កាលពីថ្ងៃទី០២ ខែកញ្ញា សាលាដំបូងខេត្តបន្ទាយមានជ័យ បានសម្រេចចោទប្រកាន់មន្រ្តីនគរបាលសង្កាត់មួយរូបពីបទប្រព្រឹត្តអំពើហិង្សាដោយចេតនាចំពោះការបាញ់បោះមកលើបុរសវ័យ ២១ឆ្នាំម្នាក់ ដោយបង្កឲ្យមានរបួសធ្ងន់។
ប៉ុន្តែគ្រួសារជនរងគ្រោះអះអាងថា ទង្វើរបស់មន្រ្តីនគរបាលរូបនោះមានស្ថានទម្ងន់ទោសស្មើនឹងមនុស្សឃាតដោយចេតនា និងអំពាវនាវឲ្យមានការចោទប្រកាន់តាមផ្លូវច្បាប់តាមស្ថានទម្ងន់ទោសនេះ។
លោក ឬទ្ធី ពិសិដ្ឋ នាយរងប៉ុស្តិ៍នគរបាលសង្កាត់និមិត្ត ត្រូវបានចាប់ខ្លួនកាលពីថ្ងៃទី៣១ ខែសីហា បន្ទាប់ពីគ្រួសារជនរងគ្រោះឈ្មោះ នាង មករា បានដាក់ពាក្យបណ្តឹងទៅសាលាដំបូងខេត្តពីបទមនុស្សឃាតដោយចេតនា និងការប្រើប្រាស់អាវុធខុសច្បាប់។ ជនរងគ្រោះបានរងរបួសធ្ងន់នៅក្នុងហេតុការណ៍ផ្ទុះអាវុធកាលពីថ្ងៃទី២៧ ខែសីហា ដោយត្រូវគ្រាប់កាំភ្លើងបាញ់ទម្លុះខ្នងពីខាងឆ្វេង និងធ្លាយចេញតាមផ្នែកខាងក្រោមក្លៀកខាងស្តាំ។
លោក តេង សាម៉ៃ អ្នកនាំពាក្យសាលាដំបូងខេត្តបន្ទាយមានជ័យ បាននិយាយ កាលពីថ្ងៃទី០៣ ខែកញ្ញា ចៅក្រមស៊ើបសួរបានសម្រេចឃុំខ្លួនលោក ឬទ្ធី ពិសិដ្ឋ នៅពន្ធនាគារខេត្ត។
លោកបាននិយាយថា៖ «តុលាការបានសម្រចចោទប្រកាន់ [លោក ឬទ្ធី ពិសិដ្ឋ] ពីបទប្រព្រឹត្តអំពើហិង្សាដោយចេតនា មានស្ថានទម្ងន់ទោស និងការប្រើប្រាស់អាវុធខុសច្បាប់» ដោយបន្ថែមថា ជនជាប់ចោទត្រូវបានបញ្ចូនទៅពន្ធនាគារខេត្ត កាលពីល្ងាច ថ្ងៃទី០២ ខែកញ្ញា។
យោងទៅតាមមាត្រាទី២១៧ និង២១៨ នៃក្រមព្រហ្មទណ្ឌ ការប្រព្រឹត្តបទល្មើសប្រព្រឹត្តអំពើហិង្សាដោយចេតនា នឹងត្រូវប្រឈមនឹងទោសជាប់ពន្ធនាគារពី ២ ទៅ៥ឆ្នាំ។
កាលពីថ្ងៃទី២៧ ខែសីហា នៅវេលាម៉ោង ១០:៣០ យប់ ជនរងគ្រោះកំពុងបើកម៉ូតូដោយមានមិត្តភក្តិអង្គុយពីតាមផ្លូវត្រឡប់មកផ្ទះវិញ ពីការលេងហ្គេម Top G និងហ្គេមតាមទូរសព្ទដៃ នៅភូមិនិមិត្ត ឃុំនិមិត្ត នៅពេលដែលជនរងគ្រោះឈ្មោះ នាង មករា ឃើញមន្រ្តីនគរបាលម្នាក់ឃាត់ម៉ូតូរបស់មិត្តភក្តិរបស់ខ្លួន ដូច្នេះទើបសាម៉ីខ្លួនចុះទៅពិនិត្យមើលស្ថានការណ៍។ នេះបើយោងទៅតាមពាក្យបណ្តឹងបញ្ចូនទៅសាលាដំបូងខេត្តបន្ទាយមានជ័យ។
មករា រៀបរាប់ក្នុងពាក្យបណ្ដឹង៖ « ពេលនោះ ខ្ញុំបានត្រឡប់ម៉ូតូមកក្រោយ និងបានសួរប៉ូលិសថាមានរឿងអី។ ប៉ូលិសថា ហ្អែងខ្លាំងអី? បើចង់ខ្លាំងចុះមក»។
មករា បានរៀបរាប់បន្ថែមក្នុងពាក្យបណ្ដឹងថា៖ « ពេលនោះខ្ញុំអត់បានតបអីច្រើនទេ គ្រាន់ថាបើអត់មានអី ខ្ញុំទៅផ្ទះហើយ។ ពេលខ្ញុំបត់ម៉ូតូត្រឡប់មកផ្ទះ ប៉ូលិសក៏មកពីក្រោយខ្ញុំ និងបានដកកាំភ្លើងបាញ់មកលើខ្ញុំ»។
ឪពុកជនរងគ្រោះឈ្មោះ នួន វល្លិ៍ អាយុ ៤៩ឆ្នាំ បានលើកឡើងថា លោកអស់សង្ឃឹមនៅពេលដែលតុលាការចោទប្រកាន់មន្រ្តីនគរបាល ឬទ្ធី ពិសិដ្ឋ ក្នុងបទល្មើសស្រាល ដោយទទូចថា មន្រ្តីនគរបាលរូបនេះមានបំណងបាញ់កូនប្រុសរបស់លោក ដោយនេះជាបទឃាតកម្មដោយចេតនា។
លោកបាននិយាយថា៖ «ខ្ញុំគិតថា វាហាក់ដូចជា ការចោទប្រកាន់បែបស្រាល ដោយសារតែបទល្មើសនេះគឺស្មើនឹង[ដោយប៉ុនប៉ង]»ឃាតកម្ម»។
លោកបានបន្តថា៖ «ខ្ញុំសូមឲ្យតុលាការផ្តន្ទាទោសគាត់ឲ្យធ្ងន់ធ្ងរ ដោយសារតែនេះជាអំពើព្រៃផ្សៃ»ដោយបានបន្ថែមថា កូនប្រុសរបស់លោកបានធូរស្បើយសន្សឹមៗពីរបួសដោយគ្រាប់កំាភ្លើង។
លោក ស៊ុំ ច័ន្ទគា មន្រ្តីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តបន្ទាយមានជ័យ បាននិយាយថា លោកទទួលស្គាល់ថា អាជ្ញាធរបានចាប់ជនដៃដល់ ប៉ុន្តែបទចោទប្រកាន់មិនបានឆ្លុះបញ្ចាំងពីស្ថានទម្ងន់នៃបទល្មើសនោះទេ។
លោកបាននិយាយថា៖ «ការឃុំខ្លួនជនជាប់ចោទគឺជាការចាំបាច់ ដើម្បីការពារមិនឲ្យគាត់ប្រព្រឹត្តបទល្មើសបន្ថែមទៀត និងបង្កការប៉ះពាល់ទៅដល់អ្នកដទៃគ្រោះថ្នាក់»។
លោកច័ន្ទគាបានបន្តថា៖ «ប៉ុន្តែ យើងមានការសោកស្តាយ ពាក់ព័ន្ធបទចោទ ពីព្រោះបទចោទនេះវាមិនស៊ីបទល្មើស។ គាត់ពិតជាបានដកកាំភ្លើង និងបាញ់បុគ្គលម្នាក់។ ហើយអ្វីដែលតុលាការបានចោទប្រកាន់មកលើជនជាប់ចោទនោះជាទោសទណ្ឌមិនធ្ងន់ធ្ងរនោះទេ»។
លោក ច័ន្ទគា បានបន្ថែមថា លោកបានត្រៀមមេធាវីម្នាក់រួចហើយ ដើម្បីការពារជនរងគ្រោះ និងស្វែងរកភស្តុតាងគ្រប់គ្រាន់នៅក្នុងករណីនេះ។
លោកបាននិយាយថា៖ «មេធាវីនឹងស្វែងរកភស្តុតាងបន្ថែមនៅក្នុងរឿងក្តីនេះ មិនថា គាត់បានប្រើអំពើហិង្សាដោយចេតនា ឬព្យាយាមសម្លាប់ [ជនរងគ្រោះ] នោះទេ ដើម្បីឲ្យចៅក្រមផ្លាស់ប្តូរបទចោទប្រកាន់»៕