លោក ចារ៉េត គូឆនែរ កូនប្រសាលោក ត្រាំ អមដំណើរដោយលោក Nikolai Mladenov អ្នក ទទួលបន្ទុកកិច្ចការហ្គាហ្សានៃ «ក្រុមប្រឹក្សាសន្តិភាព» ដែលបង្កើតឡើងដោយលោក ដូណាល់ ត្រាំ បានទៅជួបលោកប្រធានាធិបតីអេហ្ស៊ីបនៅរដ្ឋធានីគែរ ថ្ងៃទី១៧ ខែសីហា។ ផ្អែកតាមប្រភពការទូត លោក ចារ៉េត គូឆនែរ ក៏បានជួបប្រជុំជាមួយគណៈប្រតិភូក្រុមហាម៉ាស ដឹកដឹកនាំដោយមេថ្មី ឈ្មោះ ខាលីល អាល់ហៃយ៉ា។
ភាគីទាំង២ ជជែកគ្នា អំពីផែនការសន្តិភាពតំបន់ហ្កាហ្សា ដែលលោកដូណាល់ ត្រាំបានគូសវាស។ ដំណាក់កាលទី២ដែលត្រូវចាប់ផ្តើម គឺការរំសាយអាវុធក្រុមហាម៉ាស និងក្រុមប្រដាប់អាវុធផ្សេងទៀតនៅហ្កាហ្សា ជាមួយនឹងការដកចេញនូវកងទ័ពអ៊ីស្រាអែលជាសន្សឹមៗ។ ផែនការនេះ ក៏បានកំណត់បង្កើតកងកម្លាំងអន្តរជាតិពិសេស ដោយសហការជាមួយកម្លាំងនគរបាលប៉ាឡេស្ទីន ដើម្បីរក្សាស្ថិរភាពសន្តិសុខតំបន់ហ្កាហ្សា។
គួរបញ្ជាក់ថា នៅចុងខែកក្កដា ក្រុមហាម៉ាសបានប្រកាសទទួលយកផែនការសន្តិភាពរបស់លោកដូណាល់ ត្រាំ តែដោយដាក់លក្ខខណ្ឌថា ទាល់តែភាគីអ៊ីស្រាអែល សន្យាគោរពឲ្យបានជាក់ច្បាស់ ទាក់ទិននឹងការដកទ័ពចេញហើយឈប់បាញ់ប្លោងគ្រាប់មកលើហ្កាហ្សា។
សូមបញ្ជាក់ថា តាមការគ្រោងទុក កូនប្រសាលោកត្រាំ នឹងបន្តដំណើរពីអេហ្ស៊ីប ឆ្ពោះទៅកាន់អ៊ីស្រាអែល ដើម្បីជួបជាមួយលោកនេតាន់យ៉ាហ៊ូ។ កម្មវត្ថុគឺបញ្ចុះបញ្ចូលឲ្យភាគីអ៊ីស្រាអែល ព្រមទទួលយកផែនការសន្តិភាព។ កាលពីដើមខែសីហានេះ លោកនេតាន់យ៉ាហ៊ូ បានប្រកាសច្រានចោលផែនការសន្តិភាពទាំង១៥ចំណុច ស្នើដោយរដ្ឋបាលលោកត្រាំ។ លោកបានអះអាងថា សម្រាប់អ៊ីស្រាអែល ផែនការនេះមិនបានធានាឲ្យជាក់លាក់ទេ ថាក្រុមហាម៉ាស នឹងពិតជារំសាយអាវុធចោលទាំងស្រុង ហើយនឹងមិនរៀបចំកម្លាំងវាយប្រហារមកលើអ៊ីស្រាអែលសាជាថ្មីទៅថ្ងៃអនាគត។
សូមជំរាបដែរថា មុននឹងជួបជាមួយគណៈប្រតិភូអាមេរិក មេក្រុមហាម៉ាស ខាលីល អាល់ហៃយ៉ា បានជួបប្រជុំជាមួយប្រមុខស៊ើបការណ៍សម្ងាត់អេហ្ស៊ីប កាលពីថ្ងៃអាទិត្យទី១៦សីហា។ កន្លងមក គេដឹងថា អាវុធមួយចំនួនធំរបស់ក្រុមហាម៉ាស គឺត្រូវបានដឹកចូលតាមរូងក្រោមដី ភ្ជាប់ពីអេហ្ស៊ីបមកហ្កាហ្សា៕
ប្រភព៖ RFI | ដោយ៖ ម៉ម ពិសី
