អ្នកវិភាគ៖ ទស្សនកិច្ចរបស់លោក មីន អ៊ុងឡាំង នៅកម្ពុជាជាការប្រឹងប្រែងពង្រឹងភាពស្របច្បាប់របស់រដ្ឋាភិបាលក្រុងណៃពិដោ

បន្ទាប់ពីការបំពេញទស្សនកិច្ចជាបន្តបន្ទាប់តាមបណ្តាប្រទេសមួយចំនួន​នៅតំបន់អាស៊ី ប្រធានាធិបតីភូមា លោក មីន អ៊ុងឡាំង នឹងមកបំពេញទស្សនកិច្ចនៅកម្ពុជានាពេលឆាប់ៗខាងមុខនេះ។ នេះបើតាមការឲ្យដឹងពីព្រឹទ្ធសភាកម្ពុជា តែក្រសួងការបរទេសកម្ពុជា មិនទាន់ចេញសេចក្តីប្រកាសព័ត៌មានផ្លូវការណាមួយនៅឡើយ។

ទោះយ៉ាងណា អ្នកជំនាញផ្នែកវិទ្យាសាស្ត្រនយោបាយ លោកបណ្ឌិត គិន ភា យល់ឃើញថា ទស្សនកិច្ចរបស់លោក មីន អ៊ុងឡាំង គឺជាការពង្រីកទំនាក់ទំនងទ្វេភាគីជាមួយកម្ពុជា និងជាផ្នែកមួយនៃការពង្រឹងភាពស្របច្បាប់នៃអំណាចជាប្រធានាធិបតីរបស់លោកនៅភូមា ក្រោយប្រទេសមួយចំនួនមិនទាន់ទទួលស្គាល់លទ្ធផលបោះឆ្នោត។

ដោយឡែក ​អ្នកតាមដានភូមិសាស្ត្រនយោបាយនៅតំបន់អាស៊ីប៉ាស៊ីហ្វិកលោក ​សេង វណ្ណលី មើលឃើញពីហានិភ័យខ្លះៗសម្រាប់កម្ពុជា ពេលទទួលស្វាគមន៍ ​លោក មីន អ៊ុងឡាំង។ តាមលោក សេង វណ្ណលី ប្រសិនបើលោកនាយករដ្ឋមន្ត្រី ហ៊ុន ម៉ាណែត ទទួល​លោក មីន អ៊ុងឡាំង ក្នុងកម្រិតខ្ពស់ដោយមិនភ្ជាប់ជាមួយសារច្បាស់លាស់ ដូចជាការបញ្ឈប់អំពើហិង្សា ការដោះលែងអ្នកទោសនយោបាយ និងការវិលត្រឡប់ទៅរកដំណោះស្រាយនយោបាយ ដែលមានការចូលរួមពីភាគីពាក់ព័ន្ធក្នុងវិបត្តិភូមា នោះកម្ពុជាអាចត្រូវគេមើលឃើញថា កំពុងជួយផ្តល់ភាពស្របច្បាប់ដល់មេដឹកនាំ ដែលបានឡើងកាន់អំណាចពីរដ្ឋប្រហារ។

គួររម្លឹកថា បន្ទាប់ពី​ឈ្នះ​ការបោះឆ្នោត ​ដែល​គ្មា​នគូប្រជែង នៅខែមេសា ឆ្នាំ២០២៦ ​មេដឹកនាំ​របបសឹក លោក មីន អ៊ុងឡាំង បាន​ក្លាយ​ជា​ប្រធានាធិបតី ហើយ​ចាប់ពីពេលនោះមក លោកខំប្រឹង​ធ្វើ​នយោបាយ​ការទូត​នៅបរទេស​ ដើម្បី​ស្វែងរក​ការ​​ទទួល​ស្គាល់ និងគាំទ្រ​ពីអន្តរជាតិ​​។ ជាក់ស្តែង នៅពាក់កណ្តាល​ខែ​មិថុនា លោក មីន អ៊ុងឡាំង បាន​ធ្វើដំណើរទៅ​ជួប​ប្រមុខរដ្ឋ​ចិន លោក ស៊ី ជីនពីង នៅ​រដ្ឋធានី​ប៉េកាំង និង​បន្តទៅជួប​លោក ណារិនដ្រា ម៉ូឌី ​នាយករដ្ឋមន្ត្រីឥណ្ឌា ​នៅរដ្ឋធានី​​ញូវដែលី​​។​

នៅក្នុងខែសីហានេះ លោក មីន​ អ៊ុងឡាំង ក៏បានទៅជួបសន្ទានាការងារដោយផ្ទាល់ជាមួយនាយករដ្ឋមន្ត្រីថៃ លោក អនុធិន ឆានវីរៈគូន ក្នុងទីក្រុងបាងកក។ នាពេលថ្មីៗនេះ ប្រព័ន្ធផ្សព្វផ្សាយរដ្ឋភូមាបានរាយការណ៍ថា  លោក មីន អ៊ុងឡាំង បានចេញដំណើរទៅជួបប្រធានាធិបតីរុស្ស៊ី លោក  វ្ល៉ាឌីមៀរ ពូទីន ផងដែរ។​ ជាដំណើរដែលអ្នកវិភាគមើលឃើញថា ដើម្បីពង្រឹងកិច្ចសហប្រតិបត្តិការជាយុទ្ធសាស្ត្រ និងដើម្បីបានការទទួលស្គាល់ភាពស្របច្បាប់នៃរបបសឹកភូមា៕