រដ្ឋបាលសង្កាត់អណ្តូងខ្មែរ ដែលស្ថិតនៅក្នុងក្រុងកំពត ខេត្តកំពត ផ្តល់អាទិភាព ដល់ជនមានពិការភាពទាំងអស់ ក្នុងការទៅទទួលសេវាសាធារណៈផ្សេងៗ ដោយមិនយកថ្លៃសេវាចំពោះការធ្វើឯកសារណាមួយឡើយ។
ចៅសង្កាត់រងទី១ នៃសង្កាត់អណ្តូងខ្មែរ លោកស្រី ខេង សុផន បានថ្លែងនៅក្នុងកម្មវិធីសន្ទនាមតិរបស់វិទ្យុជាតិ៩មករា ថា នៅក្នុងសង្កាត់អណ្តូងខ្មែរជនមានពិការភាពមានច្រើនប្រភេទ ដែលពួកគាត់ជួបនឹងបញ្ហាប្រឈមជាច្រើន ជាពិសេសបញ្ហាសេដ្ឋកិច្ចគ្រួសារ។
អ្នកស្រីបានថ្លែងថា៖ «ជនមានពិការភាពគ្រប់ប្រភេទ រដ្ឋបាលសង្កាត់ តែងតែមានអាទិភាពជានិច្ចក្នុងការទៅទទួលសេវាសាធារណៈផ្សេងៗ។ ហើយរដ្ឋបាលឃុំ-សង្កាត់ មិនទទួលយកថ្លៃសេវាចំពោះការធ្វើឯកសារណាមួយពីពួកគាត់ឡើយ»។
អ្នកស្រី ខេង សុផន បានថ្លែងថា កន្លងមកនៅសង្កាត់អណ្តូងខ្មែរ បានសហការជាមួយអង្កការ Epic Arts ដែលជាអង្គការក្រៅរដ្ឋាភិបាល អង្គការ CWCC សង្គមកិច្ចក្រុង សង្គមកិច្ចខេត្ត និងសប្បុរសជន ក្នុងការដោះស្រាយបញ្ហាប្រឈមរបស់ជនពិការ។
លោកស្រីបានបញ្ជាក់បន្ថែមថា៖ «រាជរដ្ឋាភិបាលបានយកចិត្តទុកដាក់លើជនមានពិការភាព ដោយផ្តល់ ជាបណ្ណសមធម៌ ក៏ដូចជាបណ្ណជនពិការដល់ ជនមានពិការភាពគ្រប់រូប»។
ប្រធានអង្គការខ្មែរជីវិតឯករាជ្យ លោក មុយ សឿ បានលើកឡើង ជនពិការជួបប្រទះនឹងបញ្ហាប្រឈមធំជាងគេគឺ សេដ្ឋកិច្ចគ្រួសារ និងការធ្វើដំណើរ។ ដើម្បីសម្រួលដល់ការធ្វើរដំណើររបស់ពួកគាត់ ខាងឃុំសង្កាត់ សាលារៀន និងបន្ទប់ទឹកសាធារណៈ គួរតែមានជម្រេលសម្រាប់ឱ្យពូកគាត់ងាយស្រួលក្នុងការធ្វើដំណើរឡើងចុះ ។
គូរបញ្ជាក់ផងដែរថា បច្ចុប្បន្ននៅក្នុងខេត្តកំពតមានកាកបាទក្រហមក្រុង កាកបាតក្រហមខេត្ត មន្ទីរសង្គមកិច្ច បានផ្តល់ជាអាហារ និងសម្ភារៈផ្សេងៗដល់ជនពិការ ដើម្បីសម្រួលជីវភាពបានមួយកម្រិតផងដែរ៕