យ៉ាងហោចណាស់ កម្មករ១០នាក់បានស្លាប់ក្នុងរយៈពេល២សប្តាហ៍ចុងក្រោយនេះ នៅចម្ការចេកមួយកន្លែង ក្នុងខេត្តរតនគិរី នេះបើតាមសម្ដីលោកអភិបាលខេត្តរតនៈគិរី ដែលបានមានប្រសាសន៍ថា ប៉ូលិសកំពុងស៊ើបអង្កេតករណីនេះថាតើការស្លាប់នេះ បណ្តាលមកពីសារធាតុគីមីដែលប្រើប្រាស់លើចេក ឬយ៉ាងណា។
លោក ញ៉ែម សំអឿន អភិបាលខេត្តរតនគិរី បានប្រាប់ខេមបូចា កាលពីថ្ងៃទី២៩ ខែមិថុនា ថា អាជ្ញាធរខេត្តកំពុងស៊ើបអង្កេតការស្លាប់កម្មករចំនួន១០នាក់នៅចម្ការចេក Thagrico ដែលគ្រប់គ្រងដោយជនជាតិវៀតណាម ក្នុងស្រុកកូនមុំ ខេត្តរតនគិរី ដែលករណីនេះកើតឡើងចាប់តាំងពីថ្ងៃទី១៦ ខែមិថុនា មកម្ល៉េះ។
លោក សំអឿន បញ្ជាក់ថា៖ «តាមការសន្និដ្ឋានជាបឋមយើងសន្មត់ថា វាអាចបណ្តាលមកពីសារធាតុគីមី ឬការពុលអាហារ ប៉ុន្តែមិនមែនមកពីជំងឺឆ្លងទេ។ យើងនៅមិនទាន់ប្រាកដនៅឡើយទេ»។
លោកអភិបាលខេត្តបានប្រាប់ខេមបូចា ឱ្យសាកសួរបន្ថែមទៀតទៅកាន់មន្ទីរពេទ្យខេត្តរតនគិរី។
ដោយឡែកលោកវេជ្ជៈបណ្ឌិត អ៊ុង រតនា ប្រធានមន្ទីរពេទ្យខេត្តរតនគិរី មិនអាចទាក់ទងសុំការបំភ្លឺបានទេកាលពីថ្ងៃព្រហស្បតិ៍។
ទន្នឹមនឹងនេះស្នងការនគរបាលខេត្តរតនគិរី លោក អ៊ុង សុភាព មានប្រសាសន៍ថា មន្ត្រីនគរបាល និងអាជ្ញាធរកំពុងបន្តស៊ើបអង្កេតលើករណីនេះ។
លោក បានថ្លែងថា៖ «ឥឡូវនេះយើងកំពុងធ្វើការស្រាវជ្រាវបន្ថែមទៀតព្រោះអ្នកខ្លះឈឺ ហើយខ្លះទៀតកំពុងព្យាបាលនៅមន្ទីរពេទ្យ យើងកំពុងធ្វើការដើម្បីបញ្ជាក់ថាពាក់ព័ន្ធអីខ្លះទៀត។»
មន្ត្រីថ្នាក់ខេត្តផ្សេងទៀតមិនអាចបញ្ជាក់ប្រាប់ព័ត៌មានបន្ថែមអំពីការស្លាប់នេះទេ។ លោក យិន យុទ្ធ មន្រ្តីរដ្ឋបាលស្រុកកូនមុំ បានឱ្យដឹងថា លោកមិនអាចបញ្ជាក់ចំនួនអ្នកស្លាប់បានទេ ប៉ុន្តែបានឃើញថាមនុស្សស្លាប់ម្តងហើយម្តងទៀត។
ចំពោះលោក ភោគ បូរិទ្ធ អធិការនគរបាលស្រុកកូនមុំ មិនអាចទាក់ទងសុំការបំភ្លឺបានទេ កាលពីថ្ងៃព្រហស្បតិ៍។
ករណីចម្ការចេក ខេមបូចា ធ្លាប់បានរាយការណ៍នៅឆ្នាំ២០២១ មានបញ្ហាធ្ងន់ធ្ងរលើកម្មករដែលធ្លាក់ខ្លួនឈឺនៅចម្ការចេក Thagrico ដោយមនុស្សជាច្រើនសង្ស័យថា វាបណ្តាលមកពីសារធាតុគីមីដែលពួកគេបាញ់ទៅលើផ្លែឈើ។ កម្មករតែងតែត្អូញត្អែរពីអាការៈវិលមុខ បញ្ហាក្រពះ ក្អួតចង្អោរ និងឈឺក្បាល បន្ទាប់ពីបាញ់ថ្នាំរួច។
កម្មករក៏បានលើកឡើងទៀតថា ពួកគេជំពាក់បំណុលមីក្រូហិរញ្ញវត្ថុយ៉ាងខ្លាំង ហើយមានការប្រើប្រាស់កម្លាំងពលកម្មពីកុមារមិនគ្រប់អាយុយ៉ាងទូលំទូលាយនៅក្នុងចម្ការនេះទៀតផង។
រាយការណ៏បន្ថែមដោយ ពក ពន្លឺ
ប្រែសម្រួលពីអត្ថបទភាសាអង់គ្លេស៖ 10 Dead At Ratanakiri Banana Farm, Officials Suspect Chemical Poisoning
