តួលេខរបស់មជ្ឈមណ្ឌលជាតិកំចាត់រោគរបេង និងហង់សិន បានឲ្យដឹងថា អ្នកទទួលការព្យាបាលជំងឺរបេងក្នុងឆ្នាំ២០២១ បានថយចុះចំនួន ២៦ភាគរយ បើធៀបទៅនឹងឆ្នាំកន្លងទៅ និងថាការថយចុះនេះមកពីបញ្ហាវិបត្តិកូវីដ-១៩។
ប្រធានមជ្ឈមណ្ឌលជាតិកំចាត់រោគរបេង និងហង់សិន លោក ហួត ចាន់យុដា មានប្រសាសន៍ថា កាលពីឆ្នាំ២០២១ ករណីអ្នកឆ្លងជំងឺរបេងមានជំនួន ២១ ៥៦៤ករណី ដែលកាលពីឆ្នាំ២០២០ មានដល់ទៅ ២៩ ០០០ករណី។ យ៉ាងណា លោកថា តួលេខនេះមិនបានបង្ហាញពីចំនួនពិតប្រាកដនៃអ្នកកើតជំងឺរបេងនោះទេ ព្រោះថាអាចមានអ្នកឆ្លងជំងឺរបេងតិចតួចស្វែងរកការព្យាបាលជំងឺនៅមន្ទីរពេទ្យ ដោយសារតែមានការផ្ទុះរាលដាលជំងឺកូវីដ-១៩។
បើតាមកម្មវិធីជាតិកំចាត់រោគរបេងរបស់មជ្ឈមណ្ឌលជាតិកំចាត់រោគរបេង និងហង់សិន ចំនួនអ្នកឆ្លងជំងឺរបេងមានចំនួន ២៧៤នាក់ក្នុងចំណោមមនុស្ស ១០ម៉ឺននាក់។ តួលេខនេះបានឲ្យគេដឹងថានៅមានមនុស្សជាច្រើនទៀតមិនទាន់បានធ្វើរោគវិនិច្ឆ័យរកជំងឺរបេង ក្នុងអំឡុងវិបត្តិកូវីដ-១៩ នេះ។
ប្រធានមន្ទីរសុខាភិបាលខេត្តកណ្ដាល លោក គួយ ប៊ុនធឿន បានគាំទ្រទៅនឹងការលើកឡើងនេះ និងថាកាលពីឆ្នាំកន្លងទៅខេត្តរបស់លោកបានរកឃើញករណីអ្នកមានរោគរបេងប្រហែល ១០០ករណី តិចជាងឆ្នាំមុនៗទៅទៀត។
លោកប្រាប់ខេមបូចាថា៖ «ការថយចុះនៃករណីអ្នកជំងឺរបេងក្នុងឆ្នាំ២០២១ នេះ ដោយសារតែមន្ទីរពេទ្យរដ្ឋជាប់ដៃជាមួយនឹងការព្យាបាលជំងឺកូវីដ–១៩ ហើយអ្នកឆ្លងជំងឺរបេងក៍អាចថាបារម្ភពីការឆ្លងជំងឺកូវីដ–១៩ ដែរ ដូចនេះពួកគាត់មិនហ៊ានទៅមន្ទីរពេទ្យ»។
លោក ស្រី ស៊ីន ប្រធានមន្ទីរសុខាភិបាលខេត្តកំពង់ធំ ក៍បានឲ្យដឹងដែរថា ខេត្តរបស់លោកក៍មានករណីឆ្លងធ្លាក់ចុះដូចគ្នា ដោយលោកគិតថាមកពីមនុស្សជាច្រើនមានការយល់ដឹងវិធីការពារជំងឺនេះ ហើយពួកគេបានពាក់ម៉ាស់ និងរក្សាគម្លាតដើម្បីការពារការឆ្លងជំងឺកូវីដ-១៩។
លោក បន្ថែមថា៖ «ប្រជាពលរដ្ឋបានយល់ដឹងពីវិធានការការពារវា[ជំងឺរបេង] ពីព្រោះវាជាជំងឺឆ្លងតាមខ្យល់ ដូចទៅនឹងជំងឺកូវីដ–១៩ ដែរ»។
លោកឲ្យដឹងទៀតដែរថា ហេតុផលផ្សេងទៀតនោះគឺ អាចមកពីមានមន្ត្រីសុខាភិបាលបានចុះស្វែងរកអ្នកជំងឺរបេងដល់សហគមន៍ និងបានព្យាបាលអ្នកទាំងនោះបានជាសះស្បើយ ដែលអាចការពារមិនឲ្យចម្លងទៅអ្នកផ្សេង។
លោក ជួប សុខចំរើន នាយកប្រតិបត្តិអង្គការខាណា យល់ស្របទៅនឹងការលើកឡើងថាវិបត្តិកូវីដ-១៩ ជាកត្តាធ្វើឲ្យករណីឆ្លងជំងឺរបេងថយចុះ។
លោកបន្ថែមថា៖ «ដោយសារតែវិបត្តិកូវីដ–១៩ អ្នកមានជំងឺមិនទៅពេទ្យ ហើយមន្ត្រីសុខាភិបាលក៍រវល់ព្យាបាលអ្នកជំងឺកូវីដ–១៩ ក្នុងឆ្នាំ២០២១»។ លោក បន្ថែមថា ជំងឺរបេង និងជំងឺកូវីដ-១៩ មានរោគសញ្ញាប្រហាក់ប្រហែលគ្នា ដែលនេះអាចជាហេតុថាអ្នកមានជំងឺរបេងមិនហ៊ានទៅមន្ទីរពេទ្យ ព្រោះខ្លាចត្រូវធ្វើតេស្តរកជំងឺកូវីដ-១៩។
លោកកត់សម្គាល់ដែរថា វិធានការបិទខ្ទប់កន្លងមក ក៍បានធ្វើឲ្យអ្នកមានជំងឺពិបាកក្នុងការទៅរកសេវាព្យាបាលនៅមន្ទីរពេទ្យដែរ។
នៅដើមសប្ដាហ៍នេះ មុនទិវាជំងឺរបេងពិភពលោក ថ្ងៃទី២៤ ខែមីនា អង្គការសុខភាពពិភពលោកបានលើកឡើងថា វិបត្តិកូវីដ-១៩ បានធ្វើឲ្យកិច្ចខិតខំប្រឆាំងនឹងជំងឺរបេងបានថយក្រោយ ព្រោះវិបត្តិនេះបានរំខានដល់ការទទួលបានសេវាព្យាបាលជំងឺរបេង៕
ប្រែសម្រួលពីអត្ថបទភាសាអង់គ្លេស៖ Experts put drop in recorded TB cases down to pandemic
