សណ្ឋាគារខ្នាតធំមួយប្រកាសបិទទ្វារបណ្ដោះអាសន្ន ខណៈជម្លោះការងារមិនទាន់ដោះស្រាយបញ្ចប់

ក្រុមបុគ្គលិកតវ៉ានៅខាងមុខសណ្ឋាគារឡឺ ម៉េរីឌាន អង្គរ ក្នុងខេត្តសៀមរាប កាលពីខែកញ្ញា បន្ទាប់ពីខាងសណ្ឋាគារបញ្ឈប់សហជីពបីនាក់កាលពីខែកក្កដា។ បញ្ញា ឆព័ណ្ណ
ក្រុមបុគ្គលិកតវ៉ានៅខាងមុខសណ្ឋាគារឡឺ ម៉េរីឌាន អង្គរ ក្នុងខេត្តសៀមរាប កាលពីខែកញ្ញា បន្ទាប់ពីខាងសណ្ឋាគារបញ្ឈប់សហជីពបីនាក់កាលពីខែកក្កដា។ បញ្ញា ឆព័ណ្ណ
Share on facebook
Share on twitter
Share on linkedin
Share on telegram
Share on whatsapp

សណ្ឋាគារ ឡឺ ម៉េរីឌាន អង្គរ (Le Meridien Angkor) នឹង​បិទ​ទ្វារ​បណ្ដោះ​អាសន្ន​យ៉ាង​តិច​មួយ​ឆ្នាំ ដោយ​គិត​ចាប់​ពីថ្ងៃទី​២៥ ខែ​វិច្ឆិកា នេះបើ​តាម​ការ​បញ្ជាក់​របស់​តំណាង​សណ្ឋា​គារ ខណៈ​​បុគ្គលិក​នៅ​បន្ត​ការតវ៉ា​ទាក់ទង​នឹង​ការ​បញ្ឈប់​បុគ្គលិក​សណ្ឋាគារចំនួន​បី​នាក់កាល​​ពី​​ខែ​​កក្កដា។​

សណ្ឋាគារ​នេះ គឺជា​បណ្ដាញ​សណ្ឋាគារ​ខ្នាត​ធំ​លំដាប់​​អន្តរជាតិ​ដំបូង​គេ ដែល​បាន​ប្រកាស​បិទ​អាជីវកម្ម​របស់​ខ្លួន​នៅ​កម្ពុជា​ដោយ​សារតែ​វិបត្តិ​កូវីដ​១៩ ដែល​បាន​ធ្វើ​ឲ្យ​ប៉ះពាល់​ធ្ងន់​ធ្ងរ​ដល់​វិស័យ​ទេសច​រណ៍​ពិភពលោក និ​ងទីក្រុង​នានាពឹង​លើ​វិស័យ​ទេសចណ៍ ដូច​ជាខេត្ត​សៀម​រាប​ជាដើម។​ ក្រុមបុគ្គលិកសណ្ឋាគារ​បានធ្វើការតវ៉ា បន្ទាប់ពី​បុគ្គលិកបីនាក់ ត្រូវបាន​បញ្ឈប់ នៅពេលដែលពួកគេ​ស្នើសុំអ្នកគ្រប់គ្រង​មិនឲ្យ​កាត់ប្រាក់ខែ​ កាលពីខែកក្កដា។

​លោកស្រី Sabreena Jacob អ្នកចាត់ការ​ទូទៅ​របស់​សណ្ឋាគារ ​ឡឺ ម៉េរីឌាន អង្គរ បាន​បញ្ជាក់​នៅ​ថ្ងៃ​ពុធ​នេះ​ថា សណ្ឋា​គារ​ពិត​ជាបិទ​បណ្ដោះ​អាសន្ន​រយៈ​ពេល​មួយ​ឆ្នាំ​មែន ព្រោះ​ថា​វិបត្តិ​​កូវីដ​១៩ បាន​ធ្វើ​ឲ្យ​អតិថិជន​ធ្លាក់​ចុះ​។​

លោក​ស្រី​បញ្ជាក់តាមរយៈ​​អ៊ីម៉ែល​ថា៖ «ការបិទអាជីវកម្មនេះ​នឹង​ធ្វើ​ឡើង​រយៈពេល​មួយឆ្នាំ។ សណ្ឋា​គារ​មិ​ន​អាច​មាន​លទ្ធភាព​ចំណាយ​លើ​ថ្លៃ​បុគ្គ​លិក​បាន»។​

លោក​ស្រី​ឲ្យ​ដឹង​ទៀត​ថា​ «កិច្ចព្រម​ព្រៀង​បញ្ចប់​កិច្ច​សន្យា​ការងារ» បាន​ផ្ដល់​ជូន​បុគ្គលិក​ទាំង​អស់​មាន​លក្ខណៈ​ប្រ​សើរជាងអ្វី​ដែលមាន​ចែង​ក្នុង​​ច្បាប់ស្ដីពីការងារ ហើយ​បុគ្គលិក​នឹង​ទទួល​បាន«​ការ​ផ្ដល់​ប្រាក់​បន្ថែម​ផ្សេងៗ​​ខ្ពស់ជាង​ការ​ទូទាត់​ទៅ​តាម​ច្បាប់» ដែល​មាន​។​

យ៉ាងណា លោក​ស្រី មិន​បាន​ឆ្លើយ​តប​នឹង​សំណួរ​ទាក់ទង​នឹង​ការបញ្ឈប់​បុគ្គលិក​បី​រូប​ កាលពី​ខែកក្កដា ដែល​រងការ​ចោទ​ថា​បាន​ញុះញង់បុគ្គលិក​សណ្ឋាគារ​នោះទេ​។​

សកម្មជនសហជីព​បី​នាក់ គឺ​កញ្ញា ឌឿម ឆៃយ៉ា អ្នកនាង​ សុខ ណារ៉ែន និង​អ្នក​នាង ខាំ ស្រីភ័ក្រ បាន​ស្នើ​ឲ្យ​កម្មករ​ចុះ​ហត្ថលេខា​លើ​ញត្តិ​ទាម​ទារ​ឲ្យ​ខាង​សណ្ឋា​គារ​កុំ​កាត់​ប្រាក់ខែ​បុគ្គលិក​ច្រើន​ពេក​​ក្នុង​​ពេល​មានការ​ធ្លាក់ចុះ​ចំនួន​ភ្ញៀវទេសចរ ដោយ​សារ​វិបត្តិ​កូវីដ​១៩។​​

ក្រុម​បុគ្គលិក​សណ្ឋាគារធ្លាប់​​បាន​​ធ្វើការ​តវ៉ា​នៅ​ខាង​មុខ​មន្ទីរ​ការងារ​ខេត្ត និង​សណ្ឋាគារ​ ក្នុង​គោល​បំណង​ស្វែង​រក​ដំពោះ​ស្រាយ​លើជម្លោះ​ដែល​​មិន​ទាន់​ដោះ​ស្រាយ​ចេញ​​។​

លោក លី លីន​ដា ប្រ​ធាន​សហជីព​ក្នុង​សណ្ឋាគារ ​ឡឺ ម៉េរីឌាន អង្គរ បាន​ឲ្យ​ដឹង​នៅថ្ងៃ​ពុធ នេះថា​ លោក​ទើប​បាន​ទទួល​ដំណឹង​ពីខាង​សណ្ឋាគារ​អំពី​ការ​បិទអាជីវិកម្ម ពេល​ប្រជុំ​បុគ្គលិក​នៅថ្ងៃទី​២៣ ខែ​វិច្ឆកា។​

ប្រ​ធាន​សហជីពរូបនេះ បាន​ប៉ាន់​ស្មាន​ថា​សំណង​សរុប​សម្រាប់​បុគ្គ​លិក​គ្រប់​រូប​អាច​មាន​ចំនួន​ជិត​កន្លះ​លាន​ដុល្លារ ព្រោះថា​បុគ្គលិក​ និង​ថ្នាក់​ដឹកនាំ​មាន​ចំនួន​១៤០​នាក់ ដែល​ត្រូវ​បាន​សំណង​ចន្លោះពី​៧០០​ដុល្លារ ទៅ​១ម៉ឺន​ដុល្លារ​។​

​លោក​ឲ្យ​ដឹងថា​៖ «សម្រាប់​ខ្ញុំ បាន​ធ្វើ​ការ​នៅ​សណ្ឋាគារ​នេះ​ជិត​១៦​ឆ្នាំ​ ហើយ​ខ្ញុំ​គួរ​តែ​ទទួល​បាន​អត្ថប្រយោជន៍​ច្រើនជាង​៥ ០០០​ដុល្លារ»

លោកបន្ថែមថា​ក្រុម​ហ៊ុន​បាន​ផ្ដល់​ឲ្យ​បុគ្គលិក​នូវ​ប្រាក់​អត្ថប្រយោជន៍​ចំនួន​ប្រាំ ប៉ុន្តែបាន​ផ្ដល់អត្ថប្រយោជន៍​​ឲ្យ​បុគ្គ​លិក​ដែល​ត្រូវ​បញ្ឈប់​កាលពី​ខែ​កក្កដា តិចតួច​។​​

អ្នកនាង ខាំ ស្រីភ័ក្រ សហជីព​ម្នាក់​ក្នុង​ចំណោម​បី​នាក់ដែល​ត្រូវ​បញ្ឈប់ពី​ការងារ បាន​ឲ្យ​ដឹង​ថាក្រុម​ហ៊ុន​មិន​បាន​ទូទាត់​ប្រាក់​តាមការទាមទារ​នោះទេ ហើយ​ថា​ការ​បិទ​អាជីវកម្ម​​ជា​ចេតនា​ចង់​រំលាយ​សហជីព ក្នុង​ពេលណា​មួយ​ប្រសិន​បើ​សណ្ឋាគារ​ចាប់​ដំណើរ​ការ​ឡើង​វិញ​។​​

អ្នកនាង​បន្តថា៖ «ខ្ញុំ​គិតថា​ក្រុម​ហ៊ុន​យក​វិបត្តិ​កវីដ​១៩ ជាលេស​បិទ​សណ្ឋាគារ…​ហើយ​សណ្ឋាគារ​ចង់​រំលាយ​សហជីព​ប្រចាំ​សណ្ឋាគារ»។​

អ្នក​នាង​លើកឡើងថា​ វា​ជា​រឿង​ចម្លែក​ណាស់​ដែល​ក្រ​សួង និង​មន្ទីរ​ការងារ​មិន​បាន​ពិនិត្យ​លើ​គម្រោង​បិទ​សណ្ឋាគារ​នេះ ហើយ​ថា​ពួក​គេ​នឹង​ជួប​ជាមួយ​មន្ត្រី​នៅ​ថ្ងៃ​ពុធ​នេះ ដើម្បី​ដាក់​ពាក្យ​បណ្ដឹង​​។​​

លោក ស្វាយ​ ស៊ីថុល បុគ្គលិក​ម្នាក់ នៅ​សណ្ឋាគារ​ ឡឺ ម៉េរីឌាន អង្គរ ​​បាន​និយាយ​ថា បុគ្គលិក​មិន​ពេញ​ចិត្ត​នឹង​កញ្ចប់​សំណង​ដែល​ក្រុម​ហ៊ុន​ផ្ដល់​ឲ្យ​នោះទេ ហើយ​ថា​ពួកគេ​មាន​បំណង​ចរចាជាមួយ​សណ្ឋាគារ​ដើម្បីរក​ដំណោះស្រាយជូន​ដល់អ្នកទាំងបី​ដែលពុំទាន់ទទួលសំណង។

លោក​​បន្ថែមថា៖ «​សកម្មជន​សហជីពទាំងបីនាក់ ​មិន​យល់​ព្រម​ទៅ​នឹង​ការ​សម្រេច​​របស់​ក្រុម​ហ៊ុន​នោះទេ ដូច​នេះ​តំណាង​ក្រុម​ហ៊ុន​​នឹង​ជួបជាមួយ​តំណាង​សហព័ន្ធ និង​សហជីព​នៅ​រសៀល​ថ្ងៃ​ពុធ​នេះ»។​

លោក ស្វាយ​ ស៊ីថុល​ បាន​ម្រើ​ការ​នៅ​សណ្ឋា​គារ​នេះ​ជាង​១៥​ឆ្នាំ​មក​ហើយ និង​រំពឹង​ថាបាន​ប្រាក់​អត្ថ​ប្រយោជន៍ជាង​៣ ០០០​ដុល្លារ​។​

ប្រធាន​សហព័ន្ធ​សហជីពកម្មករ​និយោជិត​វិស័យ​ទេសចរណ៍​កម្ពុជា (CTUWF​) លោក ទូច កុសល មាន​អារម្មណ៍​ថា​ការ​បិទ​ដំណើរ​ការ​អាជីវកម្ម និង​ការ​បញ្ឈប់​បុគ្គ​លិក​ ក្នុង​គោល​បំណង​រំលាយ​សហជីព​។​

លោកបន្ថែមថា៖ «​ខាង​សណ្ឋា​គារ​បាន​ប្រកាស​បិទ​អាជីវកម្ម​បណ្ដោះ​អាសន្ន ប៉ុន្តែ​ពួកគេគួរ​​តែ បាន​​​បញ្ជូន​លិខិត​ទៅក្រ​សួង​ការងារ និង​ក្រ​សូង​ពាណិជ្ជកម្ម​ និង​បុគ្គ​លិក​ទាំងអស់ ប៉ុន្តែ​បុគ្គ​លិក​មិន​បាន​ទទួល​លិខិត​ជូន​ដំណឹង​ពីខាង​សណ្ឋាគារ​នោះទេ​»។​

​លោក ច័ន្ទ សុខុម ចិត្តា ប្រធាន​មន្ទីរ​ការងារ​ខេត្ត​សៀម​រាប បាន​ឲ្យ​ដឹងថា​ខាង​សណ្ឋាគារ​បាន​ជូន​ដំណឹង​ពីការ​បិទ​អាជីវកម្ម​បណ្ដោះ​អាសន្ននេះ​ទៅ​មន្ទីរ​​កាលពីថ្ងៃទី​២៣ ខែវិច្ឆកា ថា​ការបិទ​នឹង​ធ្វើ​ឡើង​នៅ​ថ្ងៃទី​២៥ ខែវិច្ឆិកា។​

លោក​បន្ថែមថា៖ «​ខាង​ក្រុម​ហ៊ុន​បាន​បូក​សរុប​កញ្ចប់​ប្រាក់សំណង​ដោយ​ខ្លួន​ឯង»​។​

លោក តុប សុភ័ក អ្នក​នាំ​ពាក្យ​ក្រសួង​ទេសចរណ៍​ បាន​លើក​ឡើងថា​មាន​ទេសចរបរទេស​តិច​តួច​បាន​មក​កម្ពុជា​នៅ​អំឡុង​វិបត្តិ​កូវិដ​១៩​នេះ ប៉ុន្តែ​លោក​សង្ឃឹម​ថា​ទេសចរ​ក្នុង​ស្រុក​នឹង​បន្ត​ធ្វើ​ដំណើរ​កម្សាន្ត​ក្នុង​ប្រទេស​។​

លោក ឲ្យ​ដឹងថា៖ «​តំបន់ទេសចរណ៍​ក្នុង​ខេត្ត​ផ្សេងៗ ជាពិសេស​ខេត្ត​សៀម​រាប បាន​រង​ផល​ប៉ះពាល់ជា​ខ្លាំង បើ​ធៀបទៅ​ខេត្ត​ផ្សេងៗ​ទៀត»។ លោក​បន្ថែមថា សណ្ឋាគារជាង​១០០​នៅ​ខេត្ត​សៀម​រាប​ បាន​រង​ផល​ប៉ះពាល់។​

វិស័យ​ទេស​ចរណ៍​​ទទួល​រង​គ្រោះ​ធ្ងន់​ជាង​គេ​​ក្នុង​អំឡុង​វិបត្តិ​កូវីដ​១៩នេះ ដោយ​ចំនួន​ភ្ញៀវ​បរទេស​បាន​ធ្លាក់ចុះ​៩៨​ភាគ​រយ​នៅ​ត្រីមាសទី​២ និង​៤០ភាគ​រយ​នៅ​ត្រីមាសទី​១​ក្នុង​ឆ្នាំ​២០២០។ រដ្ឋាភិបាល​បាន​ជួយ​ផ្ដល់​ថវិកា​មួយ​ចំនួន​ដល់​បុគ្គលិក​ធ្វើការ​ក្នុង​វិស័យ​ទេស​ចរណ៍​ក្នុង​អំឡុង​ពេល​ព្យួការងារ តែ​ក្រុម​អ្នក​តាម​ដាន​សង្គម​ថា​ថវិកា​ទាំង​នេះមិន​បាន​ផ្ដល់​ឲ្យបាន​ស្មើ​ភាព​នោះទេ​។​​

រដ្ឋលេខាធិការ​ក្រ​សួង​ទេសចរណ៍ លោក សុង តុងហាប់ បាន​សរសេរ​លើ​ទំព័រ​ហ្វេស​ប៊ុក​ក្រ​សួង​ទេសចរណ៍​ថា​ចំនួន​ភ្ញៀវ​ទេសចរបរទេស​មាន​ការធ្លាក់ចុះ​ចំនួន​៨០ភាគ​រយ និង​អ្នក​ទេសចរក្នុង​ស្រុក​ធ្លាក់ចុះ​៥០​ភាគរយ​ និង​គិត​ជា​ទឹក​ប្រាក់​ខាត​ក្នុង​វិស័យ​នេះ​មាន​ប្រហែល​៣ពាន់​លាន​ដុល្លារ​។​ ដោយ​សារ​តែ​បញ្ហា​នេះ បាន​ប៉ះពាល់​ដល់​ជំនួយ​ពាក់​ព័ន្ធ​ផ្នែក​ទេសចរណ៍​១ភាគ​៣ និង​ធ្វើ​ឲ្យ​បាត់បង់ការងារ​ជិត​៥១ ០០០​កន្លែង​។

43 views
Share on facebook
Share on twitter
Share on linkedin
Share on telegram
Share on whatsapp
ព័ត៌មានថ្មីៗ »
អត្ថបទពេញនិយម »