សមាគមសម្ព័ន្ធអ្នកសារព័ត៌មានកម្ពុជា

សមាគម និងអ្នកជំនាញធ្វើយុទ្ធនាការស្នើឱ្យរដ្ឋាភិបាលពន្លឿនដោះស្រាយបញ្ហាតម្លៃកសិផល

ស្ត្រីអ្នកលក់សាច់មាន់ និងសាច់ជ្រូកម្នាក់ អង្គុយរង់ចាំអតិថិជននៅក្នុងផ្សារមួយ ក្នុងរាជធានីភ្នំពេញ។ រូបថតថ្ងៃទី២៧ ខែធ្នូ ឆ្នាំ២០២៣។ (ខេមបូចា/ ព្រីង សំរាំង)
ស្ត្រីអ្នកលក់សាច់មាន់ និងសាច់ជ្រូកម្នាក់ អង្គុយរង់ចាំអតិថិជននៅក្នុងផ្សារមួយ ក្នុងរាជធានីភ្នំពេញ។ រូបថតថ្ងៃទី២៧ ខែធ្នូ ឆ្នាំ២០២៣។ (ខេមបូចា/ ព្រីង សំរាំង)

សមាគម និងអ្នកជំនាញធ្វើការជាមួយកសិករ និងកសិដ្ឋានរាប់ម៉ឺន កំពុងធ្វើយុទ្ធនាការ​ក្នុងទម្រង់​ផ្សេងៗគ្នាដើម្បីស្នើឱ្យស្ថាប័នជំនាញរបស់រដ្ឋាភិបាលពន្លឿនដោះស្រាយបញ្ហាតម្លៃដំណាំ និងសត្វ​ចិញ្ចឹម​ដែលកំពុងជួបការលំបាក។

ប្រធានសមាគមអ្នកចិញ្ចឹមសត្វកម្ពុជា លោក ស្រ៊ុន ពៅ ឱ្យដឹងថា សមាគមរបស់លោកបាន​ដាក់​លិខិត ស្នើសុំជួបស្ថាប័នចំនួន៥រួមមាន ក្រសួងកសិកម្ម ស្ថាប័នគយ ក្រសួងពាណិជ្ជកម្ម សភាពពាណិជ្ជកម្ម និងក្រសួងសេដ្ឋកិច្ច។ លោកស្រ៊ុន ពៅ ឱ្យដឹងថា គោលបំណងរបស់សមាគម ស្នើឱ្យមាន ដំណោះស្រាយបន្ទាន់នោះគឺទប់ស្កាត់សាច់បង្ក និងការអន្តរាគមជួយផ្តល់ហិរញ្ញវត្ថុ ដល់វិស័យកសិកម្មដែលកំពុងជួបការលំបាកខ្លាំង។

លោក ស្រ៊ុន ពៅ ឱ្យដឹងទៀតថា ក្នុងចំណោមស្ថាប័ន​​​ទាំង៥នេះគឺក្រសួងកសិកម្មជាស្ថាប័នគោល ដែលអាចជួយដោះស្រាយបញ្ហាកំពុងប្រឈមមុខនេះ។

លោក ស្រ៊ុន ពៅ បញ្ជា្កក់ថា៖«គាត់ជាឪពុកម្តាយកសិករ។ បាទ! ក្នុងន័យឱ្យគាត់ដោះស្រាយចេញ​មក​ដោះស្រាយជាមួយបញ្ហាប្រឈមសព្វថ្ងៃទីផ្សារនេះ កសិករយើងចិញ្ចឹមបានហើយងាប់​គ្រប់គ្នា​នេះ។ ឱ្យគាត់ចេញមកដោះស្រាយ ចាំមើលគាត់ថាម៉េច?»

ប្រធានសមាគមអ្នកចិញ្ចឹមសត្វកម្ពុជារូបនេះឱ្យដឹងថា ក្នុងរយៈ១សប្តាហ៍ទៀត បើស្ថាប័នទាំង៥ មិនអាចជួយរកដំណោះស្រាយបានទេ សមាគមនឹងដាក់សំណើ សុំជួបលោកនាយករដ្ឋមន្ត្រី ហ៊ុន ម៉ាណែត ដើម្បីរកដំណោះស្រាយបន្ត។

បើតាមលោក ស្រ៊ុន ពៅ សមាគមរបស់លោក មានសមាជិកជាកសិដ្ឋាន  និងក្រុមហ៊ុន ធំប្រមាណ​៥​ពាន់ ក្នុងនោះមានទាំងក្រុមស៊ីភី​(CP) និងក្រុមហ៊ុនរបស់លោកឧកញ៉ា ម៉ុង ឫទ្ធី ជាសមាជិកផង​ដែរ​។

អ្នកឯកទេសចិញ្ចឹមសត្វកម្ពុជា លោក រស់ ឆាំងគី បានបង្កើតជាក្រុមតេឡេក្រាម ដោយអំពាវនាវឱ្យកសិករលើកយកបញ្ហា និងសំណូម​ពររបស់ពួកគេឡើង ដើម្បីឈានដល់ការដាក់សំណើមួយរួមគ្នាទៅរដ្ឋាភិបាល។

លោក រស់ ឆាំងគី ថ្លែងថា៖«យើងចង់ឱ្យបង្កើតជាក្រុមមួយ ដើម្បីយើងយកសំឡេងរួមមួយ​ដើម្បី​ស្នើ​សុំ​ទៅក្រសួងកសិកម្ម ដើម្បីគាត់ពិនិត្យបន្ថែមពីទុក្ខកង្វល់របស់យើង។ យើងពិតជាកំពុងតែ​រងគ្រោះ​ខ្លាំង​ទៅលើអាបញ្ហាតម្លៃសត្វវាធ្លាក់ថ្លៃខ្លាំងអ៊ីចឹងហា៎»

ទោះយ៉ាងណា លោក រស់ ឆាំងគី ជាអ្នកធ្វើការងារជាមួយកសិករប្រមាណ៥ពាន់នាក់ឱ្យដឹងថា សំណើត្រូវធ្វើរបៀបណានោះមិនទាន់ដឹងទេ គឺរង់ចាំមើលលទ្ធផលរបស់សមាគមអ្នកចិញ្ចឹមសត្វ​កម្ពុជាជួបជាមួយស្ថាប័នទាំង៥សិន។

គ្រូបង្រៀនកសិកម្ម និងជាម្ចាស់កសិដ្ឋាន លោក នី ណាក់ ឱ្យដឹងថា បច្ចុប្បន្ន លោកមានដៃគូ​សហការ​លើការដាំដុះ និងចិញ្ចឹមសត្វប្រមាណ៥០នាក់ និងបានបង្រៀនដល់កសិកររាប់ពាន់នាក់​ក្នុង១ឆ្នាំៗ។ លោកបន្តថា បញ្ហាចំណាយច្រើន ក្នុងការធ្វើកសិកម្ម និងបាន​ផលមកវិញលក់បាន​តម្លៃទាប​កំពុងក្លាយជាបញ្ហាធំក្នុងវិស័យកសិកម្ម។

លោក នី ណាក់ ឱ្យដឹងថា​ ចំពោះការទាមទារឱ្យរដ្ឋាភិបាលជួយដល់តម្លៃកសិផលនោះគឺ លោក បានធ្វើតាមបណ្តាញទំនាក់ទំនងសង្គមហ្វេសប៊ុក។

លោក នី ណាក់ បន្តថា៖«ការតស៊ូមតិរបស់ខ្ញុំគឺធ្វើឡើងតែរយៈសំណើឬក៏ការរិះគន់តែនៅលើ​បណ្តាញ​សង្គមពាក់ព័ន្ធនឹងការធ្វើការរបស់មន្ត្រីពាក់ព័ន្ធទៅនឹងដំណោះស្រាយ ពាក់ព័ន្ធទៅនឹង​ស្ថានភាពមុខរបររបស់ប្រជាពលរដ្ឋ។ អ៊ីចឹង! ខ្ញុំមិនបានធ្វើអីផ្ទាល់ជាមួយនឹង​សាមីក្រសួងនៅ​ឡើយ​ទេ»

ប្រធានសមាគមសម្ព័ន្ធសហគមន៍កសិករកម្ពុជា(CCFC) លោក ថេង សាវឿន លើកឡើងថា បច្ចុប្បន្ន​កសិផលធ្លាក់ថ្លៃទាំងបន្លែត្រីសាច់ ដោយសារតែបញ្ហានាំចូល។ ប៉ុន្តែលោកថា ដើម្បី​បន្ថយ​ការនាំចូលរដ្ឋាភិបាលត្រូវមានផែនការផលិតឱ្យបានច្បាស់លាស់ដើម្បីអាចផ្គត់ផ្គង់តម្រូវការនៅក្នុងស្រុក។

លោក ថេង សាវឿន ឱ្យដឹងថា​ កសិករជាសមាជិកសមាគមរបស់ លោកមានប្រមាណ២ម៉ឺនគ្រួសារ​ស្ថិតនៅក្នុងខេត្តចំនួន១៦។ ចំពោះការដោះស្រាយបញ្ហាកសិផលលោក ថេង សាវឿន ឱ្យដឹងថា សមាគមរបស់លោកបន្តសកម្មភាពដូចអ្វីដែលធ្លាប់បានធ្វើ គឺស្រាវជ្រាវ​ចងក្រងជារបាយការណ៍ ហើយដាក់ទៅស្ថាប័នពាក់ព័ន្ធ។

លោក ថេង សាវឿន បន្ថែមថា៖«យើងបានសិក្សាស្រាវជ្រាវក៏ដូចជាលើកបញ្ហានេះដាក់ទៅ​ក្រសួង​ស្ថាប័នពាក់ព័ន្ធតាមរយៈការដាក់ញត្តិរួមជាមួយនឹងការធ្វើវេទិការផ្សេងៗក្នុងការផ្សព្វផ្សាយ និង​កិច្ច​ពិភាក្សា កិច្ចសន្ទនារវាងអាជ្ញាធរ និងភាគីពាក់ព័ន្ធ ហើយន្តការបន្ត គឺយើងនឹងប្រមូលនូវទិន្នន័យ​ក៏​ដូចជាបញ្ហាទាំងអស់ចងក្រងជារបាយការណ៍រួមមួយដែលដាក់ជូនទៅស្ថាប័នពាក់ព័ន្ធ»

របាយការណ៍ក្រសួងកសិកម្ម រុក្ខាប្រមាញ់ និងនេសាទ ឆ្នាំ២០២២ និងលើកទិសដៅឆ្នាំ២០២៣​បាន​ឱ្យ​ដឹងថា រដ្ឋាភិបាលចាត់ទុកវិស័យកសិកម្មជាវិស័យអាទិភាពសំខាន់មួយ​ដែលចូលរួមក្នុង​ការធានា​សន្តិសុខស្បៀង ជំរុញការអភិវឌ្ឍសេដ្ឋកិច្ចជនបទ លើកកម្ពស់កម្រិត ជីវភាពរស់នៅរបស់​ប្រជាពលរដ្ឋ កាត់បន្ថយភាពក្រីក្រ និងទ្រទ្រង់កំណើនសេដ្ឋកិច្ចជាតិ។

របាយការណ៍ដដែលឱ្យដឹងថា ប្រពលរដ្ឋចំនួន៧៦ភាគរយ កំពុងធ្វើកសិកម្មលើផ្ទៃដីប្រមាណជិត ៨លានហិកតា (៧ ៦២០ ២០៨,៤ហិកតា) ដោយបែងចែកប្រភេទដំណាំកសិកម្ម១៣ប្រភេទ ក្នុង​នោះ​ផ្ទៃដីដាំស្រូវសរុបចំនួនជាង៤លានហិកតា(៤ ០៦១ ៨១៤,៦ហិកតា)។

កម្ពុជាជាប្រទេសដែលមានស្ថានភាពភូមិសាស្ត្រប្រហាក់ប្រហែលប្រទេសថៃ និងវៀតណាម គឺដីមានជីជាតិ មានទឹកគ្រប់គ្រាន់ និង​អាកាសធាតុអំណោយផលសម្រាប់ការធ្វើកសិកម្ម។

ក្រសួងសេដ្ឋកិច្ចនៅដើមឆ្នាំ២០២៣បានព្យាករណ៍ដោយកំណត់យកវិស័យសំខាន់ៗចំនួន៣ សម្រាប់​ទ្រទ្រង់ ​សេដ្ឋកិច្ចជាតិ រួមមានវិស័យឧស្សាហកម្ម វិស័យសេវាកម្ម និងវិស័យកសិកម្ម។

បើទោះជាកម្ពុជាបានកំណត់យកវិស័យកសិកម្ម ជាវិស័យសំខាន់មួយក្នុងការទ្រទ្រង់សេដ្ឋកិច្ច ប៉ុន្តែ​ការនាំចូលកសិផលនៅតែមានចំនួនច្រើន។

បន្លែគ្រប់មុខត្រូវបានដាក់លក់នៅផ្សារមួយ ក្នុងរាជធានីភ្នំពេញ។ រូបថតនៅថ្ងៃទី៣ ខែមេសា ឆ្នាំ២០២៣។ (ខេមបូចា/ ព្រីង សំរាំង)

របាយការណ៍ក្រសួងកសិកម្មនៅចុងឆ្នាំ២០២២បង្ហាញថា កម្ពុជានាំចូលបន្លែជាង២ពាន់៥រយតោន​ក្នុងមួយថ្ងៃស្នើនឹងប្រមាណ​១លាន​តោនក្នុងមួយឆ្នាំ ចំណែកសាច់នាំចូលប្រមាណ១ពាន់តោន​ក្នុង​១ថ្ងៃ​ស្មើនឹងជាង៣០ម៉ឺនតោនក្នុង១ឆ្នាំ។ បន្លែត្រីសាច់ទាំងនេះនាំចូលច្រើន​ជាងគេពីប្រទេស​វៀតណាម ថៃ និងប្រទេសចិន។

សមាគមអ្នកចិញ្ចឹមសត្វកម្ពុជាក៏បានលើកឡើងបញ្ហាទីផ្សារដូចកសិករដាំបន្លែដែរគឺកសិករចិញ្ចឹម គោ មាន់ និងទា បោះបង់របរនេះស្ទើរ១០០ភាគរយ។ ចំណែកការចិញ្ចឹមជ្រូក នៅសល់ប្រមាណ ៣០ភាគនៅក្នុងកសិដ្ឋាន និងក្រុមហ៊ុនធំៗ។

កសិករដាំបន្លែសនៅស្រុកស្អាងខេត្តកណ្តាល លោក ងៀប តៃសុង ឱ្យដឹងថា កសិករ នៅតំបន់​លោក​រាប់ពាន់គ្រួសារខាតបង់ កំពុងជួបការលំបាកដោយជំពាក់បំណុល។ លោកថៃសុង មិន​សង្ឃឹម​យុទ្ធនាការរបស់សមាគម និងអ្នកជំនាញនេះ អាចដោះស្រាយបញ្ហាពួកគាត់បានទេ ព្រោះលោក​ធ្លាប់​ឮវិធានការរដ្ឋាភិបាលជាង១០ឆ្នាំមកហើយថា ជួយកសិករ ប៉ុន្តែក្រោយមកមិនបានផលទេ។

លោក តៃសុង ឱ្យដឹងថា កសិករដែលជំពាក់បំណុលធ្ងន់ធ្ងរមួយចំនួនបោះបង់របរកសិកម្ម និងមួយ​ចំនួន​ទៀតបានរត់ចោលស្រុកកំណើតដើម្បីគេចចេញពីម្ចាស់បំណុល។

លោក ងៀប តៃសុង បញ្ជាក់ថា៖«បំណុលពេញភូមិអ្នកខ្លះលក់ដី អ្នកខ្លះអត់មានដីលក់ អ្នកខ្លះ​ភៀស​ខ្លួនខ្លះអីខ្លះ រត់ចោលស្រុកខ្លះ ជំពាក់គេពេក។ ហូ ងាប់ហើយរាល់ថ្ងៃនេះ! ខ្ញុំថាងាប់ៗហើយ។ ពីរឆ្នាំនេះដួលគ្រែងម៉ង មិនខុសពីឧកញ៉ាអីដួលរលំដូចតែគ្នា»

កសិករចិញ្ចឹមជ្រូកនៅស្រុកឈូក ខេត្តកំពត លោក ស៊ុន វ៉ាន់ ឱ្យដឹងថា លោកធ្លាប់ ចិញ្ចឹមជ្រូកពី​២០​ទៅ​៣០ក្បាល តែឥឡូវចិញ្ចឹមតែមេជ្រូក១ក្បាលទុកយកកូនតែប៉ុណ្ណោះ។ លោកបន្តថា បើតម្លៃជ្រូក​នៅបន្តធ្លាក់ចុះដូចបច្ចុប្បន្ន គឺកសិករ និងឈប់ចិញ្ចឹមទាំងអស់គ្នាតែម្តង។​

លោក ស៊ុន វ៉ាន់ លើកឡើងថា៖«ខ្ញុំថាឱ្យរកវិធីសាស្ត្រអីមួយធ្វើអាហ្នឹងឱ្យបាន​[ដោះស្រាយបញ្ហា​តម្លៃ​ជ្រូកឱ្យបាន]បានប្រជាជននៅក្នុងភូមិយើងដូចថាវាមានកម្លាំងតស៊ូទៅមុខទៀត បើដូចរាល់ថ្ងៃ​នេះ​ដាក់ទៅអស់ៗ​គ្រប់គ្នា អត់ជោគជ័យគ្រប់គ្នាយូរៗលែងហ៊ានអស់ហើយ»

បញ្ហាខាតបង់ក្នុងវិស័យកសិកម្មនេះ មិនមែនតែកសិករខ្នាតតូចទេ គឺកម្រិតក្រុមហ៊ុនធំៗ​ក៏លើក​ឡើង​ថា កំពុងតែខាតបង់ធ្ងន់ធ្ងរហើយប្រឈមបិទអាជីវកម្មបន្តបន្ទាប់ដែរ។

សមាជិកព្រឹទ្ធសភា និងជាមហាសេដ្ឋីកសិកម្មលោកឧកញ៉ា ម៉ុង ឫទ្ធី ថ្លែងថា ជ្រូករបស់លោក​ចំណាយអស់ប្រមាណ១ម៉ឺនរៀលដើម្បីចិញ្ចឹមបានសាច់១គីឡូក្រាម ប៉ុន្តែតម្លៃជ្រូករស់បច្ចុប្បន្ន​លក់ចេញ១គីឡូបានតែប្រមាណ៦ពាន់៥រយរៀលទៅ៧ពាន់រៀលតែប៉ុណ្ណោះ។ លោក ម៉ុង ឫទ្ធី បន្តថា បញ្ហាតម្លៃជ្រូកធ្លាក់ចុះខ្លាំងនៅឆ្នាំ២០២៣ គឺដោយសារតែការនាំចូលសាច់បង្កក​ច្រើនលើស​លប់។

លោកឧកញ៉ា ម៉ុង ឫទ្ធី ថ្លែងថា៖«ជាអកុសលវិស័យចិញ្ចឹមសត្វយើងកំពុងជួបវិបត្តិ​ធ្ងន់ធ្ងរនៅក្នុង​ឆ្នាំ២០២៣នេះ កត្តាចម្បងនៃវិបត្តិមិនមែនបណ្តាលមកពីផលប៉ះពាល់ជំងឺកូវីដ១៩ ឬសង្គ្រាមរុស្ស៊ី​អ៊ុយក្រែន សង្គ្រាមប៉ាឡេស្ទីន [និង]អ៊ីស្រាអែលនោះទេ តែបណ្តាលមកពីការនាំចូលសាច់បង្កក​ដែលមានគុណភាពទាបខុសប្រក្រតីជាច្រើនមកលក់នៅលើទីផ្សារតូចធំនៅក្នុងព្រះរាជាណាចក្រ​កម្ពុជាយើង»

លោក ម៉ុង ឫទ្ធី ក៏ធ្លាប់អំពាវនាវតាមវេទិកាសាធារណៈឱ្យកម្លាំងពាក់ព័ន្ធត្រួតពិនិត្យ ការនាំចូលសាច់​បង្កកខុសច្បាប់ដែលនាំឱ្យប៉ះពាល់សុខភាពពលរដ្ឋ និងរបរចិញ្ចឹមសត្វនៅក្នុងប្រទេស។

អ្នកនាំពាក្យក្រសួងកសិកម្ម លោក ឃឹម ហ្វីណង់ មានប្រសាសន៍ថា ក្រសួងមានគោលជំហរច្បាស់​លាស់​ក្នុងការទប់ស្កាត់ការនាំចូលបន្លែត្រីសាច់ខុសច្បាប់។ ប៉ុន្តែលោកថា បើការនាំចូលសមស្រប​ទៅតាមច្បាប់គឺមិនអាចបិទបានទេព្រោះកម្ពុជាអនុវត្តគោលនយោបាយទីផ្សារសេរី។ ​​

ចំពោះ​​​ការ​​ធ្វើយ៉ាងណាឱ្យកសិផលក្នុងប្រទេសមានតម្លៃសមរម្យ លោក ឃឹម ហ្វីណង់ ឱ្យដឹងថា រដ្ឋាភិបាលបានដាក់កញ្ចប់លុយ១០០លានដុល្លារ និងមាននយោបាយមួយចំនួនទៀត។

លោក ឃឹម ហ្វីណង់ បន្ថែមថា៖«គោលនយោបាយហិរញ្ញប្បទានស្ថេរភាពថ្លៃកសិផល​ដែល​រដ្ឋាភិបាល​បានត្រៀមកញ្ចប់ថវិកាចំនួយ១០០លានដុល្លារ ហើយបើចាំបាច់អាចច្រើនជាងនេះ ដើម្បីធ្វើយ៉ាងណាឱ្យថ្លៃកសិផលមានស្ថេរភាពជាងមុនយើងមិនចង់ឱ្យវាធ្លាក់ចុះពេក ដោយសារ​វាប៉ះពាល់ទៅជីវភាពរបស់កសិករ តែយើងក៏មិនចង់ឱ្យវាកើនឡើងខ្ពស់ពេកដែរ ដោយសារ​វាអាច​ប៉ះពាល់ទៅដល់អតិផរណាថ្លៃ ហើយជះឥទ្ធិពលដល់អ្នកប្រើប្រាស់»

ជុំវិញការស្នើឱ្យជួយទ្រទ្រង់ផ្នែកហិរញ្ញវត្ថុបន្ថែមដល់វិស័យកសិកម្ម ដែលកំពុងខាតបង់នោះ អ្នកនាំពាក្យក្រសួងសេដ្ឋកិច្ច និងហិរញ្ញវត្ថុលោក មាស សុខសេនសាន មានប្រសាសន៍ថា អន្តរក្រសួងកំពុងធ្វើការងាររួមគ្នាដោះស្រាយបញ្ហានេះ។

លោក សុខសេនសាន ថ្លែងថា៖«ខាងជំនាញកំពុងធ្វើជាមួយគ្នា​ ដើម្បីប្រសិទ្ធភាពការងារ​ និង​ប្រយោជន៍សាធារណៈ»

នៅក្នុងផែនការយុទ្ធសាស្ត្របញ្ចកោណសម្រាប់រដ្ឋាភិបាលអាណត្តិទី៧មានចំនួន១០០ទំព័រ បាន​សង្ខេប​ជា៦ចំណុចអាទិភាពត្រូវអនុវត្តន៍នៅចាប់ពីឆ្នាំ២០២៣ទៅគឺបានផ្តោតសំខាន់លើវិស័យ​កសិកម្ម ក្នុងនោះមានទាំងការជួយទ្រទ្រង់ផ្នែកហិរញ្ញវត្ថុ និងការដាក់មន្ត្រីកសិកម្ម​នៅតាមឃុំ​សង្កាត់។

ថ្លែងនៅចុងខែវិច្ចិកា ឆ្នាំ២០២៣ លោកនាយករដ្ឋមន្ត្រី ហ៊ុន ម៉ាណែត បង្ហាញការជឿជាក់ថា រដ្ឋាភិបាលលោកនឹងធ្វើឱ្យកសិកម្មរីកចម្រើនសម្រាប់ការប្រកួតប្រជែងលើទីផ្សារអន្តរជាតិ។

លោក ហ៊ុន ម៉ាណែត លើកឡើងថា៖«សហគមន៍កសិកម្មទំនើបមិនមែនបានន័យថា យើងមាន​ត្រឹមតែធនធាន មានតែបច្ចេកវិទ្យាទំនើបទេ ប៉ុន្តែទំនើបទាំងការគិត ទំនើបទាំងរបៀបរបប​ធ្វើការ​សហការ»។លោកបន្តថា៖ «យើងត្រូវវាយតម្លៃខ្លួនយើងថាតើកន្លងទៅ ព្រោះយើងផលិតម្នាក់ៗ​ទៅអត់រួចទេ។ អ៊ីចឹង បានខ្ញុំនិយាយតាំងពីមុនរដ្ឋាភិបាលថ្មីបង្កើត ខ្ញុំថាតាមវេទិការសេដ្ឋកិច្ច សេដ្ឋកិច្ច​មាត្រដ្ឋានត្រូវធ្វើ ព្រោះយើងមិនមែនមាត្រាដ្ឋានមានទំហំទេ យើងផលិតប្រកួតប្រជែង​អ្នកនាំចេញផ្សេងទៀតអត់បាន ព្រោះយើងភាគច្រើនប្រកួតប្រជែងនាំចេញទៅទីផ្សារស្រដៀងគ្នា​ហ្នឹង​ឯង»

ទោះយ៉ាងណាក្រោយការបង្កើតរដ្ឋាភិបាលអាណត្តិទី៧ ជាង៣ខែមកនេះ កសិករ និងក្រុមហ៊ុន​ដែល​ធ្វើការងារផ្នែកកសិកម្មអះអាងថា បញ្ហារបស់ពួកគេនៅមិនទាន់ដោះស្រាយ​នៅឡើយ។

សមាគម និងអ្នកជំនាញកសិកម្មអះអាងថា ការខ្វះសមត្ថភាពផលិតនៅក្នុងស្រុក និងការនាំចូល​ផលិតផលកសិកម្មច្រើនធ្វើឱ្យប៉ះពាល់ដល់សុខភាពសាធារណៈ និងប្រាក់ចំណូលរបស់ពលរដ្ឋ។

របាយការណ៍អង្គការសង់ត្រាល់បង្ហាញថា ពលរដ្ឋខ្មែរកំពុងធ្វើជាពលករចំណាក ស្រុកនៅ​ប្រទេស​ថៃ មានប្រមាណ២លាន២សែននាក់ដែលភាគច្រើនពួកគេមានប្រភពពីកសិករដែល​ខាតបង់ និង​ជាប់បំណុលនៅកម្ពុជា៕

221 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម