ប្រព័ន្ធទឹកស្អាតដែលអាចពិសារដោយមិនគិតថ្លៃមានវត្តមាននៅសួនមុខវត្តបទុម គឺជានិមិត្តរូបនៃកិច្ចសហប្រតិបត្តិការបារាំង-កម្ពុជា មុនកិច្ចប្រជុំកំពូលហ្វ្រង់កូហ្វូនី ឈានចូលមកដល់។ ជាមួយគ្នានេះដែរ ប្រជាពលរដ្ឋមានចម្ងល់ដែរថាតើប្រព័ន្ធទឹកស្អាតនេះនឹងនៅតែរក្សាទុកបម្រើជាប្រយោជន៍សាធារណក្នុងរាជធានីភ្នំពេញទៀត ឬយ៉ាងណាក្រោយចប់កិច្ចប្រជុំកំពូលនេះ។
ប្រព័ន្ធទឹកស្អាតសម្រាប់ពិសានេះត្រូវបានដំឡើងនៅក្នុងភូមិហ្វ្រង់កូហ្វូនីនៅសួនមុខវត្តបទុម ដែលទីសាធារណៈមួយសម្រាប់ប្រជាពលរដ្ឋសម្រាក ឬធ្វើលំហាត់ប្រាណ។ ក្នុងកិច្ចប្រជុំកំពូលខាងមុខអ្នកទស្សនា អ្នកតាំងពិព័រណ៍ និងអ្នកចូលរួមជាច្រើនទៀតនឹងអាចប្រើប្រាស់ទឹកស្អាតសម្រាប់ពិសានេះបាន។ នេះបើតាមទីភ្នាក់ងារអភិវឌ្ឍន៍បារាំង AFD។
កម្ពុជានឹងធ្វើជាម្ចាស់ផ្ទះសម្រាប់កិច្ចប្រជុំកំពូលហ្វ្រង់កូហ្វូនីលើកទី២០ពីថ្ងៃទី១៣ ដល់ ទី១៧ ខែវិច្ឆិកា នៅក្នុងរាជធានីភ្នំពេញ ក្នុងនោះថ្នាក់ដឹកនាំប្រទេសចំនួន៩០ ដែលជាប្រទេសសមាជិកអង្គការអន្តរជាតិហ្វ្រង់កូហ្វូនី នឹងអញ្ជើញចូលរួម។
ប្រធានាធិបតីបារាំងលោក Emmanual Macron ក៏នឹងអញ្ជើញចូលរួមកិច្ចប្រជុំនេះដែរ។ នេះបើតាមសេចក្ដីថ្លែងការណ៍របស់ក្រសួងការបរទេសកម្ពុជា និងថាកិច្ចព្រមព្រៀង និងកិច្ចសហប្រតិបត្តិការមួយចំនួន ទាក់ទងនឹងសេដ្ឋកិច្ច វិនិយោគ វប្បធម៌ និងការពារជាតិក៏នឹងត្រូវចុះហត្ថលេខានាឱកាសនោះផងដែរ។
ទីភ្នាក់ងារអភិវឌ្ឍន៍បារាំងបានឲ្យដឹងថា ការដំឡើងប្រព័ន្ធទឹកស្អាតសម្រាប់ពិសាជាមួយរដ្ឋាករទឹកស្វយ័តក្រុងភ្នំពេញ បានបង្ហាញពីកិច្ចខិតខំប្រឹងប្រែងរួមគ្នារវាងបារាំង-កម្ពុជា ជាច្រើនទសវត្សរ៍ រួមទាំងគម្រោងស្ថានីយទឹកស្អាតបាក់ខែង ដែលបានជួយផ្គត់ផ្គង់ទឹកស្អាតសម្រាប់ប្រជាពល១,៣លាននាក់នៅភ្នំពេញបានប្រើប្រាស់។
លោក ទួន តាន អ្នករត់កង់បីដែលតែងរង់ចាំម៉ូយនៅម្ដុំសួនវត្តបទុមវត្តី បានឲ្យដឹងថា៖ «យើងមិនដែលមានប្រភពទឹកស្អាតសម្រាប់ផឹកដោយមិនគិតថ្លៃបែបនេះទេ»។
លោកបន្ថែមថា៖ «វាជារឿងល្អបើសិនជាមានកម្មវិធីដូចនេះ ព្រោះថាខ្ញុំទិញទឹកបរិសុទ្ធតាមផ្លូវរាល់ថ្ងៃ ចំណាយ ៤ ០០០រៀល សម្រាប់ទឹកពីរដប។ មានប្រភពទឹកស្អាតសម្រាប់ផឹកបែបនេះនឹងល្អសម្រាប់ខ្ញុំ និងប្រជាពលរដ្ឋផ្សេងទៀត»។
លោកឲ្យដឹងទៀតថា៖ «ខ្ញុំចង់ឲ្យវា [ប្រភពទឹកស្អាតទាំងនេះ]នៅមានជាអចិន្រ្តៃយ៍ ដូចនេះប្រជាពលរដ្ឋអាចបានទឹកផឹកពេលដើរតាមដងផ្លូវ»។
លោកបន្តថា៖ «ប្រភពទឹកស្អាតសម្រាប់ផឹកពិតចាចាំបាច់។ ពេលខ្លះខ្ញុំឃ្លាន ខ្ញុំអាចបានត្រឹមផឹកទឹកជំនួយបាយ»។ លោកបន្ថែមថា ប្រភពទឹកស្អាតនេះនឹងជួយប្រជាពលរដ្ឋសន្សំសំចៃប្រាក់ពីការទិញទឹកបរិសុទ្ធ។
លោក ចិត្ត សៀង វ័យ៣៥ឆ្នាំ ជាកម្មករដំឡើងប្រព័ន្ធទឹកស្អាតសម្រាប់ពិសានេះ បានប្រាប់សារព័ត៌មានខេមបូចាថា ប្រព័ន្ធទឹកនេះដំឡើងជាពិសេសសម្រាប់កម្មវិធីហ្វ្រង់កូហ្វូនី។
លោកលើកឡើងថា ប្រព័ន្ធទឹកស្អាតសម្រាប់ពិសានេះ ប្រជាពលរដ្ឋអាចប្រើប្រាស់បានដោយមិនគិតថ្លៃ។ លោកបន្តថា៖ «បើសិនជាមានប្រព័ន្ធទឹកស្អាតសាធារណៈសម្រាប់ផឹកនៅច្រើនកន្លែង វានឹងកាត់បន្ថយការចំណាយលើថ្លៃទិញទឹកបរិសុទ្ធ»។
លោកបន្តថា៖ «ខ្ញុំចង់ឲ្យមានប្រព័ន្ធទឹកស្អាតសម្រាប់ផឹកនេះមាននៅតាមទីសាធារណៈច្រើនកន្លែង ដូចនេះប្រជាពលរដ្ឋអាចទទួលបានទឹកផឹកដោយមិនគិតថ្លៃពេលកំពុងហាត់ប្រាណ[ក្នុងសួន]»។
សម្រាប់រយៈពេល៣០ឆ្នាំកន្លងមកនេះ បារាំងបានជួយគាំទ្រដល់រដ្ឋាករទឹកស្វយ័តក្រុងភ្នំពេញតាមរយៈទីភ្នាក់ងារអភិវឌ្ឍន៍បារាំង ហៅកាត់ថា AFD ក្នុងការកសាង ពង្រីង និងធ្វើទំនើបកម្មលើបណ្ដាញទឹកស្អាតក្នុងទីក្រុងភ្នំពេញ គម្រោងកម្មវិធីវិនិយោគ និងកសាងសមត្ថភាព។
លោក យង់ គិមអេង នាយកប្រតិបត្តិមជ្ឈមណ្ឌលប្រជាពលរដ្ឋដើម្បីការអភិវឌ្ឍ និងសន្តិភាព មានប្រសាសន៍ថា នៅមានប្រជាពលរដ្ឋជាច្រើនមិនទាន់បានទទួលទឹកស្អាតសម្រាប់ប្រើប្រាស់។
លោកបន្តថា៖ «យើងឃើញថាចំនួនប្រជាពលរដ្ឋទទួលបានទឹកស្អាតប្រើប្រាស់មានការកើនឡើង និងជាច្រើនកន្លែង។ យើងគិតថានេះជាការអភិវឌ្ឍវិជ្ជមានមួយដែលអាចឲ្យសាធារណជន រួមទាំងអ្នកគ្មានផ្ទះសម្បែង អាចទទួលបានទឹកស្អាតសម្រាប់បរិភោគ»។
ទោះយ៉ាងណាលោកថា បញ្ហាប្រឈមនៅតែមានសម្រាប់កម្ពុជា ក្នុងការធានាថា ប្រជាពលរដ្ឋនៅតាមទីជនបទអាចទទួលបានទឹកស្អាតប្រើប្រាស់ ហើយការផ្គត់ផ្គង់ទឹកស្អាតនៅតែមានការខ្វះខាតបើទោះបីជារដ្ឋាភិបាលបានខិតខំប្រឹងប្រែងអនុវត្តគោលនយោបាយទឹកក៏ដោយ។
លោក សឿង សារ៉ន នាយកប្រតិបត្តិអង្គការសមាគមធាងត្នោត បានសាទរទៅនឹងការដំឡើងប្រព័ន្ធទឹកស្អាតសម្រាប់ពិសានៅសួនសាធារណៈ។ លោកថ្លែងថា៖ «នៅបរទេស ទឹកស្អាតគឺមាននៅស្ទើរតែគ្រប់ទីសាធារណៈ។ ក្នុងប្រទេសយើង នេះគឺជាចំណុចចាប់ផ្ដើមដ៏ល្អ»។
អ្នកនាំពាក្យរដ្ឋាបាលរាជធានីភ្នំពេញ លោកស្រី ដោ សម្ផស្ស បដិសេធអត្ថាធិប្បាយលើរឿងនេះ៕
ប្រែសម្រួលពីអត្ថបទភាសាអង់គ្លេស៖ Free Drinking Water Fountain Installed at Wat Botum Park to Mark Francophonie Summit
