សកម្មជនអតីតគណបក្សសង្រ្គោះជាតិចំនួនបីរូបត្រូវបានចាប់ខ្លួននៅខាងក្រៅស្ថានទូតចិនប្រចាំកម្ពុជា នៅពេលពួកគេព្យាយាមដាក់ញត្តិ ដើម្បីប្រឆាំងវត្តមានកងទ័ពចិននៅលើកទឹកដីកម្ពុជា ជាមួយនឹងអ្នកចូលរួម ១០០នាក់ផ្សេងទៀត ដោយអំពាវនាវឲ្យរដ្ឋាភិបាលកម្ពុជាគោរពតាមកិច្ចព្រមព្រៀងសន្តិភាពក្រុងប៉ារីស អំឡុងថ្ងៃខួបលើកទី២៩ នៃការចុះកិច្ចព្រមព្រៀងនេះ។
សកម្មជនចំនួនបីនាក់នៃគណបក្សសង្រ្គោះជាតិដែលត្រូវបានរំលាយ រួមមានអ្នកស្រី លឹម សាន អាយុ ៥៧ឆ្នាំ អ្នកស្រី យ៉យ ស្រីមុំ អាយុ ៥០ឆ្នាំ និងលោក តុន និមល អាយុ ៤០ឆ្នាំ ត្រូវបានមន្រ្តីប៉ូលិស និងកងសន្តិសុខខណ្ឌចាប់ខ្លួននៅជិតស្ថានទូតចិនប្រចាំកម្ពុជានៅម៉ោងជាង ៨ព្រឹក ខណៈអ្នកសារព័ត៌មានចំនួន ០៦នាក់ទៀតត្រូវរងការបំពាន និងការគំរាមកំហែង នៅពេលព្យាយាមរាយការណ៍ពីការប៉ះទង្គិចគ្នារវាងសកម្មជន និងកងសន្តិសុខ។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានបញ្ជាក់ថា ស្រ្តីពីរនាក់ និងបុរសម្នាក់ត្រូវបានចាប់ខ្លួន ដោយសារតែពួកគេមិនទទួលបានការអនុញ្ញាតពីសាលាក្រុងដើម្បីធ្វើការតវ៉ា និងបានលើកឡើងថា ប៉ូលិសត្រូវចាត់វិធានការដើម្បីធានាសុវត្ថិភាពបុគ្គលដទៃទៀតនៅបរិវេណស្ថានទូត។
លោក សុខសីហា បានមានប្រសាសន៍ថា៖ «ដោយសារតែពួកគាត់មិនមានការអនុញ្ញាត ហើយពួកគាត់បានបង្កបញ្ហា អាជ្ញាធរបាននាំខ្លួនពួកគាត់ចំនួនបីនាក់ ដើម្បីមកសាកសួរ មិនមែនឃាត់ខ្លួនពួកគាត់នោះទេ»។
មកទល់ម៉ោងប្រាំមួយល្ងាចថ្ងៃសុក្រដដែល អ្នកនាំពាក្យនគរបាលជាតិលោក ឆាយ គឹមឃឿន បានមានប្រសាសន៍ថា សកម្មជនទាំងបីនាក់ខាងលើកំពុងត្រូវបានសាកសួរនៅឡើយនៅស្នងការដ្ឋាននគរបាលរាជធានីភ្នំពេញ។
លោកបានកត់សម្គាល់ថា មន្រ្តីប៉ូលិសអាចឃុំខ្លួនជនសង្ស័យរយៈពេល ៤៨ម៉ោង ហើយបន្ទាប់មកត្រូវស្នើការអនុញ្ញាតពីព្រះរាជអាជ្ញា ដើម្បីបន្តការសាកសួរ។
លោកបានមានប្រសាសន៍ថា៖ «ពួកគាត់បានធ្វើខុស ពួកគាត់ប្រឆាំងនឹងសន្តិសុខសាធារណៈ។ កម្រិតទោសទណ្ឌរបស់ពួកគាត់គឺផ្អែកលើការសាកសួរ ហើយ [អាជ្ញាធរ] នឹងស្នើទៅព្រះរាជអាជ្ញា ប្រសិនបើព្រះរាជអាជ្ញាគិតថា ពួកគាត់មានទោស»។
មុនពេលបាតុករចំនួនជិត ១០០នាក់បានមកដល់នៅពេលព្រឹក កងកម្លាំងសន្តិសុខចំនួនពី ២០០ទៅ៣០០នាក់ ត្រូវបានដាក់ពង្រាយនៅខាងក្រៅស្ថានទូតចិនដើម្បីរារាំងមិនឲ្យមានការប្រមូលផ្តុំ។ ហើយនៅពេលអ្នកតវ៉ាមួយក្រុមតូចបានធ្វើដំណើរទៅជិតស្ថានទូតចិន អាជ្ញាធរបានបំបែក និងរុញច្រានពួកគេចេញពីបរិវេណស្ថានទូត។
ខណៈកងសន្តិសុខកំពុងរុញច្រានបាតុករ និងបានធ្វើការចាប់ខ្លួនសកម្មជនចំនួនបីនាក់ អាជ្ញាធរមួយចំនួនបានប៉ះទង្គិចជាមួយនឹងអ្នកសារព័ត៌មាន និងបានស្រែកហាមប្រាមមិនឲ្យមានការថតរូប ឬថតវីដេអូ។
អ្នកស្រី ហុង អាន អាយុ ៤៥ឆ្នាំ បាតុករមួយរូបដែលធ្វើដំណើរមកពីខេត្តឧត្តរមានជ័យ បាននិយាយថា ក្រុមអ្នកតវ៉ាមិនបានជោគជ័យនោះទេនៅក្នុងការដាក់ញត្តិទៅឲ្យស្ថានទូតចិន។
ដោយសំដៅទៅកាន់អ្នកតវ៉ាជាស្រ្តីចំនួនពីរនាក់ ដែលបានរងរបួសនៅក្នុងការប៉ះទង្គិចគ្នាជាមួយនឹងកងសន្តិសុខ អ្នកស្រី ហុង អាន បាននិយាយថា៖ «ខ្ញុំពិតជា សោកស្តាយណាស់ ដែលអាជ្ញាធរបានចាប់ខ្លួនមនុស្សបីនាក់នៅក្នុងក្រុមយើង ហើយបានធ្វើបាប សានផា និងបងស្រីនីសា»។
អ្នកស្រី ហុង អាន បានកត់សម្គាល់ថា ស្ថានទូតអាមេរិក និងស្ថានទូតបារាំងប្រចាំកម្ពុជាបានទទួលញត្តិនៅពេលដែលក្រុមបាតុករបានធ្វើដំណើរទៅកាន់ស្ថានទូតទាំងពីរនៅថ្ងៃជាមួយគ្នានេះ។
អ្នកស្រីបាននិយាយថា៖ «ខ្ញុំសូមស្នើឲ្យប្រទេសហត្ថាលេខីជួយស្តាលទ្ធិប្រជាធិបតេយ្យនៅកម្ពុជាជាបន្ទាន់ ដោយសារតែកម្ពុជាមិនគោរពច្បាប់លទ្ធិប្រជាធិបតេយ្យ និងសិទ្ធិមនុស្សនៅថ្ងៃខួបកិច្ចព្រមព្រៀងសន្តិភាពក្រុងប៉ារីស»។
អ្នកនាំពាក្យស្ថានទូតអាមេរិកប្រចាំកម្ពុជាលោក Chad Roedemeir បានបញ្ជាក់ថា ស្ថានទូតអាមេរិកបានទទួលញត្តិរួចហើយ និងបាននិយាយថា សហរដ្ឋអាមេរិកអំពាវនាវឲ្យរដ្ឋាភិបាលកម្ពុជាគោរពសេរីភាពនៅក្នុងការបញ្ចេញមតិយោបល់ និងការប្រមូលផ្តុំ។
លោកបាននិយាយថា៖ «យើងបានលើកឡើងជាប្រចាំនូវការព្រួយបារម្ភពាក់ព័ន្ធនឹងលទ្ធិប្រជាធិបតេយ្យ និងសិទ្ធិមនុស្សជាមួយនឹងរដ្ឋាភិបាលកម្ពុជា និងបានជំរុញឲ្យរដ្ឋាភិបាលកម្ពុជាចាត់វិធានការប្រកបដោយផ្លែផ្កាដើម្បីបើកលំហនយោបាយ និងសង្គមស៊ីវិលឡើងវិញ»។
លោកបានបន្ថែមថា៖ «យើងគាំទ្រប្រជាជនកម្ពុជា និងសិទ្ធិកំណត់តាមរដ្ឋធម្មនុញ្ញដើម្បីទទួលបានលទ្ធិប្រជាធិបតេយ្យ និងសេរីភាពជាមូលដ្ឋាន»។
នៅក្នុងញត្តិដែលក្រុមបាតុករបានដាក់ជូនស្ថានទូតបារាំង និងអាមេរិក បានស្នើឲ្យប្រទេសទាំងនេះជួយអន្តរាគន៍ទៅកាន់ រដ្ឋាភិបាលកម្ពុជាគោរពលទ្ធិប្រជាធិបតេយ្យ ដែលត្រូវបានធានាដោយកិច្ចព្រមព្រៀងសន្តិភាពក្រុងប៉ារីស។
នៅក្នុងញត្តិដដែល បានអះអាងថាពួកគេប្រឆាំងដាច់ខាតវត្តមានរបស់កងទ័ពចិននៅកំពង់ផែសមុទ្ររាម ក្នុងខេត្តព្រះសីហនុ និងតំបន់អភិវឌ្ឍតារាសាគរ ក្នុងខេត្តកោះកុង។
អ្នកស្រី កែវ ចិន្តា អាយុ ៤៧ឆ្នាំ អ្នកគាំទ្រគណបក្សសង្រ្គោះជាតិ ដែលមកពីខេត្តសៀមរាបដើម្បីចូលរួមក្នុងការជួបជុំ បាននិយាយនៅខាងក្រៅស្ថានទូតបារាំងប្រចាំកម្ពុជាថា អ្នកស្រីចង់ឲ្យរដ្ឋាភិបាលគោរពលទ្ធិប្រជាធិបតេយ្យ ដែលត្រូវបានធានាដោយកិច្ចព្រមព្រៀងសន្តិភាពក្រុងប៉ារីស។
អ្នកស្រីបាននិយាយថា៖ «ខ្ញុំចង់ឲ្យប្រទេសយើងមានលទ្ធិប្រជាធិបតេយ្យពេញលេញ»។
អ្នកស្រីបាននិយាយថា៖ «[រដ្ឋាភិបាល] បានរំលោភបំពានកិច្ចព្រមព្រៀងសន្តិភាពក្រុងប៉ារីស… តាមរយៈការរំលាយគណបក្សសង្រ្គោះជាតិ។ គណបក្សសង្រ្គោះជាតិត្រូវបានជ្រើសរើសដោយប្រជាជន ប៉ុន្តែពួកគេមិនអនុញ្ញាតឲ្យប្រជាពលរដ្ឋបោះឆ្នោតដើម្បីរំលាយវិញទេ ហើយពួកគេមិនបានសួរគំនិតពីប្រជាជននោះទេ»។
អ្នកស្រីបានបន្តថា អ្នកស្រី សាន ផា អាយុ ៤៧ឆ្នាំ សកម្មជនគណបក្សប្រឆាំងមួយរូបទៀត ត្រូវបានរងរបួសនៅពេលដែលមន្រ្តីសន្តិសុខបានរុញអ្នកស្រីផ្ទប់នឹងដី និងបានជាន់ជើងអ្នកស្រីពេញទំហឹង ខណៈអ្នកស្រីព្យាយាមជួយអ្នកតវ៉ាដទៃទៀតដែលកំពុងត្រូវបានចាប់ខ្លួន។
អ្នកស្រី សេង វិសាល អាយុ ៤៦ឆ្នាំ អ្នកតវ៉ាម្នាក់ទៀតដែលធ្វើដំណើរមកពីខេត្តព្រៃវែងជាមួយនឹងបាតុករចំនួន ១០នាក់ផ្សេងទៀត បាននិយាយថា នៅពេលអ្នកស្រីព្យាយាមទៅជិតស្ថានទូតចិន អ្នកស្រីត្រូវបានចាប់រុញផ្ទប់នឹងដីជាច្រើនលើកដោយកងសន្តិសុខខណ្ឌ។
អ្នកស្រីបាននិយាយថា៖«ខ្ញុំចង់ឲ្យរដ្ឋាភិបាលគោរពតាមកិច្ចព្រមព្រៀងសន្តិភាពក្រុងប៉ារីស។ សូម កុំប្រើអំពើហិង្សា។ រដ្ឋាភិបាលកំពុងតែរំលោភបំពានសិទ្ធិប្រជាពលរដ្ឋ។ ខ្ញុំគ្រាន់តែមកចូលរួមជាមួយក្រុមខ្ញុំដើម្បីដាក់ញត្តិទៅស្ថានទូតចិនតែប៉ុណ្ណោះ ប៉ុន្តែខ្ញុំបែរជាត្រូវបានរុញច្រានទៅវិញ»។
លោក ចាន់ តុន ឪពុកសកម្មជន លោកតុន និមល ដែលត្រូវបានចាប់ខ្លួន បាននិយាយថា មិនមែនជារឿងយុត្តិធម៌នោះទេដែលកូនប្រុសរបស់លោកត្រូវបានឃាត់ខ្លួន។
លោកបាននិយាយថា៖ «ខ្ញុំគិតថា ការចាប់ខ្លួនកូនប្រុសខ្ញុំ និងមនុស្សពីរនាក់ទៀតគឺជា ការរំលោភបំពានសិទ្ធិមនុស្ស និងប្រឆាំងនឹងច្បាប់។ ប្រសិនបើពួកគេចេះតែអ្វីតាមតែអំពើចិត្តនោះ ប្រទេសមិនចាំបាច់ត្រូវការច្បាប់នោះទេ»។
លោកបានបន្ថែមថា៖ «ថ្ងៃស្អែក ខ្ញុំនឹងទៅតវ៉ាប្រឆាំងនឹងអាជ្ញាធរក្រុងភ្នំពេញឲ្យដោះលែងកូនប្រុសរបស់ខ្ញុំ»។
នៅស្របពេលដូចគ្នានេះ អង្គការសង្គមស៊ីវិល សមាគម និងសហជីពកម្មករចំនួន ២៤ បានធ្វើការប្រមូលផ្តុំដោយឡែកមួយទៀត ដើម្បីប្រារព្ធខួបនៃការចុះកិច្ចព្រមព្រៀងសន្តិភាពក្រុងប៉ារីស ដោយអំពាវនាវឲ្យរដ្ឋាភិបាលគោរពតាមគោលការណ៍ដែលមានចែងនៅក្នុងកិច្ចព្រមព្រៀង និងដាក់បញ្ចូលថ្ងៃ២៣ តុលា ជាថ្ងៃឈប់សម្រាកផ្លូវការឡើងវិញ។
លោក មាស នី អ្នកសា្រវជ្រាវសង្គម និងអ្នកវិភាគនយោបាយ បានថ្លែងទៅកាន់ពិធីជួបជុំដែលមានអ្នកចូលរួមចំនួនប្រហែល ៧០០នាក់ ដោយនិយាយថា រដ្ឋាភិបាលនាពេលបច្ចុប្បន្នដឹកនាំដោយគណបក្សប្រជាជនកម្ពុជាបានខកខាននៅក្នុងការបំពេញកាតព្វកិច្ចរបស់ខ្លួន ដើម្បីសាមគ្គីភាពជាតិ ការគោរពសិទ្ធិមនុស្ស និងលទ្ធិប្រជាធិបតេយ្យនៅក្នុងសង្គម ដូចដែលបានចែងនៅក្នុងកិច្ចព្រមព្រៀងសន្តិភាពក្រុងប៉ារីស។
លោកបាននិយាយថា៖ «យើងមានការព្រួយបារម្ភ ដោយយើងមើលឃើញថា ការបែកបាក់រវាងអ្នកនយោបាយខ្មែរ បែកបាក់ជាតិ និងគូបក្សដិបក្សនយោបាយខ្មែរ ហើយមកដល់ពេលនេះពុំទាន់មានដំណោះស្រាយ។
លោកមាស នីបានបន្ថែមថា៖ « ប៉ុន្តែបញ្ហាគឺថា យើងលែងដោះស្រាយគ្នាបាន។ ហើយមិនត្រឹមតែយើងលែងដោះស្រាយគ្នាបានទេ គឺរហូតគឺយើងឈានដល់កន្លែងមួយគឺ មានការចោទប្រកាន់គ្នាដូចជា ក្នុងបរិបទមានអ្នកក្បត់ជាតិ និងមានអ្នកស្នេហាជាតិ» ដោយលោកបានពន្យល់ថា ប្រសិនបើនៅតែមានការចោទប្រកាន់ថាក្រុមឧទ្ទាម នោះនឹងមិនមានសាមគ្គីជាតិនោះទេ»។
ដោយអំពាវនាវឲ្យមានការដាក់បញ្ចូលថ្ងៃ២៣ តុលាជាថ្ងៃឈប់សម្រាកជាតិឡើងវិញ លោកមាស នីបានប្រៀបធៀបការទទួលស្គាល់ថ្ងៃ០៧ មករា របស់រដ្ឋាភិបាលដឹកនាំប្រទេស ទៅនឹងសេចក្តីសម្រេចនៅក្នុងការដកថ្ងៃ២៣ តុលាចេញពីបញ្ជីថ្ងៃឈប់សម្រាក។
លោកបាននិយាយថា ថ្ងៃ០៧ មករា ត្រូវបានចាត់ទុកជា ថ្ងៃចាប់ផ្តើមថ្មី ដោយតំណាងឲ្យការរំដោះប្រទេសចេញពីរបបខ្មែរក្រហម ទោះបីជាការរំដោះនេះខកខនក្នុងការនាំមកនូវសន្តិភាពពេញលេញក៏ដោយ។ ស្របពេលដូចគ្នានេះ កិច្ចព្រមព្រៀងសន្តិភាពក្រុងប៉ារីសបានបញ្ចប់នូវជម្លោះប្រដាប់អាវុធនៅកម្ពុជា។ យ៉ាងណាក្តី ថ្ងៃឈប់សម្រាកជាតិថ្ងៃ២៣ តុលា លែងត្រូវបានទទួលស្គាល់តទៅទៀត។
ដោយថ្លែងតាមប្រព័ន្ធ Skype នៅអំឡុងពេលពិធីខាងលើ លោក ធន់ សារាយ ប្រធានអង្គការសិទ្ធិមនុស្សអាដហុក បានអំពាវនាវឲ្យអ្នកនយោបាយកម្ពុជាកុំឲ្យភ្លេចនូវបទពិសោធន៍របស់ខ្លួនកាលពីអតីតកាល និងបញ្ចៀសពីការធ្វើឲ្យប្រជាជនខ្មែររងការឈឺចាប់បន្ថែមទៀត ដែលការណ៍នេះរួមមានការគោរពទៅលើកិច្ចព្រមព្រៀងសន្តិភាពក្រុងប៉ារីស និងរដ្ឋធម្មនុញ្ញ។
លោកបានមានប្រសាសន៍ថា៖ «ប្រជាជនខ្មែរ ដែលមានការអប់រំ និងជាម្ចាស់ប្រទេស សូមហ៊ាននិយាយ និងទាមទារសិទ្ធិ និងសេរីភាពរបស់យើង»។
លោកបានបន្ថែមថា៖ «អ្នកនយោបាយយើងត្រូវស្តាប់សំឡេងប្រជាជន ហើយត្រូវស្តាប់ទោះបីជារឿងឈឺចាប់ក៏ដោយ»។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ដែលជាគណបក្សកាន់អំណាច បានថ្លែងប្រាប់តាមទូរសព្ទថា ថ្ងៃជ័យជម្នះលើអំពើប្រល័យពូជសាសន៍ ០៧ មករា តំណាងឲ្យ «ជីវិតទីពីរសម្រាប់ប្រជាជនកម្ពុជា» ដោយសារតែថ្ងៃនេះបាននាំមកនូវគោលនយោបាយផ្សះផ្សាជាតិ ដែលនៅទីបំផុតនាំឲ្យមានការចុះហត្ថលេខាលើកិច្ចព្រមព្រៀងសន្តិភាពក្រុងប៉ារីស។
លោកបានមានប្រសាសន៍ថា៖ «បើគ្មានថ្ងៃ០៧ មករាទេ ថ្ងៃ២៣ តុលាក៏អត់មានដែរ» ដោយបន្ថែមថា រដ្ឋាភិបាលបានបំពេញនូវលក្ខខណ្ឌនៃសន្ធិសញ្ញាក្រុងប៉ារីស តាមរយៈការដាក់បញ្ចូលនូវធាតុផ្សេងៗនៃសន្ធិសញ្ញានេះទៅក្នុងរដ្ឋធម្មនុញ្ញ។
លោក សុខ ឥសាន បានបន្ថែមថា៖ «អាហ្នឹងជាការយល់ឃើញរបស់គាត់ ជាអត្តនោម័តិរបស់គាត់ ជាបុគ្គលរបស់គាត់ទេ។ ដូច្នេះហើយ ការយល់ឃើញម្នាក់ហ្នឹង វាមិនមែនគ្រប់ដណ្តប់ទៅលើការយល់ឃើញរបស់ប្រជាជន ១៦លាននាក់បានទេ។ មតិគាត់តែមួយទេ ហើយឥឡូវ១៦លាននាក់គេឯកភាពទៅតាមគោលនយោបាយរបស់រដ្ឋាភិបាលគណបក្សកម្ពុជា» ដោយទទួចថា ប្រជាជនខ្មែរមិនមែនបែកបាក់សាមគ្គីនោះទេ។
លោកបានបកស្រាយបន្ថែមថា រដ្ឋាភិបាលត្រូវកាត់បន្ថយចំនួនថ្ងៃឈប់សម្រាកជាតិ ដែលក្នុងនោះរួមមានទិវាកិច្ចព្រមព្រៀងសន្តិភាពក្រុងប៉ារីសដើម្បីទាក់ទាញអ្នកវិនិយោគមកកាន់ប្រទេសកម្ពុជា។
លោក សុខ ឥសាន បានបន្តថា រដ្ឋាភិបាលនាពេលបច្ចុប្បន្នកំពុងធ្វើដំណើរលើមាគ៌ាលទ្ធិប្រជាធិបតេយ្យ និងគោរពនីតិរដ្ឋ ស្របពេលរក្សានូវសន្តិភាព សេ្ថរភាពនយោបាយ និងសណ្តាប់ធ្នាប់សាធារណៈ។
លោក អំ សំអាត នាយករងទទួលបន្ទុកឃ្លាំមើលនិងការពារសិទ្ធិមនុស្សនៃអង្គការលីកាដូ បានថ្កោលទោសការបង្រ្កាបទៅលើក្រុមអ្នកតវ៉ាដែលបានមកជួបជុំដោយសន្តិវិធីនៅខាងក្រៅស្ថានទូតចិនប្រចាំកម្ពុជា។
លោកបាននិយាយថា៖ «សេរីភាពមូលដ្ឋានរបស់ប្រជាពលរដ្ឋត្រូវរងការរឹតត្បិតជាងមុន ជាពិសេសសិទ្ធិរបស់ពួកគេនៅក្នុងការប្រមូលផ្តុំ» ដោយបន្ថែមថា អាជ្ញាធរគួរស្វែងរកដំណោះស្រាយជាជាងងាកទៅរកការប្រើប្រាស់អំពើហិង្សា»។
លោក អំ សំអាត បានលើកឡើងផងដែរថា វិធានការចាត់ឡើងប្រឆាំងនឹងបាតុករគឺដោយសារការបញ្ជាពីលោកនាយករដ្ឋមន្រ្តីហ៊ុន សែនកាលពីថ្ងៃទី២១ ខែតុលា ឲ្យបង្រ្កាបលើបុគ្គលណាដែលហ៊ានធ្វើបាតុកម្មនៅខាងក្រៅស្ថានទូតចិនប្រចាំកម្ពុជា ដូចការអំពាវនាវរបស់លោក សម រង្ស៊ី ដើម្បីប្រឆាំងវត្តមានកងទ័ពចិន។
លោក អំ សំអាត បាននិយាយថា៖ «យើងព្រួយបារម្ភថា [កម្ពុជា] នឹងរងការរិះគន់កាន់ច្រើនថែមទៀតពាក់ព័ន្ធនឹងការរំលោភបំពានសិទ្ធិមនុស្ស» ដោយលើកឡើងពីការអំពាវនាវនាពេលថ្មីៗនេះពីសំណាក់ក្រុមអ្នកជំនាញផ្នែកសិទ្ធិមនុស្សអង្គការសហប្រជាជាតិ និងសហភាពអឺរ៉ុប ដើម្បីឲ្យរដ្ឋាភិបាលកម្ពុជាស្តារលទ្ធិប្រជាធិបតេយ្យ និងស្ថានភាពសិទ្ធិមនុស្សឡើងវិញ។
សម្ព័ន្ធអ្នកសារព័ត៌មានកម្ពុជា (CamboJA) និងមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) បានចេញនូវសេចក្តីថ្លែងការណ៍រួមមួយដោយលើកឡើងពីការព្រួយបារម្ភពាក់ព័ន្ធនឹងការគំរាមកំហែងលើអ្នកសារព័ត៌មានចំនួនប្រាំមួយនាក់នៅខាងក្រៅស្ថានទូតចិនប្រចាំកម្ពុជា។
ក្រុមអាជ្ញាធរបានគំរាមកំហែងអ្នកសារព័ត៌មានម្នាក់ពី វីអូឌី (VOD) នៅពេលដែលអ្នកសារព័ត៌មានរូបនោះបានឈរក្បែរ ខណៈពេលអាជ្ញាធរកំពុងសាកសួរបាតុករម្នាក់ បន្ទាប់មកអាជ្ញាធរព្យាយាមទាញយកទូរសព្ទពីរូបលោក ស្របពេលលោកព្យាយាមថតរូប។
អ្នកសារព័ត៌មានពីរនាក់ទៀតមកពី វីអូឌី ក៏ត្រូវបានសាកសួរក្នុងរយៈពេលខ្លីមួយផងដែរ បន្ទាប់ពីពួកគេបានប៉ះទង្គិចគ្នាជាមួយអាជ្ញាធរ ដែលព្យាយាមបង្ខំឲ្យពួកគេចាកចេញពីកន្លែងកើតហេតុ។ ហើយអ្នកសារព័ត៌មានមួយរូបទៀតមកពី វីអូឌី ដូចគ្នាត្រូវបានអាជ្ញាធរបញ្ជាឲ្យបញ្ឈប់ជាបន្ទាន់នូវការផ្សាយផ្ទាល់តាមបណ្តាញសង្គមហេ្វសប៊ុកពាក់ព័ន្ធនឹងការជួបជុំនៅបរិវេណស្ថានទូតចិនប្រចាំកម្ពុជា។
អាជ្ញាធរក៏បានរឹបអូសម៉ាស៊ីនថតរូបមួយពីអ្នកថតរូបប្រចាំសារព័ត៌មាន Khmer Times និងបានប្រាប់ឲ្យអ្នកថតរូបឲ្យទីភ្នាក់ងារសារព័ត៌មាន Reuters លុបចោលនូវរូបថត និងបញ្ឈប់ការថតរូប។
លោក ណុប វី នាយកប្រតិបត្តិសម្ព័ន្ធអ្នកសារព័ត៌មានកម្ពុជា (CamboJA) បានមានប្រសាសន៍ថា៖ «នេះជាសញ្ញាគំរាមកំហែងដែលមិនអាចទទួលយកបាននៅពេលដែលអ្នកសារព័ត៌មានកំពុងបំពេញវិជ្ជាជីវៈរបស់ពួកគេ។ អាជ្ញាធរហាក់ចាត់ទុកថា អ្នកសារព័ត៌មាននៅជាអ្នកឃ្លាំមើលយ៉ាងសំខាន់ដែលធ្វើឲ្យពួកគេពិបាកបង្រ្កាបលើក្រុមអ្នកតវ៉ា»។
លោក អ៊ិត សូធឿត នាយកផ្នែកផ្សព្វផ្សាយប្រចាំមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) បានមានប្រសាសន៍ថា៖ «ការគំរាមកំហែងនេះនឹងកាន់តែដាក់សម្ពាធនិងរឹតត្បិតដល់សេរីភាពអ្នកសារព័ត៌មាននៅក្នុងប្រទេសកម្ពុជា»។
ឆ្លើយតបទៅនឹងការបំពានទៅលើក្រុមអ្នកសារព័ត៌មាន អ្នកនាំពាក្យក្រសួងព័ត៌មានលោក មាស សុភ័ណ្ឌ បានមានប្រសាសន៍ថា អាជ្ញាធរគ្រាន់តែបំពេញភារកិច្ចរបស់ពួកគេតែប៉ុណ្ណោះ។
លោកបានមានប្រសាសន៍ថា៖ «នៅពេលដែលសមត្ថកិច្ចបំពេញភារកិច្ចរបស់ពួកគេ យើង [អ្នកសារព័ត៌មាន] ត្រូវសហការជាមួយពួកគាត់»។ លោកមាន សុភ័ណ្ឌបានបន្ថែមថា៖ «អ្នកសារព័ត៌មានមានសិទ្ធិយកព័ត៌មាន ប៉ុន្តែពួកគេត្រូវតែសហការជាមួយនឹងសមត្ថកិច្ច ហើយនេះមិនមែនមានន័យថា ប្រសិនបើអ្នកជាអ្នកសារព័ត៌មាន អ្នកអាចធ្វើអ្វីដែលខ្លួនចង់ធ្វើគ្រប់ពេលដោយមិនគោរពសិទ្ធិ និងកាតព្វកិច្ចរបស់សមត្ថកិច្ចនោះទេ»៕
