សមាគមសម្ព័ន្ធអ្នកសារព័ត៌មានកម្ពុជា

សាំងឡើងថ្លៃធ្វើឲ្យប៉ះពាល់ខ្លាំងដល់អ្នកមានចំណូលទាបក្នុងវិស័យសេដ្ឋកិច្ចក្រៅប្រព័ន្ធ

តម្លៃប្រេងសាំងនៅស្ថានីយប្រេងឥន្ធនៈមួយកន្លែងក្នុងរាជធានីភ្នំពេញ ថ្ងៃទី៤ ខែវិច្ឆិកា ឆ្នាំ២០២១។ ខេមបូចា/ ព្រីង សំរាំង
តម្លៃប្រេងសាំងនៅស្ថានីយប្រេងឥន្ធនៈមួយកន្លែងក្នុងរាជធានីភ្នំពេញ ថ្ងៃទី៤ ខែវិច្ឆិកា ឆ្នាំ២០២១។ ខេមបូចា/ ព្រីង សំរាំង

កំពុង​អង្គុយ​លើ​ម៉ូតូ​នៅ​ចិញ្ចើម​ផ្លូវ​មួយ​កន្លែង​ក្នុង​រាជធានីភ្នំពេញ លោក មូល យី វ័យ​៥៧ឆ្នាំ ជា​អ្នក​រត់​ម៉ូតូឌុប ថា​ខ្លួន​មិន​ហ៊ាន​ជិះ​ម៉ូតូ​ឆ្វែល​រក​ម៉ូយ​ដូច​មុនទេ ​ព្រោះ​តម្លៃ​ប្រេង​សាំង​ឡើង​ថ្លៃ​ពេក​។​

លោក យី ប្រាប់​ខេមបូ​ចា ថាតម្លៃ​ប្រេងឥន្ធនៈ​ចេះតែ​ឡើង​ថ្លៃធ្វើ​ឲ្យ​លោក​និង​អ្នក​ប្រកប​របរ​ដឹក​ជញ្ជូន​ផ្សេង​ទៀត​ជួប​ការ​លំបាក​។​

លោកនិយាយថា៖ «ពិបាករកប្រាក់ណាស់ព្រោះ កូវីដ-១៩… មួយព្រឹកនេះខ្ញុំទើបរកប្រាក់ បាន ៥០០០រៀល ដែលគ្រប់សម្រាប់តែសាំងមួយលីត្រប៉ុណ្ណោះ។ ដោយសារតម្លៃសាំងឡើងថ្លៃយើងបានតែអង្គុយនិងរង់ចាំអ្នកជិះ មករកយើង»។

មុន​មាន​វិបត្តិ​កូវីដ-១៩ លោក យី អាច​រក​ប្រាក់​បាន​ប្រហែល​១០​ដុល្លារ​ក្នុង​មួយ​ថ្ងៃ គ្រប់​គ្រាន់​សម្រាប់​ចំណាយ​លើ​ម្ហូបអាហារ និង​ថ្លៃ​ចំណាយ​ប្រចាំ​ថ្ងៃ​ផ្សេងៗ។​

លោក​ឲ្យ​ដឹង​ទៀតថា៖ «​ក្រោយ​កាត់​ថ្លៃ​ចំណាយ​ផ្សេងៗ​​រួម​ទាំង​ថ្លៃសាំង និង​ម្ហូប ខ្ញុំ​អាច​នៅ​សល់​យ៉ាង​តិច​ ៥ដុល្លារ​ក្នុង​មួយ​ថ្ងៃ ប៉ុន្តែ​ឥឡូវ​នេះវិញ ខ្ញុំ​គ្មាន​លុយ​មួយ​រៀល​ទេ…​ថ្ងៃ​ខ្លះ​ខ្ញុំ​មិន​អាច​រក​បាន​សូម្បី​សម្រាប់ទិញ​ម្ហូប​»។​

ចំណែក​ លោក ប្រាក់​ វុទ្ធី បាន​ចាក​ចេញពី​ស្រុក​កំណើត​ក្នុង​ខេត្ត​កំពង់​ស្ពឺ មក​ភ្នំពេញ កាលពី​ប្រាំបី​ខែមុន ដើម្បី​មក​ធ្វើ​ជា​អ្នក​រត់​កង់បី​។ មុន​វិបត្តិកូវីដ-១៩ លោក​អាច​រក​ប្រាក់​បាន​ប្រហែល ២៥​ដុល្លារ​ក្នុង​មួយ​ថ្ងៃ ប៉ុន្តែ​ឥឡូវនេះ លោក​ថា​រក​តែ​មួយ​ម៉ឺន​រៀល​មិន​ចង់​បាន​ផង​។​

លោក​បន្ថែម​ថា៖ «​វាពិបាក​រក​លុយ​ណាស់ ខណៈ​តម្លៃ​ទំនិញ​កាន់​តែ​ឡើង​ថ្លៃ ហើយ​តម្លៃ​ប្រេង​សាំង​ក៏​ឡើង​ថ្លៃ​ទៀត…​ទោះបី​ជា​តម្លៃ​ប្រេងសាំង និង​ហ្គាស​ឡើង​ថ្លៃ តែ​ខ្ញុំ​មិន​ហ៊ាន​ទារ​ថ្លៃ​ខ្ពស់​ពី​​អ្នក​ជិះ​ទេ»។

ស្ថាន​ភាព​ចរាចរណ៍​លើ​ដង​ផ្លូវ​ក្នុង​រាជធានី​ភ្នំពេញ​ថ្ងៃទី​៤ ខែវិច្ឆិកា ឆ្នាំ២០២១។ ខេមបូចា/ ព្រីង សំរាំង
ស្ថាន​ភាព​ចរាចរណ៍​លើ​ដង​ផ្លូវ​ក្នុង​រាជធានី​ភ្នំពេញ​ថ្ងៃទី​៤ ខែវិច្ឆិកា ឆ្នាំ២០២១។ ខេមបូចា/ ព្រីង សំរាំង

កាល​ពី​ថ្ងៃ​ចន្ទ រដ្ឋាភិបាល​បាន​ប្រកាស​ពី​ការ​បើក​ដំណើរ​ការសេដ្ឋកិច្ច​​ប្រទេស​ពេញ​លេញ​ឡើង​វិញ បន្ទាប់​ពី​បាន​បិទ​ជិត​ពីរ​ឆ្នាំ និង​ធ្វើ​ឲ្យ​សេដ្ឋកិច្ច​មាន​ការ​ធ្លាក់​ចុះ​។ ស្រប​ពេល​ជាមួយ​គ្នា​នេះ​ដែរ តម្លៃ​ប្រេងសាំង​ក៏​បាន​ឡើង​ថ្លៃ ដែល​ក្លាយ​ជា​បន្ទុក​ធ្ងន់​ធ្ងរ​បន្ថែម​ទៀត​ចំពោះ​អ្នកប្រកបរបរ​ក្នុង​វិស័យ​សេដ្ឋកិច្ចក្រៅ​ប្រព័ន្ធ​ដែល​មាន​ចំណូល​ទាប​។​

ក្រ​សួង​ពាណិជ្ជកម្ម បាន​បង្ហាញ​តម្លៃ​ប្រេងសាំង​ជាគោលការណ៍​ក្នុង​រយៈពេល​ ១៥​ថ្ងៃ​ម្ដង​ ដោយ​ផ្អែក​តាម​តម្លៃទី​ផ្សារ​អន្តរជាតិ ដែល​បច្ចុប្បន្ន​នេះ​តម្លៃ​ប្រេងសាំង​ធម្មតា​លក់​រាយ​ក្នុង​មួយ​លីត្រ​ ៤៥៥០​រៀល ឬ​ប្រហែល​នឹង​ ១,១១​ដុល្លារ​ក្នុង​មួយ​លីត្រ និង​តម្លៃ​ ៤១០០​រៀល​សម្រាប់​ប្រេង​ម៉ាស៊ូត​។ ចំណែក​តម្លៃ​លក់​រាយ​របស់​សាំង​ស៊ុបពែ​វិញ​គឺ​ ៥០៥០​រៀល ឬ១,២៦​ដុល្លារ ក្នុង​មួយ​លីត្រ​។ តម្លៃ​នេះ​នឹង​ត្រូវ​កែសម្រួល​ជាថ្មី​ទៀត​បន្ទាប់ពី​ថ្ងៃទី​១៥ ខែ​វិច្ឆិកា​។​

បើតាមសេចក្ដីប្រកាសរបស់ក្រសួងពាណិជ្ជកម្ម កាលពីថ្ងៃទី១ ខែវិច្ឆិកា រដ្ឋាភិបាល បានជួយ ឧបត្ថម្ភធន់ចំនួន៤សេនដុល្លារ ក្នុងមួយលីត្រ ។ គិតចាប់ពីខែសីហា ដល់ខែវិច្ឆិកា តម្លៃប្រេង សាំង នៅកម្ពុជាបានកើនឡើង ៤,៤ ភាគរយ ។

លោក ប៉ែន សុវិជាតិ អនុរដ្ឋលេខាធិការក្រ​សួង​ពាណិជ្ជកម្ម មានប្រសាសន៍​ថា ការ​ឡើង​ថ្លៃ​ ​តម្លៃ​ប្រេង​លើ​ទីផ្សារ​អន្តរជាតិ បាននាំ​ឲ្យ​តម្លៃ​លក់​រាយ​នៅ​កម្ពុជា​កើនឡើង​ដែរ ទោះជា​យ៉ាងនេះ​ក្ដី លោក​ថារដ្ឋាភិបាល​នឹង​មិន​មានការ​កែប្រែ​តម្លៃ​ពន្ធ​នាំចូល​នោះ​ទេ​។​​

លោក​បន្ថែមថា៖ «​រដ្ឋាភិបាល​តែង​តែ​យក​ចិត្តទុក​ដាក់​ដល់​ជីវភាព​ប្រជា​ពល​រដ្ឋ ដែល​ហេតុ​នេះ​ហើយ​ទើប​រដ្ឋាភិបាល​ជួយឧបត្ថម្ភធន់ ​ ​៤សេន​ក្នុង​​មួយ​លីត្រ ដើម្បី​កាត់​បញ្ចុះ​តម្លៃប្រេង»។ លោក​​ឲ្យ​ដឹង​ទៀតថា លោក​សង្ឃឹម​ថា​តម្លៃ​ប្រេង​លើ​ទី​ផ្សារ​អន្តរជាតិ​នឹង​ធ្លាក់ចុះ ពេល​ប្រទេស​ផលិត​ប្រេងបង្កើន​ការ​ផលិត​ឡើង​វិញ​។​

​លោក​បន្ត​ថា៖ «​យើង​កំពុង​តាម​ដាន​តម្លៃ​ប្រេង​លើ​ទីផ្សារ​អន្តរជាតិយ៉ាង​យក​ចិត្ត​ទុក​ដាក់ ហើយ​រដ្ឋាភិបាល​ក៏​នឹង​មាន​វិធានការ​បន្ថែម​ក្នុង​ករណី​តម្លៃប្រេង​នៅ​តែ​បន្តកើន​ឡើង​ធ្វើ​ឲ្យ​ប៉ះពាល់​ដល់​ជីវភាពប្រជាពល​រដ្ឋ យើង​មិន​ព្រងើយ​កន្ទើយ​លើ​រឿង​នេះ​ទេ»។​

ខណៈ​ដែល​ថា​ការ​សម្រេច​ក្នុង​ការ​កាត់​ពន្ធ​នាំចូល ឬ​គោល​នយោបាយឧបត្ថម្ភធន់ណាមួយ ​​ គឺ​អាស្រ័យ​លើ​ក្រ​សួង​សេដ្ឋកិច្ច។ លោក សុវិជាតិ ថា​ការ​កាត់​បន្ថយ​ពន្ធ​នាំចូល​នឹង​ធ្វើ​ឲ្យ​ប៉ះពាល់​ច្រើន ដោយថាការកាត់​បន្ថយ​ពន្ធដារ ឬពន្ធនាំចូល​​​ត្រូវតែធ្វើ​ឡើង​ដោយ​ប្រុង​ប្រយ័ត្ន​។

លោកបញ្ជាក់​ថា៖ «​ព្រោះ​ថា​ចំណូល​បាន​ពី​ពន្ធដារ និងពន្ធនាំចូល ត្រូវ​ប្រើ​សម្រាប់​វិស័យ​ផ្សេង​ៗទៀត​ជា​ច្រើន ពិសេស​ក្នុង​វិបត្តិ​កូវីដ-១៩ វា​ជា​ប្រភព​ដ៏​សំខាន់​ក្នុង​ការ​កសាងសេដ្ឋកិច្ច​ ហេដ្ឋារចនាសម្ព័ន្ធ និង​កម្មវិធី​សង្គម»​។​

បុគ្គលិក​ដឹក​ជញ្ជូន​ម្ហូបអាហារ និង​ទំនិញ​ឲ្យ​អតិថិជន​ក្នុង​រាជធានី​ភ្នំពេញ​ ថ្ងៃទី​៤ ខែវិច្ឆិកា ឆ្នាំ២០២១។ ខេមបូចា/ ព្រីង សំរាំង
បុគ្គលិក​ដឹក​ជញ្ជូន​ម្ហូបអាហារ និង​ទំនិញ​ឲ្យ​អតិថិជន​ក្នុង​រាជធានី​ភ្នំពេញ​ ថ្ងៃទី​៤ ខែវិច្ឆិកា ឆ្នាំ២០២១។ ខេមបូចា/ ព្រីង សំរាំង

ផ្អែក​តាម​តម្លៃ​ប្រេង​ឆៅ​លើ​ទី​ផ្សារអន្តរជាតិ​ ប្រេងឆៅ West Texas Intermediate មាន​តម្លៃ​ប្រហែល​​ ៨៤,៧​ដុល្លារ​ក្នុង​មួយ​បារ៉ែល និង​ប្រេង​ឆៅ Brent មាន​តម្លៃ​ ៨៤,៥៧​ដុល្លារ​ក្នុង​មួយបារ៉ែល គិត​តាំង​ពី​ប្រទេស​ផលិត​ប្រេង​បាន​កាត់​បន្ថយ​ការ​ផលិត​ដោយសារ​វិបត្តិ​កូវីដ-១៩​ ជា​សកល​។​

ថ្វី​បើ​តម្លៃ​ប្រេងសាំង​នៅ​កម្ពុជា​ប្រហាក់​ប្រហែល​គ្នា​ទៅ​នឹង​ប្រទេស​ជិត​ខាង​ដែល​មាន​តម្លៃ​ប្រហែល​១ដុល្លារ​ក្នុង​មួយ​លីត្រ លោក ហុង វណ្ណៈ អ្នក​ស្រាវជ្រាវ​ផ្នែក​អាជីវកម្ម​នៅ​រាជបណ្ឌិត្យ​សភា​កម្ពុជា ថា​តម្លៃនេះខ្ពស់​ខ្លាំង​បើ​ធៀប​ទៅ​នឹង​ប្រាក់​ចំណូល​ប្រចាំឆ្នាំ​​របស់​ប្រជា​ពល​រដ្ឋ​ម្នាក់ៗ​​។​

លោក​មានប្រសាសន៍​ថា៖ «វា​មិន​សមាមាត្រទៅ​នឹងចំណូល​របស់​ប្រជា​ពល​រដ្ឋ ពេល​យើង​ប្រៀបធៀប​វា​ទៅ​នឹង​តម្លៃប្រេង​សាំង» ដោយលោកបន្ថែមថា៖ «តម្លៃគឺ​ខ្ពស់​ណាស់ ដូច​នេះ​វា​ប៉ះពាល់​ខ្លាំង​ដល់ជីវភាពប្រចាំ​ថ្ងៃ។ អ្នក​រងផលប៉ះពាល់ខ្លាំង គឺ​អ្ន​កមានចំណូល​ទាប ដូចជាកសិករ និង​កម្មករ​សេដ្ឋកិច្ចក្រៅ​ប្រព័ន្ធ ដែល​ពឹង​ផ្អែក​ខ្លាំង​លើ​ប្រេង​ឥន្ធនៈ​​សម្រាប់​អាជីវកម្មប្រចាំ​ថ្ងៃ»។​

យោង​តាម​ធនាគារពិភព​​លោក ចំណូល​ប្រចាំ​ឆ្នាំ​របស់​ប្រជាពល​រដ្ឋ​កម្ពុជា​ម្នាក់​ក្នុង​ឆ្នាំ២០២០ មាន​ចំនួន​ ១ ៥១២,៧​ដុល្លារ ដោយ​បាន​ថយចុះពី​ ១ ៦៤៣​ដុល្លារ​ក្នុង​ឆ្នាំ​២០១៩​។

ខណៈ​ដែល​ទទួល​ស្គាល់​ថា​មិនមែន​តែ​កម្ពុជា​ទេ ដែល​ជួប​បញ្ហា​តម្លៃ​ប្រេងសាំងថ្លៃ លោក វណ្ណៈ ថា​រដ្ឋាភិបាល​គួរ​តែ​ជួយ​បន្ថែម​ទៀត​លើ​បញ្ហា​តម្លៃ​នេះ បើ​សិនជា​អាច​ធ្វើបាន​។​

ម៉ូតូកង់​បី​ដឹកអ្នក​ដំណើរ​ក្នុង​រាជធានី​ភ្នំពេញ ថ្ងៃទី​៤ ខែវិច្ឆិកា ឆ្នាំ២០២១។ ខេមបូចា/ ព្រីង សំរាំង
ម៉ូតូកង់​បី​ដឹកអ្នក​ដំណើរ​ក្នុង​រាជធានី​ភ្នំពេញ ថ្ងៃទី​៤ ខែវិច្ឆិកា ឆ្នាំ២០២១។ ខេមបូចា/ ព្រីង សំរាំង

លោក វ៉ន ពៅ ប្រធាន​សមាគម​ប្រជាធិបតេយ្យ​ឯករាជ្យ ​នៃសេដ្ឋកិច្ច​ក្រៅ​ប្រព័ន្ធ​ មាន​ប្រសាសន៍​ថា ទោះបី​ជា​រដ្ឋាភិបាល​បាន​ប្រកាស​បើក​ប្រទេស​ឡើង​វិញមែន ការ​ឡើង​ថ្លៃរបស់​តម្លៃ​ប្រេង​សាំង​បាន​បន្ថែមការ​លំបាក​សម្រាប់​កម្មករ​មាន​ប្រាក់ចំណូល​ទាប​ក្នុង​វិស័យសេដ្ឋកិច្ច​ក្រៅ​ប្រព័ន្ធ​។  

លោក​​មានប្រសាសន៍​ថា៖ «វា​ជា​ស្ថានភាព​មួយ​ដ៏​អាក្រក់​ ពីព្រោះ​ពួក​យើង​ជួប​បញ្ហា​ធ្លាក់ចុះ​ប្រាក់ចំណូល និង​បាត់​បង់​ការងារ​ដោយសារ​កូវីដ-១៩ ហើយ​វា​បាន​បង្កើត​នូវ​អតុល្យភាព​យ៉ាង​ខ្លាំង​រវាង​ចំណូល និង​ការ​ចំណាយ» ដោយលោកបន្ថែមថា៖ «ពេល​ដែល​សាំង និង​ហ្គាស​ឡើង​ថ្លៃ វា​ក៏​ជំរុញ​ឲ្យ​ទំនិញ​ផ្សេងៗ​ឡើង​ថ្លៃដែរ ដូច​នេះ​វា​នឹង​មាន​ឥទ្ធិ​ពល​អាក្រក់​ដល់​ជីវភាព​ប្រ​ជាពល​រដ្ឋ»

ប្រែសម្រួលពីអត្ថបទភាសាអង់គ្លេស៖ High price of gasoline hits low-income informal workers hard

88 views
ព័ត៌មានថ្មីៗ »
អត្ថបទពេញនិយម »