អុកស្វាមទទូចឱ្យរដ្ឋាភិបាលប្រើប្រាស់មូលនិធិ IMF ដើម្បីស្តារសេដ្ឋកិច្ចក្រោយវិបត្តិជំងឺកូវីដប្រកបដោយតម្លាភាព

អ្នកលក់អាហារ បន្ថែ និងត្រីសាច់ នៅតាមដងផ្លូវ នៅភូមិមួយក្នុងទីក្រុងភ្នំពេញ ថ្ងៃទី១១ ខែសីហា ឆ្នាំ២០២១។ ខេមបូចា/ បញ្ញា ឆព័ណ្ណ
អ្នកលក់អាហារ បន្ថែ និងត្រីសាច់ នៅតាមដងផ្លូវ នៅភូមិមួយក្នុងទីក្រុងភ្នំពេញ ថ្ងៃទី១១ ខែសីហា ឆ្នាំ២០២១។ ខេមបូចា/ បញ្ញា ឆព័ណ្ណ

អង្គការអុកស្វាមបានទទូចឱ្យរដ្ឋាភិបាលកម្ពុជាត្រូវ​ធានាថា ហិរញ្ញប្បទានឥតសំណងចំនួន ២៤០លានដុល្លារដែលប្រកាស​ផ្តល់​ឲ្យ​ដោយ​មូលនិធិរូបិយវត្ថុអន្តរជាតិ (IMF) ដើម្បី​គាំទ្រដល់ការស្តារសេដ្ឋកិច្ចកម្ពុជានោះ ត្រូវបានប្រើប្រាស់  ដើម្បីផ្តល់ប្រយោជន៍ដល់ប្រជាពលរដ្ឋកម្ពុជាទាំងអស់ ដែលរងផលប៉ះពាល់ដោយជំងឺកូវីដ-១៩។

ក្រុមប្រឹក្សាភិបាលរបស់ IMF បានអនុម័តមូលនិធិ​ពិសេស (Special Drawing Rights (SDRs)) កាលពីថ្ងៃទី២ ខែសីហា ឆ្នាំ២០២១ ដែលមានទឹកប្រាក់៦៥០ពាន់លាន ដុល្លារអាមេរិក ដើម្បីជំរុញ​លទ្ធភាពទូទាត់ការចំណាយ​របស់សកលលោករួមទាំង ប្រទេសកម្ពុជាផងដែរ នេះបើយោងតាមអង្គការអុកស្វាម ។

នៅក្នុងសេចក្តីប្រកាសព័ត៌មានមួយ លោកស្រី លីម សូលីន នាយិកាប្រចាំប្រទេសនៃអង្គការអុកស្វាម បានស្នើឱ្យរដ្ឋាភិបាលបន្តធ្វើការប្រកបដោយតម្លាភាពជាមួយអង្គការសង្គមស៊ីវិលដទៃទៀត ដើម្បីធានាថា មូលនិធិនេះនឹងផ្តល់ផលប្រយោជន៍ដល់ប្រជា ពលរដ្ឋកម្ពុជាទាំងអស់ ដែលរងផលប៉ះពាល់ដោយជំងឺកូវីដ-១៩។

លោកស្រីថ្លែងថា៖ «យើងសូមលើកទឹកចិត្តដល់រាជរដ្ឋាភិបាលកម្ពុជា ឱ្យទាញយកផលប្រយោជន៍ពីមូលនិធិ SDRនេះ ដើម្បីផ្តល់ការគាំទ្របន្ថែមទៀត និងធ្វើឱ្យអន្តរាគមន៍ឆ្លើយតបជំងឺរាតត្បាតមានលក្ខណៈបរិយាប័ន្ន ។ ប្រជាជនកម្ពុជា ជាពិសេស ក្រុមងាយរងគ្រោះបំផុត នឹងចងចាំទុកក្នុងចិត្តនូវស្នាដៃដ៏សំខាន់នេះ»។

លោកស្រីបានមានប្រសាសន៍ថា មូលនិធិនេះគួរផ្តល់ផលប្រយោជន៍ដល់ក្រុមងាយរងគ្រោះ ដូចជាស្ត្រីនិងក្មេងស្រីដែលប្រឈមនឹងអំពើហិង្សាផ្លូវភេទនិងអំពើហិង្សាពាក់ ព័ន្ធយេនឌ័រ ស្ត្រីមានផ្ទៃពោះ កុមារ ជនមានពិការភាព ជនជាតិដើមនិងជនជាតិដើម ភាគតិច អ្នកផ្ទុកមេរោគអេដស៍ ជនអនាថា និងជនទេសន្តរប្រវេសន៍ដែល វិលត្រឡប់មកប្រទេសវិញ។

លោកស្រីថ្លែង​ថា៖ «ដូច្នេះ រាជរដ្ឋាភិបាលកម្ពុជាចាំបាច់ត្រូវធានាថា កម្មវិធីផ្តល់ជំនួយ សង្គ្រោះរបស់ខ្លួន ផ្តោតការយកចិត្តទុកដាក់ជាពិសេសទៅលើការគាំទ្រកម្មក រសេដ្ឋកិច្ចក្រៅប្រព័ន្ធ និងអាជីវកម្មធុនតូច និងមធ្យម ដែលជាឆ្អឹងខ្នងនៃសេដ្ឋកិច្ចកម្ពុជា»។

អង្គការអុកស្វាមបានអះអាងថា ផ្អែកលើតួលេខពីអង្គការពលកម្មអន្តរជាតិ (ILO) និងក្រសួងផែនការ វិស័យសេដ្ឋកិច្ចក្រៅប្រព័ន្ធនៅពេលនេះ តំណាងឲ្យ ៨៧,៥ភាគរយ នៃសេដ្ឋកិច្ចកម្ពុជា។ ក្រសួងបានព្រមានថា កម្មករសេដ្ឋកិច្ចក្រៅប្រព័ន្ធចំនួន ៦លាន នាក់ប្រឈមនឹងការបាត់បង់មុខរបរដោយសារការរាតត្បាតជំងឺ។

លោក ស៊ឹម កុសល មកពីខេត្តព្រៃវែងបាននិយាយថា លោកងាកមកធ្វើការជាកម្មករ សំណង់ប្រហែលមួយខែហើយដោយសារ​មិនអាចរកប្រាក់ពីរបររត់រ៉ឺម៉កកង់បីបាន​ ។ កន្លងមក លោក កុសល យកប្រាក់កម្ចីចំនួន៥.០០០ដុល្លារ ដើម្បីសាង សង់ផ្ទះថ្មីនៅឯស្រុកកំណើតរបស់លោកក៏ដូចជាទិញរ៉ឺម៉កកង់បី។

លោកបាននិយាយថា៖ «ខ្ញុំសំរេចចិត្តធ្វើការជាកម្មករសំណង់ ព្រោះខ្ញុំអាចរកប្រាក់ បានខ្លះសម្រាប់គ្រួសារខ្ញុំ និងបង់ការប្រាក់ខ្លះទៅ​ធនាគារ​»។ ដោយលោកបន្ថែមថា៖ «ប្រពន្ធរបស់ខ្ញុំគ្មានការងារធ្វើទេពីមុន គាត់ធ្លាប់លក់ពងទាកូន និង​ប្រហិតនៅមុខ ​វាំងនិងតាមមាត់ទន្លេ ប៉ុន្តែឥឡូវនេះ ពួកគេមិនត្រូវបានអនុញ្ញាតឱ្យលក់ នៅទីតាំងនោះទៀតទេ»។

បច្ចុប្បន្ន លោក កុសល កំពុងរស់នៅជាមួយកូនទាំងបីរបស់លោក នៅក្នុងបន្ទប់ដែលលោកជួលក្នុងមួយខែ២០ដុល្លារ។ លោកបាននិយាយថា លោកអាចរកប្រាក់បានប្រហែល ១០ដុល្លារក្នុងមួយថ្ងៃពីការងារសំណង់។

លោក ស៊ុន ខេង អ្នកលក់អាហារតាមផ្លូវនៅភ្នំពេញបាននិយាយថា ប្រាក់ចំណូល របស់លោកបានធ្លាក់ចុះយ៉ាងខ្លាំងបន្ទាប់ពីអាជ្ញាធរក្រុងបានដាក់បំរាមគោចរ ដើម្បី កាត់បន្ថយការរីករាលដាលនៃជំងឺកូវីដ-១៩ ។

លោកបាននិយាយថា៖ «យើងអាចលក់បានតែ៤ទៅ៥ម៉ោងក្នុងមួយថ្ងៃ ដោយគ្មានមនុស្សដើរក្បែរនោះទេ។ មុនមានកូវីដ ខ្ញុំអាចរកបាន៧០ដុល្លារក្នុងមួយថ្ងៃ ប៉ុន្តែឥឡូវនេះ ខ្ញុំរកស្ទើរតែមិនបាន៣០ដុល្លារផង»។

រដ្ឋាភិបាល ដែលកំពុងស្ថិតក្នុងដំណើររៀបចំផែនការស្តារសេដ្ឋកិច្ចក្រោយវិបត្តិកូវីដ- ១៩ កំពុងអនុវត្តកម្មវិធីផ្តល់ជាសាច់ប្រាក់ដល់គ្រួសារក្រីក្រ និងជនងាយរងគ្រោះព្រម ទាំង​គាំទ្រដល់សហគ្រាសធុនតូចនិងមធ្យម។ ទាំងលោក ខេង និងលោក កុសល បាននិយាយថា កន្លងមក ពួកលោកបានទទួលជំនួយស្បៀងអាហារនិងប្រាក់ផ្ទាល់ មួយចំនួន អំឡុងពេលមានការបិទខ្ទប់ក្នុងរាជធានីភ្នំពេញ ខណៈពួកលោក មិនអាច ចេញទៅធ្វើការបាន។

កាលពីខែមិថុនា ធនាគារពិភពលោកបានអនុម័តឥណទានរបស់ សមាគមអភិវឌ្ឍន៍អន្តរជាតិ (IDA) ដែលមានទឹកប្រាក់២០០លាន ដុល្លារសម្រាប់ការប្រយុទ្ធប្រឆាំង នឹងការរីករាលដាលជំងឺកូវីដ-១៩និងការស្តារសេដ្ឋកិច្ចឡើងវិញនៅកម្ពុជា។

សេដ្ឋកិច្ចកម្ពុជាបានរងផលប៉ះពាល់យ៉ាងធ្ងន់ធ្ងរដោយសារការរីករាលដាលជំងឺកូវីដ -១៩។ ទីភ្នាក់ងារវាយតម្លៃចំណាត់ថ្នាក់ឥណទានឈ្មោះ Fitch Ratings ដែលមានមូល ដ្ឋាននៅអង់គ្លេសបានកែប្រែការព្យាករកំណើនផលិតផលសរុបក្នុងស្រុកក្នុងឆ្នាំ ២០២១ សម្រាប់កម្ពុជាត្រឹម២,៥ភាគរយ ធ្លាក់ចុះពីការព្យាករ ពីមុនក្នុងកម្រិត ៣,៨ភាគរយ។

លោក Anthony Galliano នាយកប្រតិបត្តិនៃក្រុមហ៊ុន Cambodian Investment Management Holding បានលើក​ឡើង​ថា គោលបំណងរបស់ IMFគឺមួយផ្នែកជួយ សម្រួលនិងគាំទ្រដល់ការលុបបំបាត់ការរាតត្បាតជំងឺឲ្យ បានឆាប់រហ័ស។

លោកថ្លែងថា៖ «ខ្ញុំរំពឹងថា ធនធានទាំងនេះនឹងត្រូវបានបែងចែកជាសំ ខាន់សម្រាប់ការស្តារឡើងវិញនៃសេដ្ឋកិច្ច ជាពិសេសនៅក្នុងវិស័យដែលរងផលប៉ះ ពាល់ធ្ងន់ធ្ងរ។ ការបែងចែក SDRនេះ នឹងរួមចំណែកជាមួយធនធានហិរញ្ញវត្ថុ ក្នុងការជួយដល់ការងារនេះ ជាពិសេសសម្រាប់ការទិញវ៉ាក់សាំងនិង ផ្តល់ការថែទាំសុខ ភាពដល់ជនងាយរងគ្រោះ»។

លោក វន ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) ដែលមានអ្នក​ប្រកបរបរ និង​កម្មករក្រៅប្រព័ន្ធជាង ១៥.០០០នាក់ទូទាំងប្រទេស ជាសមាជិក បាននិយាយថា រដ្ឋាភិបាលគួរតែយកចិត្តទុកដាក់បន្ថែមទៀតចំពោះ ប្រជាជនងាយរងគ្រោះ អំឡុងពេលមានការរីករាលដាលជំងឺ។

លោកថ្លែង​ថា៖ «រដ្ឋាភិបាលត្រូវជំរុញ អាជ្ញាធរមូលដ្ឋានតាមដាន និងផ្សព្វផ្សាយព័ត៌ មាន​ឱ្យបានដិតដល់ជូន​ដល់​ប្រជាពលរដ្ឋនិងសហការជាមួយសង្គមស៊ីវិល ជាពិសេស អ្នកដែលធ្វើការដោយផ្ទាល់ជាមួយជនងាយរងគ្រោះ ដូច្នេះ កម្មវិធីនេះនឹងត្រូវបាន អនុវត្តប្រកបដោយប្រសិទ្ធភាព។ តាមខ្ញុំដឹង ប្រជាពលរដ្ឋបានត្អូញត្អែរថា មានការរើសអើងខ្លះ ពីអាជ្ញាធរមូលដ្ឋាន ក្នុងការចែកអំណោយ»( រាយការណ៍បន្ថែមដោយ សំ សុពេជ្រ)

ប្រែសម្រួលពីអត្ថបទភាសាអង់គ្លេស៖ Oxfam urges government to use IMF COVID recovery fund transparently

168 views
ព័ត៌មានថ្មីៗ »
អត្ថបទពេញនិយម »