស់សហភាពអឺរ៉ុបក្នុងការជួយអភិវឌ្ឍសេដ្ឋកិច្ចនិងកសាងលទ្ធិប្រជាធិបតេយ្យនៅកម្ពុជាដោយទាមទារឲ្យគោរពសិទ្ធិមនុស្ស ក៏ជារឿងសំខាន់ផងដែរ។
លោកបាននិយាយថា សេចក្តីសម្រេចរបស់សហភាពអឺរ៉ុបក្នុងការកាត់បន្ថយការអនុគ្រោះពន្ធត្រឹម២០ភាគរយលើទំនិញនាំចេញទៅកាន់អឺរ៉ុបបង្ហាញថា សហគមអឺរ៉ុបមានបំណងល្អ។
លោក មឿន តុលា បានមានប្រសាសន៍ថា៖ «បើទោះបីជាគេកាត់បន្ថយ ២០ភាគរយ [ EBA ] ក៏ដោយ ប៉ុន្តែគេអាចនឹងលុបចោលវិញ ប្រសិនបើកម្ពុជាធ្វើអ្វីមួយដែលគេមើលឃើញថា យើងកំពុងព្យាយាមកែលម្អ»។
លោកមានប្រសាសន៍ថា៖ «ថ្ងៃនេះ យើងសោកស្តាយដែលប្រទេសកម្ពុជាយើងមិនបានធ្វើកំណែទម្រង់ទៅតាមលក្ខខណ្ឌដែល EU បានស្នើហើយធ្វើឲ្យបាត់បង់ប្រព័ន្ធអនុគ្រោះពន្ធនេះ ដូច្នេះវាគួរឲ្យសោកស្តាយសម្រាប់ប្រទេសយើងទាំងមូលផងដែរ»។
លោក សយ ចន្ធូ ប្រធានសហព័ន្ធសហជីពសេរីឯករាជ្យ (FUFI) បានមានប្រសាសន៍ថា ការដកផ្នែកខ្លះនៃប្រព័ន្ធអនុគ្រោះពន្ធ គឺជាផលប៉ះពាល់មួយចំពោះកម្មករក្នុងវិស័យកាត់ដេរនិងផលិតស្បែកជើង។
លោក ចន្ធូ បានមានប្រសាសន៍ថា៖«កម្មករយើងនឹងបាត់បង់ការងារនិងអត្ថប្រយោជន៍ច្រើននាពេលអនាគត ដោយសារតែការសម្រេចដក EBA នេះ» ដោយបានបន្ថែមថា សហព័ន្ធនិងសហជីពជាង១០ រួមទាំង FUFI ផងដែរនឹងរៀបចំសន្និសីទកាសែតមួយនៅថ្ងៃទី១៤ ខែសីហា អំពីផែនការរបស់ខ្លួន។
GMAC និងសមាគមរោងចក្រផលិតស្បែកជើងកម្ពុជា (CFA) ក៏បានចេញសេចក្តីប្រកាសព័ត៌មានកាលពីថ្ងៃទី១២ ខែសីហា ដើម្បីប្រយោជន៍ដល់ក្រុមហ៊ុនជាសមាជិករបស់ខ្លួននិងអ្នកបញ្ជាទិញអន្តរជាតិ ដោយនិយាយលម្អិតពីការប្រែប្រួលជាក់លាក់នៅក្នុងសង្វាក់ផលិតកម្ម។
អ្នកនាំពាក្យក្រសួងពាណិជ្ជកម្មមិនអាចទាក់ទងសុំការអត្ថាធិប្បាយបានទេ៕
