អាជ្ញាធរឃុំមានតួនាទីយ៉ាងសំខាន់ក្នុងការជួយអន្តរាគមន៍ទៅដល់ជនរងគ្រោះដោយ អំពើហិង្សាក្នុងគ្រួសារនិងអប់រំផ្លូវច្បាប់ទៅដល់ពលរដ្ឋនៅក្នុងមូលដ្ឋានរបស់ខ្លួន ដោយសារតែស្រី្តជាជនរងគ្រោះភាគច្រើននៅពុំទាន់យល់ដឹងអំពីផ្លូវច្បាប់នៅឡើយ ដែលជាហេតុធ្វើឲ្យជនរងគ្រោះបន្តរួមរស់ជាមួយប្តីក្នុងស្ថានភាពហិង្សា។
ពលរដ្ឋរស់នៅឃុំព្រៃជ្រូក ស្រុកពួក អ្នកស្រី មឿត ចំរើន បានថ្លែងក្នុងកម្មវិធីសន្ទនាមតិរបស់វិទ្យុFMជាតិនគរភ្នំ១០៣MHz ខេត្តសៀមរាប ដោយបាននិយាយថា អាជ្ញាធរមានតួនាទីសំខាន់ក្នុងការជួយដល់ស្ត្រីដែលរងគ្រោះដោយអំពើហិង្សាក្នុងគ្រួសារ។ អ្នកស្រីថា អាជ្ញាធរត្រូវពង្រឹងការអនុវត្តច្បាប់និងតួនាទីរបស់ខ្លួនដើម្បីជួយដល់ស្ត្រីរងគ្រោះដោយអំពើហិង្សាក្នុងគ្រួសារ។
អ្នកស្រីបានថ្លែងថា៖ «ស្ត្រីមួយចំនួនមិនមានការយល់ដឹងពីច្បាប់នៃអំពើហិង្សាទេ ជាហេតុធ្វើឲ្យគាត់គ្មានជម្រើសអ្វីក្រៅតែពីសុខចិត្តរស់នៅជាមួយប្តីក្នុងស្ថានភាពហិង្សា»។
ចំណែកឯ អ្នកស្រី ថន សុណា ជាប្រជាពលរដ្ឋនៅក្នុងភូមិឃុំជាមួយគ្នាបានលើកឡើងដែរថា ប្រជាពលរដ្ឋគួរទទួលបាននូវការអប់រំពីសំណាក់អាជ្ញាធរ។ អ្នកស្រីបានបន្តថា៖ «បើមានអំពើហិង្សាកើតឡើងអាជ្ញាធរ បានចុះទៅអន្តរាគមភ្លាមៗ ដើម្បីជួយជនរងគ្រោះ»។
ប្រធានការិយាល័យការពារផ្លូវច្បាប់នៃមន្ទីរកិច្ចការនារីខេត្ត សៀមរាប លោក នើយ សុនាម បានមានប្រសាសន៍ថា អាជ្ញាធរឃុំពិតជាតួនាទីយ៉ាងសំខាន់ក្នុងការជួយអន្តរាគមន៍ជូនជនរងគ្រោះ ព្រោះពួកគាត់នៅជិតប្រជាពលរដ្ឋ។
លោកបន្តថា៖ «អាជ្ញាធរឃុំបានយកចិត្តទុកដាក់ខ្លាំងលើការជួយដល់ស្ត្រីរងគ្រោះ តែក៏នៅតែសំណូមពរដល់មេឃុំនិងអាជ្ញាធរនៅថ្នាក់ឃុំត្រូវសហការគ្នា ដើម្បីជួយស្ត្រីរងគ្រោះទាន់ពេលវេលានិងមានប្រសិទ្ធិភាព»។
យោងតាមមាត្រា១៣ នៃច្បាប់ទប់ស្កាត់អំពើហិង្សាក្នុងគ្រួសារនិងកិច្ចការពារជនរងគ្រោះឆ្នាំ២០០៥បានចែងថា ឃាត់ទុកវត្ថុជាក់ស្តែងដែលត្រូវបានប្រើប្រាស់ដោយជនមុខសញ្ញា បង្វែរយកចេញជនមុខសញ្ញាពីកន្លែងកើតហេតុ ឬបង្វែរជនរងគ្រោះទៅកន្លែងសុវត្ថិភាពដើម្បីការពារនាង ផ្ដល់ឲ្យជនរងគ្រោះនូវជំនួយសមស្រប ដូចជា ផ្លូវច្បាប់ សុខាភិបាល និងកិច្ចការពារសង្គម និងពន្យល់ពីសិទ្ធិទទួលបានការការពារពី ៕
