សមាគមសម្ព័ន្ធអ្នកសារព័ត៌មានកម្ពុជា

ភាសាខ្មែរ
  • English
  • ភាសាខ្មែរ

អង្គការសង្គមស៊ីវិលជំរុញឱ្យស៊ើបអង្កេត និងចាត់វិធានការលើករណីរកឃើញឈ្មោះ​មន្ត្រីប៉ូលិសស្ទួនជាង២ពាន់នាក់

រដ្ឋមន្ត្រីក្រសួងមហាផ្ទៃ លោក ស សុខា ចូលរួមក្នុងពិធីបើកយុទ្ធនាការធ្វើជំរឿនមន្ត្រី​នគរបាលជាតិ នៅថ្ងៃទី១៧ ខែវិច្ឆិកា ឆ្នាំ២០២៦។ (ហ្វេសប៊ុកផេក ស សុខា)
រដ្ឋមន្ត្រីក្រសួងមហាផ្ទៃ លោក ស សុខា ចូលរួមក្នុងពិធីបើកយុទ្ធនាការធ្វើជំរឿនមន្ត្រី​នគរបាលជាតិ នៅថ្ងៃទី១៧ ខែវិច្ឆិកា ឆ្នាំ២០២៦។ (ហ្វេសប៊ុកផេក ស សុខា)

ស្តាប់សំឡេងនៃអត្ថបទនេះ (បង្កើតដោយ AI)។

អង្គការសង្គមស៊ីវិលបានជំរុញឱ្យក្រសួងមហាផ្ទៃបន្តស៊ើបអង្កេតឱ្យបានស៊ីជម្រៅ និងកំណត់អ្នកទទួលខុសត្រូវ បន្ទាប់ពីរកឃើញឈ្មោះមន្ត្រីស្ទួន ឬមន្ត្រីខ្មោចជាង ២ ២០០នាក់ ក្នុងក្របខណ្ឌក្រសួង ដោយលើកឡើងថា ករណីនេះបង្កើនក្តីបារម្ភអំពីការគ្រប់គ្រងថវិកាជាតិ អភិបាលកិច្ច និងគណនេយ្យភាពក្នុងស្ថាប័នរដ្ឋ។

លោក នី សុខា ប្រធានសមាគមការពារសិទ្ធិមនុស្សអាដហុក បានលើកឡើងថា ប្រសិនបើការរកឃើញនេះបញ្ជាក់ថា មន្ត្រីមានឈ្មោះស្ទួនក្នុងបញ្ជីដើម្បីបើកប្រាក់ខែពីរដ្ឋមែន នោះវាជាការខ្ជះខ្ជាយ និងបំផ្លាញថវិកាជាតិ ដែលបាន​មកពី​ញើសឈាមរបស់ប្រជាពលរដ្ឋ។

លោកបានសង្កត់ធ្ងន់ថា ការរកឃើញភាពមិនប្រក្រតីតែមួយមុខមិនទាន់គ្រប់គ្រាន់នោះទេ ដោយក្រសួងត្រូវស្វែង​រក​អ្នកទទួលខុសត្រូវ និងសហការជាមួយអង្គភាពប្រឆាំងអំពើពុករលួយ ដើម្បីពិនិត្យស៊ើបអង្កេតឱ្យបានល្អិតល្អន់។

លោក នី សុខា បន្ថែមថា៖ «ការរកឃើញនេះវាជារឿងមួយ ប៉ុន្តែរឿងទីពីរ គឺក្រសួងត្រូវតែមានចំណាត់ការឱ្យ​បាន​ច្បាស់លាស់ ហើយត្រូវរកឱ្យឃើញអ្នកទទួលខុសត្រូវ ដើម្បីយកមកដាក់ទោសទណ្ឌឱ្យបានត្រឹមត្រូវ»។

ជាមួយគ្នានេះ លោក សេង សុវឌ្ឍនា នាយកប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា បានលើកឡើងថា ប្រសិនបើ​ការ​រកឃើញនេះជាការពិត វានឹងបង្ហាញ​ពីបញ្ហាអភិបាលកិច្ច និងគណនេយ្យភាព ក្នុងការគ្រប់គ្រងធនធានសាធារណៈ ដែល​តម្រូវ​ឱ្យមានការត្រួតពិនិត្យ និងចាត់វិធានការឱ្យបានម៉ឺងម៉ាត់។

លោកបានបញ្ជាក់ថា ទោះបីក្រសួង និងស្ថាប័នរដ្ឋមួយចំនួនបានប្រើប្រាស់ប្រព័ន្ធគ្រប់គ្រងវត្តមានការងារ រួមទាំងប្រព័ន្ធ​ស្កេន​ក្រយៅដៃ​អស់រយៈពេលជាច្រើនឆ្នាំក៏ដោយ ក៏ការរកឃើញបញ្ហានេះបង្ហាញពីភាពចាំបាច់ក្នុងការពិនិត្យឡើងវិញ​នូវប្រសិទ្ធភាពនៃយន្តការត្រួតពិនិត្យដែលមានស្រាប់។

លោក សេង សុវឌ្ឍនា លើកឡើងថា៖ «ការរកឃើញបញ្ហានេះ វាបង្ហាញពីភាពចាំបាច់មួយ នៅក្នុងការត្រួតពិនិត្យឡើងវិញ​នូវប្រសិទ្ធភាពនៃយន្តការត្រួតពិនិត្យ និងអនុវត្តវិធានការបង្ការ ឱ្យកាន់តែមានភាពប្រសើរឡើង»។

លោកបានបន្ថែមថា អាជ្ញាធរគួរចាត់វិធានការតាមផ្លូវច្បាប់ និងរដ្ឋបាលចំពោះអ្នកពាក់ព័ន្ធ ប្រសិនបើ​រកឃើញថាមាន​កំហុស ព្រមទាំងពង្រឹងប្រព័ន្ធតាមដានវត្តមាន ការគ្រប់គ្រងធនធានមនុស្ស និងយន្តការគណនេយ្យភាព ដើម្បី​ទប់ស្កាត់​បញ្ហា​ស្រដៀងគ្នានេះកើតឡើងនាពេលអនាគត។

ទាក់ទងនឹងបញ្ហានេះ លោក ស សុខា រដ្ឋមន្ត្រីក្រសួងមហាផ្ទៃ បានថ្លែងក្នុងពិធីបើកយុទ្ធនាការធ្វើជំរឿន​មន្ត្រី​នគរបាលជាតិ​ កាលពីថ្ងៃទី១៧ ខែវិច្ឆិកា ថា ក្រសួងបានរកឃើញឈ្មោះមន្ត្រីស្ទួនជាង ២ ២០០នាក់ ដែលជាចំនួនដ៏ច្រើន និងពិបាកទទួលយក។ ទោះជាយ៉ាងណា លោកថា ក្រសួងមិនទាន់កំណត់បានច្បាស់នៅឡើយទេថា ភាពមិនប្រក្រតី​ទាំងនេះមានប្រភពមកពីណា។

លោក ស សុខា បានបន្តថា យុទ្ធនាការជំរឿននេះមានគោលបំណងផ្ទៀងផ្ទាត់ចំនួនមន្ត្រីជាក់ស្ដែង វាយតម្លៃតម្រូវការកម្លាំង និងសមត្ថភាពមន្ត្រី ព្រមទាំងធ្វើទំនើបកម្មប្រព័ន្ធគ្រប់គ្រងធនធានមនុស្ស ដើម្បីពង្រឹងប្រសិទ្ធភាពការងារ និងកាត់បន្ថយការចំណាយថវិកាជាតិដែលមិនចាំបាច់។

ក្នុងឱកាសនោះ លោកបានដាក់ចេញទិសដៅសំខាន់ចំនួន៦ រួមមាន ការស្វែងយល់ពីចំនួនកម្លាំងដែលមានស្រាប់ ការ​កំណត់​តម្រូវការកម្លាំងជាក់ស្ដែង ការវាយតម្លៃសមត្ថភាពមន្ត្រី ការពង្រឹងការគ្រប់គ្រងរដ្ឋបាល ការធ្វើទំនើបកម្ម​ប្រព័ន្ធ​គ្រប់គ្រង និងការប្រើប្រាស់លទ្ធផលជំរឿនជាមូលដ្ឋានសម្រាប់ការសម្រេចចិត្ត។

លោក សេង ផល្លី អគ្គនាយកអគ្គនាយកដ្ឋានធនធានមនុស្ស ការធ្វើ​ជំរឿន​ដំណាក់កាលដំបូងនេះគ្របដណ្ដប់លើអគ្គនាយកដ្ឋានចំនួន៣ ចំណុះក្រសួងមហាផ្ទៃ រួមមាន អគ្គលេខាធិការដ្ឋាន អគ្គនាយកដ្ឋានធនធានមនុស្ស និងអគ្គនាយកដ្ឋានបច្ចេកវិទ្យាឌីជីថលនិងផ្សព្វផ្សាយអប់រំ។ យោងតាមហ្វេសប៊ុកផេករបស់ ទទក ដែលដកស្រង់ចេញ​ពីរបាយការណ៍។

លោក សេង ផល្លី បានឱ្យដឹងថា ដំណើរការជំរឿនត្រូវបានរៀបចំជាបីជំហាន ដើម្បីធានាភាពត្រឹមត្រូវនៃការប្រមូល​ទិន្នន័យ។ ជំហានដំបូង មន្ត្រីនគរបាលត្រូវបង្ហាញខ្លួនចំពោះមន្ត្រីបច្ចេកវិទ្យា ដើម្បីថតរូប ផ្ដិតមេដៃស្ដាំ និងចុះហត្ថលេខា​លើប្រព័ន្ធ Dashboard សម្រាប់ធ្វើបច្ចុប្បន្នភាពទិន្នន័យ។

ជំហានបន្ទាប់ មន្ត្រីត្រូវពិនិត្យ និងផ្ទៀងផ្ទាត់ព័ត៌មានផ្ទាល់ខ្លួននៅលើវិញ្ញាបនបត្រជំរឿនមន្ត្រីនគរបាលជាតិលើកទី៤ រួចផ្ដិតមេដៃ និងសរសេរឈ្មោះលើវិញ្ញាបនបត្រ ព្រមទាំងផ្ដិតមេដៃក្នុងសៀវភៅបិទរូបថត។ ចំណែកជំហានចុងក្រោយ គឺការចុះហត្ថលេខាលើបញ្ជីវត្តមានជាមួយមន្ត្រីលេខាធិការដ្ឋាន។

បន្ទាប់ពីបញ្ចប់ការជំរឿននៅអគ្គនាយកដ្ឋានទាំង៣ ក្រុមការងារជំនាញនឹងបន្តអនុវត្តនៅតាមអង្គភាពផ្សេងៗទៀត​ក្នុង​ក្របខណ្ឌក្រសួងមហាផ្ទៃ មុនពង្រីកទៅដល់ស្នងការដ្ឋាននគរបាលរាជធានី-ខេត្តទាំង២៥។

សារព័ត៌មានខេមបូចា មិនទាន់ទទួលបានចម្លើយពីអ្នកនាំពាក្យអង្គភាពប្រឆាំងអំពើពុករលួយ លោក សយ ច័ន្ទវិចិត្រ នៅឡើយទេ បើគិតត្រឹមម៉ោងចេញផ្សាយនេះ៕

ព័ត៌មានថ្មី

អត្ថបទពេញនិយម