កាលពីថ្ងៃពុធ ក្រុមសហជីពបានរិះគន់ភាពអសកម្មរបស់គណៈកម្មការមួយ ដែលរដ្ឋាភិបាលបានបង្កើតឡើងកាលពីឆ្នាំ២០១៧ ជាផ្នែកមួយដើម្បីស៊ើបអង្កេតករណីឃាតកម្មលើមេដឹកនាំសហជីពការងារលោក ជា វិជ្ជា ខណៈពេលពួកគេប្រមូលផ្តុំសមាជិកសហជីពនិងបុគ្គលិកសិទ្ធិមនុស្ស ប្រារព្ធខួប១៦ឆ្នាំនៃការស្លាប់របស់លោក។
លោក ជា វិជ្ជា ប្រធានសហជីពសេរីកម្មករនៃព្រះរាជាណាចក្រកម្ពុជាត្រូវបានខ្មាន់កាំភ្លើងបាញ់សម្លាប់កាលពីថ្ងៃទី២២ ខែមករា ឆ្នាំ២០០៤ ក្បែរវត្តលង្កការ ក្នុងក្រុងភ្នំពេញ ខណៈពេលលោកកំពុងទិញកាសែតអានពេលព្រឹក។
បុរសពីរនាក់ត្រូវបានចាប់ខ្លួនពីបទឃាតកម្ម ប៉ុន្តែក្រោយមកត្រូវបានសម្រេចឲ្យរួចផុតពីការចោទប្រកាន់វិញ ខណៈក្រុមគ្រួសាររបស់លោក ជា វិជ្ជានិងក្រុមអង្គការសិទ្ធិមនុស្សធ្វើយុទ្ធនាការទាមទារឲ្យមានការស៊ើបអង្កេតឯករាជ្យមួយលើករណីឃាតកម្មនេះ ចំពេលមានការចោទប្រកាន់ថា មានភាពមិនប្រក្រតី។
អង្គការពលកម្មអន្តរជាតិ (ILO) បានទទូចយូរមកហើយឲ្យរដ្ឋាភិបាលស៊ើបអង្កេតករណីឃាតកម្មនេះ ជាករណីបន្ទាន់ ហើយរដ្ឋាភិបាលបានបង្កើតគណៈកម្មការអន្តរក្រសួងមួយកាលពីឆ្នាំ២០១៧ ដើម្បីត្រួតពិនិត្យមើលការអនុវត្តទៅតាមអនុសាសន៍របស់អង្គការពលកម្មអន្តរជាតិនេះ។
លោក ម៉ាន់ សេងហាក់ អនុប្រធាននៃអតីតសហជីពសេរីកម្មកររបស់លោក ជា វិជ្ជា បាននិយាយក្នុងកម្មវិធីជួបជុំមនុស្សប្រហែល១០០នាក់កាលពីថ្ងៃពុធថា គណៈកម្មការនេះខកខានមិនបានឆ្លើយតបទៅតាមកាតព្វកិច្ចរបស់ខ្លួនចំពោះអង្គការ ILO ។
លោក សេងហាក់ បាននិយាយថា៖ «គណៈកម្មការនេះត្រូវបានបង្កើតឡើងជាងពីរឆ្នាំមកហើយ ប៉ុន្តែពួកគាត់មិនដែលទាក់ទងទៅភរិយារបស់លោក ជា វិជ្ជា ឬសាច់ញាតិសួរនាំបន្តិចសោះឡើយ ដើម្បីស្វែងរកភស្តុតាងបន្ថែម ជួយដល់ដំណើរការនៃរឿងនេះទេ»។
លោកបាននិយាយថា កិច្ចប្រឹងប្រែងមកដល់ពេលនេះមិនទាន់ល្អគ្រប់គ្រាន់នៅឡើយទេ។
លោក សេងហាក់ និយាយថា៖ «យើងស្នើឲ្យភាគីពាក់ព័ន្ធ ជាពិសេសរដ្ឋាភិបាល ត្រូវចាត់វិធានការហ្មត់ចត់ធ្វើការងារលើករណីនេះ ដើម្បីផ្តល់យុត្តិធម៌ជូនក្រុមគ្រួសាររបស់លោក ជា វិជ្ជានិងបញ្ចប់និទណ្ឌភាពនៅកម្ពុជា»។
ចំណែកអ្នកចូលរួមផ្សេងទៀតបានរំឭកពីវីរភាពរបស់លោក ជា វិជ្ជា។
លោក វ៉ន ពៅ ប្រធានសមាគមប្រជាធិបតេយ្យឯករាជ្យ សេដ្ឋកិច្ចក្រៅប្រព័ន្ធបាននិយាយថា៖ «យើងនឹងមិនភ្លេចអ្វីដែលលោក ជា វិជ្ជា បានធ្វើសម្រាប់ប្រជាជនខ្មែរ និងកម្មករខ្មែរនោះទេ»។
លោក វ៉ន ពៅ បាននិយាយថា លោក ជា វិជ្ជា បានជំរុញឲ្យសមាជិកសហជីពនិងកម្មករសម្តែងសិទ្ធិរបស់ខ្លួន។
លោកនិយាយថា៖ «ប្រសិនបើយើងត្រូវគេកេងប្រវ័ញ្ច យើងត្រូវតែសាមគ្គីគ្នាតតាំងនឹងអំពើកេងប្រវ័ញ្ចនោះ»។
ក្នុងបទសម្ភាសតាមទូរស័ព្ទពីប្រទេសហ្វាំងឡង់ អ្នកស្រី ជា គីមនី ប្រពន្ធលោក ជា វិជ្ជា បានប្រាប់ខេមបូចាថា អ្នកស្រីដេកមិនលក់ដល់ម៉ោង២យប់ ដោយគិតដល់ខួប១៦ឆ្នាំចាប់តាំងពីលោក ជា វិជ្ជា បានស្លាប់។
អ្នកស្រី គីមនី បាននិយាយថា៖ «ខ្ញុំមិនដែលបោះបង់ក្តីសង្ឃឹមថា ថ្ងៃណាមួយ យុត្តិធម៌នឹងមកដល់សម្រាប់ក្រុមគ្រួសាររបស់យើង។ ខ្ញុំមិនដឹងថា នៅពេលណានោះទេ ប៉ុន្តែយើងរង់ចាំថ្ងៃនោះ»។
អ្នកស្រីបាននិយាយថា អ្នកស្រីនិងកូនស្រីពីរនាក់របស់អ្នកស្រីនឹកដល់ប្រទេសកម្ពុជា ប៉ុន្តែនឹងមិនត្រឡប់ទៅវិញទេ លុះត្រាតែរឿងក្តីនេះត្រូវបានដោះស្រាយ។
អ្នកស្រី គីមនី បាននិយាយថា៖ «ពេលនេះ ខ្ញុំមើលឃើញថា កម្ពុជាកំពុងដើរថយក្រោយ។ មិនមែនជាប្រទេសនីតិរដ្ឋទេ។ ភាគច្រើន ពួកគេចាប់ខ្លួនមនុស្សល្អដាក់ពន្ធនាគារ។នៅពេលមានអំពើឃាតកម្មកើតឡើង ពួកគេមិនដែលរកឃើញឃាតករនោះទេ»។
លោក ជា វិជ្ជា បានបង្កើតសហជីពសេរីកម្មករកាលពីឆ្នាំ១៩៩៦ ជាមួយនឹងសមាជិកសហជីពផ្សេងទៀតដូចជា លោក រ៉ុង ឈុន និងអ្នកស្រី អ៊ូ ម៉ារី ដោយមានការគាំទ្រពីលោក សម រង្ស៊ី ជាអ្នកនយោបាយបក្សប្រឆាំង៕