ឡាវ ជាប្រទេសល្បីមួយ ខាងសម្បូរទំនប់វារីអគ្គិសនី ដោយមានទំនប់វារីអគ្គិសនី ចំនួនជាង៩០ ក្នុងផ្ទៃប្រទេស និងជាង១០ទៀតនៅជាប់ប្រទេសជិតខាង។ ក៏ប៉ុន្តែ ការប្រែប្រួលអាកាសធាតុ ជាពិសេស ខ្សត់ទឹកនៅរដូវប្រាំង បានជំរុញឲ្យ រដ្ឋអំណាចក្រុងវៀងចន្ទន៍ រិះរកមធ្យោបាយថ្មី ដើម្បីបង្កើនប្រភពថាមពលអគ្គិសនី។ ការខ្វះខាតអគ្គិសនីក្នុងឆ្នាំ២០២៣ព្រោះតែគ្រោះរាំងស្ងួត បានបង្ហាញពីហានិភ័យជាក់ស្តែង និងពីផលវិបាកនៃការពឹងផ្អែកទាំងស្រុងទៅលើទំនប់វារីអគ្គិសនី។ ម្ល៉ោះហើយ ទើបអាជ្ញាធរឡាវ ប្រឹងធ្វើពិពិធកម្មប្រភពថាមពល។
ក្រោមកិច្ចសហការជាមួយឈ្មួញបរទេស ប្រទេសឡាវបានវិនិយោគទុនច្រើនឡើងៗទៅលើកង្ហារស្រូបខ្យល់ផលិតថាមពលអគ្គិសនី។ នៅខែសីហា ឆ្នាំ២០២៥ ឡាវ បានដាក់ឲ្យដំណើរការគម្រោងថាមពលខ្យល់មូសុង (Monsoon Wind Power) នៅភាគខាងត្បូងប្រទេស ដែលមានកង្ហារវិលផលិតថាមពលអគ្គិសនី ចំនួន ១៣៣ ដើម និងមានសមត្ថភាពផលិតអគ្គិសនី យ៉ាងតិច ៦០០ មេហ្គាវ៉ាត់។
មានទុនវិនិយោគ៧០០លានដុល្លារ គម្រោងថាមពលវាយោនេះសាងសង់ដោយសហគ្រាសរដ្ឋចិន និងគ្រប់គ្រងប្រតិបត្តិការដោយសម្ព័ន្ធក្រុមហ៊ុនថៃ។ តាមការប៉ាន់ប្រមាណ រដ្ឋាភិបាលឡាវអាចទទួលបានចំណូល ១៨០ លានដុល្លារ ក្នុងរយៈពេលកិច្ចសន្យា ២៥ ឆ្នាំ តាមរយៈពន្ធ រួមទាំងមូលនិធិអភិវឌ្ឍមូលដ្ឋាន និងការពារបរិស្ថាន។
នាំផលប្រយោជន៍ដល់សហគមន៍មូលដ្ឋាន ដូចជាផ្លូវថ្មី ប្រព័ន្ធទឹកស្អាត និងសេវាសុខាភិបាល គម្រោងនេះមិនបានផ្គត់ផ្គង់អគ្គិសនីដោយផ្ទាល់ដល់ប្រជាពលរដ្ឋឡាវ ទេ។ ដ្បិតថា អគ្គិសនីដែលផលិតបានត្រូវលក់ទាំងស្រុងទៅឲ្យវៀតណាម។ វៀតណាម ដែលមានឧស្សាហកម្មកំពុងរីកចម្រើនយ៉ាងឆាប់រហ័ស ត្រូវការអគ្គិសនី ក្នុងតម្លៃថោក និងផ្គត់ផ្គង់បានជាប់លាប់។
ការប្រឈមផ្សេងទៀត គឺប៉ះពាល់ដល់លំនៅដ្ឋានរបស់ប្រជាកសិករ និងបំផុសឲ្យមានពាក្យបណ្តឹងប្រមាណ ១ ៦០០ ករណី។ តែអ្នកគ្រប់គ្រងគម្រោងនេះ បានអះអាងថា គ្មានការបង្ខំឲ្យប្រជាពលរដ្ឋផ្លាស់ទីឡើយ ហើយបណ្តឹងភាគច្រើនទាក់ទងនឹងសំណង ដែលគេដោះស្រាយរួចហើយ។
ទោះយ៉ាងជាយ៉ាងណាក្តី គម្រោងថាមពលបៃតងនៅប្រទេសឡាវ១នេះ ជាគំរូជាក់ស្តែង នៃសក្តានុពលវិនិយោគទុនក្នុងវិស័យថាមពលស្អាត ហើយក៏ត្រូវគេចាត់ទុកថា ជាមជ្ឈមណ្ឌលផលិតថាមពលដើរដោយកម្លាំងខ្យល់ ដ៏ធំជាងគេ នៅតំបន់អាស៊ីអាគ្នេយ៍៕
ប្រភព៖ RFI | ដោយ៖ ហេង ឧត្តម
