នៅទីក្រុងប៊ែរឡាំង ថ្ងៃពុធទី២៤មិថុនា ប្រមុខដឹកនាំក្រុមប្រទេសE5 បារាំង អាល្លឺម៉ង់ អ៊ីតាលី អង់គ្លេស និងប៉ូឡូញ បានជួបប្រជុំគ្នា ដើម្បីរឹតបន្ថែមនូវចំណងសហការ ជាពិសេសក្នុងវិស័យយុទ្ធសាស្ត្រសន្តិសុខ។ កិច្ចប្រជុំនេះ ក៏ជាឱកាសដើម្បីពិភាក្សាយោបល់ តៀមទៅចូលរួមជំនួបកំពូលអង្គការសម្ព័ន្ធភាពអាត្លង់ទិកខាងជើងហៅកាត់ថា OTAN/NATO នៅទីក្រុងអង់ការ៉ា ដើមខែកក្កដា។
ថ្លែងទៅកាន់ថ្នាក់ដឹកនាំអឺរ៉ុបទាំង៤នាក់ លោកអធិការបតីអាល្លឺម៉ង់ ហ្វ្រេដ្រិឆ មែរស៍ បានលើកឡើងថា សាធារណរដ្ឋសហព័ន្ធអាល្លឺម៉ង់ សូមស្នើថា ក្នុងនាមយើងជាសម្ព័ន្ធមិត្តអឺរ៉ុបក្នុងអូតង់ គឺយើងត្រូវតែជួយអ៊ុយក្រែន តាមរយៈការសន្យាផ្តល់កញ្ចប់ហិរញ្ញវត្ថុឲ្យបានច្រើនបំផុត។ លោកប្រមុខរដ្ឋាភិបាលអាល្លឺម៉ង់បន្តថា សារដ៏សំខាន់មួយដែលត្រូវផ្ញើទៅកាន់រុស្ស៊ីគឺ “អ៊ុយក្រែននៅតែខ្លាំងរឹងមាំ ហើយជំនួយគាំទ្ររបស់អឺរ៉ុបវិញ ក៏មិនចុះថយដែរ”។
នៅក្នុងពេលពេលប្រជុំ ទាំងលោកម៉ាក្រុង ទាំងលោក ហ្វ្រេដ្រិឆ មែរស៍ សុទ្ធតែបានបង្ហាញការត្រេកអរ ចំពោះលទ្ធផលនៃជំនួបកំពូលG7 កាលពីសប្តាហ៍កន្លងទៅ ដែលគេឃើញសហរដ្ឋអាមេរិក បានត្រឡប់មកចូលរួមសហការឡើងវិញ។ វាគឺជាលើកទី១ គិតចាប់ពីលោកដូណាល់ ត្រាំ បានចូលកាន់អំណាច ក្រុមប្រទេស G7 បានចុះហត្ថលេខារួមគ្នាលើលិខិតប្រកាសតែមួយ សន្យាទទួលស្គាល់អធិបតេយ្យភាពនិងបូរណៈភាពទឹកដីរបស់អ៊ុយក្រែន។ ក្នុងន័យនេះ សង្គ្រាមឈ្លានពានរបស់រុស្ស៊ី គឺជាសង្គ្រាមខុសច្បាប់ ហើយកងទ័ពរុស្ស៊ីត្រូវតែដកថយចេញពីទឹកដីអ៊ុយក្រែន។
គួររំលឹកថា អត្តចរិកប្រែប្រួលម្តងក្តៅម្តងត្រជាក់របស់លោកដូណាល់ ត្រាំ បានធ្វើឲ្យប្រទេសសម្ព័ន្ធមិត្តអឺរ៉ុបពិបាកធ្វើការជាមួយណាស់ កន្លងមក។ ប្រឈមនឹងការបាត់បង់ទំនុកចិត្តជាមួយសហរដ្ឋអាមេរិកនេះហើយ ទើបក្រុមប្រទេសអឺរ៉ុបទាំង៥បានចាប់ផ្តើមរៀបចំគ្រោងឆ្អឹងយុទ្ធសាស្ត្រ ដើម្បីពង្រឹងសមត្ថភាពការពារខ្លួនដោយខ្លួនឯង តាមរយៈផលិតសព្វាវុធក្នុងស្រុក ឈប់រំពឹងលើសព្វាវុធអាមេរិក។ តែការពង្រឹងវិស័យយោធារបស់អាល្លឺម៉ង់ បានធ្វើឲ្យមានការព្រួយបារម្ភមួយចំនួនដែរ ដោយហេតុតែបទពិសោធន៍ប្រវត្តិសាស្ត្រកាលពីសម័យសង្គ្រាមលោកលើកទី២។
ទោះជាយ៉ាងនេះក្តី លោកអធិកាបតីអាល្លឺម៉ង់ បានថ្លែងធានាអះអាងថា អាល្លឺម៉ង់ចង់ឲ្យមានការសហការកាន់តែខ្លាំង ទាំងក្នុងក្របខណ្ឌអន្តរអាត្លង់ទិក និងក្នុងអឺរ៉ុប។ លោកធានាថា ប្រទេសជិតខាងអាល្លឺម៉ង់ គ្មានអ្វីត្រូវបារម្ភទេ តែផ្ទុយទៅវិញគឺត្រូវមានអារម្មណ៍ថាមានសុវត្ថិភាព ព្រោះអាល្លឺម៉ង់បានប្តេជ្ញារៀបចំបង្កើតឧស្សាហកម្មសព្វាវុធ និងដាក់ពង្រាយសមត្ថភាពកងកម្លាំងការពារជាតិ នៅក្នុងអឺរ៉ុបតែម្តង ព្រោះវាគឺជាផលប្រយោជន៍រួមទាំងអស់គ្នា៕
ប្រភព៖ RFI | ដោយ៖ ម៉ម ពិសី
