វរសេនីយ៍ឯក Richa Suksuwanon អ្នកនាំពាក្យរងកងទ័ពថៃ បានថ្លែងនៅថ្ងៃទី៥ ខែតុលាថា ទូកុងតឺន័រទាំងនោះត្រូវបានដាក់តាំងដំបូងជារបាំងការពារបណ្តោះអាសន្ន ដើម្បីរក្សាសន្តិសុខនៅតាមបណ្តោយទីតាំងដែលមានជម្លោះ។ តាមអ្នកនាំពាក្យរងកងទ័ពថៃរូបនេះ ការដែលភាគីថៃដកចេញទូកងតឺន័រពីតំបន់អូរខ្លាំឃ្មុំ គឺជាកែលម្អផ្នែកយុទ្ធសាស្ត្រ ដើម្បីឲ្យស្របទៅនឹងស្ថានភាពភូមិសាស្ត្រ និងបង្កើនប្រសិទ្ធភាពនៃកិច្ចការពារសន្តិសុខ។ ទោះជាយ៉ាងណា មិនទាន់មានប្រតិកម្មណាមួយពីក្រសួងការពារជាតិកម្ពុជានៅឡើយទេ។
សូមបញ្ជាក់ថា ក្នុងលិខិតតវ៉ារបស់ក្រសួងការបរទេសកម្ពុជា កាលពីថ្ងៃទី៨ ខែកុម្ភៈ ឆ្នាំ២០២៦ បានគូសបញ្ជាក់ថា កងកម្លាំងប្រដាប់អាវុធថៃ កាលពីថ្ងៃទី៥ ខែកុម្ភៈ ឆ្នាំ២០២៦ បានដាក់ទូកុងតឺន័របិទផ្លូវ ក្នុងភូមិអូរខ្លាឃ្មុំ និងភូមិរួតចំប៉ី ក្នុងសង្កាត់អូរស្មាច់ ខេត្តឧត្តរមានជ័យ។ ពីរថ្ងៃក្រោយមក ពោលនៅថ្ងៃទី៧ ខែកុម្ភៈ យោធាថៃបានចាប់ផ្តើមសាងសង់ផ្លូវមួយខ្សែ ដោយលាតសន្ធឹងចេញពីកន្លែងដែលថៃបានដាក់ទូកុងតឺន័រ។ កម្ពុជាបានតវ៉ាយ៉ាងដាច់អហង្ការ និងចាត់ទុកសកម្មភាពរបស់ថៃ កាលណោះថា ធ្វើឡើងដើម្បីរារាំងពលរដ្ឋខ្មែរមិនឲ្យវិលទៅផ្ទះសម្បែងរបស់ពួកគេវិញ។
ទោះជាកងទ័ពថៃមិនបាននិយាយត្រង់ៗពីមូលហេតុដែលថៃដកទូកុងតឺន័រទាំងនេះចេញពីអូខ្លាំឃ្មុំក៏ដោយ តែកាសែតក្នុងស្រុករបស់ថៃមួយចំនួនបានរាយការណ៍ថា បន្ទាប់ពីដកទូកុងតឺន័រចេញ យោធាថៃនឹងជីកប្រឡាយនៅទីតាំងនោះទទឹង៣ម៉ែត្រ ដើម្បីប្រឆាំងរថគ្រោះរបស់កម្ពុជា ក្នុងករណីមានការប្រយុទ្ធគ្នាជាថ្មី។ក៏ប៉ុន្តែជាបន្តបន្ទាប់ ក្រសួងការបរទេសកម្ពុជា តែងចេញលិខិតតវ៉ាយ៉ាងដាច់អហង្ការចំពោះសកម្មភាពខុសច្បាប់របស់ភាគីថៃនៅលើទឹកដីកម្ពុជា។ កម្ពុជាតែងបានបញ្ជាក់ថា កម្ពុជាមិនទទួលស្គាល់ជាដាច់ខាតនូវការចូលកាន់កាប់ទឹកដីកម្ពុជាដោយប្រើប្រាស់កម្លាំងយោធា និងការកសាងរបងព្រំដែនថ្មីដែលរំលោភលើសន្ធិសញ្ញាបារាំង-សៀមឆ្នាំ១៩០៤-១៩០៧ ដែលបានកំណត់ខ្សែបន្ទាត់ព្រំដែនអន្តរជាតិរវាងកម្ពុជា-ថៃ៕
ប្រភព៖ RFI | ដោយ៖ អ៊ឹង ប៊ុនថន
