កម្មករនៅរោងចក្របិទទ្វារចំនួនពីរក្នុងខេត្តកណ្ដាលនឹងទទួលបានប្រាក់ឈ្នួល បន្ទាប់ពីអាជ្ញាធរលក់សម្ភារៈបានជាង១លានដុល្លារ

លោក ភិន សុខភា តំណាងកម្មករនៅរោងចក្រ Dignity Knitter និងCEO Base និយាយទៅកាន់មិត្តរួមការងាររបស់ខ្លួនក្រោយកិច្ចប្រជុំជាមួយអាជ្ញាធរ ពិភាក្សាផែកការផ្ដល់ប្រាក់ឈ្នួល និងប្រាក់អត្ថប្រយោជន៍ផ្សេងៗដល់កម្មករ បន្ទាប់ពីការដេញថ្លៃលក់សម្ភារាៈរឹបអូសពីរោងចក្រ។ បញ្ញា ឆព័ណ្ណ
លោក ភិន សុខភា តំណាងកម្មករនៅរោងចក្រ Dignity Knitter និងCEO Base និយាយទៅកាន់មិត្តរួមការងាររបស់ខ្លួនក្រោយកិច្ចប្រជុំជាមួយអាជ្ញាធរ ពិភាក្សាផែកការផ្ដល់ប្រាក់ឈ្នួល និងប្រាក់អត្ថប្រយោជន៍ផ្សេងៗដល់កម្មករ បន្ទាប់ពីការដេញថ្លៃលក់សម្ភារាៈរឹបអូសពីរោងចក្រ។ បញ្ញា ឆព័ណ្ណ
Share on facebook
Share on twitter
Share on linkedin
Share on telegram
Share on whatsapp

អាជ្ញាធរ​ឲ្យ​ដឹងថា​ កម្មករជាង​១០០០​នាក់​​ មកពីរោង​ចក្រ​បិទទ្វារ​ចំនួន​ពីរនឹង​ទទួល​បាន​ប្រាប់សំណង នៅ​ថ្ងៃទី​១២ ខែ​កុម្ភៈ​  ​បន្ទាប់​ពីអាជ្ញាធរ​ស្វែង​រក​អ្នក​ទិញ​សម្ភារៈ​ដែល​រឹប​អូសពី​រោង​ចក្រ និង​លក់​បាន​តម្លៃ​ជាង១​លាន​ដុល្លារ ​បន្ទាប់​ពីកម្មករ​បាន​​រង់ចាំអស់​រយៈពេលជាង​១ឆ្នាំ​​ក្រោយ​​ថៅកែឈប់​បើក​ប្រាក់ខែ និង​បាន​បិទ​រោងច្រ នៅ​ក្នុង​ខេត្ត​កណ្ដាល។​

កម្មករ​ប្រមាណជា​៥០០​នាក់​បាន​រង់ចាំ​នៅ​មុខ​រោងចក្រ​ Dignity Knitter ដើម្បី​ចាំ​ស្ដាប់​ដំណឹង​ពី​ការ​ជួប​គ្នា​រវាង​កម្មករ និង​មន្ត្រី​កាលពីថ្ងៃអង្គារ បន្ទាប់​ពី​មាន​អ្នក​ទិញ​មិន​បញ្ចេញ​ឈ្មោះ​បាន​ឲ្យ​តម្លៃ​១,១​លាន​ដុល្លារ​លើ​សម្ភារៈ​រឹបអូសទាំង​នោះ ក្នុងពេល​ដាក់​ដេញ​ថ្លៃលើកទី​៣ កាលពីថ្ងៃទី​៥ ខែ​កុម្ភៈ កន្លង​ទៅ។​

អភិបាល​ខេត្ត​កណ្ដាល លោក គង់ សោភ័ណ្ឌ បាន​ឲ្យ​CamboJA ដឹង​ថា៖ «ជាមួយ​ប្រាក់​ដែល​ម្ចាស់​រោងចក្រ​ដំកល់ទុក​នៅ​ក្រសួង​ការងារ​ចំនួន​ ១៦០ ០០០​ដុល្លារ និង​ការ​លក់​សម្ភារៈទៀត យើង​មាន​ប្រាក់ជាង​១,២​លាន​ដុល្លារ សម្រាប់​បើក​ជូន​កម្មករ»។ ​

មន្ត្រី​សាលាដំបូង​ខេត្ត​កណ្ដាល​ទទួលបន្ទុក​កិច្ច​ការ​នេះ លោក យីម កេតធី ឲ្យ​ដឹងដែរថា​គណៈកម្មការ​បាន​រៀបចំតម្លៃជាថ្មី ដែល​តម្លៃត្រូវ​ដាក់បម្រុង​មាន​ ១ ៧៧៧ ០០០​ដុល្លារ ប៉ុន្តែ​​គណៈកម្មការ​ព្រម​ទទួល​យក​តម្លៃ​១ ១១០ ០០៩ ដុល្លារ ដើម្បី​បញ្ចប់​រឿង​ដែល​កើត​ឡើង​មក​ជាយូរ​ហើយ​នេះ និង​បន្ទាប់​ពី​ការ​ដេញ​ថ្លៃ​ពីរ​ដង​ត្រូវបរថាជ័យ​។

កម្មករ​មកពី​រោង​ចក្រ​ Dignity Knitter និង​CEO Base ​បាន​ដាក់​វេន​គ្នា​យាម​សម្ភារៈរោងចក្រ២៤​ម៉ោង​ក្នុង​មួយ​ថ្ងៃ អស់ពេល​ជា​ច្រើន​ខែ បន្ទាប់​ពី​ម្ចាស់​រោង​ចក្រ​បាន​ព្យាយាម​ជាច្រើន​ដង​ក្នុង​ការ​ដឹក​សម្ភារៈដូច​ជាម៉ាស៊ីន​ដេរ ចេញ​ពី​រោង​ចក្រ។​

កម្មករ​បាន​ទាមទារប្រាក់ឈ្នួល និង​ប្រាក់​អត្ថប្រយោជន៍​ផ្សេង​តាំងពីខែ​ធ្នូ ឆ្នាំ២០១៩ ពេល​ដែល​រោង​ចក្រ​បាន​បន្ថយ​ប្រតិបត្តិ​ការ បីខែ​មុន​ពេល​ផ្អាកការងារ រហូត​ឈាន​ដល់មានការ​បិទ​រោងចក្រ​ជាផ្លូវការ​នៅ​ខែ​មិថុនា ឆ្នាំ២០២០។

លោក ភិន សុភា តំណាងសហជីព​ស៊ីខៅឌូ(CCAWDU)  ប្រចាំ​រោង​ចក្រ​ Dignity Knitter និង​បាន​ធ្វើ​ការ​នៅ​រោងចក្រ​នេះអស់​ពេល​១៤​ឆ្នាំ​ផង​នោះ បាន​ឲ្យ​ដឹងថា៖ «ខ្ញុំ​គិតថា​កម្មករ​ម្នាក់​អាច​បាន​ទទួល​ប្រាក់​ចន្លោះពី​៨០០​ដុល្លារ ទៅ​១​៥០០​ដុល្លារ»។​

លោក សុភា បាន​ផ្ដល់ដំណឹង​នេះ​ទៅ​កាន់​កម្មករ​ប្រហែល​៥០០​នាក់​ បន្ទាប់ពី​លោក​បាន​ជួប​ជាមួយ​មន្ត្រី​តុលាការ មន្ត្រី​ខេត្ត មន្ត្រីអង្គភាព​ប្រឆាំងអំពើពុក​រលួយ និង​មន្ត្រី​ក្រសួង​ការងារ​កាល​ពីព្រឹក​ថ្ងៃអង្គារ។

លោក​បន្ថែមថា៖ «​ខ្លួន​ខ្ញុំ​ផ្ទាល់ ក៏​ដូច​ជា​កម្មករពិតជា​សប្បាយ​ចិត្ត​ខ្លាំង​ណាស់ ព្រោះ​ពួក​យើង​បាន​រង់ចាំ​ជាង​មួយ​ឆ្នាំ​មក​ហើយ​សម្រាប់​ដំណោះ​ស្រាយ​នេះ»

លោក សុភា ឲ្យ​ដឹងថា​ប្រាក់ដែល​លោកនឹង​​ទទួល​បាន​ប្រហែល​១៤០០​ដុល្លារ នឹងមិន​គ្រប់​សង​បំណុល ដែល​លោក​ជំពាក់​អំឡុងពេល​អត់ការងារធ្វើ និង​អំឡុងពេល​ទាមទារ​ដំណោះ​ស្រាយ​មួយ​ឆ្នាំ​កន្លង​មក​នេះទេ​។

អ្នក​ស្រី ព្រំ ចំរើន ដែល​បាន​ធ្វើជា​កម្មករ​នៅ​រោង​ចក្រ​ Dignity Knitter តាំងពី​ឆ្នាំ២០០៦ បាន​ឲ្យ​ដឹងថា អ្នក​ស្រី​បាន​ធូរ​ចិត្ត​បន្តិច​ បន្ទាប់ពី​អត់ការងារ​ជាង​មួយ​ឆ្នាំ​កន្លង​មក​នេះ។

អ្នកស្រី​បន្ថែម​ថា៖ «ខ្ញុំ​នឹង​ទទួល​បាន​ប្រាក់​សំណង​ជាង​១៣០០​ដុល្លារ»

ប្រែសម្រួលពីអត្ថបទភាសាអង់គ្លេស៖ Staff of shuttered Kandal factories to share $1.2M after sale of seized equipment

159 views
Share on facebook
Share on twitter
Share on linkedin
Share on telegram
Share on whatsapp
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »