ឈរតម្រង់ជួរនៅតាមដងផ្លូវជាមួយនឹងផ្កាពណ៍សកាន់ក្នុងដៃ ប្រជាជនវៀតណាមរាប់ម៉ឺននាក់បានចូលរួមកាន់ទុក្ខ និងគោរពដល់សពទាហានវៀតណាមចំនួន ៧៣១នាក់ ដែលដង្ហែទៅកាន់ទីបញ្ចុះសពទាហាននៅជាយក្រុងហូជីមិញនាថ្ងៃពុធ ទី ១៤ តុលា។ សពទាហានវៀតណាមទាំងនេះទើបត្រូវបានជីកកកាយចេញពីឧទ្យាន Le Thi Rieng ក្នុងទីក្រុងហូជីមិញ បន្ទាប់ពីបានបាត់ខ្លួនក្នុងសង្គ្រាមអស់ជាច្រើនទសវត្សរ៍។ យុទ្ធនាការជីកកកាយស្វែងរកសាកសពទាហានបាត់ខ្លួនដើម្បីបញ្ជាក់ស្វែងរកអត្តសញ្ញាណនេះបានចាប់ផ្តើមតាំងពីខែមីនា។ ក្រុមអ្នកជំនាញ និងទាហានរាប់រយនាក់បានជីកកកាយដោយប្រើគ្រឿងចក្រ និងម៉ាស៊ីនបូមទឹក ព្រមទាំងចម្រោះភក់ដោយដៃដើម្បីស្វែងរកសំណល់មនុស្សយកមកធ្វើការពិនិត្យ DNA ដើម្បីកំណត់អត្តសញ្ញាណ។
ថ្លែងនៅក្នុងពិធីបញ្ចុះសព អភិបាលក្រុងហូជីមិញ បញ្ជាក់ថា អាជ្ញាធរមិនទាន់អាចកំណត់អត្តសញ្ញាណសពទាហានភាគច្រើនបាននៅឡើយទេ និងថា ក្រុមអាជ្ញាធរនឹងបន្តស្វែងរកគ្រប់មធ្យោបាយ និងមិនបោះបង់ការជីកកកាយរកសាកសពទាហានដែលបាត់ខ្លួនដើម្បីស្វែងរកអត្តសញ្ញាណឡើយ។ សូមជម្រាបជូនថា រដ្ឋាភិបាលវៀតណាមបានកំណត់គោលដៅស្វែងរកសពទាហានបាត់ខ្លួនក្នុងសម័យសង្រ្គាមឲ្យបាន ៧០០០នាក់នៅត្រឹមខែកក្កដា ឆ្នាំ២០២៧។ បច្ចុប្បន្ន មានមនុស្សជាង ១៥០០នាក់កំពុងចូលរួមស្វែងរកនៅតាមសមរភូមិចាស់ៗក្នុងប្រទេសវៀតណាម ឡាវ និងកម្ពុជា។
ចំណែកក្រុមការងារផ្សេងទៀតកំពុងប្រមូល និងវិភាគទិន្នន័យលើកាកសំណល់ដែលប្រមូលបាន។ បើតាមការប៉ាន់ប្រមាណ មានផ្នូរទាហានប្រមាណ ២៣ម៉ឺនផ្នូរដែលនៅមិនទាន់កំណត់អត្តសញ្ញាណបាននៅឡើយ។ ដើម្បីផ្ទៀងផ្ទាត់អត្តសញ្ញាណរបស់សពទាហានដែលបានរកឃើញ អាជ្ញាធរវៀតណាមបានធ្វើការវិភាគ DNA ដែលយកចេញពីសព និងសាច់ញាតិរបស់អ្នកបាត់ខ្លួន។ តែបញ្ហានៅត្រង់ថា ការងារនេះត្រូវប្រើពេលយូរ ពិសេសត្រូវស្វែងរកក្រុមគ្រួសារដែលមានអ្នកបាត់ខ្លួនដើម្បីយក DNA របស់គេទៅផ្ទៀងផ្ទាត់។ ទោះជាយ៉ាងណា ការធ្វើដូចនេះជាក្តីសង្ឃឹមចុងក្រោយសម្រាប់គ្រួសារជាច្រើនដែលមិនមានដំណឹងពីសាច់ញាតិរបស់ខ្លួន។
បើតាមតួលេខរបស់រដ្ឋាភិបាលវៀតណាម មានទាហានវៀតណាមរហូតដល់ទៅ ១,២លាននាក់បានស្លាប់ក្នុងអំឡុងឆ្នាំ១៩៤៥ ដល់១៩៧៥ ដែលវៀតណាមមានសង្រ្គាមជាមួយបារាំង និងបន្ទាប់មកជាមួយសហរដ្ឋអាមេរិក។ ដូច្នេះការស្វែងរកសាកសព និងការកំណត់អត្តសញ្ញាណអ្នកបាត់ខ្លួននៅតែជាការងារសំខាន់មួយរបស់អាជ្ញាធរដើម្បីជាការគោរពដល់ជនដែលបានពលីជីវិតដើម្បីការពារជាតិ មាតុភូមិ៕
ប្រភព៖ RFI | ដោយ៖ ស្អាត សុភ័ណ្ឌ
