ក្រុមហ៊ុនប្រមូលសំរាមថ្មីចាប់ផ្តើមដំណើរការ ខណៈកម្មករស៊ីនទ្រីជាង ១.០០០នាក់ជួបបញ្ហាបន្ទាប់ពីបាត់បង់ការងារ

កម្មករក្រុមហ៊ុនស៊ីនទ្រី ប្រមូលសំរាមនៅតាមដងផ្លូវមួយនៅខណ្ឌចំការមន ក្រុងភ្នំពេញ កាលពីថ្ងៃទី០៨ ខែកក្កដា ឆ្នាំ២០២១។ខេមបូចា/ ព្រីង សំរាំង
កម្មករក្រុមហ៊ុនស៊ីនទ្រី ប្រមូលសំរាមនៅតាមដងផ្លូវមួយនៅខណ្ឌចំការមន ក្រុងភ្នំពេញ កាលពីថ្ងៃទី០៨ ខែកក្កដា ឆ្នាំ២០២១។ខេមបូចា/ ព្រីង សំរាំង

កម្មករ​​ជាង ១.០០០​នាក់​នៅ​រាជធានី​ភ្នំពេញ ដែល​ត្រូវ​បាន​បញ្ឈប់​ពី​ការងារ​កាល​ពី​សប្តាហ៍​មុន​ពី​ក្រុមហ៊ុន​ប្រមូលសំរាមស៊ីនទ្រី បាន​និយាយ​ថា ពួកគេ​កំពុង​ជួប​ការ​លំបាក​ក្នុង​ការ​ស្វែងរក​ការងារ​ថ្មី​ក្នុង​ក្រុមហ៊ុន​ប្រមូលសំរាម ខណៈ​មាន​ការ​លើកឡើង​ថា នេះ​ជា​ការ​រើសអើង​ប្រឆាំង​នឹង​សមាជិក​សហជីព។

លោក ឈុន នី គឺ​ជា​កម្មករ​ម្នាក់​ដែល​បាន​ជួប​ការ​លំបាក​ បន្ទាប់​ពី​ក្រុមហ៊ុន ស៊ីនទ្រី បាន​បញ្ឈប់​កម្មករ​ប្រមាណ​ជាង​ពាក់កណ្តាល​កាល​ពី​ថ្ងៃ​ទី០១ ខែ​កក្កដា។ អតីត​អ្នកបើកបរ​ឡាន​សំរាម​ឲ្យ​ក្រុមហ៊ុនស៊ីនទ្រី វ័យ​ ៣៦​ឆ្នាំ​រូប​នេះ បាន​និយាយ​ថា គាត់​ត្រូវ​បាន​ជ្រើស​ឲ្យ​ធ្វើការ​នៅ​ក្រុមហ៊ុន​ប្រមូល​សំរាម​មួយ​ទៀត​ឈ្មោះ 800 Super/Global Action for Environment Awareness បន្ទាប់​ពី​ត្រូវ​បាន​បញ្ឈប់​ពី​ការងារ។ ការងារ​ថ្មី​របស់​លោក​ទើប​តែ​ចាប់ផ្តើម ប៉ុន្តែ​លោក​ត្រូវ​បាន​បញ្ឈប់​ពី​ការងារ​​នៅ​ក្រុមហ៊ុន​ថ្មី​នេះ​កាល​ពី​ថ្ងៃ​ទី០២ ខែ​កក្កដា។

លោក​បាន​ថ្លែង​ថា៖ «ខ្ញុំ​ត្រូវ​បាន​តំណាង​ក្រុមហ៊ុន​ទូរសព្ទ​ប្រាប់​នៅ​ម៉ោង ៩​យប់ ដោយ​​ថា ខ្ញុំ​ត្រូវ​បាន​បញ្ឈប់​ពី​ការងារ​ ហើយ​ គេ​ចោទប្រកាន់​ខ្ញុំ​ថា​ជា សកម្មជន​សហជីព»។

លោក នី បាន​ថ្លែង​ប្រាប់ខេមបូចា ថាលោក​បាន​ធ្វើការ​នៅ​ក្រុមហ៊ុន​ស៊ីនទ្រី ចាប់តាំង​ពី​ឆ្នាំ ២០០៦ មក ដោយ​ដំបូង​ជា​អ្នក​ប្រមូលសំរាម មុន​ពេល​ត្រូវ​បាន​ដំឡើង​តួនាទី​ជា​អ្នក​បើក​ឡាន​សំរាម​នៅ​ឆ្នាំ២០០៩។ លោក​បាន​និយាយ​ថា លោក​បាន​ដាក់ពាក្យ​សុំ​ធ្វើការ​ជា​ថ្មី​នៅ​ក្រុមហ៊ុនស៊ីនទ្រី ប៉ុន្តែ​ត្រូវ​បាន​ប្រាប់​ថា ក្រុមហ៊ុន​មាន​កម្មករ​ពេញ​ហើយ។ ឥឡូវ​នេះ លោក នី​ បាន​ដាក់ពាក្យ​ធ្វើការ​នៅ​ក្រុមហ៊ុន Mizuda Group ដែល​ជា​ក្រុមហ៊ុន​ប្រមូលសំរាម​ទីបី​កំពុង​មាន​ប្រតិបត្តិការ​នៅ​ក្រុង​ភ្នំពេញ។

ដោយ​រំឭក​ពី​បញ្ហា​របស់​លោក​កាល​ពី​ពេល​ថ្មីៗ​នេះ ​លោក​បាន​និយាយ​ថា៖ «ខ្ញុំ​មិន​ជឿ​ថា ខ្ញុំ​មិន​អាច​បំពេញ​លក្ខខណ្ឌ​ជ្រើសរើស​បុគ្គលិក​នៅ​ក្រុមហ៊ុន​ទាំង​នោះ​ទេ ពីព្រោះ​ខ្ញុំ​មាន​បទពិសោធន៍​ជា​ច្រើន​ឆ្នាំ​ក្នុង​ការ​ប្រមូលសំរាម និង​បើក​ឡាន​សំរាម។ ខ្ញុំ​ខកចិត្ត​ដែល​គេ​បញ្ឈប់​ខ្ញុំ​ពី​ការងារ​ដោយមិនមាន​ហេតុផល»

លោក នី​ បាន​បន្ថែម​ថា៖ «ពួកគេ​គួរ​តែ​ជ្រើស​បេក្ខជន​ដោយ​ផ្អែក​លើ​បទពិសោធន៍​ និង​ចំណេះដឹង ប៉ុន្តែ​ពួកគេ​បាន​រើសអើង​ពួកយើង ហើយ​ឥឡូវ​នេះ​ ខ្ញុំ​គ្មាន​ការងារ​ធ្វើ​នោះទេ»

ក្រុមហ៊ុន​ស៊ីនទ្រី ដែល​កំពុង​សហការ​ជាមួយ​ក្រុមហ៊ុន​មួយ​ទៀត​ឈ្មោះ​ថា Everbright ពី​មុន​មក​មាន​កិច្ចសន្យា​ប្រមូលសំរាម​ផ្តាច់​មុខ​ក្នុង​រាជធានី​ភ្នំពេញ ប៉ុន្តែ​ត្រូវ​បាន​រង​ការ​ចោទ​ប្រកាន់​ជា​ប្រចាំ​ពី​ការ​ផ្តល់​សេវាកម្ម​អន់ខ្សោយ។ ក្រុមហ៊ុនស៊ីនទ្រី ​ត្រូវ​បាន​ដាក់​ក្រោម​ការ​គ្រប់គ្រង​ដោយ​រដ្ឋ​វិញ​នៅ​ឆ្នាំ​ ២០១៩ បន្ទាប់​ពី​អាជ្ញាធរ​បាន​ដក​សិទ្ធិ​ផ្តាច់មុខ​របស់​ក្រុមហ៊ុន​នេះ។ កាល​ពី​ឆ្នាំ​មុន ថ្នាក់ដឹកនាំ​រដ្ឋបាល​ក្រុងភ្នំពេញ​បាន​បែងចែក​ក្រុង​ភ្នំពេញ​ជា​បី​តំបន់​សម្រាប់​ការ​គ្រប់គ្រង​សំរាម ហើយ​បន្ទាប់​មក ​ដំណើរការ​ដេញថ្លៃ​បាន​ផ្តល់​កិច្ចសន្យា​ថ្មី​ដល់​ក្រុមហ៊ុន​ចំនួន​ពីរ​បន្ថែម​ទៀត ​រួម​មាន ​ក្រុមហ៊ុន 800 Super និង​ក្រុមហ៊ុន Mizuda ចំពោះ​ការ​ប្រតិបត្តិការ​គ្រប់គ្រង​សំណល់រឹង។

​ការ​បញ្ឈប់​ការងារ​កម្មករ​ជា​បន្ទាន់​ពី​សំណាក់​ក្រុមហ៊ុន​ Cintri បាន​ធ្វើឡើង​កាល​ពី​សប្តាហ៍​មុន ខណៈ​អតីត​តំបន់​គ្រប់គ្រង​ដោយ​ក្រុមហ៊ុន​នេះ​ត្រូវ​បាន​ផ្តល់​ឲ្យ​ជា​ផ្លូវការ​ដល់​ក្រុមហ៊ុន​ប្រមូល​សំរាម​ដែល​ជា​គូប្រជែង​ដទៃ​ទៀត។ ប៉ុន្តែ​នៅ​ស្រប​ពេល​​កម្មករ​ដែល​ត្រូវ​បាន​បញ្ឈប់​ពី​ការងារ​ត្រូវ​បាន​រំពឹង​ថា នឹង​ត្រូវ​ផ្លាស់ទៅ​ក្រុមហ៊ុន​ដទៃ​​ទៀត ដំណើរការ​នេះ​គឺ​ មិនមាន​ភាព​ងាយស្រួល​នោះ​ទេ។

លោក នី បាន​និយាយ​ថា លោក​កំពុង​ជួប​ការ​លំបាក​ដើម្បី​បង់​ការ​ប្រាក់​​ប្រចាំ​ខែ​ចំនួន ៣៤៩​ដុល្លារ​លើ​កម្ចីធនាគារ​ចំនួន ១ម៉ឺន​ដុល្លារ។ លោក នី​ និង​ភរិយា ដែល​ជា​កម្មករ​កាត់ដេរ កំពុង​រិះគិត​ថាតើ​ពួកគេ​នឹង​ត្រូវ​​ចិញ្ចឹម​កូនស្រីតូចៗ​របស់ខ្លួន​បាន​យ៉ាង​ដូចម្តេច។

លោក​បាន​បន្ថែម​ថា៖ «វា​ប៉ះពាល់​ដល់​គ្រួសារ​ខ្ញុំ​ទាំង​ផ្លូវ​ចិត្ត និង​ស្ថានភាព​រស់នៅ​របស់​យើង។ ប្រពន្ធ​ខ្ញុំ និង​ខ្ញុំ​ដេក​មិនលក់​អស់​ពេល​ប៉ុន្មាន​ថ្ងៃ​នេះ ពីព្រោះ​យើង​កំពុង​គិត​ពី​របៀប​រក​លុយ​បង់​ធនាគារ»។

លោក ដួង ស៊ីឡែន បុគ្គលិក​ផ្នែក​រដ្ឋបាល​ក្រុមហ៊ុនស៊ីនទ្រី បាន​បដិសេធ​​បញ្ជាក់​ពី​ចំនួន​ជាក់លាក់ ​នៃ​កម្មករ​ដែល​ត្រូវ​បញ្ឈប់ពី​ការងារ ដោយ​លើកឡើង​ថា តួលេខ​នៅ​មិនទាន់​ច្បាស់​នៅ​ឡើយ។

​លោក​បាន​ថ្លែង​ថា៖ «រហូត​មក​ដល់​ពេល​នេះ យើង​មិនអាច​កំណត់​ចំនួន​កម្មករ​បាន​នៅ​ឡើយ​ទេ ដោយសារ​តែ​ពួកគាត់​អាច​ចេញចូល​ក្រុមហ៊ុន​បាន»។

លោក ស៊ីឡែន ​បាន​បន្ត​ថា ក្រុមហ៊ុន​ស៊ីនទ្រី បាន​ផ្តល់​ប្រាក់ខែ​ចុងក្រោយ​ឲ្យ​កម្មករ​រួចរាល់​ហើយ តែឥឡូវ​នេះ​កំពុង​រៀបចំ​ឯកសារ​ពាក់ព័ន្ធ​នឹង​ប្រាក់ឧបត្ថម្ភ​ផ្សេង​ទៀត ដែល​ក្រុមហ៊ុន​គ្រោង​នឹង​បង់​នៅ​ថ្ងៃ​ទី១៤ ខែ​កក្កដា។

​កាល​ពី​ខែ​តុលា កម្មករ​ក្រុមហ៊ុនស៊ីនទ្រី ប្រមាណ ១.០០០​នាក់​បាន​ធ្វើ​កូដកម្ម​អស់​រយៈពេល​បួន​ថ្ងៃ ដើម្បី​ទាមទារ​ប្រាក់​ឧបត្ថម្ភ​ផ្សេងៗ ខណៈ​រដ្ឋបាល​រាជធានី​ភ្នំពេញ​ពិនិត្យ​ឡើង​វិញ​លើ​កិច្ចសន្យា​ផ្តាច់មុខ​របស់​ក្រុមហ៊ុន​នេះ​នៅ​ក្រុង​ភ្នំពេញ។ កម្មករ​ព្រួយបារម្ភ​ថា បញ្ហា​កិច្ចសន្យា​អាច​ធ្វើ​ឲ្យ​ក្រុមហ៊ុនស៊ីនទ្រី បិទ​ទ្វារ ដោយ​មិនចាំបាច់​បង់ប្រាក់​ខែ​ចុងក្រោយ ឬ​ប្រាក់​ឧបត្ថម្ភ​ផ្សេងៗ។ កូដកម្ម​ខាង​លើ​នេះ​គឺ​ បាន​បង្ក​ឲ្យ​មាន​គំនរសំរាម​យ៉ាង​ច្រើន​នៅ​តាម​ដងផ្លូវ​នានា។

កម្មករ​ក្រុមហ៊ុន Mizuda ចាប់ផ្តើម​ប្រមូល​សំរាម​នៅ​ខណ្ឌ​៧មករា ក្នុង​រាជធានី​ភ្នំពេញ កាល​ពី​ថ្ងៃ​ទី០១ ខែ​កក្កដា ឆ្នាំ​២០២១។ខេមបូចា/ បញ្ញា ឆព័ណ្ណ
កម្មករ​ក្រុមហ៊ុន Mizuda ចាប់ផ្តើម​ប្រមូល​សំរាម​នៅ​ខណ្ឌ​៧មករា ក្នុង​រាជធានី​ភ្នំពេញ កាល​ពី​ថ្ងៃ​ទី០១ ខែ​កក្កដា ឆ្នាំ​២០២១។ខេមបូចា/ បញ្ញា ឆព័ណ្ណ

លោក កៅ សុខវ៉ាត អតីត​អ្នកដឹកនាំ​សហជីព​កម្មករ​ក្រុមហ៊ុនស៊ីនទ្រី បាន​និយាយ​ថា កម្មករ​ដែល​ត្រូវ​បាន​បញ្ឈប់​ពី​ការងារ ​ពី​មុន​មក​ត្រូវ​បាន​កំណត់​ឲ្យ​ប្រមូល​សំរាម​នៅ​សង្កាត់​ចំនួន១០ ដែល​ក្រុមហ៊ុន​ Cintri បាត់បង់​អាជ្ញាបណ្ណ​ទៅ​ឲ្យ​ក្រុមហ៊ុន​ប្រមូលសំរាម​ដទៃ​ទៀត។ នាពេលបច្ចុប្បន្ន ក្រុមហ៊ុន Cintri និង​ក្រុមហ៊ុន Everbright ផ្តល់​សេវាកម្ម​ប្រមូល​សំរាម​​នៅ​ខណ្ឌ​ចំការមន បឹងកេងកង មានជ័យ និងច្បារ​អំពៅ​តែ​ប៉ុណ្ណោះ។ ​

លោក​ សុខវ៉ាត​ បាន​បន្ត​ថា លោក​ស្ថិត​នៅ​ក្នុង​ចំណោម​កម្មករ​ជាង​ ១.០០០​នាក់ ដែល​បាន​បាត់បង់​ការងារ។ ឥឡូវ​នេះ​លោក​កំពុង​រង់ចាំ​ទទួល​ប្រាក់​ឧបត្ថម្ភ​ផ្សេង​ទៀត​ពី​កិច្ចសន្យា​សម្របសម្រួល​ផ្តល់​ដោយ​ក្រុមហ៊ុន Cintri ត្រួតពិនិត្យ​ពី​លើ​ដោយ​រដ្ឋបាល​ក្រុង​ភ្នំពេញ បន្ទាប់​ពី​មាន​កូដកម្ម កាល​ពី​ខែ​តុលា​ឆ្នាំ​មុន។

​លោក​សុខវ៉ាត បាន​សង្កត់ធ្ងន់​ថា អាជ្ញាធរ​រដ្ឋបាល​រាជធានី​ភ្នំពេញ​បាន​ប្រាប់​កម្មករ​ថា ការ​កែទម្រង់​រចនាសម្ព័ន្ធ​​សេវាកម្ម​គ្រប់គ្រង​សំរាម​នឹង​មិន​ធ្វើ​ឲ្យ​ពួកគេ​បាត់បង់​ការងារ​នោះ​ទេ ដោយ​បង្គាប់​ឲ្យ​ពួកគេ​ដាក់ពាក្យ​ធ្វើការ​ដោយ​ផ្ទាល់​ទៅកាន់​ក្រុមហ៊ុន​ថ្មី។ ទោះបីជា​មន្រ្តី​សាលាក្រុង​បាន​ប្រាប់​ទៅ​កម្មករ​ក្រុមហ៊ុន Cintri ថា​ ពួកគេ​នឹង​ជា​បេក្ខជន​អាទិភាព​ក្នុង​ដំណើរការ​ជ្រើសរើស​ក៏​ដោយ លោក​សុខវ៉ាត បាន​និយាយ​ថា នេះ​មិនអាច​បញ្ឈប់​ការ​បាត់បង់​ការងារ​ដែល​កើត​មាន​នោះទេ។

លោក​បាន​និយាយថា៖ «ខ្ញុំ​សង្ឃឹម​ថា សាលាក្រុង​ភ្នំពេញ​នឹង​ជួយ​សម្រួល​រក​ការងារ​ឲ្យ​យើង។ សម្តេច​ ហ៊ុន សែន បាន​និយាយ​ថា [លោក]នឹង​មិន​ឲ្យ​កម្មករ​បាត់បង់​ការងារ​នោះ​ទេ ហើយ​ប្រសិន​បើ​ក្រុមហ៊ុន​ថ្មី​ឈ្នះ​ការ​ដេញថ្លៃ កម្មករ​ពី​មុន​នឹង​ត្រូវ​ធ្វើ​ការ​នៅ​ទី​នោះ»

​មន្រ្តី​ជាន់ខ្ពស់​មួយ​រូប​នៅ​​សាលារាជធានីភ្នំពេញ​បាន​និយាយ​ថា លោក​ជំរុញ​ឲ្យ​កម្មករ​ក្រុមហ៊ុន​ Cintri ដែល​ត្រូវ​បាន​បញ្ឈប់​ការងារ​ដាក់ពាក្យ​សុំ​ធ្វើការ​ជាមួយ​នឹង​ក្រុមហ៊ុន​ប្រមូល​សំរាម​ដទៃ​ទៀត។ ​

លោក​បាន​និយាយថា៖ «ខ្ញុំ​បាន​ប្រាប់​ទៅ​ក្រុមហ៊ុន​ទាំង​នោះ​ថា ពួកគេ​ត្រូវ​ទទួល​ពាក្យ​សុំ​ធ្វើការ​ពីកម្មករ​ក្រុមហ៊ុន Cintri»។  ដោយលោក​បន្ថែម​ថា និយោជក​មាន​លក្ខខណ្ឌ​ផ្ទាល់ខ្លួន​ក្នុង​ការ​ជ្រើសរើស​កម្មករ​របស់គេ។

​បើ​ទោះ​បី​ជា​តំណាងកម្មករ​ក្រុមហ៊ុន Cintri ដែល​នៅ​សេសសល់​បាន​ប្រាប់ខេមបូចា ថា លក្ខខណ្ឌ​ផ្សេងៗ​គឺ​មាន​លក្ខណៈ​ធម្មតា​សម្រាប់​អ្នក​ដែល​មិន​ត្រូវ​បាន​បញ្ឈប់​ពី​ការងារ កម្មករ​មួយ​ចំនួន​ដែល​អាច​ផ្លាស់​ទៅ​ធ្វើការ​នៅ​តាម​ក្រុមហ៊ុន​ថ្មី​បាន​លើកឡើង​ថា ដំណើរការ​ផ្លាស់​ទៅ​ធ្វើការ​នេះ​គឺ​មាន​ការ​លំបាក។

​កម្មករ​ម្នាក់ដែលកំពុងធ្វើការ​នៅ​ក្រុមហ៊ុន 800 Super ដែល​ស្នើ​សុំ​មិន​បញ្ចេញ​ឈ្មោះ ដោយបារម្ភពីសុវត្ថភាពការងារ បាន​ត្អួញត្អែរ​ពី​លក្ខខណ្ឌ​មិនសូវល្អ​​ចំពោះការងារ​ថ្មី​របស់​លោក បើប្រៀប​ជាមួយ​នឹង​ការងារ​នៅ​ក្រុមហ៊ុន Cintri។ លោក​បាន​ថ្លែង​ប្រាប់ខេមបូចា ថា លោក​ត្រូវ​បាន​ជ្រើសរើស​សម្រាប់​តួនាទី​បច្ចុប្បន្ន​ដោយ​ស្វ័យប្រវត្តិ​ បន្ទាប់​ពី​តំបន់​ការងារ​របស់​លោក​សម្រាប់​ក្រុមហ៊ុន Cintri ត្រូវ​បាន​ផ្លាស់​កិច្ចសន្យា​ប្រមូលសំរាម​ថ្មី។

លោក​បាន​ថ្លែង​ថា៖ «ខ្ញុំ​ធ្លាប់​មាន​ពេល​ប្រមូល​កំប៉ុង​ ដប និង​ដែក​យក​ទៅ​លក់ ប៉ុន្តែ​ឥឡូវ​នេះ​ ខ្ញុំ​ត្រូវ​ប្រមូល​សំរាម​ពីរ​ទៅ​បីដង​ក្នុង​មួយ​ថ្ងៃជាមួយ​ឡាន​ ៨០០​តោន»

លោក ជី វ៉ុន ដែល​មាន​ឈ្មោះ​ចុះបញ្ជី​តាម​ប្រព័ន្ធ​អនឡាញ​ជា​ប្រធាន​ផ្នែក​ធនធាន​មនុស្ស​​របស់​ក្រុមហ៊ុន 800 Super មិន​បាន​ផ្តល់​ការ​អធិប្បាយ ដោយនិយាយ​ថា លោក​ជាប់​រវល់ខ្លាំង។

លោក សៀង សាមុទ្រមាស តំណាង​ក្រុមហ៊ុន Mizuda និយាយ​ថា ក្រុមហ៊ុន​របស់​លោក​កំពុង​ជួប​ប្រទះ​នឹង​បញ្ហា​ប្រឈម​ពាក់ព័ន្ធ​នឹង​សំរាម​កកកុញ​ បន្ទាប់​ពី​បាន​ទទួល​សិទ្ធិ​ពី​ក្រុមហ៊ុន Cintri។

លោក​បាន​ថ្លែង​ថា៖ «យើង​ត្រូវ​ប្រើ​កម្មករ ពេលវេលា រថយន្ត និង​អ្វីផ្សេងៗ​ដើម្បី​ប្រមូល​សំរាម​ទាំងអស់​នៅ​ក្នុង​ទីក្រុង។ ជា​ការលំបាក​ក្នុង​ការ​ប្រមូល​នៅ​ថ្ងៃ​ដំបូង ប៉ុន្តែ​យើង​ប្រឹងប្រែង​តាម​តែ​អាច​ធ្វើ​ទៅ​បាន»។ ​

លោក សាមុទ្រមាស ក៏​បាន​លើកឡើង​ថា ដំណើរការ​ជ្រើសរើស​បុគ្គលិក​របស់​ក្រុមហ៊ុន Mizuda គឺ​មិនមាន​បញ្ហា​នោះ​ទេ។

លោក​បាន​បន្ត​ថា៖ «យើង​មិន​រើសអើង​ប្រឆាំង​នឹង​អ្នកដាក់ពាក្យ​ណា​ម្នាក់​នោះ​ទេ ពីព្រោះ​យើង​ចង់​បាន​មនុស្ស​ធ្វើការ និង​សម្អាត​ទីក្រុង។ យើង​បាន​ជ្រើសរើស​ដោយ​ផ្អែក​លើ​ប្រវត្តិការងារ​ ឯកសារ​ពាក់ព័ន្ធ និង​ការ​ប្តេជ្ញា»

​លោកសាមុទ្រមាស​ បានបន្ថែមថា មក​ទល់​ពេល​នេះ​ ក្រុមហ៊ុន​បាន​ជ្រើសរើស​កម្មករ​ចំនួន ៥៣១​នាក់​មក​ធ្វើការ ដែល​ជាង ៨០​ភាគរយ​មក​ពី​ក្រុមហ៊ុន Cintri។

លោក ទូច កុលស ប្រធាន​សហព័ន្ធ​សហជីព​កម្មករ​​ក្នុង​វិស័យ​ទេសចរណ៍​នៅ​កម្ពុជា ដែល​មើលការខុសត្រូវ​លើ​សហជីព​នៅ​ក្រុមហ៊ុន Cintri បាន​និយាយ​ថា លោក​កំពុង​តែ​តាមដាន​ថា​តើ​ក្រុមហ៊ុន​ Cintri បាន​ផ្តល់​ប្រាក់​ឧបត្ថម្ភ​សមស្រប​ដល់​កម្មករ​ដែល​ត្រូវ​បាន​បញ្ឈប់​ពី​ការងារ​ឬ​ទេ។

លោក​បាន​ថ្លែង​ថា៖ «ទោះបីជា​[ថ្នាក់​ដឹកនាំ]សាលាក្រុង​ភ្នំពេញ​ជួយ​សម្របសម្រួល យើង​នៅ​តែ​ព្រួយបារម្ភ​ពី​ការ​រើសអើង​ប្រឆាំង​នឹង​សមាជិក​និង​សកម្មជន​សហជីព» ដោយ​លោក​បាន​លើកឡើង​ថា ​កម្មករ​ក្រុមហ៊ុន​ Cintri ដែល​ពុំ​ទាន់​មាន​ការងារ​ធ្វើនា​ពេល​បច្ចុប្បន្ន អាច​ជា​មុខសញ្ញា​នៃ​ការ​រើសអើង​​ប្រឆាំង​នឹង​សហជីព៕

ប្រែសម្រួលពីអត្ថបទភាសាអង់គ្លេស៖ New garbage collectors begin service as more than 1,000 Cintri workers struggle with layoffs

288 views
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »