សមត្ថកិច្ចឲ្យដឹងថាម៉ូតូ និងរថយន្តជាង១០០គ្រឿងត្រូវបានដកហូតពីប្រជាពលរដ្ឋដែលបំពានបំរាមគោចរ ក្នុងរាជធានីភ្នំពេញ ក្នុងរយៈពេលបីថ្ងៃមកនេះ ហើយផ្សារអូរឫស្សីវិញត្រូវបានបិទ ខណៈអ្នកលក់ដូរប្រហែល៥ ០០០នាក់នឹងត្រូវនាំទៅធ្វើតេស្តកូវីដ១៩ បន្ទាប់ពីមានអាជីវករ និងសន្តិសុខផ្សារនេះមានវិជ្ជមានកូវីដ១៩។
មន្ត្រីឲ្យដឹងទៀតថា អាជីវករនៅផ្សារចាស់ក្នុងខណ្ឌដូនពេញឯណោះវិញ ក៏ត្រូវបានហៅទៅយកសំណាកតេស្តកូវីដ១៩ដែរ បន្ទាប់ពីមានអាជីវករក្នុងផ្សារម្នាក់មានវិជ្ជមានកូវីដ១៩ ខណៈនៅថ្ងៃចន្ទល្ងាចនេះ ផ្សារនៅបន្តដំណើរការធម្មតា។
បើតាមមន្ត្រីដដែលឲ្យដឹងថា អ្នកបើកបរម៉ូតូ និងរថយន្តបំពានបំរាមគោចរ ដែលដាក់១៤ថ្ងៃ ក្នុងខែមេសា ចាប់ពីម៉ោង៨យប់ ដល់ម៉ោង៥ព្រឹក ត្រូវបញ្ជាឲ្យធ្វើចត្តាឡីស័ក១៤ថ្ងៃដោយខ្លួនឯង និងថាក្រោយពីមានការរឹតបន្តឹងជាបន្តបន្ទាប់ពីថ្ងៃសុក្រ និងថ្ងៃសៅរ៍ ចំនួនអ្នកបំពានបំរាមបានថយចុះគិតត្រឹមយប់ថ្ងៃអាទិត្យ។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា មានប្រសាសន៍ថា៖ «បើតាមគោលការណ៍របស់អភិបាលសាលារាជធានីភ្នំពេញ ពេលអ្នកទាំងនោះបញ្ចប់ការធ្វើចត្តាឡីស័ក១៤ថ្ងៃ ពួកគាត់អាចទៅយកម៉ូតូ ឬរថយន្តវិញបាន»។ បើតាមអ្នកនាំពាក្យរូបនេះ យានយន្តដែលដកហូតមានម៉ូតូ១៣៨គ្រឿង និងរថយន្តចំនួន២៧គ្រឿង។
លោកបន្ថែមថា៖ «យើងចង់ឃើញរាល់យប់គ្មានម៉ូតូ ឬរថយន្តត្រូវបានដកហូត មានន័យថារាល់យប់គ្មានអ្នកបំពាន និងពួកគាត់គោរពបំរាមគោចរ១០០ភាគរយ»។
កាលពីថ្ងៃអាទិត្យ ផ្សារអូរឫស្សី ត្រូវអាជ្ញាធរសម្រេចបិទរយៈពេល១៤ថ្ងៃ ក្នុងនោះមានអ្នកលក់ដូរ និងសន្តិសុខផ្សារផងមានវិជ្ជមានកូវីដ១៩ ធ្វើឲ្យចំនួនអ្នកឆ្លងកូវីដ១៩ ក្នុងព្រឹត្តិការណ៍២០ កុម្ភៈ ឡើងដល់២២២២ករណី និងអ្នកឆ្លងសរុបមានចំនួន២៧៥២ករណី។
ក្នុងសេចក្ដីជូនដំណឹងមួយចុះថ្ងៃទី៣ ខែមេសា អភិបាលរាជធានីភ្នំពេញ លោក ឃួង ស្រេង លើកឡើងថាសន្តិសុខ និងសុវត្ថិភាពផ្សារនឹងត្រូវធានាការដោយសាលារាជធានីភ្នំពេញ ខណៈផ្សារនេះក៏ត្រូវបានបាញ់ថ្នាំសម្លាប់មេរោគផងដែរ។
លោក ឃួង ស្រេង បញ្ជាក់ថា៖ «ស្ថានភាពនេះ បានរីករាលដាលជាបន្តបន្ទាប់ ច្រើនតូប និងមានទីតាំងខុសៗគ្នាក្នុងបរិវេណផ្សារ»។ លោកបន្ថែមថាផ្សារនឹងបើកដំណើរការឡើងវិញនៅថ្ងៃទី១៧ ខែមេសា ឆ្នាំ២០២១។
បើតាមសេចក្ដីជូនដំណឹងដដែល បានឲ្យដឹងថា ខណៈអ្នកលក់បានបិទតូប រដ្ឋបាលរាជធានីភ្នំពេញបានធានាសន្តិសុខ និងសុវត្ថិភាពរាល់សម្ភារ និងអីវ៉ាន់ទាំងអស់នៅក្នុងផ្សារ និងមិនតម្រូវឲ្យបង់ថ្លៃសេវាឲ្យភាគីណាមួយឡើយ។
នាយប៉ុស្ដិ៍រដ្ឋបាលសង្កាត់ផ្សារអូរឬស្សី លោក ថង ម៉ារ៉ាឌី ប្រាប់ខេមបូចា ថា៖ «ឥឡូវនេះកម្លាំងនគរបាលរបស់ខ្ញុំកំពុងយាមផ្សារ រក្សាសន្តិសុខ និងសុវត្ថិភាព ដើម្បីកុំឲ្យមនុស្សអាក្រក់លួចសម្ភារ និងទំនិញ»។ លោកឲ្យដឹងដែរថា ផ្សារត្រូវបានបាញ់ថ្នាំសម្លាប់មេរោគរួចរាល់ហើយ។
លោក ហ័ត វ៉ាន់ធី ប្រធានផ្សារអូរឫស្សី មានប្រសាសន៍ថាអ្នកលក់ដូរប្រហែល៥០០០នាក់ត្រូវទៅធ្វើតេស្តកូវីដ១៩ បន្ទាប់ពីអ្នកលក់ និងសន្តិសុខមានវិជ្ជមានវីរុសនេះ។
អ្នកស្រី អួន ញឹម អ្នកលក់ដូរវត្ថុអនុស្សាវរីយ៍នៅផ្សារអូរឫស្សីជាង១០ឆ្នាំហើយនោះ បានឲ្យដឹងថាអ្នកស្រីបានឮថាអ្នកឆ្លងនៅជាន់ផ្ទាល់ដីរបស់ផ្សារកាលពីថ្ងៃទី១ ខែមេសា ហើយអ្នកស្រីក៏បានបិទតូបខ្លួននៅជាន់ទី១ នៅថ្ងៃជាមួយគ្នាដែរ។
អ្នកស្រីបន្ថែមថា៖ «វាប៉ះពាល់ដល់ជីវភាពរបស់យើង ព្រោះយើងមិនមានចំណូល ពេលផ្សារត្រូវបិទ»។
អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្ដី មិនអាចទាក់ទងសុំការអត្ថាធិប្បាយបានទេ។
លោក លឹម សុភា អភិបាលខណ្ឌ៧មករា បដិសេធធ្វើអត្ថាធិប្បាយលើរឿងនេះ។
លោក សឹង សែនករុណា អ្នកនាំពាក្យសមាគមសិទ្ធិមនុស្សអាដហុក មានប្រសាសន៍ថា ការដកហូតយានជំនិះគឺ ជារឿងធ្ងន់ធ្ងរ ហើយថាការដាក់ឲ្យអ្នកបំពានធ្វើចត្តាឡីស័កដោយខ្លួនឯង១៤ថ្ងៃ គឺ មិនមានចែងក្នុងអនុក្រឹត្យចេញកាលពីសប្ដាហ៍មុននោះទេ។
លោកបន្ថែមថា៖ «អ្នកខ្លះមិនជាប់ពាក់ព័ទ្ធជាមួយនឹងកូវីដ១៩ទេ»។ លោកអំពាវនាវឲ្យអនុវត្តច្បាប់ដោយមានការប្រុងប្រយ័ត្ន បើមិនដូច្នេះទេ វាអាចធ្វើឲ្យគ្រួសារមួយចំនួនបាត់ចំណូល។
លោកថា៖ «ខ្ញុំគិតថារដ្ឋាភិបាលត្រូវគិតពីជីវភាពរបស់ប្រជាពលរដ្ឋ»។
ក្រសួងសុខាភិបាលនៅថ្ងៃចន្ទនេះ ឲ្យដឹងថាអ្នកស្លាប់ដោយសារកូវីដ១៩ ឡើងដល់២១នាក់ ដោយអ្នកស្លាប់ចុងក្រោយគឺស្រ្តីខ្មែរ និងបុរសជនជាតិចិន ស្លាប់នៅថ្ងៃទី៣ និងទី៤ ខែមេសា បន្តបន្ទាប់គ្នា។
អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានបញ្ជាក់តាមប្រព័ន្ធតេលេក្រាមនៅថ្ងៃចន្ទនេះថា មនុស្សដែលបានទទួលវ៉ាក់សាំងបង្ការកូវីដ១៩ មានចំនួន៤១៨ ៥៦៩នាក់។
បំរាមគោចរក្នុងរាជធានីភ្នំពេញនឹងបន្តរហូតដល់ថ្ងៃទី១៤ ខែមេសា។
ប្រែសម្រួលពីអត្ថបទភាសាអង់គ្លេស៖ O’Russei Market Closed; 100 vehicles confiscated during curfew