ស្តាប់សំឡេងនៃអត្ថបទនេះ (បង្កើតដោយ AI)។
នៅសប្តាហ៍នេះ ក្រុមសកម្មជនបានដាក់ញត្តិទៅកាន់ស្ថានទូតបារាំងប្រចាំរាជធានីភ្នំពេញជាថ្មីម្តងទៀត ដោយលើកនេះ គឺពាក់ព័ន្ធនឹងជម្លោះព្រំដែនរវាងកម្ពុជានិងថៃ។ សកម្មភាពនេះធ្វើឡើងមុនកិច្ចប្រជុំកំពូលហ្វ្រង់កូហ្វូនីលើកទី២០ ដែលនឹងប្រព្រឹត្តទៅនៅរាជធានីភ្នំពេញ នាថ្ងៃអាទិត្យខាងមុខនេះ ហើយប្រធានាធិបតីបារាំង លោក អេម៉ានុយអែល ម៉ាក្រុង នឹងអញ្ជើញចូលរួមក្នុងកិច្ចប្រជុំនេះផងដែរ។
ក្រុមសកម្មជនជាយុវជនចំនួន១០នាក់ រួមជាមួយព្រះតេជគុណ អួន គង់ ជាព្រះសង្ឃមួយអង្គដែលគេស្គាល់តាមរយៈអត្ថាធិប្បាយអំពីបញ្ហាសង្គម និងសកម្មភាពការពារបរិស្ថាន បានទៅកាន់ស្ថានទូតនៅព្រឹកថ្ងៃសុក្រនេះ ដើម្បីដាក់ញត្តិជូនលោក ម៉ាក្រុង ដោយស្នើឱ្យលោកជួយដោះស្រាយជម្លោះព្រំដែនជាមួយប្រទេសថៃ។
ញត្តិនេះ បានសរសេរថា៖ «សកម្មភាពរបស់កងទ័ពថៃ កំពុងបង្កឱ្យមានក្តីបារម្ភយ៉ាងខ្លាំងចំពោះសន្តិសុខក្នុងតំបន់ សន្តិភាព និងសុវត្ថិភាពរបស់ប្រជាពលរដ្ឋកម្ពុជា ដែលរស់នៅតាមបណ្តោយព្រំដែន»។
មន្ត្រីស្ថានទូតម្នាក់ ដែលបានទទួលយកញត្តិនៅព្រឹកថ្ងៃសុក្រនេះ បានប្រាប់អ្នកសារព័ត៌មានថា៖ «យើងនឹងកត់ត្រាទុក ហើយយើងនឹងបកប្រែញត្តិនេះ»។
ញត្តិនេះធ្វើឡើង បន្ទាប់ពីមានញត្តិពីរផ្សេងទៀត ដែលត្រូវបានដាក់ជូនស្ថានទូតបារាំង និងកាណាដា នៅក្នុងខែនេះ ដោយញត្តិមួយមកពីសម្ព័ន្ធសហជីព និងក្រុមអង្គការសិទ្ធិមនុស្ស ហើយមួយទៀតដាក់ជូនដោយលោក រ៉ុង ឈុន ជាទីប្រឹក្សាជាន់ខ្ពស់ នៃគណបក្សកម្លាំងជាតិ ដែលជាគណបក្សប្រឆាំង។
សម្ព័ន្ធសហជីព និងអង្គការសិទ្ធិមនុស្ស បានជំរុញឱ្យរដ្ឋាភិបាលនានាដាក់សម្ពាធលើកម្ពុជា ដើម្បីឱ្យដោះលែងសកម្មជន ដែលកំពុងជាប់ឃុំ និងបើកលំហប្រជាធិបតេយ្យឡើងវិញ ខណៈលោក រ៉ុង ឈុន បានស្នើសុំឱ្យជួយស្តារសិទ្ធិនយោបាយរបស់លោក។ លោក ថម អេនឌ្រូ អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា ក៏បានអំពាវនាវដល់រដ្ឋាភិបាលកម្ពុជាកាលពីថ្ងៃចន្ទ ឱ្យដោះលែងសកម្មជនទាំងនោះ មុនកិច្ចប្រជុំកំពូលចាប់ផ្តើម។
ការប៉ះទង្គិចគ្នាកាលពីខែកក្កដា និងខែធ្នូ ឆ្នាំមុន បានបណ្តាលឱ្យមនុស្សជាង១០០នាក់ស្លាប់ និងរាប់សែននាក់ទៀតនៃប្រទេសទាំងពីរ ត្រូវភៀសខ្លួនពីលំនៅឋាន មុនពេលមានបទឈប់បាញ់។ ភាគីនីមួយៗបានចោទប្រកាន់ភាគីម្ខាងទៀតថា ជាអ្នកបង្កឱ្យមានការប្រយុទ្ធគ្នា ដែលបានជំរុញឱ្យមានស្មារតីជាតិនិយមនៅក្នុងប្រទេសទាំងពីរ ហើយជម្លោះនេះមួយផ្នែក កើតចេញពីការកំណត់ខ្សែបន្ទាត់ព្រំដែនក្នុងសម័យអាណានិគមបារាំងផងដែរ។ កម្ពុជាបានអះអាងថា ពលរដ្ឋរបស់ខ្លួនជាង ២០ ០០០នាក់ ដែលរស់នៅក្នុងភូមិជាប់ព្រំដែន បច្ចុប្បន្នស្ថិតនៅក្រោយរបាំងរបស់ថៃនោះ នៅមិនអាចត្រឡប់ទៅកាន់ផ្ទះសម្បែងរបស់ពួកគេនៅឡើយ។
ប្រទេសបារាំងបានជំរុញឱ្យភាគីទាំងពីរដោះស្រាយជម្លោះដោយសន្តិវិធី ហើយបានផ្តល់ជូនកម្ពុជា និងថៃ នូវសិទ្ធិចូលទៅពិនិត្យមើលឯកសារនៅបណ្ណសារព្រំដែននាសម័យអាណានិគម។
លោក អ៊ឹង សេរីវុធ ជាសកម្មជនយុវជនម្នាក់ បាននិយាយថា ក្រុមរបស់លោកបានងាកទៅរកប្រទេសបារាំង ដោយសារកម្ពុជាកំពុងធ្វើជាម្ចាស់ផ្ទះរៀបចំកិច្ចប្រជុំកំពូលមួយ ដែលជាការជួបជុំគ្នា នៃមេដឹកនាំមកពីអង្គការអន្តរជាតិឡាហ្វ្រង់កូហ្វូនី ដែលជាប្លុកប្រទេស និងរដ្ឋាភិបាលដែលនិយាយភាសាបារាំង។ លោកនិយាយថា លោករំពឹងថា មេដឹកនាំ ដែលចូលរួមក្នុងកិច្ចប្រជុំនេះ នឹងលើកយក «បញ្ហាដែលកម្ពុជាត្រូវបានប្រទេសថៃរំលោភបំពាន» មកពិភាក្សា។
ព្រះតេជគុណ អួន គង់ មានសង្ឃដីកាថា ព្រះអង្គសង្ឃឹមថា ប្រទេសបារាំង និងប្រទេសផ្សេងទៀតដែលជាហត្ថលេខី នៃកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ដែលបានបញ្ចប់សង្គ្រាមស៊ីវិលនៅកម្ពុជា នឹងមាន «ស្មារតីទទួលខុសត្រូវ» ក្នុងការជួយ «ការពារ និងអន្តរាគមន៍» ប្រឆាំងនឹង «រដ្ឋណាមួយ ដែលឈ្លានពានកម្ពុជា»។
រដ្ឋមន្ត្រីការបរទេសថៃ លោក ស៊ីហាសាក់ ភួងកេតកែវ បានព្រមានកម្ពុជានៅថ្ងៃសុក្រនេះថា ការប្រើប្រាស់កិច្ចប្រជុំកំពូលនេះ ដើម្បី “បង្ហាញព័ត៌មានតែម្ខាងអំពីជម្លោះព្រំដែនថៃ-កម្ពុជា” អាចធ្វើឱ្យប៉ះពាល់ដល់កិច្ចខិតខំប្រឹងប្រែងក្នុងការកសាងទំនុកចិត្តឡើងវិញរវាងប្រទេសទាំងពីរ។
លោក ប៉ែន បូណា អ្នកនាំពាក្យរដ្ឋាភិបាលកម្ពុជា បានមានប្រសាសន៍ថា សមាជិកនៃអង្គការអន្តរជាតិហ្វ្រង់កូហ្វូនី «មានសិទ្ធិលើកឡើងអំពីបញ្ហាដែលមានសារៈសំខាន់និងពាក់ព័ន្ធ»។
នៅចម្ងាយពីរបីគីឡូម៉ែត្រពីស្ថានទូត លោកនាយករដ្ឋមន្ត្រី ហ៊ុន ម៉ាណែត បានថ្លែងសុន្ទរកថាជាសាធារណៈលើកដំបូងពាក់ព័ន្ធនឹងកិច្ចប្រជុំកំពូលនេះ នៅថ្ងៃសុក្រ ក្នុងពិធីបើកពិព័រណ៍វប្បធម៌នៃកិច្ចប្រជុំកំពូលនេះ។
លោកបានមានប្រសាសន៍ថា៖ «សម្រាប់ហ្វ្រង់កូហ្វូនី មិនមែនគ្រាន់តែជារឿងភាសាប៉ុណ្ណោះទេ ប៉ុន្តែវាក៏ពាក់ព័ន្ធនឹងវប្បធម៌ដែលកំពុងរស់រវើកផងដែរ។ វាគឺជាវេទិកាសម្រាប់ការផ្លាស់ប្តូរបទពិសោធន៍ ពាណិជ្ជកម្ម និងនវានុវត្តន៍ ហើយក៏ជាការប្រមូលផ្តុំ នៃគុណតម្លៃនានា ដូចជា សន្តិភាព សេចក្តីថ្លៃថ្នូររបស់មនុស្ស និងសាមគ្គីភាព។ ប្រទេសរបស់យើងយល់ដឹងអំពីសារៈសំខាន់នៃសន្តិភាពដែលមិនអាចកាត់ថ្លៃបាន ហើយប្រហែលជាយល់ច្បាស់ជាងប្រទេសភាគច្រើនទៅទៀត»។
សកម្មជនកម្ពុជាបានប្រើប្រាស់ដំណើរទស្សនកិច្ចរបស់មេដឹកនាំបរទេសជាយូរមកហើយ ដើម្បីស្វែងរកការដាក់សម្ពាធពីខាងក្រៅមកលើរដ្ឋាភិបាល រួមទាំងការទាមទារឱ្យដោះលែងអ្នករិះគន់រដ្ឋាភិបាល ដែលកំពុងជាប់ឃុំផងដែរ ប៉ុន្តែលទ្ធផល ដែលទទួលបាន មានទាំងជោគជ័យនិងបរាជ័យ។
កាលពីឆ្នាំ២០១២ សាលាឧទ្ធរណ៍បានដោះលែងសកម្មជនដីធ្លីតំបន់បឹងកក់ចំនួន១៣នាក់ប៉ុន្មានសប្តាហ៍ បន្ទាប់ពីលោកស្រី ហ៊ីលឡារី គ្លីនតុន ជារដ្ឋមន្ត្រីការបរទេសសហរដ្ឋអាមេរិកនៅពេលនោះ បានជំរុញឱ្យដោះលែងពួកគេ និងមិនយូរប៉ុន្មាន មុនពេលលោកស្រីអញ្ជើញមកបំពេញទស្សនកិច្ចនៅរាជធានីភ្នំពេញ ដើម្បីចូលរួមកិច្ចប្រជុំអាស៊ាន។
មួយទសវត្សរ៍ក្រោយមក លោក ចូ បៃដិន ដែលពេលនោះ ជាប្រធានាធិបតីសហរដ្ឋអាមេរិក បានដាក់សម្ពាធលោក ហ៊ុន សែន ដែលពេលនោះ ជានាយករដ្ឋមន្ត្រីកម្ពុជាអំឡុងកិច្ចប្រជុំកំពូលអាស៊ានមួយ ឱ្យដោះលែងមេធាវីសញ្ជាតិខ្មែរ-អាមេរិក គឺលោកស្រី សេង ធារី។ បច្ចុប្បន្ននេះ លោកស្រីនៅតែជាប់ឃុំនៅក្នុងពន្ធនាគារនៅឡើយ៕
ប្រែសម្រួលពីអត្ថបទភាសាអង់គ្លេស៖ Activists Ask Macron to Intervene in Thai Border Dispute in Latest Embassy Petition
