ផលិតផលប្រេងកម្ពុជាស្ថិតក្នុងភាពមិនច្បាស់លាស់ ខណៈក្រុមហ៊ុន KrisEnergy ប្រកាសក្ស័យធន

យោធាកាន់ដំណក់ប្រេងដំបូងរបស់កម្ពុជាក្នុងពិធីតំកល់មួយ នៅវិមានឈ្នះ ឈ្នះ ក្នុងរាជធានីភ្នំពេញ ថ្ងៃទី៩ ខែមិថុនា ឆ្នាំ២០២១។ ខេមបូចា/ បញ្ញា ឆព័ណ្ណ
យោធាកាន់ដំណក់ប្រេងដំបូងរបស់កម្ពុជាក្នុងពិធីតំកល់មួយ នៅវិមានឈ្នះ ឈ្នះ ក្នុងរាជធានីភ្នំពេញ ថ្ងៃទី៩ ខែមិថុនា ឆ្នាំ២០២១។ ខេមបូចា/ បញ្ញា ឆព័ណ្ណ

ទោះបើ​រដ្ឋាភិបាល​កម្ពុជា​មាន​មោទនភាព​ចំពោះ​ផលិត​ផល​ប្រេង​ដែល​ទទួល​បាន​បន្ទាប់ពី​រង់​ចាំ​អស់​ពេល​ជា​យូរ ប៉ុន្តែ​វិស័យ​ផលិត​ផល​ប្រេង​របស់ប្រទេស​នេះ​ហាក់​នៅ​មាន​ភាព​មិនប្រាកដ​ប្រជា បន្ទាប់​ពី​ក្រុម​ហ៊ុន​បូមប្រេង​ KrisEnergy ប្រកាស​ថា​មិន​មាន​លទ្ធភាព​សង​បំណុល​​។ ​

រដ្ឋាភិបាល​បាន​យក​​ដំណក់​ប្រេង​ដំបូង​របស់​ខ្លួន​ទៅ​ដាក់​តំកល់​នៅ​ក្នុង​វិមាន​ឈ្នះ ឈ្នះ ​កាល​ពីថ្ងៃពុធ​។ រដ្ឋ​មន្ត្រី​ក្រ​សួង​ការពារ​ជាតិ លោក ទៀ បាញ់ ដែលធ្វើ​ជា​អធិបតី​ក្នុងពិធី​នោះ មាន​ប្រ​សាសន៍ថា​​ផលិត​ផល​ប្រេង​​គឺ​ជា​ពរជ័យ​សម្រាប់​កម្ពុជា​។​

លោក​មានប្រសាសន៍ថា​៖ «​សម្រាប់​អ្នក​​លើកឡើង​​ពី​​ «បណ្ដាសាប្រេង»​ វា​មិន​ចំលែក​ទេ ព្រោះពួកគេ​តែងតែ​និយាយ​បែបនេះ ហើយមិនមែន​តែ​រឿងប្រេងនេះទេ»។ លោក​បន្ត​ថា៖ «ប៉ុន្តែ​ពួកគេ​តែងរារាំងដល់​ដំណើរការ​អភិវឌ្ឍ និងការរីក​ចំរើន​របស់ប្រទេស ហើយ​ធ្វើ​គ្រប់​យ៉ាង​ដែលពួកគេ​អាច​ដើម្បី​​បំផ្លាញ​ផល​ប្រយោជន៍​ប្រទេស​ជាតិ»។​

តាំងពី​កម្ពុជា​​​បាន​បូម​យក​ដំណក់ប្រេង​ដំបូង​ពី​ឈូង​សមុទ្រ​​ក្នុង​ខែ​ធ្នូ ឆ្នាំ​២០២០ អ្នក​ឃ្លាំ​មើល​ខ្លះ​បាន​អំពាវ​នាវ​ឲ្យ​មាន​តម្លាភាពក្នុង​ការ​គ្រប់​គ្រង​ចំណូល​​បាន​ពី​ប្រេង​នេះ ដើ​ម្បី​បញ្ចៀស​ពី អ្វី​ដែល​គេ​ហៅ​ថា «បណ្ដាសាប្រេង» ដែលអាច​​រំខាន​ដល់​ផលិត​ផល​ធំៗ​របស់ជាតិ​ផ្សេងទៀត​។​

​យ៉ាងណា បន្ទាប់​ពី​ប្រាំ​មួយ​ខែ​នៃប្រតិបត្តិការ​បូមប្រេង វិស័យ​ថ្មី​មួយ​នេះ​កំពុង​ជួប​ភាព​មិន​ប្រាកដ​ប្រ​ជា ខណៈ​ក្រុម​ហ៊ុន​អភិវឌ្ឍន៍ KrisEnergy ដាក់​ពាក្យ​សុំរំលាយក្រុមហ៊ុន ខណៈបរិមាណ​ប្រេង​ទទួលបាន​តិច​ជាង​ការ​រំពឹង​ទុក​។​​ ក្រុម​ហ៊ុន​រុក​រក​ប្រេង​មាន​មូលដ្ឋាន​នៅ​ប្រទេស​សិង្ហបុរី​មួយ​នេះ កាលពីថ្ងៃទី៤ ខែមិថុនា បាន​ប្រកាស​ថា​ខ្លួន​មិន​មាន​លទ្ធភាព​ក្នុង​ការ​សង​បំណុល ហើយ​​ថា​បាន​រៀប​ចំដំណើរ​ការ​ប្រកាស​ក្ស័យធន​។​ ក្រុម​ហ៊ុន​បាន​ដាក់​លិខិត​បិទ​ប្រតិបត្តិ​ការ​របស់​ខ្លួន​ទៅ​កាន់​តុលាការ​កំពូល​នៅ​កោះ​​​ Cayman ជា​កន្លែង​ដែល​ក្រុម​ហ៊ុន​បាន​ចុះ​បញ្ជី​។​

ក្នុង​សេចក្ដី​ប្រកាសព័ត៌មាន​​របស់​ខ្លួន​ទៅ​កាន់​ម្ចាស់​ភាគ​ហ៊ុន ក្រុម​ហ៊ុន​បាន​អះអាង​ថា​បំណុលរបស់​ខ្លួន​កើន​លើស​តម្លៃ​​ទ្រព្យ​ដែល​មាន ហើយ​លំហូរ​សាច់​ប្រាក់​ទាប​បាន​ពីការ​អភិវឌ្ឍ​អណ្តូងប្រេងអប្សរា​ស្ថិតនៅប្លុក១A ​ មានន័យថា​​​ការ​បង្វិល​សង​សាច់​ប្រាក់​មិន​អាច​ធ្វើ​បាន​តទៅទៀត​។ ដោយ​សារ​តែ​មិនមាន​វិធីអាចទទួល​យក​បាន​​ពី​ជម្រើស​​បង្វិល​សាច់​ប្រាក់​សង​ផ្សេងទៀត និង​មិនមាន​ទុន​ថ្មី​បន្ថែម​សម្រាប់​ក្រុម​ហ៊ុន បើ​តាម​សេចក្ដី​ប្រកាស ក្រុម​ហ៊ុន​គ្មាន​ជម្រើស​អ្វី​​ផ្សេង​ ក្រៅពី​ការ​ប្រកាស​ក្ស័យធន។ ក្នុង​សេចក្ដី​ប្រកាសព័ត៌មាន​ថ្មីមួយទៀត​ចេញផ្សាយ​កាលពីថ្ងៃទី​៨ មិថុនា  ក្រុម​ហ៊ុន​បាន​ប្រកាស​ថា​សាជីវកម្ម​​ Madison Pacific Trust Limited នឹង​ចាត់តាំង​អ្នក​ទទួល​លើ​ភាគហ៊ុន និង​ទ្រព្យ​របស់​ក្រុម​ហ៊ុន KrisEnergy ។​

លោក​ស្រី Tanya Pang អនុប្រធាន​ផ្នែក​ទំនាក់ទំនង​សារ​ជីវ​កម្ម​របស់​ក្រុមហ៊ុន KrisEnergy បាន​បដិសេធ​ធ្វើអត្ថាធិប្បាយ ដោយ​បាន​ឲ្យ​អ្នក​សារព័ត៌មាន​មើល​ព័ត៌មាន​លើ​វិបសាយ​ក្រុម​ហ៊ុន​វិញ​។

ដំណក់ប្រេងដំបូងត្រូវបានរក្សាទុកក្នុងវិមានឈ្នះ ឈ្នះ ក្នុងរាជធានីភ្នំពេញ ថ្ងៃទី៩ ខែមិថុនា ឆ្នាំ២០២១។ ខេមបូចា/ បញ្ញា ឆព័ណ្ណ

លោក ជៀប សួរ អគ្គនាយក​នៃ​អគ្គនាយកដ្ឋាន​ប្រេងកាត​នៃ​ក្រសួង​រ៉ែ និង ​ថាមពល​ មាន​ប្រ​សាសន៍​ថា​​កម្ពុជា​ក៏​កំពុង​រង់​ចាំ​មើល​ដែរ​ថា​ឧស្សាហកម្ម​មួយ​នេះ​នឹង​អភិវឌ្ឍ​ទៅ​ដោយ​រលូន​ឬ​យ៉ាងណា​។​

លោក ​មានប្រសាសន៍​ថា៖ «​យើង​មិនដឹង​ថា​នឹង​មាន​អ្វី​កើត​ឡើងនៅឡើយទេ ពីព្រោះ​យើង​កំពុង​រង់ចាំ​មើល​ការ​សម្រេច​របស់​តុលាការ ថាតើ​​​ពួកគេ​ប្រគល់​​ទ្រព្យ​សម្បត្តិ​ក្រុម​ហ៊ុន​ទៅ​ឲ្យ​ម្ចាស់​បំណុល​ណាមួយ ដែល​អាច​នឹង​បន្ត​ប្រតិបត្តិ​ការ​នៅ​កម្ពុជា​ទៀត»។​

យ៉ាងណា លោក​ថា​ក្រុម​ហ៊ុន​នៅបន្ត​បូម​ប្រេង​ជាធម្មតា​។​​

លោក​មានប្រសាសន៍​ថា៖ «ក្នុង​នាម​រាជរដ្ឋាភិបាល យើង​​គឺមើល​តែ​ទៅ​លើ​លក្ខខណ្ឌ​មាន​ក្នុង​កិច្ច​ព្រម​ព្រៀង»។ ដោយបន្ថែមថា៖ «​មក​ដល់​ពេល​នេះ​ ក្រុម​ហ៊ុន​បាន​បំពេញ​គ្រប់​លក្ខខណ្ឌ​ទាំងអស់​សម្រាប់​ប្រតិបត្តិការ​របស់​ខ្លួន»។​

ក្រុម​ហ៊ុន KrisEnergy បាន​ចុះ​កិច្ច​ព្រម​ព្រៀង​ជាមួយ​​រាជរដ្ឋាភិបាល​កាលពី​ឆ្នាំ​២០១៧ ដើម្បី​​​បូម​ប្រេង​ក្នុង​ប្លុក​A លើ​ផ្ទៃទឹក​៣ ០៨៣​គីឡូម៉ែត្រការ៉េ បន្ទាប់ពី​បាន​ទិញ​ហ៊ុន​ទាំងអស់​របស់​ក្រុម​ហ៊ុន​ Chevron Corp’s ក្នុង​តម្លៃ​៦៥​លាន​ដុល្លារ​កាលពី​ឆ្នាំ​២០១៤ បន្ទាប់ពី​កម្ពុជា​បាន​បរាជ័យ​ក្នុង​ការ​បូបមប្រេង​លើក​ដំបូង​របស់​ខ្លួន​។​ ក្រុម​ហ៊ុន​ KrisEnergy កាន់​កាប់​ភាគ​ហ៊ុន​៩៥​ភាគ​រយ ហើយ​រដ្ឋាភិបាល​កម្ពុជា​មាន​ហ៊ុន​ចំនួន​ប្រាំ​ភាគរយ​​ក្នុង​គម្រោង​មួយ​នេះ។​

ក្រុម​ហ៊ុន​​បាន​ប្រកាស​ថា​ផលិត​ផល​ប្រេង​រំពឹង​ថា​អាច​បូម​បាន​ក្នុង​កម្រិត​ខ្ពស់​បំផុត​៧ ៥០០​បារ៉ែល​ក្នុង​មួយ​ថ្ងៃ ក្រោយ​ពី​ខ្លួនបាន​បញ្ចប់​គម្រោង​ខួង​ប្រេង​កាលពី​ពាក់​កណ្ដាលខែកុម្ភៈ ​ឆ្នាំ​២០២១​។ ប៉ុន្តែ​ផល​ប្រេង​ដែល​ទទួល​បាន​ទាប​ជាង​ការ​រំពឹង​ទុក ដោយ​បរិមាណ​ប្រេង​ដែល​បូម​បាន​ក្នុង​​អណ្តូងប្រេងអប្សរា​​មាន​ត្រឹម​តែ​ជាង​២ ៤០០​បារ៉ែល​ក្នុង​មួយ​ថ្ងៃ។​

អ្នកសេដ្ឋកិច្ច​និយាយ​ថា​ផលិតផល​ប្រេង​ដែលទទួលបាននៅ​ពេល​នេះមាន​ចំនួន​តិច​តួច​សម្រាប់​ចំណូល​ជាតិ ទោះ​បីជា​ប្រតិបត្តិការនេះ​ដំណើរការពេញ​លេញ​ក៏​ដោយ​។​ ប៉ុន្តែ សម្រាប់ លោក ហុង វណ្ណៈ អ្នកស្រាវជ្រាវ​ផ្នែក​សេដ្ឋកិច្ច ​នៅ​រាជ​បណ្ឌិត្យ​សភា​កម្ពុជា មាន​ប្រសាសន៍​ថា ប្រេង​ និង​ឧស្ម័ន​ នឹង​រក​ឃើញ​មានច្រើន​ទៀត​នៅ​​ក្នុង​តំបន់​ត្រួត​ស៊ី​គ្នា​​ជាមួយ​ប្រទេស​ថៃ​។​

លោក​មានប្រសាសន៍ថា​៖​«​បើ​និយាយ​ពី​ទិដ្ឋភាព​សេដ្ឋកិច្ច​ជារួម ការ​រំខាន​ណាមួយ​លើ​ផលិតកម្ម​ប្រេង​មិន​​ប៉ះពាល់​ធ្ងន់ធ្ងរ​លើ​ការ​អភិវឌ្ឍ​សេដ្ឋកិច្ចទេ ពីព្រោះ​ថា​ចំណូល​ដែល​រំពឹង​ថា​បានពីប្រេង​មាន​ចំណែក​តូច​បើ​ធៀប​ទៅ​នឹងឧស្សាហកម្ម​ដែល​មាន​ស្រាប់​ដូច​ជា​ឧស្សាហកម្ម​ទេស​ចរណ៍ កសិកម្ម និង​ឧស្សាហកម្មកាត់ដេរ ជា​ដើម ដែល​បាន​រក​ចំណូល​រាប់​ពាន់​លាន​ដុល្លារ​សម្រាប់​សេដ្ឋកិច្ច»។​

លោក វណ្ណៈ ប្រាប់​ខេមបូចា ថាលោក​នៅ​តែជឿ​​ប្រតិបត្តិការ​នឹង​នៅ​តែ​បន្ត​ទោះ​បីជា​ក្រុម​ហ៊ុន​ក្ស័យ​ធន ដោយ​ថា​រដ្ឋាភិបាល​នឹង​រក​វិធី​ផ្សេង​ទៀត​ដើម្បី​បន្ត​​បូម​ប្រេង​៕

ប្រែសម្រួលពីអត្ថបទភាសាអង់គ្លេស៖ Cambodia’s oil production uncertain as KrisEnergy declares insolvency

340 views
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »