តម្លៃសាំង ហ្គាស និងប្រេងឥន្ធនៈមួយចំនួនទៀតបានហក់ឡើងថ្លៃខ្លាំងក្នុងប្រទេសកម្ពុជា បន្ទាប់ពីមានការឈ្លានពានរបស់ប្រទេសរុស្ស៊ីទៅលើប្រទេសអ៊ុយក្រែន ខណៈដែលស្ថានីយប្រេងមួយចំនួនក្នុងរាជធានីភ្នំពេញបានប្រកាសថាសាំងធម្មតាក្នុងស្ថានីយ៍របស់ពួកគេបានដាច់ស្តុកហើយ។
ការហក់ឡើងយ៉ាងខ្ពស់នៃតម្លៃប្រេងឥន្ធនៈ បានប៉ះពាល់យ៉ាងខ្លាំងជាពិសេសសម្រាប់ប្រជាជនកម្ពុជាដែលមានចំណូលទាបដែលកំពុងប្រឈមរួចហើយនឹងវិបត្តិហិរញ្ញវត្ថុដោយសារជំងឺរាតត្បាតសកល។
តម្លៃលក់រាយបច្ចុប្បន្នត្រូវបានកំណត់នៅតម្លៃ៥៣០០ រៀល ក្នុងមួយលីត្រ សម្រាប់សាំងធម្មតា និងម៉ាស៊ូត បើធៀបនឹងមួយខែមុន មានតម្លៃតែ៤៧០០ប៉ុណ្ណោះ។ តម្លៃលក់រាយប្រេងស៊ុបពែមានតម្លៃ ៥ ៨៥០ រៀលក្នុងមួយលីត្រ។ តម្លៃទាំងនេះនឹងប្រែប្រួលទៀត ក្រោយថ្ងៃទី ៣១ ខែមីនា។
លោក ឡាច ពន្លក អ្នករត់រ៉ឺម៉កកង់បីនៅរាជធានីភ្នំពេញបាននិយាយថាតម្លៃសាំងឡើងថ្លៃ ធ្វើឱ្យប៉ះពាល់យ៉ាងខ្លាំងដល់ចំណូលប្រចាំថ្ងៃរបស់លោក។
លោកបានបន្តថា៖ «វាពិតជាប៉ះពាល់ដល់ជីវភាពគ្រួសាររបស់ខ្ញុំ ដោយសារប្រាក់ចំណូលធ្លាក់ចុះ ហើយស្ទើរតែមិនគ្រប់គ្រាន់សម្រាប់ការចំណាយផង»។
លោករកបានជាមធ្យម ៨០ ០០០ រៀលក្នុងមួយថ្ងៃក្នុងរយៈពេល២ខែចុងក្រោយនេះ ប៉ុន្តែតម្លៃហ្គាសហក់ឡើង បានបណ្តាលឱ្យប្រាក់ចំណូលប្រចាំថ្ងៃរបស់លោកធ្លាក់ចុះមកនៅប្រហែល ៥០ ០០០ រៀល ប៉ុណ្ណោះ។
លោកបានមានប្រសាសន៍ថា៖«ខ្ញុំចង់ឱ្យរដ្ឋាភិបាលជួយផ្តល់ការគាំទ្រ មួយចំនួនដើម្បីជួយជនងាយរងគ្រោះបំផុត។ ខ្ញុំមិនអាចរកប្រាក់បានគ្រប់គ្រាន់ទេ ហើយត្រូវការសងបំណុលគេទៀត»។
អ្នកបើករ៉ឺម៉កកង់បីម្នាក់ទៀតឈ្មោះ អ៊ាម សារិន អាយុ ៥២ ឆ្នាំ បាននិយាយថា លោករកចំណូលបានប្រហែល ៥ម៉ឺនរៀលក្នុងមួយថ្ងៃ ហើយចំណាយយ៉ាងតិច ២ម៉ឺនរៀលក្នុងមួយថ្ងៃសម្រាប់ថ្លៃហ្គាស ។ បញ្ហានេះបានបន្ថែមការលំបាកដល់រូបលោកទៀត ខណៈដែលចំនួនភ្ញៀវជិះរ៉ឺម៉កកង់បីរបស់លោកមានការធ្លាក់ចុះប្រមាណជា៨០ភាគរយ បើប្រៀបធៀបទៅនឹងចំនួនភ្ញៀវមុនផ្ទុះកូវីដ-១៩។
លោក សារិន ដែលត្រូវបានចុះឈ្មោះរ៉ឺម៉កកង់បីរបស់លោកជាមួយក្រុមហ៊ុនក្នុងស្រុក Passapp បានជំរុញឱ្យក្រុមហ៊ុនកាត់បន្ថយថ្លៃសេវាពីអ្នកបើកបរ ដើម្បីសម្រាលបន្ទុកអំឡុងពេលមានវិបត្តិតម្លៃឥន្ធនៈបែបនេះ។
លោកបានបន្តថា៖ «ខ្ញុំគ្រាន់តែចង់សុំឱ្យក្រុមហ៊ុនកាត់បន្ថយថ្លៃសេវាពី ១៥ ភាគរយមកត្រឹម១០ ភាគរយ។ ឥឡូវនេះ យើងរកបានដោយគ្រាន់តែឱ្យថ្លៃហ្គាសប៉ុណ្ណោះ»។
ថ្លែងនៅស្ថានីយ៍ប្រេងឥន្ធនៈមួយ ខណៈចូលចាក់សាំងម៉ូតូ លោក គង់ សុត្រា ដេវីត រស់នៅរាជធានីភ្នំពេញ យល់ថានេះជាបញ្ហាសកល មិនមែនសម្រាប់កម្ពុជាទេ ប៉ុន្តែលោកកត់សម្គាល់ថាការឡើងថ្លៃបែបនេះនឹងធ្វើមានការប៉ះពាល់ដល់ជីវភាព។
លោកបន្តថា៖ «កន្លែងធ្វើការខ្ញុំនៅឆ្ងាយ ដូច្នេះខ្ញុំត្រូវចំណាយថ្លៃសាំងច្រើនទៀត»។ [ខ្ញុំ] បារម្ភថា ស្ថានីយ៍ប្រេងមួយចំនួនកំពុងអស់ស្តុក ដែលនាំឱ្យតម្លៃកាន់តែឡើងខ្ពស់»។
ជាមួយនឹងការកើនឡើងតម្លៃប្រេងឥន្ធនៈជាបន្តបន្ទាប់ ក្រសួងពាណិជ្ជកម្មកម្ពុជាបានប្រកាសថានឹងចាប់ផ្តើមកែសម្រួលគោលការណ៍ណែនាំតម្លៃដោយធ្វើបច្ចុប្បន្នភាពរៀងរាល់១០ថ្ងៃម្តង។
យោងតាមការប្រកាសក្រសួងពាណិជ្ជកម្មដែលចេញនៅថ្ងៃទី១៦ ខែមីនាដដែលនេះ រដ្ឋាភិបាលកំពុងឧបត្ថម្ភធនដោយជួយ៤សេនក្នុងមួយលីត្រ។
លោកនាយករដ្ឋមន្ត្រី ហ៊ុន សែន ថ្លែងក្នុងសុន្ទរកថានៅខេត្តព្រៃវែងកាលពីថ្ងៃព្រហស្បតិ៍ថា ការកើនឡើងតម្លៃប្រេងឥន្ធនៈគឺដោយសារតែបរិបទពិភពលោក ហើយដំណោះស្រាយតែមួយគត់គឺកាត់បន្ថយការធ្វើដំណើរ។
លោក ហ៊ុន សែន ថ្លែងថា៖ «សូមកុំជេរ ហ៊ុន សែន អី! រឿងហ្នឹង វាជារឿងសភាពការណ៍អន្តរជាតិ សង្គ្រាមរវាងរុស្ស៊ីនិងអ៊ុយក្រែន បានបង្កើតជាបញ្ហាសម្រាប់សេដ្ឋកិច្ចសកលហើយ »។
អនុរដ្ឋលេខាធិការក្រសួងពាណិជ្ជកម្ម លោក ប៉ែន សុវិជាតិ មានប្រសាសន៍ថា ការកើនឡើងនៃតម្លៃប្រេងក្នុងទីផ្សាអន្តរជាតិបានធ្វើឱ្យតម្លៃលក់រាយនៅកម្ពុជាកើនឡើងដែរ។ ប៉ុន្តែលោកបានកត់សម្គាល់ថា ស្ថានីយ៍ប្រេងឥន្ធនៈនានាមិនគួរអស់សាំងទេ ដោយលោកថាប្រកាសអន្តរក្រសួងបញ្ជាក់យ៉ាងច្បាស់ថា ស្ថានីយ៍ប្រេងទាំងអស់ត្រូវតែផ្តល់ជម្រើសផ្សេងៗ។
លោកបានបន្តថា៖ «គ្រប់ស្ថានីយ៍ប្រេងទាំងអស់ គឺតម្រូវឱ្យលក់មិនត្រឹមតែសាំងស៊ុបពែទេ ត្រូវតែមានលក់ទាំង សាំងស៊ុបពែ សាំងធម្មតា និងម៉ាស៊ូត»។ លោកបន្ថែមថា៖ «យើងនឹងពិនិត្យស្ថានីយ៍ណាដែលប្រកាសថាអស់ស្តុក ហើយប្រសិនបើយើងរកឃើញថាពួកគេមានចេតនាមិនលក់សាំងធម្មតាឱ្យអតិថិជនដោយផ្អែកលើហេតុផលណាមួយ នោះក្រសួងនឹងចាត់វិធានការលើស្ថានីយ៍ទាំងនោះដោយពិន័យជាប្រាក់»។
បើតាមអនុរដ្ឋលេខាធិការរូបនេះ អ្នកនាំចូលប្រេងទាំងអស់ត្រូវមានស្តុកទុកយ៉ាងហោចណាស់មួយខែ។
លោក វន ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) មានថ្លែងថារដ្ឋាភិបាលអាចជួយពលរដ្ឋតាមរយៈកាត់បន្ថយពន្ធនាំចូលប្រេង ដើម្បីឲ្យតម្លៃប្រេងក្នុងស្រុកចុះថោកដែរ។
លោកបានបន្តថា៖ «រដ្ឋាភិបាលត្រូវដំឡើងពន្ធលើគ្រឿងស្រវឹង និងផលិតផលដែលមិនចាំបាច់ផ្សេងទៀត ហើយខ្ញុំគិតថារដ្ឋអាចប្រើយន្តការនេះដើម្បីដោះស្រាយបញ្ហា»។
លោកបានបន្តថា នៅពេលដែលតម្លៃសាំងឡើងថ្លៃ វាប៉ះពាល់ដល់ប្រជាជនកម្ពុជាដែលមានប្រាក់ចំណូលទាបបំផុត ជាពិសេសកម្មករក្រៅប្រព័ន្ធ។
លោកបានមានប្រសាសន៍ថា៖« កូវីដ-១៩ នៅតែជាក្តីបារម្ភ ហើយតម្លៃសាំងកើនឡើងខ្ពស់ កំពុងធ្វើឱ្យស្ថានការណ៍កាន់តែអាក្រក់ទៅៗ ដោយសារតែប្រេងសាំង និងហ្គាស គឺជាទំនិញសំខាន់ ហើយប្រសិនបើតម្លៃកើនឡើង វាក៏ជំរុញឱ្យទំនិញផ្សេងទៀតឡើងថ្លៃតាមហ្នឹងដែរ»។
ប្រេងឥន្ធនៈទាំងអស់របស់កម្ពុជាត្រូវបាននាំចូល។ កិច្ចខិតខំប្រឹងប្រែងដើម្បីផលិតប្រេងនៅឈូងសមុទ្រកាលពីឆ្នាំមុនបានផ្អាក ប៉ុន្មានខែបន្ទាប់ពីក្រុមហ៊ុនប្រេងនិងឧស្ម័ន KrisEnergy ដែលមានមូលដ្ឋាននៅសិង្ហបុរី បានក្ស័យធន។
ការឡើងថ្លៃប្រេងឥន្ធនៈ ក៏បានធ្វើឱ្យប៉ះពាល់ដល់វិស័យដឹកជញ្ជូនទាំងមូលផងដែរ។
ប្រធានសមាគមភស្តុភារកម្មកម្ពុជា លោក ស៊ិន ចន្ធី មានប្រសាសន៍ថាក្រោយពីរងការវាយប្រហារដោយជំងឺកូវីដ-១៩ បញ្ហាប្រេងសាំងឡើងថ្លៃកំពុងដាក់បន្ទុកបន្ថែមដល់វិស័យភស្តុភារ។
លោកបន្តថា៖ «តម្លៃថាមពលមានសារៈសំខាន់សម្រាប់វិស័យដឹកជញ្ជូន ហើយវាកំពុងប៉ះពាល់ដល់វិស័យនេះ។ បច្ចុប្បន្នយើងកំពុងពិភាក្សារកវិធីកាត់បន្ថយផលប៉ះពាល់ ខណៈក្រុមហ៊ុនមួយចំនួនស្នើសុំដំឡើងថ្លៃដឹកជញ្ជូន»៕
ប្រែសម្រួលពីអត្ថបទភាសាអង់គ្លេស៖ As gas price skyrockets, some stations announce they are out of stock
