“នាវាមុជទឹកនុយក្លេអ៊ែរ មានបំពាក់ជើងបង្ហោះមីស៊ីលដែលអាចពាំក្បាលគ្រាប់នុយក្លេអ៊ែរ បានបាញ់សាកល្បង ប្រកបដោយជោគជ័យ នៅថ្ងៃចន្ទទី៦កក្កដា វេលាម៉ោង ១២និង០១នាទី។ គឺជាការបាញ់មីស៊ីលយុទ្ធសាស្ត្រ មានពាំក្បាលគ្រាប់បញ្ឆោត (មិនមែនក្បាលគ្រាប់នុយក្លេអ៊ែរពិត) សំដៅទៅផ្ទៃទឹកអន្តរជាតិ ក្នុងដែនមហាសមុទ្ទប៉ាស៊ីហ្វិក។ នេះបើតាមសេចក្តីថ្លែងការណ៍របស់កងទ័ពជើងទឹកចិន ដោយបន្ថែមថា គ្រាប់មីស៊ីលបានធ្លាក់ចំគោលដៅដែលបានកំណត់ទុក តែមិនបញ្ជាក់អំពីទីតាំងពិតប្រាកដទេ។
សេចក្តីថ្លែងការណ៍ដដែលបានអះអាងថា ការបាញ់សាកល្បងនេះប្រព្រឹត្តទៅក្នុងក្របខ័ណ្ឌនៃលំហាត់សមយោធា ប្រចាំឆ្នាំ តាមទម្លាប់របស់ចិន។ ប៉ុន្តែថ្ងៃចន្ទទី៦កក្កដា ក៏ជាថ្ងៃចាប់ផ្តើមបើកសមយុទ្ធប្រចាំឆ្នាំរវាងចិននិងរុស្ស៊ី នៅកំពង់ផែយោធាQingdao តាមបណ្តោយឆ្នេរខាងកើតរបស់ប្រទេសដែរ។ មិនដឹងថាតើហេតុការណ៍ទាំងពីរមានពាក់ព័ន្ធនឹងគ្នាដែរឬអត់ទេ។
នេះជាការសាកល្បងមីស៊ីលបង្ហាញសមត្ថភាពយោធាដ៏កម្ររបស់ចិន នៅក្នុងតំបន់យុទ្ធសាស្ត្រប៉ាស៊ីហ្វិកខាងត្បូង ដែលធ្លាប់ជាដែនអំណាចរបស់សហរដ្ឋអាមេរិក និងសម្ព័ន្ធមិត្ត ដូចជាអូស្ត្រាលី ឬនូវែលហ្សេឡង់។ តាំងពីប៉ុន្មានទសវត្សរ៍ចុងក្រោយមកនេះ ចិនបានអភិវឌ្ឍន៍សមត្ថភាពយោធា ទន្ទឹមនឹងការរីកចម្រើនផ្នែកសេដ្ឋកិច្ចនិងការទូត។ បើតាមវិទ្យាស្ថានស្រាវជ្រាវអន្តរជាតិដើម្បីសន្តិភាព ហៅកាត់ថាSipri ចិនមានអាវុធនុយក្លេអ៊ែរ៦០០គ្រាប់ នៅឆ្នាំ២០២៥ ពោលគឺ១០០គ្រាប់លើសឆ្នាំ២០២៤ តែមិនអាចប្រៀបនឹងអាមេរិកដែលមានដល់ទៅ៣៧០០គ្រាប់ទេ។ ចិនបានសាកល្បងមីស៊ីលអន្តរទ្វីប នៅមហាសមុទ្ទប៉ាស៊ីហ្វិក ជាលើកទីមួយ នៅក្នុងឆ្នាំ២០២៤ ដែលកាលណោះមីស៊ីលពាំគ្រាប់បញ្ឆេត និងគ្មានផ្ទុកនុយក្លេអ៊ែរ ដូចគ្នា។
ថ្វីបើចិនបានជូនដំណឹងជាមុន អំពីការបាញ់សាកល្បងមីស៊ីលនេះ ស្របតាមច្បាប់និងក្រមសីលធម៌អន្តជាតិ ក៏ដោយ ក៏បណ្តាប្រទេសជិតខាង បានបញ្ចេញប្រតិកម្មប្រឆាំងយ៉ាងខ្លាំង។ ជប៉ុនទាមទារឱ្យចិនពិចារណាឡើងវិញ កុំសាកល្បងមីស៊ីលបាលីស្ទិក ដែលជាតំណាងនៃការគំរាមកំហែងសន្តិសុខជប៉ុន។ នូវែលហ្សេឡង់បង្ហាញក្តីព្រួយបារម្ភខ្លាំង ចំពោះការបាញ់សាកល្បងមីស៊ីលអន្តរទ្វីប រយៈឆ្ងាយ ដែលមានសមត្ថភាពនុយក្លេអ៊ែរ និងចាត់ទុកទង្វើនេះថាមិនស៊ីចង្វាក់នឹងស្ថិរភាពប៉ាស៊ីហ្វិកទេ។ ចំណែកអូស្ត្រាលី បានបញ្ជាក់ដោយចំៗទៅចិនថា អូស្ត្រាលីចាត់ទុកការសាកល្បងមីស៊ីលអន្តរទ្វីបក្នុងប៉ាស៊ីហ្វិក ជាការបង្កអស្ថិរភាពក្នុងតំបន់៕
ប្រភព៖ RFI | ដោយ៖ អៀង សុខម៉ិញ
