ប្រជាពលរដ្ឋរស់នៅ ភូមិព្រែកត្រប់ ឃុំនរិន្ទ ស្រុកឯកភ្នំ ខេត្តបាត់ដំបង បានត្អូញត្អែរ ថាផ្លូវពិបាកធ្វើដំណើរខ្លាំងនៅក្នុងរដូវវស្សា ចាប់ពីភូមិព្រែកត្រប់ ទៅភូមិបាក់ព្រា អស់រយៈពេលជាង៥ឆ្នាំ មកហើយ ប៉ុន្តែអាជ្ញាធរនៅមិនទាន់ធ្វើការជួសជុលនៅឡើយ។
គ្រូបង្រៀនមួយរូប គឺអ្នកគ្រូ ឈិន គឹមឡា រស់នៅភូមិព្រែកត្រប់ ឃុំព្រែកនរិន្ទ បានថ្លែងថា ផ្លូវមួយខ្សែនេះមានការលំបាកយូរមកហើយ ជាពិសេសរដូវវស្សា មានភក់ រអិល ជិះម៉ូតូសឹងមិនកើត និងធ្វើឲ្យសិស្សខកខានមករៀន ឬមករៀនមិនទៀតទាត់ជាដើម។
អ្នកស្រី គឹមឡា បន្ដថា៖ «កន្លងទៅប្រជាពលរដ្ឋធ្លាប់បានស្នើសុំឲ្យជួយស្ថាបនាផ្លូវមួយខ្សែនេះ តែនៅមិនទាន់ឃើញខាងមន្រ្ដីពាក់ព័ន្ធណាចុះមកធ្វើទេ»។
ឆ្លើយតបទៅនឹងបញ្ហានេះ អភិបាលស្រុកឯកភ្នំ លោក ម៉ិល សុផល បានថ្លែងថា ផ្លូវនេះស្ថិតនៅក្នុងគម្រោងថ្នាក់ខេត្តជាអ្នកធ្វើ ដោយស្ថាបនាចាក់កៅស៊ូ។ ផ្លូវនេះស្ថិតនៅក្នុងគម្រោងនៅឡើយ ដែលគម្រោងផ្លូវនេះធ្លាក់តាមដំណាក់ៗ ប៉ុន្តែលោកក៏មិនទាន់ដឹងថាពេលវេលាជាក់លាក់នៅឡើយដែរ។
លោកបន្តថា៖ «ផ្លូវនេះពិបាក់ធ្វើដំណើរ ក្នុងរដូវវស្សាពិតមែន ចំពោះការលំបាកនេះ ក៏ដោយសារប្រជាពលរដ្ឋមួយចំនួនចាក់ដីខ្ពស់ជាងផ្លូវ ដែលធ្វើឲ្យហូរដីធ្លាក់ចុះមក។ ក្នុងនាមខ្ញុំជាអភិបាលស្រុក ខ្ញុំសូមជម្រាបជូនដល់បងប្អូនប្រជាពលរដ្ឋថា រដ្ឋបាលស្រុក មានការខិតខំប្រឹងប្រែងណាស់ ហើយបានដាក់គម្រោងស្នើសុំទៅខេត្តអស់ហើយដែរ»។
លោកបានឲ្យដឹងទៀតថា លោកសូមឲ្យប្រជាពលរដ្ឋអត់ធ្មត់និងរង់ចាំបន្ដិច ចំពោះការលំបាក ដោយសារថវិកាធ្វើមានចំនួនកំណត់ មិនអាចធ្វើអ្វីឲ្យបានទាំងអស់គ្នានោះទេ គឺត្រូវធ្វើតាមកញ្ចប់ថវិកា ។ លោកថ្លែងថា ៖«មិនមែនរដ្ឋបាលស្រុកធ្វើព្រងើយកន្ដើយ អង្គុយមើលបងប្អូនប្រជាពលរដ្ឋជួបការលំបាក ដោយមិនខិតខំរកគម្រោងថវិកាណាមកធ្វើឬជួសជុលនោះទេ»។
ទោះបីជាយ៉ាងណា ប្រជាពលរដ្ឋដែលធ្វើដំណើរលើផ្លូវនេះ ទទូចស្នើសុំឲ្យមានជួសជុលឬធ្វើឲ្យបានឆាប់កាន់តែល្អព្រោះផ្លូវនេះបំរើផលប្រយោជន៍ដល់ការដឹកជញ្ជូនកសិផលផ្សេងៗ៕
