រដ្ឋមន្រ្តីការពារជាតិអាមេរិកប្រើសំដីធ្ងន់ៗ ដើម្បីបន្តដាក់សម្ពាធលើអឺរ៉ុប និងកាណាដា សម្ព័ន្ធមិត្តរបស់អាមេរិកនៅក្នុងអង្គការអាត្លង់ទិកអូតង់។ ចូលរួមក្នុងកិច្ចប្រជុំ ថ្នាក់រដ្ឋមន្រ្តីការពារជាតិរបស់អូតង់ នៅទីស្នាក់ការក្នុងទីក្រុងព្រុចស៊ែល រដ្ឋមន្រ្តីការពារជាតិអាមេរិក លោកPete Hegseth បានរិះគន់ប្រទេសសម្ព័ន្ធមិត្តមួយចំនួនធំថា នៅតែមិនទាន់ភ្ញាក់ខ្លួន និងមិនព្រមបត់បែនតាមជំហរនយោបាយថ្មីរបស់រដ្ឋបាលលោកដូណាល់ ត្រាំ។
លោកដូណាល់ ត្រាំធ្លាប់បានទាមទារឲ្យអឺរ៉ុបដំឡើងប្រាក់វិភាគទានក្នុងកេសថវិការួមរបស់អូតង់ ដើម្បីធ្វើយ៉ាងណាឲ្យអឺរ៉ុបអាចម្ចាស់ការ ការពារទឹកដីអឺរ៉ុបដោយខ្លួនឯង ព្រោះថា អាមេរិកចង់បង្វែរកម្លាំង និងយុទ្ធសាស្រ្តយោធារបស់ខ្លួនទៅនៅអាស៊ី ដើម្បីទប់ទល់នឹងឥទ្ធិពលរបស់ចិនវិញម្តង។
កាលពីឆ្នាំមុន ក្រោមការដាក់សម្ពាធពីអាមេរិក សមាជិករបស់អូតង់បានសន្យាបង្កើនវិភាគទានរបស់ខ្លួន ចំនួន៥%នៃផលិតផលក្នុងស្រុកសរុប ពីពេលនេះ ដល់ឆ្នាំ ២០៣០ ទៅតាមការទាមទារចង់បានរបស់ប្រធានាធិបតីអាមេរិក។ ប៉ុន្តែ រដ្ឋមន្រ្តីការពារជាតិអាមេរិក នៅថ្ងៃព្រហស្បតិ៍បានបរិហារថា សមាជិកមួយចំនួនរបស់អូតង់ នៅតែមិនទាន់បំពេញករណីយកិច្ចរបស់ខ្លួន។ មិនត្រឹមតែប៉ុណ្ណោះ សមាជិកមួយចំនួន របស់អូតង់ក្នុងទឹកដីអឺរ៉ុប បានបដិសេធមិនព្រមឲ្យអាមេរិកអាចប្រើមូលដ្ឋានទ័ពរបស់អូតង់ក្នុងទឹកដីខ្លួន ដើម្បីធ្វើប្រតិបត្តិការយោធានៅអ៊ីរ៉ង់។
បើតាមលោកPete Hegseth ក្នុងរយៈពេល៦ខែខាងមុខនេះ មន្ទីរបញ្ចកោណនឹងពិនិត្យសើរើឡើង វិញពីវត្តមានទ័ពអាមេរិកក្នុងទឹកដីអឺរ៉ុប។ ពោល គឺអាមេរិកមិនអាចពង្រាយទ័ពនៅប្រទេសអឺរ៉ុបណាដែលបដិសេធមិនជួយសហការជាមួយអាមេរិកនៅគ្រាមានអាសន្ន ដូចជាសង្រ្គាមនៅអ៊ីរ៉ង់នោះទេ។
អាមេរិកទាមទារឲ្យសម្ព័ន្ធមិត្តនៅអឺរ៉ុបចូលរួមវិភាគទានឲ្យកាន់តែច្រើនទៅក្នុងកេសអូតង់ តាមរយៈការបង្កើនថវិកា ឲ្យបាន៥%។ អគ្គលេខាធិការអូតង់លោកMark Rutte យល់ថា ពាក្យគំរាមរបស់រដ្ឋមន្រ្តីការពារជាតិអាមេរិក ជារឿងត្រឹមត្រូវព្រោះអាចជាការក្រើនរំឭក ឲ្យសមាជិកអូតង់នៅទឹកដីអឺរ៉ុប បង្កើនល្បឿន ពង្រឹងវិស័យការពារជាតិរបស់ខ្លួន នៅចំពោះមុខនៃការគំរាមកំហែងរបស់រុស្ស៊ី។ ប៉ុន្តែ យ៉ាងណាក៏ដោយ លោកទទួលស្គាល់ថា ប្រទេសនៅអឺរ៉ុបរួមទាំងកាណាដា ដែលជាសមាជិករបស់អូតង់បានចំណាយថវិកាលើកងទ័ព កើនឡើង២០% ប្រមាណ ៩០ពាន់លានដុល្លារ បើប្រៀបធៀបនឹងឆ្នាំ២០២៤។
ដោយបង្វែរទិសទៅរកអាស៊ីដើម្បីទប់ទល់នឹងចិន រដ្ឋបាលអាមេរិកធ្លាប់បានជូនដំណឹងទៅសម្ព័ន្ធមិត្តរបស់ខ្លួននៅអឺរ៉ុបពីការកាត់បន្ថយគ្រឿងសព្វាវុធរបស់អាមេរិក នៅទូទាំងពិភពលោក ដើម្បីប្រតិបត្តិការយោធារបស់អូតង់។ ថ្មីៗនេះ កាសែតអាមេរិកនិងអាល្លឺម៉ង់បានចុះផ្សាយថា អាមេរិកនឹងកាត់បន្ថយចំនួនយន្តហោះចម្បាំង យន្តហោះយកការណ៍សម្ងាត់ ប្រមាណ ១ភាគ៣នៃយន្តហោះអាមេរិកសរុប១៥០គ្រឿង។ លើសពីនោះ អាមេរិកនឹងដកនាវាមុជទឹក និងនាវាផ្ទុកយន្តហោះចម្បាំង២គ្រឿង។ ចំពោះរដ្ឋមន្រ្តីការពារជាតិអាល្លឺម៉ង់ អឺរ៉ុបកំពុងស្វាហាប់ជំរុញផលិតគ្រឿងសព្វាវុធដោយខ្លួនឯង ប៉ុន្តែអឺរ៉ុបនៅត្រូវការពេលវេលាបន្ថែមទៀត។ ការដកជំនួយយោធារបស់អាមេរិកភ្លាមៗ ដោយប្រថុចញ៉ុចនឹងបង្កគ្រោះថ្នាក់ធំចំពោះសន្តិសុខអឺរ៉ុប។ អគ្គលេខាធិការ អូតង់វិញបាននិយាយសម្រាលក្តីបារម្ភរបស់សមាជិកអឺរ៉ុបដោយថា ការកាត់បន្ថយកម្លាំងទ័ព និងគ្រឿងសព្វាវុធអាមេរិក ពីទឹកដីអឺរ៉ុប មិនមែនមានន័យថា អាមេរិកលែងមកជួយអឺរ៉ុបនោះទេ។ អាមេរិក និងសម្ព័ន្ធមិត្តទាំងអស់នឹងមករួមគ្នា ជាអតិបរមាដើម្បីធ្វើយ៉ាងណាជួយឲ្យអឺរ៉ុបមានសមត្ថភាពប្រយុទ្ធតទល់នឹងសត្រូវឈ្លានពាន៕
ប្រភព៖ RFI | ដោយ៖ ឈាង បុប្ផា
