សមាគមសម្ព័ន្ធអ្នកសារព័ត៌មានកម្ពុជា

អាជ្ញាធរទទូចដល់ប្រជាពលរដ្ឋរស់នៅលើដីសួនព្រែកព្រះស្តេចសហការដើម្បីបញ្ចប់ជម្លោះដីធ្លី

លោកឈឺន យឿប អនុប្រធានមន្ទីររៀបចំដែនដី នគររូបនីយ៍កម្ម សំណង់ថ្លែងក្នុងកម្មវិធីសន្ទនាមតិកន្លងមក។ រូបភាព៖ រី មុនីបញ្ញា
លោកឈឺន យឿប អនុប្រធានមន្ទីររៀបចំដែនដី នគររូបនីយ៍កម្ម សំណង់ថ្លែងក្នុងកម្មវិធីសន្ទនាមតិកន្លងមក។ រូបភាព៖ រី មុនីបញ្ញា

អាជ្ញាធរក្រុងបាត់ដំបងនិងមន្រ្តីជំនាញ ទទូចដល់ប្រជាពលរដ្ឋកំពុងរស់នៅ លើដីសម្បទាន សង្គមកិច្ច ជាដីដែល​គ្រោង ធ្វើ​សួនព្រែកព្រះស្តេច ស្ថិតនៅ ភូមិ​អូរ​ខ្ជាយ សង្កាត់ព្រែក​​ព្រះស្តេច​ ក្រុង​បាត់ដំបង​ ចូលរួមសហការរុះរើរំកិលទៅតាមព្រំដី ដែលមន្រ្តីជំនាញបានធ្វើការបែងចែកជាឡូតិ៍រួចរាល់ ដើម្បីឆាប់ទទួលបានកម្មសិទ្ធិដីធ្លីស្របច្បាប់។

លោកឈឺន យឿប អនុប្រធានមន្ទីររៀបចំដែនដី នគររូបនីយ៍កម្ម សំណង់ និងសុរិយោដីខេត្តបាត់ដំបង បានទទូចដល់ប្រជាពលរដ្ឋឲ្យចូលរួមជាមួយអាជ្ញាធរដើម្បីដោះស្រាយបញ្ចប់ជម្លោះ។

លោកបានថ្លែងថា ៖ «ការប្រឈមមួយដែលធ្វើឲ្យការដោះស្រាយមានភាពស្មុគស្មាញ ដោយសារ​មាន​បងប្អូនមួយចំនួនទាមទារទំហំដីទៅតាមចំនួនសមាជិកគ្រួសារ។ បើសិនជាបែបនេះមានតែបន្តចែកចំពោះបងប្អូនដែលយល់ព្រម ចំណែកអ្នកដែលមិនយល់ព្រមគឺមានតែទុកសិន»។

លោក ភោគ អាត់ ប្រធានការិយាល័យ រៀបចំដែនដី នៃមន្ទីរនគររូបនីយ៍កម្ម សំណង់ និងសុរិយោដីខេត្តបាត់ដំបង បានឲ្យ​ដឹង​ថា ការដោះស្រាយមិនចេញនេះគឺដោយសារប្រជាពលរដ្ឋខ្លះនាំអ្នកក្រៅមកនៅ ហើយខ្លះការកូនចៅ កើនឡើងនូវចំនួនសមាជិក ច្រើនជាងកាលដែលសុរិយោដីទៅសួរយកទិន្នន័យ ។

យុវជនមួយរូប ជាពលរដ្ឋមួយរូបរស់នៅលើដីសួននេះ ក្នុងភូមិ១៣មករា បានត្អូញត្អែរអំពីបង្ហាញពីភាពមិនពេញចិត្តចំពោះការដេញ និងផ្តល់ជូនដីថ្មីបែបនេះ ដោយលើកឡើងថា ដីរបស់ខ្លួនបានរស់នៅជាយូរមកហើយ រួចមានកូនចៅដែលរស់នៅលើដីនេះច្រើន បើសិនជាជាអាជ្ញាធរចែកដីសម្បទានឲ្យតិច ច្បាស់ជាគ្មានកន្លែងឲ្យកូនចៅនៅទេ ។

ជាការឆ្លើយតប ទៅលើបញ្ហានេះ លោក ឈឺន យឿប អនុប្រធានមន្ទីរបាន ឲ្យ​ដឹង​ថា ចាប់តាំងពីបង្កើតគណ:កម្មការសុរិយោដីមក ខេត្តបាត់ដំបងទទួលពាក្យបណ្តឹង ចូល ៥៣៦ ករណី ដែលក្នុងនោះឆ្នាំ២០២២ ទើបតែមានបណ្តឹងចូល១ករណី ហើយបានដោះស្រាយបញ្ចប់ ចំនួន ២៤១ ករណី និង ច្រានចោលពាក្យបណ្តឹង ១៣១ ករណី បញ្ជូនទៅថ្នាក់ជាតិ ៥០ ករណី និងកំពុងតែសោះស្រាយ ៧១ ករណី។

គួររំលឹកផងដែរថា ថ្នាក់ដឹកនាំ​ខេត្តបាត់ដំបង បាន​ស្នើ​ទៅ​រាជរដ្ឋាភិបាល ដើម្បី​រៀបចំ​បែងចែក ដី​គ្រោងធ្វើ​​សួន ទៅជាដី​សម្បទាន​សង្គមកិច្ច ផ្តល់ជូន ពលរដ្ឋ​លើដី​គ្រោង​សួន​ព្រែក​ព្រះស្តេច រួមទាំង យោធិន​​ក្រីក្រ និង​ជនក្រីក្រ គ្មាន​ផ្ទះសំបែង ។​ ​ក្នុងអំឡុង​ឆ្នាំ ២០០៧ រដ្ឋបាលខេត្ត​បាត់ដំបង បានរៀបចំ​ដី​នេះ បែងចែក​ជា​ឡូ​តិ៍ ៗ ដែល​បាន​ស្រង​ឈ្មោះ អ្នករស់នៅ លើដី​គ្រោង​សួន​នេះ​ផ្ទាល់ មាន ៣៣៤ គ្រួសារ៕

អត្ថបទដោយពលរដ្ឋសារព័ត៌មាន​ រី មុនីបញ្ញា

92 views