តាមសេចក្តីប្រកាសរបស់ក្រសួងការបរទេសកម្ពុជា នៅថ្ងៃទី១៨ ខែតុលា ឆ្នាំ២០២៦ ការដែលគណៈកម្មការផ្សះផ្សា ជំរុញឲ្យភាគីកម្ពុជា និងថៃ អនុវត្តឲ្យបានពេញលេញ និងមានប្រសិទ្ធភាព នូវកិច្ចព្រមព្រៀង និងវិធាននានា ដែលមានស្រាប់ ដោយសារតែគណៈកម្មការផ្សះផ្សា បានកត់សំគាល់ថា កិច្ចព្រមព្រៀង និងវិធាននានា ដែលកម្ពុជា និងថៃបានឯកភាពគ្នាពីមុនមក មិនទាន់ត្រូវបានអនុវត្តពេញលេញនៅឡើយ។
ប្រមុខការទូតថៃលោក ស៊ីហាស័ក្ត ភួងកេតកែវ បានអះអាងថា វិធាននានាដែលគណៈកម្មការផ្សះផ្សាបានស្នើឲ្យថៃ និងកម្ពុជាអនុវត្តនោះ រួមមាន ចៀសវាងការចោទប្រកាន់ ឬធ្វើសេចក្តីថ្លែងការណ៍នានានៅក្នុងវេទិកាអន្តរជាតិ ដែលអាចធ្វើឱ្យប៉ះពាល់ដល់ដំណើរការផ្សះផ្សា ព្រមទាំងចៀសវាងសកម្មភាព ដែលអាចបង្កឱ្យមានការប្រឈមមុខដាក់គ្នា រវាងប្រទេសទាំងពីរ។
ភាគីថៃ ក៏បានទទួលស្គាល់ដែរថា ប្រទេសទាំងពីរត្រូវកសាងទំនុកចិត្តគ្នាឡើងវិញទៅតាមអ្វីដែលជាការជំរុញរបស់គណៈកម្មការផ្សះផ្សា។ គណៈកម្មការផ្សះផ្សា ក៏បានស្នើឱ្យភាគីថៃ និងកម្ពុជា បង្ហាញភស្តុតាង និងពន្យល់ពីគោលបំណងរបស់ភាគីទាំងពីរ ដែលអះអាងជុំវិញបញ្ហាតំបន់ខ្ពង់រាបបាតសមុទ្រ និងព្រំប្រទល់សមុទ្រនៃប្រទេសទាំងពីរ។ នេះបើតាមសារព័ត៌មានថៃ Khaosod English។
តាមប្រមុខការទូតថៃរូបនេះ ថៃគោរពសេចក្តីសម្រេចចិត្តរបស់គណៈកម្មការផ្សះផ្សា ក្រោមអនុសញ្ញាUNCLOS និងបញ្ជាក់ថា កិច្ចពិភាក្សានេះ ផ្តោតតែបញ្ហាដែនសមុទ្រប៉ុណ្ណោះ ពោលមិននិយាយដល់ជម្លោះព្រំដែនគោករវាងកម្ពុជា និងថៃទេ។
តែក្នុងកិច្ចប្រជុំទាក់ទងនឹងបញ្ហាដែនសមុទ្រត្រួតស៊ីគ្នារវាងកម្ពុជា និងថៃ កាលពីថ្ងៃទី១៤ ដល់១៨ ខែតុលា ភាគីទាំងពីរក៏បានឯកភាពគ្នាលើវិធានការកសាងទំនុកចិត្ត ដែលមានគោលបំណងជំរុញទំនុកចិត្ត និងភាពជឿជាក់ទៅវិញទៅមក ដើម្បីសម្រួលដល់ការដោះស្រាយ ដោយសមហេតុផល ដោយមិត្តភាព ស្របតាមច្បាប់អន្តរជាតិ។ នេះបើតាមក្រសួងការបរទេសកម្ពុជា៕
ប្រភព៖ RFI | ដោយ៖ អ៊ឹង ប៊ុនថន
