មូលនិធិសហប្រជាជាតិសម្រាប់ប្រជាជន (UNFPA) រួមជាមួយអង្គការអន្តរជាតិទេសន្តរប្រវេសន៍ (IOM) និងអង្គការសហប្រជាជាតិដើម្បីសមភាពយេនឌ័រ និងការបង្កើនភាពអង់អាចដល់ស្ត្រី (UNWomen) បានដាក់ចេញជាផ្លូវការនូវគម្រោងជួយទៅដល់ពលករចំណាកស្រុក និងជនភៀសខ្លួនដែលរងផលប៉ះពាល់ដោយសារជម្លោះព្រំដែនកម្ពុជា-ថៃ។ ក្នុងសេចក្តីប្រកាសព័ត៌មានដែលចេញផ្សាយនៅថ្ងៃទី១៧មិថុនា គម្រោងខាងលើនេះជាការគាំទ្ររបស់រដ្ឋាភិបាលជប៉ុន ក្នុងទំហំទឹកប្រាក់ប្រមាណ ១,៣លានដុល្លារអាមេរិក សម្រាប់រយៈពេល ១២ខែ។
ជាគម្រោងដែលបង្កើតឡើងក្រោយទីភ្នាក់ងារអង្គការសហប្រជាជាតិទាំង ៣កត់សម្គាល់ឃើញថា ការផ្លាស់ប្តូរទីលំនៅរបស់ពលរដ្ឋភៀសសឹក បានផ្តល់បន្ទុកយ៉ាងធ្ងន់ធ្ងរដល់សេវាសាធារណៈ រចនាសម្ព័ន្ធសហគមន៍ ការធ្វើពាណិជ្ជកម្មឆ្លងដែន ពិសេសចំណូលសម្រាប់ទ្រទ្រង់ជីវិត។ តាមសេចក្តីប្រកាសព័ត៌មាន គម្រោងនេះត្រូវបានបង្កើតឡើងក្នុងគោលដៅលើកកម្ពស់សិទ្ធិ និងសេចក្តីថ្លៃថ្នូររបស់ពលករចំណាកស្រុកដែលវិលត្រឡប់មកប្រទេសកំណើតវិញ។ គម្រោងនេះទៀតសោត ក៏ផ្តោតពិសេសលើស្រ្តី និងកុមារដែលរងគ្រោះផ្នែកសេដ្ឋកិច្ច-សង្គម កង្វះការការពារ និងការកេញប្រវ័ញ្ចជាដើម។
តាមរយៈគម្រោងខាងលើ អង្គការ UNFPA នឹងផ្តល់ការគាំទ្រសុខភាព និងអនាម័យដល់ស្ត្រី និងក្មេងស្រី ដោយក្នុងនោះ ការផ្តល់សម្ភារៈអនាម័យចំនួន ៥០០០កញ្ចប់ និងបរិក្ខារសម្រាលសម្រាប់ស្ត្រីមានផ្ទៃពោះ តាមខេត្តគោលដៅជាប់ព្រំដែនខ្មែរ-ថៃ។ ចំណែក អង្គការ IOM នឹងផ្តោតលើការជួយទៅដល់ពលករចំណាកស្រុក ពិសេសស្ត្រីដែលវិលមកកម្ពុជាវិញ តាមរយៈការលើកកម្ពស់ការយល់ដឹង ការបណ្តុះបណ្តាលវិជ្ជាជីវៈ ការគាំទ្រសហគ្រាសធុនតូច និងមធ្យម (SME) និងការការពារសិទ្ធិជាមូលដ្ឋានដល់ពលករដែលរងគ្រោះពីការជួញដូរ។ ដោយឡែក អង្គការ UNWomen នឹងដឹកនាំការស្តារឡើងវិញផ្នែកយេនឌ័ររបស់ស្ត្រី និងក្មេងស្រី ទាំងពលករ និងទាំងអ្នកភៀសសឹក។
សូមរំឭកថា ក្នុងជម្លោះតាមព្រំដែនរវាងកម្ពុជានិងថៃ ពលរដ្ឋខ្មែរយ៉ាងតិច ៥០ម៉ឺននាក់បានរត់ភៀសខ្លួនពីលំនៅដ្ឋាន។ ក្នុងបទសម្ភាសផ្តាច់មុខជាមួយ Nikkei Asia កាលពីពេលថ្មីៗ លោក លោក ស៊ុន ចាន់ថុល អនុប្រធានទី១ក្រុមប្រឹក្សាអភិវឌ្ឍន៍កម្ពុជា ពលករខ្មែរប្រមាណ ១លាននាក់ បានត្រឡប់មកកម្ពុជាវិញ ក្នុងនោះប្រហែល ៦៥% មានការងារធ្វើឡើងវិញ ខណៈរដ្ឋាភិបាលកំពុងបន្តស្វែងរកការងារសម្រាប់អ្នកដែលនៅសេសសល់៕
ប្រភព៖ RFI | ដោយ៖ សើ ដាវី
