ចិនបរាជ័យក្នុងការបាញ់បង្ហោះរ៉ុកកែតដឹកផ្កាយរណបទៅកាន់ទីអវកាស

បេសកកម្ម​បាញ់បង្ហោះរ៉ុកកែតដឹកផ្កាយរណបទូរគមនាគមន៍ទៅកាន់ទីអវកាសរបស់ចិន បានបរាជ័យ។ យោងតាមទីភ្នាក់ងារព័ត៌មានរដ្ឋចិនស៊ីនហ៊ួរ រ៉ុកកែត Long March 7A ត្រូវ​បាន​បាញ់បង្ហោះចេញពីមជ្ឈមណ្ឌលអវកាស Wenchang លើកោះហៃណាន នៅថ្ងៃចន្ទ ទី ១០ ខែសីហា។ ប៉ុន្តែបន្ទាប់ពីការបាញ់បង្ហោះបានប្រហែលជាងមួយនាទី រ៉ុកកែតនោះត្រូវបានគេកត់សម្គាល់ថា មានភាពមិនប្រក្រតីកើតឡើង។

ព័ត៌មានពីប្រព័ន្ធផ្សព្វផ្សាយ និងវីដេអូដែលត្រូវបានចែកចាយតាមបណ្តាញសង្គម បង្ហាញថា រ៉ុកកែតផ្ទុះនៅលើអាកាស។ នៅក្នុងវីដេអូនោះ គេឃើញពន្លឺភ្លើងផ្ទុះនៅលើមេឃ បន្ទាប់មកមានផ្សែងពណ៌ប្រផេះ និងកម្ទេចកម្ទីធ្លាក់ចុះមកក្រោម។ ចំណែកឯទូរទស្សន៍ Channel NewAsia របស់សិង្ហបុរី ក៏បានផ្សព្វផ្សាយវីដេអូពីហេតុការណ៍នេះដែរ។ ទោះជាយ៉ាងណា អាជ្ញាធរចិននៅមិនទាន់បញ្ជាក់ជាផ្លូវការទេថា រ៉ុកកែតបានផ្ទុះដោយរបៀបណា ហើយកម្ទេចកម្ទីបានធ្លាក់នៅកន្លែងណាខ្លះទេ។

សូមជម្រាប់ជូនថា បរាជ័យនេះកើតឡើងនៅពេលដែលចិនកំពុងបង្កើនការខិតខំប្រឹងប្រែងក្នុងវិស័យអវកាស។ ចិនបានចំណាយថវិកាជាច្រើនពាន់លានដុល្លារ ក្នុងប៉ុន្មានឆ្នាំចុងក្រោយនេះ ដើម្បីអភិវឌ្ឍសមត្ថភាពអវកាស និងសម្រេចគោលដៅដែលប្រធានាធិបតី ស៊ី ជីនពីង ហៅថា “ក្តីសុបិនអវកាស” របស់ចិន។ ដោយឡែកអគ្គនាយកក្រុមហ៊ុន SpaceX លោក Elon Musk បានបញ្ចេញមតិតាមបណ្ដាញសង្គម X របស់ខ្លួនថា «រ៉ុកកែតពិតជាពិបាកខ្លាំងណាស់» ហើយលោកសង្ឃឹមថា ចិននឹងអាចស្តារកម្មវិធីបាញ់បង្ហោះរបស់ខ្លួនឡើងវិញបានយ៉ាងឆាប់រហ័ស។

គួររម្លឹកថា បញ្ហាផ្ទុះរ៉ុកកែត Long March 7A លើកនេះ ធ្វើឲ្យ​គេ​នឹកដល់បរាជ័យនៃការបាញ់បង្ហោះរ៉ុកកែតប្រភេទនេះជាលើកដំបូង កាលពីឆ្នាំ ២០២០។ នៅពេលនោះ ទីភ្នាក់ងារព័ត៌មានរដ្ឋចិនស៊ីនហ៊ួរ បានរាយការណ៍ថា ពីបញ្ហា​ខូចមុខងារកើតឡើងនៅក្នុង​បេសកកម្មបាញ់បង្ហោះ។ ចំណែកឯ បរាជ័យលើកនេះ ទីភ្នាក់ងារអវកាសចិន​មិនទាន់​បញ្ជាក់​មូលហេតុពិតប្រាកដនៅឡើយទេ។ អាជ្ញាធរចិនបានអះអាងថា ការស៊ើបអង្កេតកំពុងបន្ត ដើម្បីកំណត់ថា តើអ្វីទៅដែលបណ្ដាលឱ្យរ៉ុកកែតដែលទើបហោះចេញពីផែនដី មិនអាចបំពេញបេសកកម្មរបស់ខ្លួនបាន។

ចិនកំពុងធ្វើការប្រកួតប្រជែងជាមួយសហរដ្ឋអាមេរិក ក្នុងការស្វែងរកវិធីបញ្ជូនមនុស្សទៅកាន់ឋានព្រះចន្ទ។ ប៉េកាំង មានគោលដៅបញ្ជូនអវកាសយានិកចិនទៅចុះចតលើព្រះចន្ទ មុនឆ្នាំ ២០៣០ ខណៈសហរដ្ឋអាមេរិកកំពុងបន្តកម្មវិធី Artemis ដើម្បីនាំមនុស្សទៅកាន់ឋានព្រះចន្ទដែរ ប៉ុន្តែ នៅ​ឆ្នាំ​២០២៨ មុន​ចិន​២ឆ្នាំ៕