ប្រឈមនឹងជំហរមិននឹងន និងមិនច្បាស់លាស់របស់លោក ដូណាល់ ត្រាំ ក្នុងការធានាសន្តិសុខឲ្យសម្ព័ន្ធមិត្ត នៅក្នុងតំបន់អាស៊ីប៉ាស៊ីហ្វិក ជប៉ុនគ្មានជម្រើសអ្វីក្រៅតែពីងាកទៅពង្រឹងសហប្រតិបត្តិការឲ្យកាន់តែស៊ីជម្រៅជាមួយអូស្ត្រាលី។ នៅក្នុងអំឡុងទស្សនកិច្ចទៅកាន់រាជធានី កង់បេរ៉ា នៅថ្ងៃអង្គារទី១៨ ខែសីហា រដ្ឋមន្រ្តីការពារជាតិជប៉ុន លោក Shinjiro Koizumi បានប្រកាសពីការជំរុញសហប្រតិបត្តិការយោធាជាមួយអូស្ត្រាលី ដែលនៅក្នុងនោះអូស្ត្រាលីនឹងអនុញ្ញាតឲ្យជប៉ុនធ្វើតេស្ត បាញ់សាកល្បងគ្រាប់មីស៊ីលអ៊ីពែរសូនិក និងគ្រាប់ផ្សេងៗទៀត នៅទឹកដី អូស្ត្រាលី។
ចំពោះប្រមុខការពារជាតិជប៉ុន ការបាញ់សាកល្បងគ្រាប់មីស៊ីលអ៊ីពែរសូនិករបស់ជប៉ុននៅក្នុងទឹកដីអូស្រ្តាលី ជាវិវត្តន៍មួយជំហានធំក្នុងទំនាក់ទំនងរវាងប្រទេសជប៉ុន និងអូស្ត្រាលី។
ថ្លែងក្នុងសន្និសីទកាសែតជាមួយសមភាគីជប៉ុន រដ្ឋមន្រ្តីការពារជាតិអូស្ត្រាលីលោកRichard Marles បានអះអាងវិញថា ទៅតាមកិច្ចព្រមព្រៀងយោធារវាងប្រទេសទាំងពីរ ជប៉ុនយល់ព្រម ទិញមីស៊ីលរបស់អូស្ត្រាលីសម្រាប់ប្រើជាអាវុធយុទ្ធសាស្រ្តការពារជប៉ុន។
នៅក្នុងក្របខណ្ឌនៃកិច្ចព្រមព្រៀងយោធាដដែល រដ្ឋមន្រ្តីការពារជាតិ អូស្ត្រាលី និងជប៉ុនបានប្រកាសពីគម្រោងចាប់ដៃគ្នា ក្នុងការផលិតប្រព័ន្ធការពារទំនើបថ្មី នោះគឺប្រព័ន្ធ Laserដែលមានឈ្មោះថា BooBook។ Boobook នេះជាឈ្មោះសត្វទីទុយអូស្ត្រាលីដែលមានសមត្ថភាពមើលក្នុងស្បៃរាត្រីងងឹត។ បើតាមរដ្ឋមន្រ្តីការពារជាតិអូស្ត្រាលី ប្រព័ន្ធLaser Boobook ដែលមានសមត្ថភាពចាប់សញ្ញាគំរាមកំហែងដ៏គ្រោះថ្នាក់ នឹងត្រូវបំពាក់នៅទីតាំងការពារជាយុទ្ធសាស្រ្ត មិនថា នៅ តាមឆ្នេរ ឬនៅក្នុងសមរភូមិប្រយុទ្ធ។
អូស្ត្រាលី និងជប៉ុនបានបង្កើនសហប្រតិបត្តិការយោធារវាងគ្នា នៅក្នុងកាលៈទេសៈដែលប្រទេសទាំងពីរសង្កេតឃើញសកម្មភាពពង្រីកដែនយោធា និងចរិតគំរាមកំហែងរបស់ចិន នៅឥណ្ឌូប៉ាស៊ីហ្វិក។ អូស្ត្រាលី និងជប៉ុនសហការរួមគ្នាដើម្បីអភិវឌ្ឍកម្មវិធីយោធា បន្ទាប់ពីអាមេរិករបស់លោកដូណាល់ ត្រាំ ទាមទារឲ្យសម្ព័ន្ធមិត្តក្នុងតំបន់បង្កើនការចំណាយលើសព្វាវុធដើម្បីការពារខ្លួនឯង ដោយមិនត្រូវរង់ចាំតែជំនួយរបស់អាមេរិក។
នៅឆ្នាំមុន អូស្ត្រាលីបានចុះកិច្ចព្រមព្រៀងយោធាដែលអនុញ្ញាតឲ្យអូស្ត្រាលីទិញនាវាចម្បាំងរបស់ជប៉ុនក្នុងតម្លៃ ៦ពាន់លានដុល្លារអាមេរិក។ នេះជាគម្រោងលក់សព្វាវុធដ៏ធំមួយដែលជប៉ុនមិនធ្លាប់មាន គិតចាប់តាំងពីចប់សង្រ្គាមលោកលើកទី២៕
ប្រភព៖ RFI | ដោយ៖ ឈាង បុប្ផា
