សមាគមសម្ព័ន្ធអ្នកសារព័ត៌មានកម្ពុជា

អតីតអ្នកជំងឺរបេងចែករំលែកបទពិសោធន៍ ខណៈការប្រយុទ្ធប្រឆាំងជំងឺនេះឲ្យចប់នៅតែបន្ត

បុគ្គលិកអង្គការធ្វើផ្នែកសុខាភិបាលជួបប្រជុំនៅវត្តជាមួយអ្នកជំងឺរបេង អតីតអ្នកជំងឺ និងអ្នករងផលប៉ះពាល់ដោយសារជំងឺរបេង ដើម្បីចងក្រងបង្កើតអ្នកជំងឺរបេងសហគមន៍។រូបភាពថតថ្ងៃទី ១៤ ខែកញ្ញា ឆ្នាំ២០២១។ ផ្តល់ឲ្យ
បុគ្គលិកអង្គការធ្វើផ្នែកសុខាភិបាលជួបប្រជុំនៅវត្តជាមួយអ្នកជំងឺរបេង អតីតអ្នកជំងឺ និងអ្នករងផលប៉ះពាល់ដោយសារជំងឺរបេង ដើម្បីចងក្រងបង្កើតអ្នកជំងឺរបេងសហគមន៍។រូបភាពថតថ្ងៃទី ១៤ ខែកញ្ញា ឆ្នាំ២០២១។ ផ្តល់ឲ្យ

លីដា បានធ្លាក់ខ្លួនឈឺមុនពេលធ្វើតេស្តរកឃើញថាខ្លួនមានជំងឺរបេង។

​គិត​មក​ដល់​ពេល​នេះ លីដា មាន​វ័យ​ ៣៤ឆ្នាំ​ ជា​អ្នក​រស់​នៅ​ស្រុក​ស្អាង​ ខេត្ត​កណ្ដាល។ អ្នក​ស្រី​លើក​ឡើ​ង​ថា ខ្លួន​បាន​ក្អក​អស់​រយៈពេល​ប្រហែល​ពីរ​សប្ដាហ៍ អស់កម្លាំង​ខ្លាំង ពិបាក​ដក​ដង្ហើម និង​ស្រក​ទម្ងន់​ទៀត​ផង​។ អ្នកស្រី​ លីដា បាន​កើត​ជំងឺរបេង​កាលពី​ជាង​ពីរ​ឆ្នាំ​កន្លង​ទៅ ហើយ​ពេល​នេះ​អ្នកស្រី​បាន​ជាសះ​ស្បើយ​ទាំង​ស្រុង​ហើយ​ដែរ។ យ៉ាងណា អ្នកស្រី នៅ​តែចងចាំ​ពីភាព​លំបាក​ក្នុង​ការ​តស៊ូ​ប្រឆាំង​នឹង​ជំងឺ​របេង​។​​

អ្នក​ស្រី​ឲ្យ​ដឹង​ថា៖ «អ្នក​ភូមិ ក៏​ដូច​ជា​អ្នក​ជិត​ខាង​រើស​អើង​គ្រួសារ​ខ្ញុំ ពីព្រោះពួកគេ​ខ្លាច​ឆ្លង​ជំងឺ​របេង​ពីខ្ញុំ»។

អ្នក​ស្រី​បន្ត​ថា​ ខណៈ​កំពុង​ព្យាបាល​ជំងឺ​របេង អ្នកស្រី​តែងតែ​ប្រើ​ចាន ស្លាបព្រា ឆ្នាំង និង​គេង​នៅ​ដាច់​ពី​អ្នក​ផ្សេង ដើម្បី​ការពារ​ការ​ចម្លង​ជំងឺ​ទៅ​សមាជិក​គ្រួសារ​។​

អ្នក​ស្រី​ឲ្យ​ដឹង​ទៀត​ថា៖ «​មុន​ដំបូង​ពេល​ខ្ញុំ​ប្រើ​ថ្នាំ​ព្យាបាល​ជំងឺ​របេង វា​ធ្វើ​ទុក្ខ​ខ្ញុំ​យ៉ាងខ្លាំង ហើយ​ខ្ញុំ​បាន​ទៅ​ជួប​ពេទ្យ និង​បាន​សួរ​ពេទ្យ​ពី​មូល​ហេតុ​ដែល​មាន​ផល​រំខាន​នេះ។ គ្រូពេទ្យ​ប្រាប់ថា​ វា​ជា​រឿង​ធម្មតា និង​បាន​ប្ដូរ​ថ្នាំ​ឲ្យ​ខ្ញុំ និង​បាន​ឲ្យ​ថ្នាំ​ជំនួយ​កម្លាំង​ដល់​ខ្ញុំ​បន្ថែម»។​

ទោះ​បី​ជា​ការ​ព្យាបាល​មិន​មែន​ជា​រឿង​ងាយ​ស្រួល តែ​អ្នក​ស្រី លីដា អាច​ជាសះស្បើយ​ដោយ​ជោគជ័យ។ អ្នកស្រី បាន​ជាសះស្បើយ​ពី​ជំងឺ​របេង​​បន្ទាប់​ពី​បាន​ព្យាបាល​អស់ពេល​ប្រាំ​មួយ​​ខែ។​​

រឿង​របស់​អ្នក​ស្រី​ លីដា មិន​មែន​ជា​រឿង​ចម្លែង​អ្វី​ទេ​សម្រាប់​កម្ពុជា ក៏​ដូច​ជា​ប្រទេស​ផ្សេង​ទៀត​នៅ​លើ​ពិភព​លោក​។​

ករណី​ឆ្លង​ជំងឺ​របេង​​ត្រូវ​គេ​រាយ​ការណ៍​ថា​បាន​ធ្លាក់​ចុះ​កាលពី​ឆ្នាំ​កន្លង​ទៅ និង​បាន​ធ្វើ​ឲ្យ​ប្រទេស​កម្ពុជា​បាន​ឆ្លង​ផុត​ពី​ប្រទេស​៣០ ដែល​មាន​​ឆ្លង​ជំងឺ​របេង​ខ្លាំង​ជាង​គេ ប៉ុន្តែ​ជំងឺ​នេះ​នៅ​តែបន្ត​មាន​នៅ​ក្នុង​ប្រទេស​មួយ​នេះ។​

​​អត្រា​ឆ្លង​ជំងឺ​របេងបាន​បន្ត​ធ្លាក់​ចុះ​ជា​បន្ត​បន្ទាប់ ប៉ុន្តែជំងឺ​នេះ​​ត្រូវ​​បាន​អង្គការ​ USAID ​ប៉ាន់​ប្រមាណ​ថា​បាន​សម្លាប់​មនុស្ស​ប្រហែល​ ១៣ ០០០នាក់​​ជា​រៀង​រាល់​ឆ្នាំ​។ ខណៈ​ដែល​វីរុស​កូវីដ-១៩ បំប្លែង​ថ្មី​ប្រភេទ អូមីក្រុង បានបង្ហាញ​ខ្លួន អ្នក​ជំនាញ​មួយ​ចំនួន​លើក​ឡើងថា​កិច្ច​ខិត​ខំ​ប្រឹង​ប្រែង​ប្រឆាំង​នឹង​ជំងឺ​របេង​អាច​នឹង​ធ្លាក់​ចុះ​ដោយសារ​បញ្ហា​នេះ។​

លោក ជួប សុខចំរើន នាយកប្រតិបត្តិអង្គការខាណា (KHANA) មានប្រសាសន៍​ថា៖ «វិបត្តិ​កូវីដ-១៩ បាន​បង្អាក់​ដំណើរ​ការ​ផ្ដល់​សេវា​ចាំបាច់​សម្រាប់​ជំងឺ​របេង និង​កាត់​បន្ថយបន្ទុក​​នៃ​ជំងឺ​របេង» ដោយលោកបន្តថា៖ «គោល​ដៅជំងឺ​របេង​សកល​នៅ​ប្រទេស​ភាគ​ច្រើន​បាន​អាក់ខាន ទោះ​បីជា​មាន​ប្រទេស ឬ​តំបន់​មួយ​ចំនួន​នៅ​បន្ត​ធ្វើ»។​​

មុនមាន​វិបត្តិ​កូវីដ-១៩ ជំងឺ​របេង​ជា​ជំងឺ​ផ្លូវ​ដង្ហើម​ចម្បង​មួយ​សម្រាប់​អាទិភាព​ក្នុង​បញ្ជី​សុខភាព​សាធារណៈ។ ​ទោះ​បី​ជា​ជំងឺ​របេង​ គឺជា​ជំងឺ​ផ្លូវ​ដង្ហើម​ដែល​អាច​ធ្វើ​ឲ្យ​​សួត​ខូច​ បើ​មិន​បាន​ព្យាបាល​ត្រឹម​ត្រូវ តែជំងឺនេះ​បង្ក​ឡើង​ដោយ​បាក់តេរី មិន​មែន​វីរុស​នោះទេ។​ មជ្ឈមណ្ឌល​គ្រប់គ្រង​ជំងឺឆ្លង​ ហៅ​កាត់​ថា​ (CDC) បាន​ឲ្យ​ដឹង​ថា​ជំងឺ​របេង​ជា​ជំងឺ​ឆ្លង​ដែល​សម្លាប់​មនុស្សច្រើន​ជាង​គេ​នៅ​លើ​ពិភព​លោក និង​មាន​ការ​ប៉ាន់​ប្រមាណ​ថា ​ក្នុង​ឆ្នាំ​២០១៨ មនុស្ស​ឆ្លង​ជំងឺ​របេង​មាន​ប្រហែល​ ១,៧​​ពាន់​លាន​នាក់​​។​

បើ​តាម ​CDC មនុស្សប្រហែល​ ១,៥លាន​នាក់​ស្លាប់​រាល់​ឆ្នាំដោយសារជំងឺ​របេង​​​នៅ​ទូ​ទាំង​ពិភព​លោក​។​​​

អ្នកលក់អីវ៉ាន់បណ្តើរកង់កាត់ពីមុខ មជ្ឈមណ្ឌលជាតិកំចាត់រោគរបេង និងហង់សិន ក្នុងទីក្រុងភ្នំពេញ កាលពីថ្ងៃទី១១ ខែវិច្ឆិកា ឆ្នាំ២០២១។ ខេមបូចា/ ព្រីង សំរាំង

សម្រាប់​ប្រទេស​កម្ពុជា ប្រភព​ដែល​ផ្ដល់​តួលេខ​ទាក់ទង​នឹង​ជំងឺ​របេង​គឺ​កម្មវិធី​ជាតិកម្ចាត់​រោគ​របេង ដែល​ជា​ការិយាល័យ​មួយ​របស់ មជ្ឈមណ្ឌល​ជាតិកម្ចាត់​រោគ​​របេង និង​ហង់សិន​។​​ កម្មវិធី​នេះ បាន​ប៉ាន់​ប្រមាណ​ថា​អត្រា​ឆ្លង​ជំងឺ​របេង​នៅ​កម្ពុជា​មាន​ ២៧៤​ករណី ចំណោម​មនុស្ស​ ១០០ ០០០​នាក់ មាន​ន័យ​ថា​មនុស្ស​ប្រហែល​ ៤៦ ០០០​នាក់ ឆ្លង​ជំងឺ​របេង​ក្នុង​មួយ​ឆ្នាំៗ​។​

យ៉ាងណា លោក សុខ ចំរើន មាន​ប្រ​សាសន៍​ថា ​កម្ពុ​ជា​បាន​រក​ឃើញ​អ្នក​មាន​ជំងឺ​របេង និង​ទទួល​ការព្យាបាល​តែ​ ៣០ ០០០​នាក់ មាន​ន័យ​ថា​មនុស្ស​ប្រហែល​ជា​ ១៦ ០០០​នាក់​ផ្សេង​ទៀត​មិន​ដឹង​ថា ខ្លួន​មានជំងឺ​របេង និង​មិន​បាន​ទទួល​ការព្យាបាល​នៅ​ក្នុង​សហគមន៍​របស់​ ខ្លួន។​

លោកបន្ថែម​ថា៖ «​បើ​សិន​ជា​ពួកគាត់​មិន​ស្វែង​រក​សេវា​ព្យាបាល ពួកគាត់​ប្រឈម​នឹង​ការ​ស្លាប់​នៅពេល​ខាង​មុខ»។​

លោក ពន្យល់​ថា ជំងឺ​របេង​មិន​មែន​ជា​ជំងឺ​តពូជ​នោះទេ ជំងឺ​នេះ​អាច​ព្យាបាល​ដោយ​ប្រើ​ថ្នាំ​បាន​​ជាសះស្បើយ​។

រោគ​សញ្ញា​ចម្បង​ដំបូង​គេ​របស់​អ្នក​ឆ្លង​ជំងឺ​របេង​សកម្ម​គឺក្អក​ពី​បី​សប្ដាហ៍ ឬលើសពី​នេះ ក្អក​មាន​ឈាម ឬ ស្លេស្ម ឈឺទ្រូងពេល​ដក​ដង្ហើម ស្រក​ទម្ងន់ បែក​ញើស​ពេល​យប់ ក្ដៅ​ខ្លួន អស់​កម្លាំង មិន​ឃ្លាន​អាហារ និង​ហើម​កូន​កណ្ដុល​។​ អ្នក​ខ្លះ​ក៏​អាច​ឆ្លង​ជំងឺ​របេង​សម្ងំ​ផង​ដែរ ត្បិត​មិន​សូវគ្រោះ​ថ្នាក់ តែ​ក៏​នៅ​តែ​ត្រូវ​ការការ​ព្យាបាល​។​

បើ​តាម​លោក សុខ​ ចំរើន អត្រា​ឆ្លង​ជំងឺ​របេងនៅ​កម្ពុជា​​បាន​ធ្លាក់​ចុះ​ ២០ភាគ​រយ​តាំង​ពី​ឆ្នាំ​២០១៥ ដែល​ជា​ហេតុ​នាំឲ្យ​នៅ​ឆ្នាំ​២០២០ កម្ពុជា​បាន​ចាក​ចេញពី​ប្រទេស​ចំនួន​៣០ ដែល​មាន​អ្នក​ឆ្លង​ជំងឺ​ផ្លូវ​ដង្ហើម​មួយ​នេះ​ច្រើន​ជាង​គេ​។​​

លោក សុខ​ ចំរើន បន្ថែម​ថា៖ «ដើម្បី​បញ្ចប់ជំងឺ​របេង​នៅ​កម្ពុជា​ទាម​ទារ​ឲ្យ​មាន​ការ​ចូល​រួម​ពីគ្រប់​ភាគី រួម​ទាំង​អ្នកជំងឺ អាជ្ញាធរ ក៏​ដូចជាភាគីពាក់ព័ន្ធ យក​ចិត្ត​ទុក​ដាក់​ការពារ និង​ព្យាបាល​ទាំង​អស់​គ្នា»។​

ទោះបី​ជា​វិបត្តិ​កូវីដ-១៩ បានរំខាន​ដល់​ការ​រៀបចំវគ្គបណ្ដុះ​បណ្ដាល និង​សិក្ខាសាលា​ពីជំងឺ​របេង ប្រធាន​មជ្ឈមណ្ឌល​ជាតិ​កម្ចាត់​រោគ​របេង និងហង់សិន លោក ហួត ចាន់យុដា មាន​ប្រសាសន៍​ថា សេវាព្យាបាល និង​ការ​ស្រាវ​ជ្រាវ​នៅ​តែ​បន្ត​មាន​។ បើ​តាម​លោក ចាន់​យុដា កម្ពុជា​​សង្ឃឹមថា ​អាច​បញ្ចប់​ការ​ឆ្លង​រាល​ដាល​ជំងឺ​របេង​នៅ​ត្រឹម​ឆ្នាំ​២០៣០ តាម​គោលការ​សុខ​ភាព​សកល​។​

លោកបាន​ដក​ស្រង់​ទិន្ន័យ​ពី​អង្គការ​សុខ​​ភាព​ពិភពលោក ដោយ​ថា​ចំនួន​អ្នក​ស្លាប់​ដោយសារ​ជំងឺ​របេង​នៅ​កម្ពុជា​មាន​តិចជាង​តួលេខ​របស់​អង្គការ​ USAID។ លោកថា ចំនួន​អ្នក​ស្លាប់​មាន​ប្រហែល​ ២៩០០​នាក់​ស្លាប់​ទាក់ទង​នឹង​ជំងឺ​របេង​នៅ​ឆ្នាំ​២០១៨ និង​មាន​ចំនួន​ ២៧០០​នាក់​នៅ​ឆ្នាំ​២០១៩ និង​មាន​ចំនួន​ ៣ ៣០០​នាក់​កាលពី​ឆ្នាំ​កន្លង​ទៅ​។​

ទោះបីជា​តួលេខ​ឆ្នាំ​នេះ​កំពុង​តែ​ប្រមូល​ក្ដី លោក ចាន់យុដា មាន​ប្រសាសន៍​ថា កម្ពុជា​មើល​ឃើញ​ពី​ការ​ធ្លាក់​ចុះ​នៃ​ករណី​ឆ្លង​ថ្មី​។​

នៅ​ត្រីមាសទី​១ ឆ្នាំ​២០២១ លោកថា កម្ពុជា​រក​ឃើញ​អ្នក​ឆ្លង​ចំនួន​ ៦១៣៨ករណី បើធៀប​ទៅ​នឹង​រយៈ​ពេល​ដូច​គ្នា​កាលពី​ឆ្នាំ​២០២០ ថយ​ចុះ​២០​ភាគរយ​។ ចំណែក​នៅ​ត្រី​មាសទីពីរ​​វិញ​ លោក​ថា ​ចំនួន​បាន​ថយចុះ៣៣​ភាគ​រយ បើ​ធៀប​ទៅ​នឹង​រយៈពេល​ដូច​គ្នា​កាលពី​ឆ្នាំ​មុន និង​នៅ​ត្រី​មាសទី​បី​នេះ​វិញ ករណី​ឆ្លង​បាន​ថយ​ចុះ​៤៨​ភាគ​រយ​។​

ទោះ​យ៉ាងណា លោក ចាន់យុដាមានប្រសាសន៍ថា ការ​ធ្លាក់​ចុះ​នេះ​អាច​មក​ពី​កាលៈទេសៈ​ជាងកត្តា​ផ្សេង​ទៀត​។​

លោក​បន្ថែមថា៖ «ហេតុ​ផល​ដែល​ចំនួន​អ្នក​ឆ្លង​ជំងឺ​របេង​ថយ​ចុះ​ គឺព្រោះ​តែ​វិបត្តិ​កូវីដ-១៩»។​

ទោះបី​ជា​កំពុង​ប្រឈម​នឹង​វិបត្តិ​កូវីដ-១៩ អ្នក​ធ្វើ​ការ​តស៊ូមតិ​ផ្នែក​សុខភាព ជំរុញ​ឲ្យ​ដៃ​គូ​របស់​ខ្លួន​ត្រូវ​បន្ត​យក​ចិត្ត​ទុក​ដាក់​ខ្ពស់​លើ​ជំងឺ​របេង។​

បុគ្គលិកអង្គការធ្វើផ្នែកសុខាភិបាលជួបប្រជុំនៅស្រុកលើកដែក ខេត្តកណ្តាល ជាមួយអ្នកជំងឺរបេង អតីតអ្នកជំងឺ និងអ្នករងផលប៉ះពាល់ដោយសារជំងឺរបេង ដើម្បីចងក្រងបង្កើតអ្នកជំងឺរបេងសហគមន៍។រូបភាពថតថ្ងៃទី១ ខែមករា ឆ្នាំ២០២១។ ផ្តល់ឲ្យ

អ្នកស្រី សុខន វ័យ​ ៧៣​ឆ្នាំ ជាអ្នក​ភូមិ​រស់​នៅ​ស្រុក​ស្អាង និង​ជា​បណ្ដាញ​របស់​អង្គការ​ខាណា ប្រចាំ​ឃុំ​ក្រាំងយ៉ូវ ប្រាប់​ខេមបូចាថា ​មនុស្ស​ចំនួន​​ ២១៤​នាក់ ជាគោល​ដៅ​ក្នុង​ការ​ទទួល​ការ​ព្យាបាល ក្នុង​នោះ​មាន​ ៤៤​នាក់​ជា​អ្នក​កើត​ជំងឺ​របេង និង​ ៧៩​នាក់​ផ្សេង​ទៀតជា​អ្នក​ត្រូវ​ប្រើ​ថ្នាំ​ការពារ​ជំងឺ​របេង​។​​

អ្នកស្រី សុខន ក៏​ធ្លាប់​កើត​ជំងឺ​របេង​ដែរ​កាល​ឆ្នាំ​១៩៩៩ និង​បានជាសះស្បើយ​វិញ​ក្រោយ​ទទួល​ការព្យាបាល​ចំនួន​ប្រាំមួយ​ខែ​។

អ្នកស្រី​បន្ត​ថា៖ «​ខ្ញុំ​សូម​អំពាវ​នាវ​ឲ្យ​បង​ប្អូន​ដែល​សង្ស័យថា​ មាន​ឆ្លង​ជំងឺ​របេង​ ស្វែង​រក​ការ​ធ្វើ​តេស្ត​នៅ​មណ្ឌល​សុខភាព និង​ព្យាបាល​ជំងឺ​របេង​ឲ្យ​ទាន់ពេល​វេលា»។​

សម្រាប់​ អ្នកស្រី លីដា ដែលជាអ្នកស្រុក​ស្អាង​ដែរ​នោះ លើក​ឡើង​ដែរថា អ្នក​ស្រី​ចង់​ឲ្យ​មាន​ជំនួយ​បន្ថែម​ទៀត​​ដល់​អ្នក​ជំងឺ​របេង។ អ្នក​ស្រី​ថា ពេល​ដែល​ខ្លួន​កំពុង​ទទួល​ការ​ព្យាបាល​ អ្នកស្រី​ ត្រូវ​គ្រូ​ពេទ្យ​ណែ​នាំ​មិន​ឲ្យ​ធ្វើ​ការ​ធ្ងន់​នោះទេ​។

អ្នកស្រី ឲ្យ​ដឹង​ថា៖ «​ខ្ញុំ​ស្នើ​ដល់​រដ្ឋាភិបាល​ជួយ​ផ្គត់​ផ្គង់​ម្ហូប​អាហារ និង​ថវិកា សម្រាប់​អ្នកជំងឺ​របេង ពេល​ដែល​ពួកគាក់​កំពុង​ទទួលការ​ព្យាបាល ពីព្រោះពួកគាត់​មិន​អាច​ធ្វើ​ការ​អ្វីបានទេ ប៉ុន្តែ​ពួកគេ​ត្រូវ​ការប្រាក់​ដើម្បី​ចំណាយ​ប្រចាំ​ថ្ងៃ»

ប្រែសម្រួលពីអត្ថបទភាសាអង់គ្លេស៖ Former TB patients describe their experiences as fight to end the disease continues

281 views

ព័ត៌មានថ្មីៗ

អត្ថបទពេញនិយម