ស្តាប់សំឡេងនៃអត្ថបទនេះ (បង្កើតដោយ AI)។
កាលពីថ្ងៃអាទិត្យ ទី១៥ ខែវិច្ឆិកា ប្រធានាធិបតីបារាំង លោក អេម៉ានុយអែល ម៉ាក្រុង បានស្នើឱ្យរដ្ឋាភិបាលកម្ពុជាធ្វើការស៊ើបអង្កេតលើករណីសម្លាប់អតីតតំណាងរាស្ត្របក្សប្រឆាំង លោក លិម គិមយ៉ា ដែលត្រូវបានគេបាញ់សម្លាប់នៅទីក្រុងបាងកក កាលពីខែមករា ឆ្នាំ២០២៥។
ថ្លែងនៅក្នុងសន្និសីទសារព័ត៌មានមួយនៅក្រៅកិច្ចប្រជុំកំពូលហ្វ្រង់កូហ្វូនីលើកទី២០ នៅរាជធានីភ្នំពេញ លោក ម៉ាក្រុង បានមានប្រសាសន៍ថា៖ «ខ្ញុំចង់លើកឡើងអំពីករណីឃាតកម្មលើលោក លិម គិមយ៉ា នៅទីក្រុងបាងកក។ ខ្ញុំចង់ឱ្យមានការស៊ើបអង្កេត ដើម្បីស្វែងរកការពិត និងនាំខ្លួនជនដៃដល់មកទទួលខុសត្រូវចំពោះមុខច្បាប់»។
លោក ម៉ាក្រុង បានថ្លែងរួមគ្នាជាមួយលោកនាយករដ្ឋមន្ត្រី ហ៊ុន ម៉ាណែត ដែលគ្របដណ្តប់លើប្រធានបទជាច្រើន ក្នុងនោះ ក៏មានការចុះហត្ថលេខាលើកិច្ចព្រមព្រៀងជាច្រើន ដើម្បីពង្រឹងទំនាក់ទំនង និងការវិនិយោគរវាងប្រទេសទាំងពីរផងដែរ។
លោក លិម គិមយ៉ា ដែលអាយុ៧៤ឆ្នាំ និងមានសញ្ជាតិពីរ គឺកម្ពុជា និងបារាំង គឺជាសមាជិកសភាមកពីគណបក្សសង្គ្រោះជាតិ (CNRP) ដែលធ្លាប់ជាគូប្រជែងដ៏សំខាន់បំផុតរបស់គណបក្សប្រជាជនកម្ពុជាដែលកាន់អំណាចអស់រយៈពេលជាយូរ។ តុលាការកំពូលបានសម្រេចរំលាយគណបក្សសង្គ្រោះជាតិនៅឆ្នាំ២០១៧ ដោយចោទប្រកាន់ថា មានផែនការផ្តួលរំលំរដ្ឋាភិបាលកម្ពុជា ជាការចោទប្រកាន់ ដែលគណបក្សនេះអះអាងថា ជាការប្រឌិត ហើយសមាជិកជាច្រើនរបស់គណបក្សនេះ បានប្រឈមមុខនឹងការកាត់ទោសទ្រង់ទ្រាយធំ ក្រោមការចោទប្រកាន់ពីបទសមគំនិតប្រព្រឹត្តអំពើក្បត់ជាតិ និងបទញុះញង់។
លោក អេកកាឡាក់ ផែណយ ជាអតីតទាហានជើងទឹកថៃ បានបាញ់សម្លាប់លោក លិម គិមយ៉ា នៅថ្ងៃទី៧ ខែមករា ឆ្នាំ២០២៥ នៅជិតផ្លូវខាវសាន ក្នុងទីក្រុងបាងកក។ លោក អេកាឡាក់ ត្រូវបានចាប់ខ្លួននៅក្នុងប្រទេសកម្ពុជានៅថ្ងៃបន្ទាប់ ហើយត្រូវបានប្រគល់ជូននគរបាលថៃ។
ប៉ុន្មានខែក្រោយមក តុលាការនៅទីក្រុងបាងកកបានកាត់ទោសលោក អេកកាឡាក់ ពីបទឃាតកម្មគិតទុកជាមុន ដោយផ្តន្ទាទោសប្រហារជីវិត ប៉ុន្តែក្រោយមកបានបន្ធូរបន្ថយទោសនោះមកជាការជាប់ពន្ធនាគារអស់មួយជីវិតវិញ ដោយសារតែលោកបានសារភាពកំហុស។
អាជ្ញាធរថៃបានចេញដីកាចាប់ខ្លួនបុរសជនជាតិខ្មែរ ២នាក់ គឺលោក លី រតនរស្មី ដែលនគរបាលអះអាងថា ជាអ្នកជួលលោក អេកកាឡាក់ និងលោក ពេជ្រ គឹមស្រ៊ិន ដែលត្រូវបានគេចោទថា បានជួយប្រាប់អត្តសញ្ញាណរបស់លោក លិម គិមយ៉ា ទៅជនដៃដល់។ បុរសទាំង ២នាក់នេះនៅតែមិនទាន់ត្រូវបានចាប់ខ្លួននៅឡើយទេ។
លោក ហ៊ុន ម៉ាណែត បានបដិសេធថា រដ្ឋាភិបាលរបស់លោក ឬឪពុករបស់លោក មិនបានពាក់ព័ន្ធនឹងការសម្លាប់នេះទេ។
អាជ្ញាធរកម្ពុជាបានប្រាប់វិទ្យុអាស៊ីសេរី (RFA) កាលពីខែមករា ឆ្នាំ២០២៥ ថា ពួកគេនឹងធ្វើការស៊ើបអង្កេតលុះត្រាតែមានសំណើពីភាគីថៃ។ នៅខែបន្ទាប់មកទៀត លោក ខៀវ សុភ័គ អ្នកនាំពាក្យក្រសួងមហាផ្ទៃ បានហៅដីកាចាប់ខ្លួនរបស់ថៃ គឺ «គ្មានប្រយោជន៍»ហើយបានបញ្ជាក់ថា រដ្ឋធម្មនុញ្ញរបស់កម្ពុជាមិនអនុញ្ញាតឱ្យមានការបញ្ជូនពលរដ្ឋកម្ពុជាទៅឱ្យប្រទេសផ្សេងនោះទេ។
ក្រសួងមហាផ្ទៃ អគ្គស្នងការដ្ឋាននគរបាលជាតិ និងលោក ប៉ែន បូណា អ្នកនាំពាក្យរាជរដ្ឋាភិបាល មិនបានឆ្លើយតបភ្លាមៗចំពោះសំណើសុំការអត្ថាធិប្បាយនោះទេ។
ក្រសួងការបរទេសបារាំងបានថ្កោលទោសការសម្លាប់នេះ រយៈពេលពីរថ្ងៃ បន្ទាប់ពីហេតុការណ៍បានកើតឡើង ហើយបានបញ្ជាក់ថា ខ្លួនកំពុងតាមដានយ៉ាងដិតដល់នូវការស៊ើបអង្កេតរបស់ភាគីថៃ។
លោក លិម ថូម៉ាស់ ជាកូនប្រុសរបស់លោក គិមយ៉ា បានថ្លែងអំណរគុណដល់លោក ម៉ាក្រុង និងរដ្ឋាភិបាលបារាំង តាមរយៈការបង្ហោះសារលើហ្វេសប៊ុកកាលពីថ្ងៃអាទិត្យ ដែលបានលើកឡើងពីករណីឃាតកម្មលើឪពុករបស់លោក។
លោកបានប្រាប់សារព័ត៌មានខេមបូចាថា៖ «ជាអកុសល យើងដឹងច្បាស់ណាស់ថា ប្រសិនបើគ្មានការចូលរួម និងការតាមដានយ៉ាងយកចិត្តទុកដាក់ជាបន្តបន្ទាប់ពីសំណាក់ប្រទេសបារាំងទេនោះ ការស៊ើបអង្កេតនេះអាចនឹងមានវាសនាដូចករណីជាច្រើនទៀត ដែលពាក់ព័ន្ធនឹងការធ្វើឃាតគូប្រជែងនយោបាយនៅកម្ពុជា ដែលករណីទាំងនោះមិនដែលត្រូវបានស៊ើបអង្កេតឱ្យបានត្រឹមត្រូវ ឬដោះស្រាយរហូតដល់ទីបញ្ចប់ឡើយ»។
លោកបានលើកឡើងថា ក្រុមគ្រួសារសង្ឃឹមថា ជនសង្ស័យទាំងពីរនាក់ គឺ លី រតនរស្មី និង ពេជ្រ គឹមស្រ៊ិន នឹងត្រូវបានចាប់ខ្លួនក្នុងពេលឆាប់ៗ ហើយតួនាទីរបស់ពួកគេនឹងត្រូវបានកំណត់ឱ្យច្បាស់លាស់នៅក្នុងតុលាការ។
លោក លិម ថូម៉ាស់ សរសេរថា៖ «ទោះជាយ៉ាងណាក៏ដោយ យើងមិនមានការយល់ឃើញខុសឡើយ៖ យើងជឿជាក់ថា បុគ្គលទាំងពីរនាក់នេះ មិនមែនជាមេគំនិតពិតប្រាកដ នៅពីក្រោយអំពើឃាតកម្មលើឪពុករបស់ខ្ញុំនោះទេ។ យើងជឿថា ពួកគេគ្រាន់តែជាអន្តរការីប៉ុណ្ណោះ។ ហេតុដូច្នេះហើយ វាជារឿងចាំបាច់ណាស់ ដែលការស៊ើបអង្កេតមិនត្រូវបញ្ចប់ត្រឹមជនសង្ស័យទាំងពីរនាក់នេះទេ ប៉ុន្តែត្រូវបន្តទៅមុខទៀត រហូតដល់រកឃើញអ្នកដែលបានបញ្ជា និងរៀបចំអំពើឃាតកម្មនេះពិតប្រាកដ»៕
ប្រែសម្រួលពីអត្ថបទភាសាអង់គ្លេស៖ Macron Presses Cambodia to Investigate Murder of Former Opposition Lawmaker Lim Kimya






