រដ្ឋាភិបាលស៊ុយអែតប្រកាសបិទស្ថានទូតនៅកម្ពុជា បន្ទាប់ពីប្រកាសផ្តាច់ជំនួយ

ឯកអគ្គរាជទូតស៊ុយអែតប្រចាំកម្ពុជា លោក Björn Häggmark ថ្លែងក្នុងកម្មវិធីរបស់ខេមបូចា កាលពីឆ្នាំ២០១៩។ បញ្ញា ឆព័ណ្ណ
ឯកអគ្គរាជទូតស៊ុយអែតប្រចាំកម្ពុជា លោក Björn Häggmark ថ្លែងក្នុងកម្មវិធីរបស់ខេមបូចា កាលពីឆ្នាំ២០១៩។ បញ្ញា ឆព័ណ្ណ

រដ្ឋាភិបាល​​ប្រទេស​​ស៊ុយ​អែត​នឹង​បិទ​ស្ថាន​ទូត​របស់​ខ្លួន​ក្នុងទី​ក្រុង​ភ្នំពេញ ដោយ​ប្ដូរ​ទៅ​កាន់​ទីក្រុង​បាងកក​វិញ តែ​មន្ត្រីរដ្ឋាភិបាល​ថា​ការ​សម្រេច​ចិត្ត​នេះ​មិន​មែន​បង្ហាញ​ពី​ភាព​ល្អក់​កករ​នៃ​ទំនាក់​ទំនង​ប្រទេស​ទាំងពីរ​នោះទេ​។​

រដ្ឋាភិបាល​​​​ស៊ុយ​អែត បាន​ប្រកាស​កាល​ពី​ថ្ងៃព្រហស្បតិ៍ ថា​ស្ថានទូត​នឹង​បិទ​ដំណើរ​ការ​ទាំង​ស្រុង​នៅ​ចុង​ឆ្នាំ​២០២១ ហើយ​ត្រូវ​ប្ដូរ​ទៅ​កាន់​ទី​ក្រុង​បាងកក​វិញ។​ សេចក្ដី​ប្រកាសព័ត៌មាន​ បាន​បន្ត​ថាទី​ភ្នាក់​ងារ​អភិវឌ្ឍន៍​អន្តរជាតិ​ស៊ុយ​អែត(Sida) នឹង​នៅ​បន្ត​ការ​ងារ​នៅ​កម្ពុជា។​

​ក្រ​សួង​ការ​បរទេស​ស៊ុយ​អែត​​ បានលើឡើងថា ប្រ​ទេសស៊ុយ​អែតនឹង​រក​ «មធ្យោបាយ​ថ្មី» ដើម្បី​បន្ត​ទំនាក់​ទំនង​ជាមួយ​កម្ពុជា តែ​មិន​បាន​បញ្ជាក់​ច្បាស់​ថា​ហេតុ​អ្វី​រដ្ឋាភិបាល​ស៊ុយ​អែត​​សម្រេចចិត្ត​​បែប​នេះ​ទេ​។​

សេចក្ដី​ប្រកាសព័ត៌មាន បានសរសេរថា៖ «ការ​ផ្លាស់​ប្តូរ​នេះ​ គឺ​ជា​ផ្នែក​មួយ​របស់​ក្រ​សួង​ការ​បរទេស​ ក្នុង​ការ​បន្ត​រៀប​ចំ​ស្ថាប័ន​ក្រៅ​ប្រទេស ដើម្បី​តម្រូវ​តាម​ការ​ប្រែ​ប្រួល​របស់​​មជ្ឈ​ដ្ឋាន​ខាង​ក្រៅ និង​តាម​តម្រូវ​ការ​ចាំ​បាច់​ទាំង​ផ្នែក​សេវាកម្ម និង​ការ​ត្រួត​ពិនិត្យ។ ការ​ផ្លាស់​ប្ដូរ​នេះ ជា​ដំណើរ​ការ​ប្រ​ក្រ​តី ហើយ​ពេល​ខ្លះ​រដ្ឋាភិបាល​ស៊ុយ​អែតមានបើក ឬ​បិទ​ស្ថានទូត និង​ស្ថានកុងស៊ុល​របស់​ខ្លួន​បែបនេះ»។​​

ការ​ប្រ​កាស​នេះ​កើត​មាន​តែ​ប៉ុន្មា​ន​ខែ​បន្ទាប់​ពី​រដ្ឋាភិបាល​ស៊ុយ​អែត​ប្រកាស​បញ្ចប់​គ្រប់​ជំនួយ​ទ្វេភាគី​របស់​ខ្លួន​មក​កាន់​កម្ពុជាត្រឹម​ខែ​កក្កដា ឆ្នាំ​២០២១។ ការ​សម្រេច​ចិត្ត​ផ្ដាច់​ជំនួយ​នេះធ្វើ​ឡើង​ដោយថា​មក​ពី​ការ​ធ្លាក់​ចុះស្ថាន​ភាព​​​ផ្នែក​សិទ្ធិ​មនុស្ស និង​ប្រ​ជា​ធិបតេយ្យនៅ​កម្ពុជា ហើយ​​ថា​នឹង​បង្វែរ​មូលនិធិ​ទាំង​នោះ​ទៅ​គាំ​ទ្រ​ដល់​អ្នកការ​ពារ​សិទ្ធិមនុស្ស និង​អ្នក​តស៊ូ​មតិ​ផ្នែក​​លទ្ធិ​ប្រ​ជា​ធិបតេយ្យ​។

​រដ្ឋមន្ត្រី​ក្រសួង​អភិវឌ្ឍន៍​សហប្រតិបត្តិការ​អន្តរជាតិ​ស៊ុយ​អែត Peter Eriksson បានថ្លែងកាលពីខែមិថុនា ថា៖ «រដ្ឋាភិបាល​បាន​សម្រេច​ចិត្ត​បង្វែរ​​ជំនួយ​អភិវឌ្ឍន៍​​ទៅ​ជួយ​គាំទ្រ​ការ​ធ្វើ​ឲ្យ​ប្រ​សើរ​ផ្នែក​សិទ្ធិមនុស្ស ប្រជា​ធិបតេយ្យ និង​នីតិរដ្ឋ​ក្នុង​ប្រទេស​កម្ពុជា»

ស្ថាន​ទូត​ស៊ុយ​អែត​ប្រ​ចាំ​កម្ពុជា​មិន​អាច​សុំ​ការ​ឆ្លើយ​តប​បាន​ទេ​នៅ​ថ្ងៃ​សុក្រ​នេះ។​

រដ្ឋាភិបាល​​ស៊ុយ​អែត​ជា​ញឹកញាប់​បាន​បង្ហាញ​ការ​មិន​ពេញ​ចិត្ត​ចំពោះ​រដ្ឋាភិបាល​កម្ពុជា ដែល​រង​ការ​ចោទថា​បាន​ធ្វើ​ទុក្ខ​បុក​ម្នេញ​លើ​អតីតគណបក្ស​សង្រ្គោះជាតិ ប្រ​ព័ន្ធ​ផ្សព្វ​ផ្សាយ​ឯករាជ្យ និង​អង្គការ​សង្គម​ស៊ីវិល​។

​ប៉ុន្តែ​មន្ត្រី​រដ្ឋាភិបាល​កម្ពុជាមាន​ប្រសាសន៍​​ថាមិន​បារម្ភ​​លើ​ការ​សម្រេច​ចិត្ត​​របស់​រដ្ឋាភិបាល​ស៊ុយ​អែត​នោះទេ​។​

អ្នកនាំ​ពាក្យ​ក្រ​សួង​ការបរទេស​កម្ពុជា លោក កុយ គួង បាន​ថ្លែង​ប្រាប់​អ្នក​សារព័ត៌មាន​តាម​ប្រ​ព័ន្ធ​តេឡេក្រាម​ថា ការ​សម្រេចចិត្តបិទ ឬ​បើក​ស្ថានទូ​ត​ ជា​កិច្ច​ការ​ផ្ទៃ​ក្នុង​របស់​​រដ្ឋាភិបាល​ស៊ុយ​អែត ហើយ​ការ​ផ្លាស់​ប្ដូរ​បេសកកម្ម​ការទូត​នេះ​នឹង​មិន​ប៉ះពាល់​ដល់​ទំនាក់​ទំនង​ប្រទេស​ទាំង​ពីរ​នោះ​ទេ​។​​

លោក​បាន​សរសេរថា៖ «ការ​ប្រ​កាស​បិទ​ស្ថាន​ទូត​ មិន​ប៉ះពាល់​ដល់​ទំនាក់ទំនង​រវាង​កម្ពុជា និង​ស៊ុយ​អែត​នោះ​ទេ​»។​

អ្នកនាំពាក្យរដ្ឋាភិបាល​ លោក ផៃ ស៊ីផាន មានប្រ​សាសន៍ថា​កាលពី​មុន​ប្រទេស​ស៊ុយ​អែត​មា​ន​ស្ថាន​ទូត​នៅប្រទេស​ថៃ ហើយ​ទំនាក់​ទំនង​រវាង​ប្រទេស​ទាំង​ពីរ​នៅ​ពេល​នោះ​ក៏​ល្អ​ប្រ​សើរ​ដែរ​។​

លោកមានប្រសាសន៍ថា៖ «ដូច​នេះ​គ្មាន​អ្វី​គួរ​ឲ្យ​ភ្ញាក់​ផ្អើលទេ​ វា​គ្រាន់​តែ​ជា​ការ​ផ្លាស់​ប្ដូរ​ផ្នែក​រដ្ឋបាល និង​កិច្ចការ​ផ្ទៃ​ក្នុង​របស់គេ»

លោក ផៃ ស៊ីផាន បាន​កត់​សម្គាល់​ថា​កម្ពុជា និង​ស៊ុយ​អែត មិន​ដែល​មាន​បញ្ហា​ទំនាក់​ទំនង​ល្អក់កករ​អ្វី​នឹង​គ្នា​នោះទេ ហើយ​ថា​ប្រទេស​ទាំង​ពីរ​ចាត់ទុក​គ្នា​ជាមិត្ត​។​

លោក​ស្រី ចក់ សុភាព នាយិការ​មជ្ឈមណ្ឌល​សិទ្ធិមនុស្សកម្ពុជា សង្ឃឹម​ថា​រដ្ឋាភិបាល​ស៊ុយអែត​នឹង​នៅ​តែ​បន្ត​​គាំទ្រ​ដល់​ក្រុម​សង្គម​ស៊ីវិល​នៅ​កម្ពុជា ដែល​ជា​អ្នក​ «​តស៊ូ» ការ​ពារ​ផ្នែក​សិទ្ធិមនុស្ស​នៅកម្ពុជា​។​

លោក​ស្រីមាន​ប្រសាសន៍ថា៖ «ខ្ញុំ​មាន​ការ​ភ្ញាក់​ផ្អើល​ ពេល​ដឹង​ថា​រដ្ឋាភិបាល​ស៊ុយ​អែត​បាន​សម្រេច​ចិត្ត​បិទ​ស្ថាន​ទូត​របស់​ខ្លួន​នៅ​ភ្នំពេញ…​វត្ត​មាន​របស់​ស្ថានទូត​ស៊ុយ​អែត​នៅ​កម្ពុជា​មាន​សារៈសំខាន់​ណាស់​ ហើយ​ខ្ញុំ​ព្រួយ​បារម្ភ​ថា​ ពួក​គេ​នឹង​មិន​មាន​បុគ្គ​លិក​នៅ​ផ្ទាល់​ទៅ​ថ្ងៃ​ខាង​មុខ»។​

លោក​ ប៉ា ចន្ទរឿន ​ប្រធាន​វិទ្យាស្ថាន​ប្រជាធិបតេយ្យ​កម្ពុជា មាន​ប្រសាសន៍​ថា​ការ​សម្រេច​ចិត្ត​ប្ដូ​រស្ថាន​ទូត​នេះ បង្ហាញ​ពី​រូប​ភាព​មិន​ល្អ​ដល់​​រដ្ឋាភិបាល​កម្ពុជា ដោយ​ថា​បាន​បរាជ័យ​ក្នុង​ការ​គោរព​សិទ្ធិមនុស្ស និង​លទ្ធិប្រជា​ធិបតេយ្យ​។​

លោក​​បន្តថា រដ្ឋាភិបាល​ស៊ុយ​អែត ទំនង​ជាមិន​ឃើញ​មាន​ការ​ធ្វើ​ឲ្យ​ប្រសើរ​ឡើង​ ទោះ​បីជា​បាន​ផ្ដល់​ជំនួយ​គាំទ្រ​ដល់​សកម្មភាព​អភិបាល​កិច្ច និង​ប្រ​ជា​ធិបតេយ្យ​។

លោក​​បន្ថែមថា៖ «​ដូច​នេះ វា​ជា​សារ​មួយបង្ហា​ថា​ ​រូប​ភាពនេះ​មិន​ល្អ​សម្រាប់​កម្ពុជា នៅលើ​ឆាក អន្តរជាតិ»

117 views
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »