អ្នករត់រ៉ឺម៉កកង់បីតាមថ្នាលឌីជីថលរបស់ក្រុមហ៊ុន ផាសអ៊ែប (Pass App) ជាង១០០នាក់ នាព្រឹកថ្ងៃពុធ ទី៣០ ខែកញ្ញា បានប្រមូលផ្ដុំគ្នាតវ៉ានៅទីស្នាក់ការរបស់ក្រុមហ៊ុន ក្នុងរាជធានីភ្នំពេញ ស្នើសុំឱ្យលុបចោលកម្មវិធីមានឈ្មោះ សេវលុយ ឬសន្សំប្រាក់ (Save Luy) ដោយអះអាងថា បានតម្រូវឱ្យពួកគេបង់កម្រៃជើងសាររហូតដល់១៨ភាគរយជូនក្រុមហ៊ុន ខណៈសេវាកម្មធម្មតាបង់ត្រឹម១៥ភាគរយចំពោះការដឹកជញ្ជូនភ្ញៀវមួយលើក ស្របពេលដែលពួកគេក៏ត្អូញត្អែរជុំវិញតម្លៃហ្គាសហក់ឡើងថ្លៃ។
អំឡុងពេលប្រមូលផ្ដុំនៅមុខទីស្នាក់ការរបស់ក្រុមហ៊ុន ក្រុមអ្នកតវ៉ា បានលើករូបថតលោកនាយករដ្ឋមន្រ្តី ហ៊ុន ម៉ាណែត និងប្រធានព្រឹទ្ធសភាលោក ហ៊ុន សែន និងសេចក្ដីណែនាំរបស់ក្រសួងពាណិជ្ជកម្ម រួមទាំងបដាដែលសរសេរសុំកិច្ចអន្តរគមន៍ពីថ្នាក់ដឹកនាំផងដែរ។
ពួកគេ បានស្រែកទាមទារឱ្យក្រុមហ៊ុន ផាសអ៊ែប គោរពតាមការព្រមព្រៀងគ្នាជាមួយក្រសួងពាណិជ្ជកម្ម កាលពីថ្ងៃទី១១ ខែកញ្ញា ដែលណែនាំឱ្យផ្អាកជាបណ្ដោះអាសន្ននូវសេវាកម្មនេះក្នុងរយៈពេល៣ខែ បណ្ដោះអាសន្ន ចាប់ពីថ្ងៃទី១៨ ខែកញ្ញា ឆ្នាំ២០២៦ តទៅ។
អ្នករត់រ៉ឺម៉កកង់បីតាមថ្នាលឌីជីថល ផាសអ៊ែប មួយរូប ដែលចូលរួមការតវ៉ាព្រឹកនេះលោក រស់ សំអឿន វ័យ៣៧ឆ្នាំ និយាយថា ក្រុមហ៊ុន ពុំបានអនុវត្តតាមការព្រមព្រៀងគ្នាជាមួយក្រសួង ចំពោះការលុបសេវាកម្ម សេវលុយ (Save Luy។
ផ្ទុយទៅវិញលោក អះអាងថា ក្រុមហ៊ុនបានដំឡើងថ្លៃឱ្យដល់ ១ ១០០ រៀល ក្នុងមួយគីឡូម៉ែត្រ (សម្រាប់គីឡូម៉ែត្របន្ទាប់) ដូចកម្មវិធីធម្មតា ប៉ុន្តែក៏បានដំឡើងកម្រៃជើងសារជូនក្រុមហ៊ុនរហូតដល់១៨ភាគរយ ខណៈសេវាកម្មធម្មតាបង់ត្រឹម១៥ភាគរយ ចំពោះការដឹកជញ្ជូនភ្ញៀវក្នុងមួយលើក។
លោកលើកឡើងថា៖ «ពេលដែលក្រុមហ៊ុន បន្តបើកកម្មវិធីនេះ ពួកខ្ញុំដឹកបានថោក កម្រៃជើងសារខ្ពស់ ទាំងដែលបច្ចុប្បន្នថ្លៃហ្គាសថ្លៃ ចឹងស្មើនឹងខ្ញុំរករាល់ថ្ងៃ គឺអត់បានសល់ទេ គឺរកឱ្យតែក្រុមហ៊ុនទេ»។
ក្រុមអ្នកតវ៉ា ក៏បានរអ៊ូរទាំថា ប្រសិនបើពួកគេពុំបើកមុខងារសេវាកម្ម សេវលុយ (Save Luy) ទេនោះ កម្មវិធីធម្មតាដែលប្រើប្រាស់ គឺមិនងាយក្នុងការទទួលបានការហៅពីអតិថិជនឡើយ។
លោក សំអឿន បន្ថែមថា លោករត់រ៉ឺម៉កកង់បីតាមថ្នាលឌីជីថលជាមួយក្រុមហ៊ុន ផាសអ៊ែប តាំងពីឆ្នាំ២០១៨ ដែលកាលនោះ តម្លៃហ្គាសមួយលីត្រត្រឹម១២០០រៀល ខណៈតម្លៃសម្រាប់គីឡូម៉ែត្របន្ទាប់ ថ្លៃ ១ ២០០ រៀល ហើយការបង់កម្រៃជើងសារជូនក្រុមហ៊ុនត្រឹម១២ភាគរយ ក្នុងមួយជើង។
ផ្ទុយស្រឡះនៅពេលនេះ លោក ថា តម្លៃហ្គាស បានហក់ឡើងខ្ទង់៣៥០០រៀល ទៅ ៤ ០០០ រៀល ក្នុងមួយលីត្រ ប៉ុន្តែថ្លៃដឹកជញ្ជូនបែរជាធ្លាក់មកនៅ ១ ១០០ រៀល ក្នុងមួយគីឡូម៉ែត្របន្ទាប់ និងបង់កម្រៃជើងសារជូនក្រុមហ៊ុនដល់ទៅ១៨ភាគរយ (សម្រាប់សេវាកម្ម សេវលុយ)។
អ្នករត់រ៉ឺម៉កកង់បីមួយរូបទៀតលោក ហួន កុសល ថ្លែងទៅកាន់អ្នកសារព័ត៌មាននៅចំពោះមុខទីស្នាក់ការក្រុមហ៊ុនថា សព្វថ្ងៃលោក និងអ្នករត់រ៉ឺម៉កកង់បីដទៃទៀត មានការលំបាកលំបិនជាខ្លាំង នៅពេលដែលប្រេងឥន្ធនៈ និងឧស្ម័នកំពុងឡើងថ្លៃ ហើយមកប្រឈមមុខនឹងការដំឡើងកម្រៃជើងសារពីក្រុមហ៊ុនបន្ថែមទៀត។
លោកបន្ថែមថា៖ «នៅពេលដែលហ្គាសកំពុងតែឡើងថ្លៃហើយ បែរជាក្រុមហ៊ុនដំឡើងនូវភាគរយទៀត។ ក្រុមហ៊ុនធ្វើផ្ទុយពីអ្វីដែលយើងបានជជែកគ្នាជាមួយនឹងក្រសួងពាណិជ្ជកម្មទៀត ហើយគោលបំណងដែលយើងមកនេះ គឺយើងចង់ឱ្យក្រុមហ៊ុនបិទនូវសេវាកម្មថ្មី សេវលុយ(Save Luy)ហ្នឹង»។
ចំណែកអ្នករត់រ៉ឺម៉កកង់បីមួយរូបទៀតគឺលោក ហេង ហុង និយាយថា លោកបានបង្ខំចិត្តក្នុងការបន្ថែមម៉ោងរត់រ៉ឺម៉កកង់បី ពីព្រោះតែប្រាក់ចំណូលបានធ្លាក់ចុះច្រើន បើប្រៀបធៀបនឹងកាលពីមុន។
លោក និយាយថា៖ «ពីមុនមកអាចថាត្រឹម១០ម៉ោងចូលផ្ទះបាន។ អីឡូវនេះ សឹងថា១៥ ទៅ១៦ម៉ោង ពេលខ្លះរកលុយអត់បាន ដេកលើកង់បីហ្មង។ បើអត់មានលុយ មានអីចូលផ្ទះធ្វើម៉េចឡូវ បើកភ្នែកមកប្រពន្ធកូនចាយលុយត្រូវអី គ្រប់សព្វបែបយ៉ាងទាំងអស់»។
សារព័ត៌មានខេមបូចា បានព្យាយាមទាក់ទងទៅកាន់ក្រុមហ៊ុន ផាសអ៊ែប តាមរយៈលេខទូរសព្ទដែលដាក់នៅលើទំព័រហ្វេសប៊ុក ដោយអ្នកលើកទូរសព្ទ ប្រាប់ថា នៅមិនទាន់ទទួលបានព័ត៌មានជុំវិញករណីតវ៉ានៅព្រឹកនេះ ពីថ្នាក់លើនៅឡើយទេ។
អ្នកលើកទូរសព្ទដដែលថា គាត់មិនមានលេខទូរសព្ទថ្នាក់លើនោះទេ ក្រោយសាកសួរអំពីលេខទំនាក់ទំនង និងប្រាប់អ្នកសារព័ត៌មានខេមបូចា ថា ប្រសិនបើចង់បានព័ត៌មានអាចមកកាន់ក្រុមហ៊ុនផ្ទាល់។
អ្នកនាំពាក្យក្រសួងពាណិជ្ជកម្មលោក ប៉ែន សុវិជាតិ ថ្លែងប្រាប់សារព័ត៌មានខេមបូចា នៅល្ងាចនេះថា ករណីនេះ លោកកំពុងទាក់ទងទៅកាន់មន្រ្តីពាក់ព័ន្ធ។
រីឯប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ
លោក វន់ ពៅ ចាត់ទុកទង្វើរបស់ក្រុមហ៊ុន ជាការគាបសង្កត់លើដៃគូដែលជាអ្នករត់រ៉ឺម៉កកង់បី ដោយមិនខ្វល់ខ្វាយពីការកើនឡើងនូវតម្លៃប្រេងឥន្ធនៈ និងឧស្ម័ន។
លោក ក៏បានវាយតម្លៃ ការតវ៉ារបស់ប្រជាពលរដ្ឋកើតឡើងនៅថ្ងៃនេះ ក៏ព្រោះតែជាកម្សោយរបស់ក្រសួងពាណិជ្ជកម្ម ដែលគ្មានយន្តការក្នុងការបង្ខំឱ្យក្រុមហ៊ុនអនុវត្តតាមការព្រមព្រៀងជាមួយគ្នាបាន។
លោក និយាយថា៖ «ខ្ញុំមើលឃើញថា វាជាកម្សោយរបស់ក្រសួងពាណិជ្ជកម្ម ដែលមិនមានយន្តការចាប់បង្ខំឱ្យក្រុមហ៊ុន អនុវត្តតាមកិច្ចព្រមព្រៀង»។
កាលពីដើមខែកញ្ញានេះ អ្នករត់រ៉ឺម៉កកង់បីតាមថ្នាលឌីជីថលរបស់ក្រុមហ៊ុន Grab ជាង១០០នាក់ ក៏បានប្រមូលផ្ដុំគ្នាតវ៉ានៅទីស្នាក់ការរបស់ក្រុមហ៊ុន នៅរាជធានីភ្នំពេញ ស្នើសុំឱ្យលុបចោលកម្មវិធីបញ្ចុះតម្លៃ១៥ភាគរយ ដែលមានឈ្មោះថា សេវលុយ (Save Luy) នេះផងដែរ ដោយអះអាងថា បានធ្វើឱ្យប្រាក់កម្រៃធ្លាក់ចុះពី ១ ១០០ រៀល មកត្រឹម ៩៥០រៀល ក្នុង១គីឡូម៉ែត្រ (សម្រាប់គីឡូម៉ែត្របន្ទាប់) ដែលប៉ះពាល់ដល់ចំណូល និងជីវភាពរបស់ពួកគេ។
កាលនោះ ពួកគេលើកឡើងថា ក្រុមហ៊ុនដឹកជញ្ជូនតាមថ្នាលឌីជីថលមួយចំនួន បានសហការគ្នាក្នុងការបង្កើតកម្មវិធី Save Luy នេះ ដែលដំណើរការរយៈពេលកន្លះខែមកហើយ ដោយបានបន្ថយកម្រៃរបស់អ្នកដឹកជញ្ជូន ១៥ភាគរយ ក្នុងមួយគីឡូម៉ែត្រ សម្រាប់គីឡូម៉ែត្របន្ទាប់។
បើតាមអ្នករត់រ៉ឺម៉កកង់បីតាមថ្នាលឌីជីថល ផាសអ៊ែប ក្រុមហ៊ុនដែលសហការគ្នាក្នុងការបង្កើតសេវាកម្ម សេវលុយ (Save Luy) បានយល់ព្រមលុបចោលកម្មវិធីនេះអស់ហើយ នៅឡើយតែក្រុមហ៊ុន ផាសអ៊ែប ប៉ុណ្ណោះ។
នៅល្ងាចនេះ អ្នករត់រ៉ឺម៉កកង់បីតាមថ្នាលឌីជីថល ផាសអ៊ែប លោក រស់ សំអឿន ប្រាប់ថា ភាគីក្រុមហ៊ុន ពុំព្រមលុបចោលសេវាកម្ម សេវលុយ (Save Luy) នោះទេ បន្ទាប់ពីកិច្ចប្រជុំបានបញ្ចប់នៅថ្ងៃនេះ ជាមួយតំណាងរបស់អ្នករត់រ៉ឺម៉កកង់បីក្រោមការសម្របសម្រួលពីអាជ្ញាធរខណ្ឌទួលគោក។
យ៉ាងណា លោក សំអឿន ថា នៅព្រឹកស្អែកភាគីក្រុមហ៊ុន និងតំណាងអ្នកតវ៉ា គ្រោងជួបគ្នានៅក្រសួងពាណិជ្ជកម្មដើម្បីរកដំណោះស្រាយបន្តទៀត៕
